Pretty Crazy 容祖兒演唱會 Rundown 詳細點評
之前有篇 Pretty Crazy 演唱會 Overview：
呢篇係將 《Pretty Crazy 容祖兒演唱會》run down 逐首歌講，咁當然係以我第一身角度，有喜好有bias。唔識佢啲歌未必睇得明，無去演唱會又唔明，發燒友睇嘅（同發燒友寫嘅）。
有人問我睇咗邊場，你搵個 rundown 對下就會知~卡卡
《空港》開場正，之後就係快歌，紅館開場一定用快歌，咁多年都係咁，而且係喪跳，由《隆重登場演唱會》個陣唔係好識跳舞，到而家去跳個啲極其複雜嘅舞蹈，進步好多。當然，同啲 dancer 比，佢某啲 muscle 運用係鬆鬆地（睇佢之前TVB個 music video 已經見到分別），如果講跳舞，蔡依林應該再比佢叻啲，亦唔好同韓星比，歌手水平佢已經非常好。
Concert Theme Song Medley: Show up/好事多為/逃/美麗在望/隆重登場
呢堆歌我都好鍾意，全部係以前演唱會啲 theme song， 《Show Up》係我人生第一個睇嘅 concert，《Reflections of Joey’s Live》（《好事多為》）我睇咗3次……（雖然有啲fans認為係口碑較差嘅祖兒演唱會）《逃》我又係超鍾意，應該係我最鍾意Joey嘅快歌，當然係改咗 arrangement ，但我聽第一個bar已知係《逃》。但作為fans 呢，最鍾意都係原版（原裝控），聽到原裝會有 hormonal rush，佢最後跳咗原版一個 chorus，如果可以1/3改版，2/3 原版，而唔係大部分改版就好了。我好鍾意《美麗在望》，亦係一首好舊嘅歌，好驚喜會 jam 落去同埋jam得咁靚，去到《隆重登場》，啲人high 到，啲白燈打爆到好似完場最後一擊咁，好勁，好正。
呢part 10分。
跟住首《再見我的初戀》又係好到不得了，佢嘅演譯超越咗原裝。聲線清徹，嗰種青澀，好懷念初戀但又捉不住的可堪回味的感覺完全唱晒出來，是咁多次以來唱得最好，我記得另一次佢著藍色裙唱。佢中間重話：「係青春呀！係小學回憶呀」。唉，回不去了。
《天之驕女》又係另一首歌同唱都超好嘅演出，個首歌個遞進、纏綿、無奈，一下放一下收，個種成熟同《再見我的初戀》係一種對比，個種忐忑感互相輝映。
跟住 very sad 啦……《無人知道雙子座》我真係唔鍾意。原來佢其他場次係唱《逃避你》……我要《逃避你》呀！！！
如果只計頭兩首10分。
《走著睡》好耐好耐 concert 無唱，無記錯，係《隆重登場演唱會》時唱過？（check 完果然記啱）個陣歌少。其實首歌我麻麻，但啲人好鍾意四個毛毛球。（另一首同瞓覺有關嘅 side track 係 《如果件睡袍太少布》（My Secret Live 唱過），歌名聽到就打冷震，但 《My Secret Live》聽番覺得無咁可怕）
呢part 8.5分。
《桃色冒險》係極好，不嬲呢首歌都做得好，佢件旗袍又好靚，有嗰幾下 signature 撥扇，同加埋中間少少中國風編曲同扇舞，好正，呢一首歌 performance 係極品嚟。Dancer 套衫其實係熒光粉紅，好靚。（好似話佢第一場因為舞台凹陷所以跳舞時成個仆低）
呢 part 10分。
要留意以上呢兩首歌，佢唱一首換一次衫，超級 quick change。通常一件衫會唱幾首歌，要變化就洋蔥性咁除同埋加配件，但佢為咗配合首歌走去係咁換，呢啲又係某種堅持來，睇concert 係真係會睇得出。
《Lovin’ U》呢，你問我都係懷念原裝，那個由靜到輕快嘅版本再加signature 嘅電子嘟嘟聲。但呢個brass band版本都好好，好有氣氛，睇得出佢好開心好享受，而且個 arrangement 襯，然後就係《不容錯失》喇，同樣係 《EP2》嘅歌。
呢part9.5分。
《牆紙》呢首歌我真係麻麻，呢首歌俾其他歌手唱會好過佢，味道會出啲，佢唱輕身傭懶嘅歌唔太叻。值得留意通常 concert live cam 落咗簾個人就會矇咗睇唔到（好似 GEM 唱《泡沫》），但佢今次竟然入面有 cam 都睇到佢喺個「牆紙」入面，呢啲就係細節。
跟住嗰節我先冒汗，佢竟然彈琴！！！以我20年忠粉嘅理解，容祖兒並唔識彈琴嘅，佢竟然仲搵 live cam 影埋個琴鍵 live 自己隻手彈《啜泣》！！！痴線咖！！！其他歌手玩樂器呢，如果玩樣新嘅，會要個 band 墊住個底，結他又好鼓又好，歌手做樣打但唔會好大聲或mute 咗。例如 GEM 之前打鼓，根本係後面個鼓手打一樣嘅。但容祖兒真係 solo自彈自唱，重要 live cam 影住隻手，無花無假，嚇得我！跟住佢又真係成首彈同唱出來，無事。當然，如果係方大同個啲，你見佢哋彈琴好似呼吸咁，但祖兒個樣好緊張。一般人唔知，以為佢本身識好簡單，但佢肯去挑戰真係唔容易，畢竟佢唔需要。
最後彈完佢先話學咗一年！諗住一日學一粒音點知都學唔曉。其實唔識彈琴嘅人大個學好難，佢每次演唱會都想搵啲突破唔係得過且過，好配服。唔信，你睇下薛凱琪，個譜又易彈，都彈到錯晒。
然後係祖兒近年好滿意嘅《心之科學》，但我就麻麻，而且唔鍾意佢個種唱法吧。
呢part 8分，毅力+1變9.
