《冬末北歐遊：侵素》
請小心控制流量（手機上網嗰啲，唔係月事嗰啲呀）
2019年3月冬末，去咗歐洲四個地方：
Stockholm/斯德哥爾摩（瑞典） Tromso/侵素（正式叫 Tromsø，位於挪威。「侵素」係我改嘅，Tromso個正式譯名「特羅姆瑟」不知所謂） Antwerp/安特衛普（比利時） Amsterdam/阿姆斯特丹（荷蘭）。
今次要介紹嘅係挪威嘅極光聖地，侵素市 (City of Tromso)。
《史兄小知識》
得，你唔知侵素喺邊。事實上，我去完都唔知。譯名「特羅姆瑟」難讀到嘔，又毫無靈性同意義。
如下圖所示，侵素自治市（紅圈）比起北歐嘅斯德哥爾摩、奧斯陸同赫爾辛基（正方形）北幾百公里。由斯德哥爾摩搭飛機去，大概要兩個鐘：
侵素自治市 (Tromso；下圖紅色不規則圖案內)由多個島嶼組成，面積2500平方公里，大概兩個香港；但人口只有70000，係香港1%：
侵素市 (City of Tromso)係市中心，面積21平方公里，細過70平方公里嘅沙田。遊客活動嘅地方，仲要集中於島仔東南方（下圖右紅色），應該等同將新城市廣場幾層平放咁上下大細。
以下嘅解說，侵素即指侵素市，不用分那麽細。
【實用資訊】
以下資訊建基於2019年3月冬末去侵素時所得嘅認知。侵素屬於極北之地，每日嘅天氣狀況變化極大、冬天同夏天嘅情況亦完全唔同。另外，為方便計算，挪威克朗兌港幣當係1比1，要準確嘅請去網站計算。
最重要1：99.99%嘅人去侵素係為睇北極光 (Nordic Lights/Aurora)。無乜其他事唔好去侵素市，歐洲大把更靚更好嘅城市。
歐洲幾個極光聖地－冰島、挪威、芬蘭，冬天頭（12月）同尾（3月頭）最容易見到極光，有人會去各大首都（斯德哥爾摩、奧斯陸同赫爾辛基）睇，但個人認為首都同近郊光害太勁，加上並非處於極北，無喺侵素咁容易見到。
最重要2：侵素物價極高。你想像唔到咁撚貴，貴到痴撚線，物價比起已經離地嘅斯德哥爾摩再離地多五光年
- 一支500ml可樂，超市買$22（斯市超市$10、香港百佳網店$8）
- 一程普通巴士正價$50，手機買飛就$33（我唔好意思同人講$33一程巴士已經平咗）
- 機場8–10分鐘車程去酒店要$200-$250，仲有海量不可思議嘅收費方式同附加費
- 食飯同斯市差唔多，出街食每人起碼$300-$400（未飲酒）
- 最平反而係 Burger King，一個餐$120，同歐洲其他地方差唔多。同主編去過幾次歐洲，幾次哀求佢畀我食 Burger King都不果，今次嚟到畀得起錢都冇乜嘢好食嘅侵素，終於畀我食 Burger King了……喺侵素最好食嗰餐就係 Burger King。無錯，為保命我再次食牛了。
- 相比之下，侵素嘅當地旅行團（極光、撚鹿、出海釣魚）好平（每人每團約$800-$1,000）
- 即使咁多地而人又咁少，侵素樓價仍算高。Tromso City嘅樓價平均約 港幣$5,000-$8,000／呎，喺歐洲嚟講算超級貴，就算以香港銀河第一嘅樓價嚟比較都唔可以話好平好平。朋友住喺比利時 Antwerp，幾百萬港幣買到成個森林加城堡咧。
講起搭的士，往侵素嗰程飛機，旁邊坐咗個 University of Stockholm嘅教授，傾咗個幾鐘：佢1984年結婚渡蜜月，坐鐵路經蘇聯同北京由海路去過香港（！），住重慶大廈（！！），返瑞典後學咗半年中文。佢仲推薦咗一間幾好食嘅餐廳 (Fiskekcompaniet)；又問我哋識唔識搭車去間酒店，我哋答「的士」，跟住教授話：
「屌，咁又啱呀！兩個人搭的士同搭巴士，差唔多錢嫁渣！」
返嚟香港我上網check，airport express bus每人每程要$100，兩個人搭巴士同搭的士差唔多……尤其是你面對橫風橫雪：
