諗極都諗唔明香港地名系列（五）
鄉事會？
鄉事（委員）會喺我呢D移民後裔眼中（都話祖父母輩都係走難落嚟㗎囉），其實都只係英國政府同班鄉紳都想鞏固權力嘅工具。政府俾個名分班鄉紳，要班鄉紳效忠於政府，得到新界（同埋新九龍）嘅權力；而班鄉紳就順便得到政府嘅授權，喺佢哋個鄉度得到權力。雙贏㗎啵。
不過呢，我唔係讀社會科學嘅，我只係一個讀語言學嘅JJ嚟嘅啫，所以我都冇能力去研究鄉事委員會對社會嘅影響。我就不如去睇下呢個名喺香港D街道名入面點處理喇。
睇返政府地圖，街名有「鄉事會」呢三個字嘅街名總共有八條，分別喺大埔（兩條，大埔區）、沙田（沙田區）、西貢（西貢區）、青衣（葵青區）、馬灣（荃灣區）、梅窩（離島區）同埋屯門（屯門區）。以香港分區計，基本上除咗北區同元朗國之外，新界每區都有。
北區都叫理解到點解冇，話哂北區係八十年代先由大埔區分割出嚟，勉強計返入大埔都叫做有，但係元朗好似一直都係自成一角，冇條街係鄉事會係有D諗唔明嘅我。跟住不如睇下「鄉事會」嘅英文。
首先要記住，鄉事會嘅上頭鄉議局嘅英文，係用返香港拼音：Heung Yee Kuk。官方㗎，唔係講笑。
但係講到鄉事會呢個名喺街名呢一度，竟然係有兩種譯法：
- 跟官方，意譯：Rural Committee
- 音譯，香港政府拼音：Heung Sze Wui
然而，咁啱呢八條街，呢兩種英文譯法各佔一半。
睇我D相可以睇到，沙田同梅窩呢兩條係用Rural Committee呢個名嘅。咁我哋再睇埋政府地圖。
馬灣同西貢都係用Rural Committee呢個名做返條路名。
即係話，其他區（大埔、青衣、屯門）同鄉事會有關嘅街名，個英文係用音譯嘅Heung Sze Wui。
其實都諗唔明，點解同樣係鄉事會，點解會有兩種譯法，整嗰陣點解唔統一咗佢呢？
就係咁，跟住我哋可以睇到多一樣嘢，就係其實香港冇postcode嘅情況下撞街名嘅處理方法。
香港雖然細，但係因為街名中英文都係官方名，所以要撞嘅話都可以撞得好應嘅。而通常撞名嘅解決方法係市區嗰條唔會有改動（始終市區嗰條應該係改名先？），其他區嘅就喺條街名前面加返個地區名。例如：
- 油麻地有條「街市街」，所以荃灣同埋大澳嘅街市街就要加返地區名（i.e.「荃灣街市街」同埋「大澳街市街」）
- 灣仔有條「太和街」，所以大埔就算有太和市同太和邨都好，太和路都要加區名（即係「大埔太和路」）
- 馬頭圍有條「炮仗街」，元朗有條「炮仗坊」，所以元朗嗰條就要加地區名喇（即係「元朗炮仗坊」）
- 你唔係以為英文撞名唔使改吓話？愛民邨出面有條「忠孝街」，而梅窩有條「涌口街」，睇落明明爭好遠，但係涌口街正式嘅名叫「梅窩涌口街Mui Wo Chung Hau Street」。涌口嘅英文Chung Hau咁啱同忠孝街嘅Chung Hau撞咗，咁要加地區名嘅唯有加喺梅窩嗰度。
但係我唔明點解跑馬地同粉嶺都有條「聯興街」，牛頭角同粉嶺都有條「聯安街」。冇一條有加地區名。
所以都要諗埋，點解八條街，係大埔嗰兩條唔使加地區名。
我諗到出嚟嘅理由，我都唔肯定係咪嘅：講香港歷史嗰陣咪成日話大埔一直以嚟都係新界嘅行政中心嘅，咁既然佢係中心囉，咁重要，咁其他區咪要讓路俾佢囉。所以係其他區加地區名，大埔嗰兩條唔使加。
但係呢點都係唔係好肯定，因為點睇呢D路都唔係好舊，雖然好似都係喺D墟市附近。
所以都係重溫下我有D咩諗唔明先：
- 點解喺新界區嘅分區入面，係得元朗同埋北區係冇「鄉事會」有關嘅街嘅呢？
- 點解「鄉事會」喺街道名嘅英文會有兩種？點解唔一早統一咗佢？
- 點解八條入面，係得大埔嗰兩條唔使加地區名？
- 又有D街道名明明係重複咗，兩個地區嘅街道撞名，點解又唔喺其中一個，甚至全部嘅呢一類街道加返個地區名呢？
