《港產爛片終身成就奬頒奬典禮》
春天係各大電影頒奬典禮舉行之時，3月美國奧斯卡、嚟緊4月又有香港金像奬，我都唔執輸趁下墟，整返個《港產爛片終身成就奬頒奬典禮》。
呢個《港產爛片終身成就奬頒奬典禮》，係從2000年至今上演嘅爛片中，抽絲剝繭、千挑萬選、精挑細選，揀出最出色嘅男主角、女主角、電影公司、導演、編劇，頒以一個終身成就奬。得奬嘅電影從業員必須係香港人或香港公司，拍嘅戲可以係任何戲（淨係港產片就仆得街，每年得嗰三兩套。港產片就嚟同香港啲漁民、大押、粵劇咁只可以喺歷史博物館睇到）。
我會用以下三方面作評分同評論準則：
- 片夠爛：越爛越好，一套超級爛，抵得上十套普通爛。
- 片夠多：仲要拍得多越多爛片越好－無錯，呢個頒奬會偏心一啲產量多嘅電影從業員。唔公平？你都戇撚鳩，奧斯卡咪又係bias towards弱勢社群（例如同性戀黑人猶太窮人）。作為一種競爭，頒奬典禮梗係建基於偏見同歧視，否則頒奬變派米，人人有份永不落空。你估我係民建聯咩？
- 片夠水準參差：最好係一套爛、一套唔爛，尤如一啖砂糖一啖屎。好戲同爛片梅花間竹咁嚟，觀眾嘅落差先會大－記住爛係一個期望同現實嘅差距。起落越大，睇呢個從業員拍嘅戲有好大嘅風險，可能好睇、可能係垃圾，令人無從掌握。拍親都爛，好似景甜／林志玲／文詠珊咁，邊好玩呀？
───
＜爛片之帝王：劉德華＞
作為一個娛樂界從業員，劉華嘅專業態度，簡直係人類嘅模範生嚟。
不過，劉華近年拍嘅戲，真係不敢恭維。以下係佢喺2007年拍畢兩套上乘之作《門徒》同《投名狀》後，十年間有份主演或做大配角嘅17套電影：
三國之見龍缷甲 游龍戲鳳（爛） 未來警察（爛） 狄人傑之通天帝國 新少林寺 我知女人心（爛） 桃姐 天機：富春山居圖（爛到核爆） 盲探 風暴（爛） 失孤 解救吾先生 偷天特務（爛） 拆彈專家（爛到爆） 俠盜聯盟（爛到爆） 追龍 熱血合唱團
除咗《三國之見龍缷甲》、《失孤》、《解救吾先生》、《追龍》、《熱血合唱團》，我睇晒餘下12套。呢12套，有8套係爛片。幾多演員，成個演藝生涯都主演唔到8套戲？劉華一個人拍咗8套爛戲！仲要拍爛片嘅機率有成66%、每3套有2套係爛片，幾乎中硬！
劉華拍爛片數目唔單止多，有幾套爛片肯定係終極大佬，尤如電子遊戲Final Fantasy中嘅Omega、寵物小精靈中嘅傳說級精靈「超夢夢」：
爛片排頭嘅，乃人類史上最爛嘅戲之一《天機：富春山居圖》。《天機》之爛，非筆墨可以形容，睇完套戲震驚幾日，講唔出半句話。佢爛到一個程度變成經典，好多人睇係因為想知有幾爛－小弟當年一樣係慕名而睇咗。呢邊廂《天機》故事（如果嗰個算故事）跳躍，情節離奇有歪常理，支離破碎；嗰邊廂劉華依然擺出一副煞有介事、事事認真嘅演技，唔知以為佢喺度玩緊黑色幽默（點知佢真係好認真咁演緊）。
排名第二嘅爛片係《未來警察》。呢套戲明抄Ironman，偏偏配以九流特技，戇鳩劇情，連張海報都爛到出血，廿年前葉倩文套《鐵甲無敵瑪莉亞》，好睇一億倍。喺正常情況下，任何男主角主演《未來警察》，定必成為佢生涯嘅爛片代表作。偏偏《天機》珠玉在前，《未來警察》喺劉華2000年後嘅電影生涯中只能夠拎第二爛！非常可惜呀！《天機》同《未來警察》，一時瑜亮，又好似費達拿成為網球界嘅Greatest Of All Time (GOAT)，拿度再努力都只能活喺佢陰影下，真叫人抱頭嘆息。