最重要3：冬天去侵素睇極光，一定要做足禦寒準備。
－有足夠禦寒衣物。零下十幾度，凍到仆街；睇極光嘅地方，大部份無遮無掩，可以大風大雪打死你。雪褸、雪褲、雪鞋、HEATTECH內衣同內褲，缺一不可。褸同褲我問人借；鞋喺似大陸牌字嘅法國品牌 Decathlon買（麻煩Decathlon檢討品牌形象），旺角同老銅有分店；HEATTECH就 UNIQLO；暖手熱包亦要預備大量。
唔好心存僥倖，唔想買就去借。
我睇極光嗰幾晚，一直著住六件衫（底衫、HEATTECH、兩件面衫、羽絨、有帽雪樓）、四條褲（底褲、HEATTEACH、面衭、雪衭）、兩對襪。個身同對腳好暖，但腳掌依然有寒意。有雪鞋已經好啲，唔敢想像著 Nike會點樣凍死同冼死。
－去之前約一個星期，請開始全身搽潤膚液，保持皮膚濕潤，否則極度乾燥之下，全身爆拆，由頭痕到落腳，每晚都瞓唔著。點解？由第三晚開始我痕到瞓唔著，全身痕，由腳痕到去腰、再痕到去身同背脊。去到 Amsterdam仲痕緊呀！
－預備杯面。睇完極光返酒店，早就凌晨一點、夜則四點，呢個時候你肯定集飢寒交迫於一身，情緒又極度興奮（睇到極光）／失望（睇唔到）。放心，侵素絕對唔會有便利店應酬你個打鼓嘅肚，只能夠靠酒店嘅 room service (if any)或者買定糧食應急。
信我，出發前放幾個合味道杯面落個喼。
出發前，問過曾睇極光嘅女友細佬使唔使帶杯面，佢話當年睇完極光食嗰個杯面，一世難忘；我半信半疑咁帶咗幾個，畢竟六個杯面佔咗個喼一半位。
直到我喺侵素第一晚，凌晨四點喺酒店食嗰個合味道雞肉杯面……
我感動到幾乎想喊出嚟。
－最重要4：想影極光相，一定要帶單反同腳架。
如果你想用手拎住 iPhone/SamSung 影極光，麻煩你收埋個念頭。一來影唔到、二來影唔到、三來唔用腳架係乜鳩都影唔到。想影相，一係搵個會帶埋相機幫你影嘅導遊，一係帶腳架用單反影。
以下嘅嘢大部份同斯德哥爾摩篇相差無幾：
－去侵素，拎特區護照使唔使簽證？唔使，用特區護照可直接入境。落機後無檢查過任何文件，直接由機場行出去。
－侵素多唔多大陸人？非常少。睇四晚極光只遇過兩組六個大陸人(out of 200人)。撚鹿、釣魚、睇雪山都冇大陸人。
信我，呢啲純觀光嘅地方，你要趁啲生蕃未識欣賞之前，去晒佢，去個夠。
只要你嗰團50人，有10個以上大陸人，佢哋嘅嘈、煩、無禮貌、唔守秩序，你一定敗興而回。連你附近有第二啲無關嘅大陸人，都足夠掃你慶。
－侵素除咗睇極光仲有乜嘢做：侵素本身只係一個小城，無嘢買、無名店、無地鐵。你上網睇人撚鹿、睇雪山、出海釣魚、撚狗、去北極，搭船去第二個城市（如果咁都算喺侵素做嘅嘢），全部喺以侵素為出發點，搭車去近郊做。
侵素市嘅出名景點，只得 Arctic Cathedral－嚴格嚟講 Arctic Cathedral並唔係喺侵素市……Arctic Cathedral 建築獨特，打咭一流，入場費每人 $50。喺無乜選擇之下，係要去嘅。Arctic Cathedral、附近嘅纜車同 Tromso Bridge已經打入 TripAdvisor裏面 Tromso 十大景點嘅2–4位……我話侵素本身無景點，無呃你嫁。
推薦度︰★★★★★（最高5 ★）。市內唯一景點。 擠迫度︰★（最少人係5 ★）。多遊客到喊，包括大量大聲講嘢嘅廢老。 接近其他景點度：★★（附近多景點係5 ★）。步行廿分鐘可往另一個景點，登山纜車，惟極度不推薦。你想感受下畀人呃上山嘅感覺，就去搭下呢個登山纜車。 開放時間：一般1400–1800。實際上極為複雜，要讀完數學 Ph.D先計到，或者參考官方網頁。 費用：$50 注意：去教堂請注意公德，切勿大呼小叫 有冇免費廁所：有 點去：請善用google map
