“Sunderland ’til I die” (Season 2) — 屢敗屢戰

喺盡最大嘅努力之下，上一篇 (STID Season 1) 我基本上就冇乜點劇透嘅。嚟緊呢篇，無可避免地我會同大家講，新特蘭護級失敗，喺 2018–19 球季降落第三級聯賽英甲。 (咁你唔好問我點解「甲組聯賽」喺英格蘭只係第三級啦，商業化包裝嘅嘢，我識條鐵。)

如果唔係，我都唔知從何說起。

STID Season 1 嘅結尾已經透露，班主 Ellis Short 將球會出售，由 Stewart Donald 為首嘅財團接手。第二季嘅故事，基本上就係圍繞 Stewart 如何致力將虧損經營多年嘅球會變返收支平衡，以及佢嘅好拍檔 Charlie Methven 點樣從市場行銷嘅角度，將新特蘭變得更加好賣 (marketable)。

第一集嘅兩位主角，行政總裁 Martin Bain 同教練 Chris Coleman 已經因為 Stewart 同 Charlie 入主而掛冠而去。新特蘭降落英甲嘅現實，亦令球會面臨更大嘅財政壓力。

喺上一集，有睇開波嘅朋友或者都仲會見到一啲熟悉嘅名字，例如 Darron Gibson 同 John O’Shea 披上紅白直間球衣出賽。但係喺第二集，陌生嘅面孔基本上主導咗一切。無他， Darron Gibson 醉駕被捕繼而被中止合約， John O’Shea 將佢最後一季職業生涯奉獻畀英冠球會雷丁，其他高薪球員例如 Jack Rodwell 等嘅合約都被買斷，剩低僅餘嘅 Aidan McGeady 同 Lee Catermole 等老將帶領一眾新兵爭取升班。

第二集嘅 STID 只得六集，或者係因為第一季要講嘅折墮或者前朝積落嘅陋習都已經講得夠多，而如何撥亂反正嘅數字遊戲，實在唔太適合放喺屏幕上畀觀眾慢慢睇。於是， STID 第二季有唔少篇幅都花咗喺一名新秀、司職前鋒嘅 Josh Maja 去留問題之上。

喺足球世界，球員係員工，亦係商品，更加係經理人 (Agent) 嘅生財工具。雖則 Josh Maja 嘅職業生涯喺新特蘭開展，但係嚴格嚟講佢唔算係「黑貓」嘅青訓產品，此前曾經為水晶宮及富咸等球會嘅青年軍效力。如是者， Josh Maja 並無 George Honeyman (第一季亮相、自十歲開始喺新特蘭踢波嘅青訓產品) 對球會嘅歸屬感同忠誠亦可以理解 (唔代表認同呀下) 。

STID 對於轉會市場嘅描述都相對地深入，近距離地拍下 Stewart Donald 如何同經理人及其他球會交涉嘅片段。當 Josh Maja 決定離隊他投， Stewart Donald 無可避免地要收購一名前鋒填補。由於收購目標 Will Grigg 所屬嘅球會韋根態度強硬，而 Stewart Donald 對於當季爭取升班資格嘅意願強烈到接近歇斯底理嘅地步，結果新特蘭用咗出售 Josh Maja 兩倍嘅價錢 (即係 300 萬英鎊) 去收購 Will Grigg 。

事後孔明表示，Stewart Donald 賭輸咗。 Will Grigg 加盟新特蘭至今 (講緊截至 2020 年 3 月) 上陣 49 次，只能攻入 8 球，效率同佢喺韋根上陣 150 次、攻入 65 球明顯地差一截。完。 (其實 Will Grigg 以前入球多產嘅球季都只限於喺英甲聯賽，一上到英冠佢就啞晒火， 喺英甲 111 場入 76 球同喺英冠 54 場入 11 球⋯⋯多少都說明咗佢咩級數)

STID 第二季其實都有一啲令人興奮、期待嘅場面。例如話，新特蘭喺 Checkertrade Trophy (即 EFL Trophy ，現時冠名贊助為 Leasing.com) ，一項只供英甲及英乙球會參賽嘅盃賽，一路殺入決賽，可以喺英國足球聖地溫布萊球場與樸茨茅夫決一高下，就令新特蘭嘅球迷興奮咗好一陣子。

又例如話，新特蘭喺 2018–19 球季最終以第五名完成聯賽，得以晉身附加賽，與排名第三至第六嘅球隊爭奪最後一個升班英冠嘅資格。新特蘭成功喺四強擊敗樸茨茅夫，可以再次造訪溫布萊，與第三名嘅查爾頓決一雌雄。作為 STID 觀眾，目睹成千上萬嘅新特蘭球迷期待愛隊高奏凱歌，信我，你唔會想事先知道比賽結果。

無論如何， STID 第三季並未開拍。或者同武漢肺炎有關係，又或者，製作團隊唔覺得有啲咩新嘢好講。都係嘅，由 Simon Grayson 到 Chris Coleman 到 Jack Ross ，新特蘭嘅教練換咗幾手，而球員班底經歷過一輪大清洗之後，薪酬成本或者減輕咗，但係要喺比較低組別嘅聯賽殺出一條血路，講到尾都係要有錢。

體育事業已經唔係 2000 年前咁，靠本地土炮班主出心出力就可以搞得起。隨住俄羅斯同中東油王嘅介入，以至中國土豪班主進駐，越來越多球會嘅擁有權落入外國人手上。時至今日，超過一半英超球會已經係由非英倫三島嘅人士持有。有錢唔係萬能，但係冇錢，就真係萬萬不能。

如果大家再去 Google 下 Stewart Donald ，或者都會發現佢已經有最新嘅部署。係現實，又或者係當初嘅鴻圖大志，經歷過時間洗禮之後，得出一個結論。球員又好，教練又好，甚至班主都好，喺廿一世紀都冇咩話永垂不朽。真正陪伴球隊走落去嘅，講到尾，或者都只係每個星期六都喺光明球場大叫 “Red and White Army” 同埋 “We’re by far the greatest team the world has ever seen” 嘅球迷。

I’m Sunderland till I die, I’m Sunderland till I die, I know I am, I’m sure I am, I’m Sunderland till I die