第三同第四分別係《風暴》同《拆彈專家》。《拆彈專家》有一幕，黑仔畀個賊走甩咗，對住鏡頭大叫「仆街」，我喺戲院叫忍唔住跟佢大叫咗句「仆街」。《拆彈專家》英文名叫Shock Wave，用嚟形容呢套戲帶畀觀眾嘅陣陣震撼，非常貼切。當中點解唔由得紅隧炸撚咗佢，理由真係牽強到令人驚訝。
你知唔知劉華拍嘅爛片有幾爛？連《我知女人心》呢套What Women Want (by Mel Gibson)嘅垃圾版本，只能屈居排第五！《游龍戲鳳》不知所謂，劇本鳩流，西片經典《風月俏佳人》退化版，劉華同舒淇毫無火花；《偷天特務》同《俠盜聯盟》面目糢糊，劇情老土，毫無靈魂。呢堆爛片，一泊埋《天機：富春山居圖》，連車尾燈都見唔到。
令觀眾更難堪嘅係，劉華拍完《桃姐》（金馬奬金像奬最佳男主角），下一套就係《天機：富春山居圖》，然後又上套仲可以嘅《盲探》（杜琪峰搭鄭秀文，普普通通），又一個回馬槍嚟套炸極都炸唔撚死，成個中環都地陷咗去地獄但劉華依然無死嘅《風暴》！好難捉摸呀！
劉德華無人能及之處，係連客串嘅戲都爛：
建國大業（爛） 建黨偉業（爛） 寒戰（爛－唔好同我講呢套唔爛） 金雞SSS 賭城風雲II（爛） 我的少女時代 賭城風雲III（爛） 我的特工爺爺 長城（爛） 鐵道飛虎 我的情敵女婿
嘩，11套又爛6套，60%。
夾夾埋埋，劉華自2007年拍嘅27套戲，起碼有14套係爛片。唔知道以為劉華專挑爛片嚟拍，唔爛唔拍。我知，劉華要養仔女；我知，劉華好有義氣。不過，劉華拍嘅戲－主演、陪襯、客串－毫無質素保證。過去10年，劉華拍嘅戲幾乎無任何upside surprise，算得經典嘅只有《桃姐》，而downside risk無限大－你黑仔啲會揀中《天機》、《未來警察》，好運些少都只係畀套《俠盜聯盟》你。
Key lesson learnt :
劉華演警察或其他紀律部隊人員，套戲避之則吉。
《未來警察》、《天機：富春山居圖》、《風暴》、《拆彈專家》、《偷天特務》，劉華清一式飾演警察之類嘅角色。想睇佢扮警察，麻煩睇返《無間道》。
───
【其他入圍演員】
－周潤發：《臥虎藏龍》後，幾乎套套杰作，《七龍珠：全新進化》、《建黨偉業》、《大上海》；近年更加恐怖，《賭城風雲》、《賭城風雲II》、《華麗上班族》、《賭城風雲III》、《寒戰II》。爛片比率比劉華更高，《七龍珠：全新進化》爛到核爆。以過去十年八載嘅作品計算，周潤發已經放棄扮演正經角色，全力沉醉於爛片中。唔頒畀周潤發係因為冇睇過佢嘅《賭城》系列。係咁求其嫁咧，吹咩？
－郭富城：杰出作品有《寒戰》、《寒戰II》、《全球熱戀》、《殺人犯》，綽號國貨城嘅城城拍得太多國產片（如《孫悟空》系列），我無緣欣賞，無得評論。
－謝霆鋒：杰出作品有《賭城風雲》、《驚心破》、《全城熱戀熱辣辣》，當中《驚心破》名副其實，劇情戇鳩程度令觀眾心驚兼膽破。
－陳奕迅：杰出作品有《華麗上班族》、又叫「渡鳩人」嘅《擺渡人》，《全球熱戀》（留意，《全城熱戀熱辣辣》同《全城熱戀》係兩套戲嚟）。不過，陳奕迅演技不賴，只待一套代表作得到突破。