－無現金城市：同斯德哥爾摩一樣，侵素係無現金城市，一咭傍身，侵素通行。挪威錢係點樣，我去完旅行都唔知。
出發前要打畀信用咭銀行開啓海外簽帳，一陣咭公司 detect到你喺距離香港老練咁遠嘅地方簽咭以為係詐騙再停鳩埋你咭就麻煩。
－英文OK？絕對OK。
－使唔使買周遊咭之類嘅嘢？我唔知有冇呢啲嘢。但侵素無乜名勝，有都唔使買。
【侵素活動講解】
簡單嚟講，去侵素主要睇極光，極光12月／3月頭先有；即係話其餘時間，無乜事就唔好去侵素。侵素市無景點，並不等同無活動。今次嘅介紹以活動為主。
(1) 追極光 (Nordic Lights/ Aurora)
極光點嚟？同磁場活動有關。每次提起磁場活動，我淨係諗起經典港漫《海虎》嗰個50萬匹反地心吸力境界、100萬匹自毀境界（但全套漫畫唯一一個出過100萬匹嘅白首男又無死到……）。極光點形成我唔知亦唔理，但以下有關極光嘅事好重要：
1. 真實嘅極光，係白色嘅。你肉眼見到嘅極光，絕大部份時間都係白色。極光係一團白色、會發光嘅薄霧，喺天上飄飄下。
呢種白色係呈好淡好淡嘅綠色，用肉眼唔會睇到綠色；只有用相機喺曝光足夠下，影出嚟先會呈深綠色。所以，
綠色嘅極光只係會相片出現。 綠色嘅極光只係會相片出現。 綠色嘅極光只係會相片出現。
好好管理預期，唔好因為肉眼見嘅極光係白色而失望。當你用眼見到天上有過千粒星星，嗰種畫面已經夠夢幻同感動。
2. 睇極光需要兩個重要嘅條件同時出現。第一：天空要夠清、無雲；第二：地球有磁場活動，產生極光畀你睇。
呢兩個條件難唔難同時出現呢？睇彩數。睇極光嘅日子係冬天，喺侵素大部份時間橫風橫雪，要天空夠清，一係夠好運、一係去遠啲。即使個天夠清，嗰晚地球先生唔高興，磁場活動唔活躍，即使天夠清你都唔會望到任何極光。
最最最仆街係乜？呢兩樣嘢都唔係人類可以控制。
所以，睇極光同你做庄賭大細一樣，只要你賭嘅局數夠多、賭嘅人數同注碼夠平均，in the long run你一定會贏。問題係in the short run你已經無時間繼續做庄。
建議：你去睇極光，一定要預備定幾晚去追光。千祈唔好諗住去一兩晚就夠。你睇到係好彩、睇唔到係正常。
我又點？我報咗一個「侵素七晚任屌任砌任睇極光團」，連續七晚都可以參加大團去睇。
幸運地，主編同我第一二晚已經睇到不錯嘅極光；到第三晚停咗雪，天朗氣清、萬里無雲，極光勁到無倫－極光超多、光度超強、仲要不斷咁郁同擺動，有幾下係用肉眼都幾乎睇到綠色咁滯。
第四五晚我哋冇去睇。臨走第六晚，天氣超級好，萬里無雲，主編同我諗住臨走再追多一晚，點知嗰晚嘅極光只係弱弱咁出現咗五分鐘。
你要記住，每晚下午六點開始搭車，搭兩三個鐘去郊區，然後喺零下十幾度嘅戶外，等天氣好、等極光出現，一等可能幾個鐘，再搭返兩個鐘返酒店，上到床已經係凌晨－我第一晚追完光瞓上床係凌晨四點。付出時間同食西北風就梗，付出咗仍無人擔保有嘢出現。如果你只追一日，咁啱撞正好似我哋嘅第六晚咁，你一定屌爆個天。
你又有幾多次睇極光嘅機會？所以我建議你追光，最少要去三至五晚。唯一增加賭局嘅數目，你做庄贏嘅機會先會增加。
咁凍、又要睇彩數，值唔值得去？
值。如果你見到極光，係一定值。睇極光最怕係乜呀？屌你，咪睇唔到極光囉！你問下身邊睇唔到嗰啲朋友，有邊個唔屌鬼？
第三晚嘅影片（由導遊拍攝）：
3. 我報邊個團？ TripAdvisor有好多介紹，我係去呢個「侵素七晚任屌任砌任睇極光團」，7日$2,500，包來回大巴、導遊講解、熱飲、拍照（導遊影相非常專業）。當你一晚已經要$1,000，7晚 $2,500簡直係你阿媽大減價益你阿爸。