聽到《歌姬》，我極興奮，好鍾意呢首歌，成個 setting 好靚。雖然去咗偏台唱，但啲props 呀波波燈呀地球齊晒。不過嗰晚演譯就麻麻，無「歌姬」應有嗰種「定」同「高傲」，而且有一節明顯 music 快過佢，唔知點解。
然後佢講下一環節嘅 intro，講台詞講到漏口，然後我發現佢成晚除咗同嘉賓講嘢，都唔太流利。
跟住一開場係《未知》……完全唔夾《歌姬》個feel ，咁難得個氛圍咁好，係應該駁《出賣》或者《摩登時代》嘅……其實我唔太想聽到《未知》，即係我認識咗你好多年，唔使再聽番咖喇……
Mega Ballad Hits Medley: 未知/怯/想得太遠/與蝶同眠/16號愛人/阿門/愛一個上一課
呢個 medley 當然正（有啲場次中間幾首換咗），而佢亦做到歌手最鍾意嘅「紅館大合唱」。但呢……我最想聽到佢把聲唱晒大半首，唔係聽到隔離位唱。尤其《怯/想得太遠/與蝶同眠/16號愛人/阿門》呢啲真係首首金，我俾錢入場係想聽佢唱。不過氣氛又真係好好個個識唱。
跟住佢話「金中金」係《痛愛》，我唔認同囉，雖然當年應該係。對我來說一定係《怯》。
呢 part 9.5分。
去到呢刻佢走上名為「紅磡360」嘅飛船，諗住，終於可聽佢唱成首啦，點知係同觀眾對唱環節，佢就變咗棟篤笑……啲好歌被觀眾遭塌晒，《這分鍾更愛你》同《特別嘉賓》呀陰公！仲衰過上一環節，因為上一環節一齊唱，呢個環節佢直頭俾觀眾唱……重要玩3首歌咁多，我覺得1首已經夠皮。都係嗰句啲咁經典好聽嘅歌我係入嚟聽容祖兒唱嘅。
呢 part 6分，完全崩壞。
順帶一提，連架吊車都有車cam，大頭，我睇過咁多紅館演唱會都無。通常，係一個遠一個近鏡，跟住喺個screen 度加啲 frames 呀動畫夾落個人度，但有時個cam 唔夠 wide，動畫夾到唔到，個 live 出來就好核突。但今次個啲 live cam 全部做得好靚，連一啲平時無cam 嘅位都有，啲detail位今次做得好足。
好喇，終於捱完，到嘉賓環節，晚晚不同。如果佢同嘉賓本身有合唱歌 e.g. 《他都不愛我》、《狂串樂基兒》咁會好啲，無就會唱嘉賓首歌用埋嘉賓個key，嘉賓通常係男所以就無咁好聽了，一去到上8度個啲佢就唔唱 skip。好似話農夫個場啲人 Xx 聲，好在我個場嘉賓正。
VCR《神魂顛倒》，呢首歌幾好，我以為會跳添。《破相》我就麻麻，不嬲都麻麻，不過佢個尾音拉得好好聽。佢個Lady Gaga look 我亦麻麻，但成個set 揼本有心思。跟住佢唱新歌《悲觀生物學》，首新歌唔易唱，但無反應，因為無人識。然後原來其他場次唱《爭氣》！嗚呀！我要聽《爭氣》！
呢 part 7分。
Dance Medley: 跑步機上/Pretty Crazy/派對機器/全身暑假/一面之緣/越唱越強
又來一個強勁 dance medley. 咁我鍾意第一個多啲。《跑步機上》係正嘅，《Pretty Crazy》我唔特別鍾意但都叫搶耳啦，《派對機器》佢之前有無唱過呢？都幾好，呢首歌從來無唱過 live. 跟住又有加入同個 mon 嘅 卡通互動元素，有啲似 《Number Six》Concert 隻舞。《越唱越強》我反而覺得入得好怪。啲 fans 話終於甩咗《喜喜》。拜託以後以後以後以後都唔好唱《喜喜》，一睇就知係 MK Disco 歌，好難聽。佢最勁係跳得咁都唔喘氣，你話有 backing 我都係咁話。
呢 part 9分。
《最後的茱麗葉》個 visual 做得好靚，隻金色翼，加埋成個洪洪火焰，我俾高分，同類演出有Gin Lee 首 《Falling》，都係末日咁。之前 《My Secret Live》已經好勁，今次又成功將 side track 翻新昇華。
呢首歌 10分。
fans 話：《華麗邂逅》守尾門傻的嗎？悶。其實唱《抱抱》呀《煙霞》呀個啲我哋就好鬼開心了……《一拍兩散》都好過「蟹后」
《心淡》作為最後一首反正就毫無驚喜可言，anyway 唔係呢首又諗唔到邊首。我並唔係話最鍾意《心淡》。有少少林憶蓮 fans 唔想林憶蓮再唱《至少還有你》feel. 《我的驕傲》其實不必喇……
Ending：頹，7分。