－鄭伊健：杰出作品有《見習黑玫瑰》、《全力扣殺》、《忠烈楊家將》、《後備甜心》、《千機變》、《無限復活》、《蜀山傳》，近年較少主演電影。
－梁朝偉：如果個奬係喺2000年頒，我會頒畀佢。佢套《神龍賭聖之旗開得勝》係《未來警察》嘅級數。
《神龍賭聖之旗開得勝》 https://goo.gl/qOj5UK點解劉華攞奬：以上呢班男演員夾埋拍嘅爛片，都搵唔到兩套比得上《天機》同《未來警察》。
＜爛片之皇后張栢芝＞
2002至2004年，張栢芝拍咗幾套代表作：《我家有隻河東獅》、《忘不了》（金像奬女主角）、《大隻佬》，仲有《旺角黑夜》【當然仲有王晶套《性感都市》，Sex and the city嘅香港唔sexy版】。張栢芝同我同年－簡單八個字就將作者自己嘅水平同級數抽到同張栢芝一齊，有夠無恥，當時佢廿幾歲已被認定係香港影圈嘅接班人之一。
不過！2005年之後張栢芝拍嘅戲，幾乎套套都爛：
《喜馬拉亞星》：老實講，未睇。影評兩極，似乎都惡哽。
《無極》：又稱《一個饅頭引發的血案》。近年好多戲，奸角因為細個嗰陣一啲好戇鳩好無謂嘅事而懷恨在心，長大成人就去復仇（例如《殺人犯》個仔畀人喺公園欺凌）。《無極》係呢類戇鳩劇情嘅先鋒、祖師爺同開山鼻祖之一，當年有人二次創作咗套《一個饅頭引發的血案》嚟笑鳩佢:
《最愛女人購物狂》：成套戲痴撚線，當中徐小鳳第一次出場，去IFC買衫嗰幕，睇幾多次依然想界櫈；最後不斷打電話將陳小春劉青雲點嚟點去嗰幕，重複睇咗好多次都覺得無聊之極（唔好問點解我重複睇咁多次）。只能想像韋家輝係畀人用槍拍住個頭拍呢套垃圾。
《野蠻秘芨》(2006年)：王晶，完。
留意，張栢芝喺影壇下滑，喺2008年艷照事件前已經出現；艷照事件踩多腳，休息咗兩年，到2011年復出拍戲，依然唔爛唔拍：
《最強囍事》：賀歲片，唔使認真。你問下睇咗《楝篤特工》嘅人，完。
《無價之寶》：又係王晶。
《楊門女將之軍令如山》：垃圾。順帶一提，鄭佩佩多年後屌柒張栢芝，話同佢合作拍呢套戲嗰陣唔專業（OK我知同套嘢爛唔爛無關）。
《極速天使》、《影子愛人》、《危險關係》：無睇過
《河東獅吼2》：爛、廢，同第一集相同之處，只係得戲名四個字。
張栢芝係香港碩果僅存有實力嘅女演員，演技好，戲路廣－扮到純情玉女（《星願》），刻苦寡婦（《忘不了》），港女（《喜劇之王》、《12夜》、《河東獅》、《鍾無艷》），如果無發生咁多事，應該仲有排玩－當然一講「如果」，就係無「如果」。而家拍乜都爛－情況喺脫離中國星（《最愛女人購物狂》之後）更加嚴重。同佢伙拍嘅導演，唔係無名小卒，但依然救唔到張栢芝。
好可惜。香港影壇一個優秀嘅女演員，失去名聲，無人再搵佢拍戲，連爛嘅機會都冇。對我嚟講，感到可惜係因為我買過佢隻《任何天氣》CD，同埋張栢芝拍陽光嗰個廣告，索到嘔。
「全靠你嗌『快啲、快啲』渣。」男主角同張栢芝講。
你老母，而家呢句嘢對意淫先得……
Key lessons learnt :
Good news 1：張栢芝拍嘅戲，清一式爛，可以直接跳過。
Good news 2：收得貴、片又唔收得，加上條件太辣，形象又唔太討好，已經無乜人搵張栢芝拍戲。
───
【其他入圍演員】