－佢哋嘅導遊水準非常之高，講解同預期管理做得一流； －揀睇極光嘅地方真係睇到極光。佢哋自稱有90%機會見到極光，而我去嗰四晚全部見到（第六晚弱雞同短暫但仍叫見到）； －導遊會幫你影人照／極光照，等你專心睇星睇光，啲相用最高清嘅格式影，免費畀返晒你。
導遊以後生仔女為主，聽咗幾晚佢哋喺巴士嘅解釋同安排，感受到佢對追極光係有種熱誠，堅係想你嚟侵素睇到極光，仲要睇得開心同興奮；唔撚係當你水魚，不斷叫你買貔貅。導遊畀足夠時間畀你影個夠，幾日以嚟只有啲人怕凍、影到悶、無晒極光而上返車，無人畀人趕鴨仔。天氣好、見到極光當然100分重要；好嘅導遊，令整個行程錦上添花。
《乜嘢團友最煩？》
極光團友聯合國，少大陸人（四晚遇到兩組共六人）、少香港人（四晚只遇到一組），西班牙同意大利人唔少。大家都係求開心，並無任何不高興嘅事發生。
憑於多國參加不同 local tour嘅感覺，聯合國團友中：－西班牙同意大利呢兩種人煩嘅程度比得上大陸人，尤其西班牙女人，西班牙話嗰種機關槍發音，再加中年女人大大聲，煩到你自殺 －英國同日本團友較友善同有禮 －印度人自私缺德度排名第一（大陸人都比唔上），不過識排隊 －東歐人較沉默但友善，英文好多雜音（屌你自己咪又係咁） －嘈，就以大陸人遙遙領先、香港人排第二
___________________
(2) 上雪山
去到呢啲同香港與別不同嘅地方，一定要去睇風景。屌你，去到侵素掛住行商場同食中餐，你不如留喺沙田第一城打36圈麻雀。
天公做美，上雪山嗰日朝早停咗雪。導遊載我哋去 Tromso （唔係 Tromso City）以西嘅山群去，沿途盡見雪山藍天，混為一片，靚到痴線。
侵素個landscape好靚。Kvaloya島（Ersfjordbotn, Kalfjord, Grotfjord Bygdelag……地方名嚟，唔係typo）上一座又一座嘅雪山，收入眼簾嘅盡是一片白－雪山、樹上嘅積雪，望住地上厚厚嘅白雪，尤如張床褥，好想瞓落去，一睡不起。
見到啲相，先知我中文真係好差，完全唔識形容現場嘅雪山有幾壯觀（屌你你終於發現自己啲中文好差）。
我成個行程，講咗100句 Wao。事實上，真係Wao。睇相係不及現場壯觀嘅億分之一。
推薦度︰★★★★★ 點搵返嚟：TripAdvisor有好多類似嘅團
___________________
(3) 撚鹿/撚狗
當初主編問我撚馴鹿（Reindeer；One Piece中 Chopper嘅動物原型）定係撚狗（西伯利亞狗、或稱雪橇），我揀咗去撚鹿。撇除撚鹿平幾舊水，更重要係我冇撚過馴鹿、香港亦冇乜鹿；而狗就喺香港大把有得你撚，去一轉港島狗公園西施北京哥基柴犬撚到你唔撚。
撚鹿活動包括餵鹿、坐鹿車、飲鹿肉湯。老實講，成件事好似你餵到啲鹿肥肥白白，就係為咗佢拖車同食佢啲肉，我左膠大愛上身唔安落咗幾秒……但天寒地凍我最後都有坐同飲。
只有雌性嘅馴鹿冬天先有會有角，而聖誕老人條粉腸架鹿車啲鹿全部都有角。有理由相信聖誕老人僱用馴鹿時係性別歧視，萬一畀啲平權納粹軍發現，肯定要求芬蘭道歉同聖誕老人寫悔過書。
呢度啲鹿仔好乖，唔似奈良嗰啲咁惡同咁撚串。自由時間頗長，餵到你唔餵為止。萬里無雲，望住雪山，靜靜咁摸住鹿仔，好寫意。
講返轉頭，其實個撚鹿活動係畀你認識北歐 Sami Culture－一種講 Sami Language、喺北歐地帶以放牧為生嘅土著／原居民。撚完鹿之後，所有人喺個營度聽一啲 Sami人講解佢哋嘅生活、文化、服飾，仲有早年朋受到嘅打壓－挪威政府好一段時間禁止講 Sami Language、唔畀人自稱 Sami People、唔畀 Sami People擁有土地資產（人哋放牧唔畀擁有地皮，呢招夠毒），全方位打壓同溝淡 Sami People……一聽呢啲事，似曾相識，喺我出生嘅地方，何嘗又唔係咁。點解又要令我諗起故國不堪回首嘅往事……