香港有實力嘅女演員，息影嘅息影（張曼玉、袁詠儀、葉童）、老嘅老（關芝琳、羅蘭姐、惠英紅、葉德孄），青黃不接情況非常嚴重，搵候選人都有難度－過去17屆香港金像奬最佳女主角，得奬嗰陣後生過35歲嘅只得張栢芝係香港人，其他包括李心潔(得奬時27歲，馬拉人)、章子怡(26歲)、周迅(32歲)、春夏(24歲)，全部唔係香港人。恐唔恐怖？斷層、空洞化、掏空得何奇嚴重？相比之下，1982第一屆金像奬到2000年，最佳女主角第一次獲奬嗰陣，大部份香港人－葉童、惠英紅、梅艷芳、袁詠儀、吳君如，全部35歲樓下。
－文詠珊：已知杰作有《內衣少女》、《赤道》、《寒戰II》、《兇手還未睡》，另外有幸未睇過《狂獸》、《愛鬥大》，瀨嘢可能性極高。文詠珊演出非常穩定……穩定地屎。佢唯一嘅演技，只有不斷碌大對眼，碌、碌、碌，碌到你怕，《寒戰II》唯一值得欣喜嘅一幕，係佢死而眼閉，觀眾唔使再畀佢牛咁眼望住。
－鄧麗欣：愛情片皇后（無人咁讚佢……呢個朵係我而家幫佢改嘅）。由2006年到2017年Stephy演嘅34套戲中，「愛」同「戀」兩個字共出現咗16次，包括《獨家試愛》、《戀愛初歌》、《十分愛》、《塚愛》、《我的最愛》、《保持愛你》、《等我愛你》、《不愛不散》，可謂死了都要愛！
慶幸Stephy大部份作品只係平庸，未去到爛嘅地步。加上2016年同方力申分手後，似乎想改戲路，拍咗套《空手道》，令人眼前一亮－雖然個人認為佢只係演返自己，並非突出。
好消息係乜？只要你拍到一套似樣些少嘅戲，金魚記憶嘅觀眾會徹底忘記你以前嘅所作所為！余文樂拍《一念無明》之前，又何嘗唔係拍咗超多垃圾呢？所以啲戲超屎嘅周柏豪，唔使灰心嫁。
Btw，我覺得鄧麗欣同方力申，根本係2000年代嘅鄭秀文同許志安。
－薛凱琪：已知杰作有《女人本色》、《爛賭夫鬥爛賭妻》、《閨密》、《閨密2》（未上但肯定爛，黃真真導演）、《新紥師妹3》，《女人本色》角色隨劇情而暴走。薛凱琪要突破自己，請停止接拍飾演癲雞、偽ABC、大笑姑婆嘅角色－我好懷念《早熟》同《分手說愛你》嘅薛凱琪。
－楊穎：即係Angelababy. 天字第一號花瓶，得個靚字，可惜個樣成日畀人懷疑係假嘅。即係……你好有錢，乜都冇，淨係得錢，偏偏啲人懷疑啲錢係偽鈔、根本唔存在，你話感覺幾咁可悲。楊穎演嘅全部大陸戲，我無緣無錢欣賞，唔知係龍定鳳。不過有樣嘢幾肯定，比起上面幾個女星（包括一度好姊妹文詠珊），楊穎有一個強勁優勢：佢連拍荷里活嘅戲都係爛嘅－《天殺反擊戰第二集》，就係2016年垃圾之一（IMDB: 第一集7分；第二集4.2分）。
－林嘉欣：……你白痴嫁咩？林嘉欣係我偶像嚟，無論佢有份嘅《怪物》、《阿嫂》、《救命》、《戀愛行星》、《我要做model》、《後備甜心》有幾爛都好，我都唔會選佢入圍，ok?（但你已經寫了……）
－劉心悠：過去三四年，劉心悠每年平均拍兩三套戲，我只係睇咗好少。已知杰作有《我老婆係明星》。
－穿屎：穿屎一齊主演嘅，必屬爛片。
《穿屎主演，必屬爛片：見習黑玫瑰》 https://goo.gl/FxTfvk點解張柏芝攞奬：你對上面班女演員，完全無期望；無期望，無失望－重申拍嘅片要爛爆，一定要你有期望先得。佢哋畢竟唔係泛民嚟。
.