至於撚狗好玩啲、定撚鹿好玩啲，我唔知。
推薦度︰★★★★ 點搵返嚟：TripAdvisor有好多類似嘅團
___________________
(4) 坐船
另一日坐咗架魚船往侵素市以北，沿途欣賞侵素城市及山群風光。船長無乜講解（其實亦唔使乜嘢講解），午餐以蔬菜湯－有冇北極鮮魚加餸就視乎你啲團友生唔生性，釣到乜嘢魚。當日有個團友好勁，無魚餌下齋用魚竿釣到兩條大魚……
我唔識游水，唔太 enjoy遊船河。不過沿途風景好美、好寧靜。
西方人食魚，淨係食魚柳，一割咗魚柳出嚟，頭、尾同內臟通通唔要……畀我阿媽知道實鬧死。
推薦度︰★★（個人口味，坐船成日怕相機同人跌落水，唔夠上山寫意） 點搵返嚟：TripAdvisor有好多類似嘅團
侵素好食嘅餐廳
侵素食飯係比較麻煩嘅事，喺度推介幾間幾好食嘅餐廳：
Art Cafe : 馴鹿肉幾好食－我根本係去大屠殺啲鹿仔（Richard Withs plass 2, 9008 Tromsø, Norway；地圖）
Fiskekompaniet：飛機上巧遇嘅教授推介，海鮮餐廳，午餐唔錯（Killengreens gate, 9008 Tromsø, Norway；地圖）
Da Pinocchio：好食嘅意大利粉（Grønnegata 37, 9007 Tromsø, Norway；地圖）
Raketten Bar & Pølse：打咭用熱狗 aka overpriced hotdog（ Storgata 94B, 9008 Tromsø, Norway；地圖）
整體評價
我對侵素嘅評價非常高。要睇極光，值得去侵素一次。當你用肉眼見到極光跳嚟跳去，超級勁興奮。不過真係好凍，好乾燥，最好趁後生，好氣好力嗰陣去。
今次不斷參加一日遊行團，對侵素本身嘅認知有限，亦無乜同當地人交流。遇到僅有嘅導遊同當地人非常友善，成個旅程都冇遇到任何不愉快嘅事－除咗仆街的士佬屌鳩我哋（全世界嘅的士佬都改不了吃屎嘅狗）。
侵素係屬於嗰種「無乜嘢做你去幾日休息下好舒服」嗰隻城市，類似嘅地方仲有法國尼斯、東京箱根，仲有好耐好耐好耐以前嘅澳門。
每日起身，食個早餐，慢慢思考下去邊，諗唔到就喺市內岸邊慢行，欣賞下北歐嘅風景，食個long lunch，然後去追光；或者一早去個day trip，兩三點返市中心食個下午茶、飲下咖啡，早啲返酒店瞓，好寫意，毫不壓迫。如果去東京係景點接景點，追趕城市嘅速度；去北歐－斯德哥爾摩好、侵素好－喺享受寧靜同慢活。Art Cafe得六七張枱，我同主編坐低咗就無晒空位。店主喺門口楝個牌話 “We are full”，有客嚟都講話 “Sorry, 我哋無位。”；你食完任你坐喺度傾計，中意就點杯咖啡或甜品，人哋根本無嗰種 「你老味我一個鐘要做一轉客你食完好拿拿臨走」思考方式－當然去過咁多地方我懷疑其實只得香港先有呢種邏輯。
旅行係一輩子嘅事，唔同年紀唔單止會去唔同地方，即使唔同時期－春夏秋夏、自己經歷、身邊嘅伴－去同一個地方，遊覽嘅方法都可能截然不同。
作為一個遊客，我好享受北歐呢個地方同生活態度。屌你老母，淨係唔使喺香港人迫人，一日到黑膊頭撞膊頭，同埋對撚住啲大陸佬，淨係望住侵素嘅風景就已經夠。
（留意，呢篇唔係葉佩文，我無收任何人嘅錢或任何好處寫呢篇文）
Follow me on Medium，我嘅文字唔會令你失望（不過寫文嘅速度會）。
https://medium.com/@relgitsjgFacebook page：https://www.facebook.com/Relgitsjg至於旅途餘下嘅比利時同荷蘭，主要係探親，無乜時間去玩……遊記，未寫。