至於最爛電影公司、導演、編劇……未寫……
特別附著：爛片檔期－賀歲片
根據非正式統計，每年農曆新年總會爛片遍地，尤如七月十四妖魔鬼怪怪力亂神，通街橫行。只要打上賀歲片牌頭，即使劇情再九流胡鬧，導演再渣，只要參演嘅明星夠多夠紅，票房仍有可觀。以下係2010年至2017年港產賀歲片：
2010 《72家租客》收三千萬，葉念琛 《花田囍事2010》收千五萬，黃百鳴、邱禮濤
2011 《我愛HK開心萬歲》，收二千萬，曾志偉、鍾樹佳(TVB導演) 《最強囍事》，收二千萬，陳慶嘉（有甄子丹）
2012 《2012我愛HK喜上加囍》（個劇名幾撚老土），收千九萬，曾志偉、鍾樹佳(TVB導演) 《八星抱喜》，收千二萬，陳慶嘉
2013 《2013我愛HK恭囍發財》（痴撚線，佢居然改到一個劇名比舊年嗰個更加老土），收千七萬，鍾樹佳(TVB導演) 《百星酒店》，收千九萬，谷德昭
2014 《六福喜事》，收千八萬，谷德昭 《賭城風雲》，收三千四萬（天呀！！），王晶
2015 《賭城風雲II》，收二千六萬（天呀！！！），王晶
2016 《賭城風雲III》，收二千四萬（天呀！！！！），王晶
2017 《小男人週記3之吾家有喜》，收千六萬，鄭丹瑞
以上呢堆賀歲片好唔好睇，自己諗。2018有套叫《楝篤特工》，網上媽聲四起，我冇睇，無得評論。
好撚悲哀，其他檔期嘅戲，再好睇都未必收到二千萬（上年口碑一絕，余文樂破格演出嘅《一念無明》，埋單只係得千九萬……）。賀歲片錢，易搵，但你要搵到大牌名星參演（即使只係得幾組戲，最緊要出一出，可以放個名喺海報），過到自己改過核撚突突嘅戲名(2019我愛香港喜上加喜)，咁就搞掂。
劇本呢啲嘢……求撚其啦，反正睇嗰個同拍嗰個都唔在乎。
──────────────────
下集大結局
──────────────────
【港產爛片系列】
－ 《我老婆（居然）係明星》 https://goo.gl/nB1RZb －《男兒當入樽》－唔係櫻木流川嗰套https://goo.gl/SebZHP － You know nothing,《吳清源》https://goo.gl/ZzD7Lo －《80分鐘好戲：殺人犯》 https://goo.gl/DQigtM －《畫蛇添足：兇手還未睡》 https://goo.gl/ySBCih －《穿屎主演，必屬爛片：見習黑玫瑰》 https://goo.gl/FxTfvk －《神龍賭聖之旗開得勝》 https://goo.gl/qOj5UK －《內衣少女》 https://goo.gl/3FNXgN －《我阿媽發仔瘟》 https://goo.gl/JG2i49 －《王老吉、OSIM特約：女人本色》 https://goo.gl/DnbXJA －《阿嫂》 https://goo.gl/Zzfqpz －《遠離寒戰，冚家保平安》 https://goo.gl/MT5RSE －［非爛片］《導火新聞線電影版之深宵問答》 https://goo.gl/WwQYfU ──────────────────
歡迎大家加入 Medium，follow史兄： https://medium.com/@relgitsjg
Facebook page：https://www.facebook.com/Relgitsjg IG (主要用嚟睇女仔) : https://www.instagram.com/iamuncleshit/