Pretty Crazy 容祖兒演唱會真係Pretty Crazy

引言：雖然話呢個時勢講娛樂嘢飲飲食食會被人鬧，但始終人都係需要娛樂同食飯嘅。如果係長期戰就更需要。燒山話齋，啲示威者同警察喺條街打完，然後脫下戰衣，一齊入紅館睇容祖兒。坐你隔嚟同你一齊大叫個條友隨時係對家，你話幾犀利。上一代成日想話番去嘅香港應該係咁，娛樂至上，沒有撕裂。正如空姐上班還上班，下班還下班，大家各自做自己想做嘅嘢，社會繼續正常運作，呢啲先係文明表現。而且開完演唱會再唔出，個 timing 就更不合適，所以還是快啲出咗佢。

想寫當然係因為睇完相當激動啦，但 Ivan Li 李聲揚 - 華麗后台 寫咗先咁我又跟風寫下。

呢篇係 《Pretty Crazy》演唱會簡評，遲啲會有一篇講偶像回憶。

「容祖兒」+「紅館四面台」，實在無唔入場嘅可能。友人唔熟容祖兒啲嘢，但認為佢係「大娛樂家」，個演唱會乜都有，乜都做到盡，大雜薈式。外國歌手啲 concert，我倆睇唔少，唱個零兩個鐘就完，唔會係咁換衫，有咁多機關咁多嘢搞……大件夾抵食，其實呢件事好香港，茶餐廳同車仔麫都係咁，任食放題都係咁，有人會唔鍾意，但好多人好滿意。你可以唔鍾意佢，唔鍾意佢嘅品味，但不得不承認佢嘅唱跳表演係達到一定水平，演唱會確實係相當精彩。

財雄勢大當然係令到個show好睇嘅原因之一，但真係要加埋祖兒及team嘅 talent、搏盡、及認真先得。難怪是今年口碑最好演唱會。入面好多 details 一絲不苟，例如 live cam 啦，下篇文集中講run down 會講。

好好彩地買到正價飛，唔使食黃牛，重好好彩係正面台。諗返起細個係買到正價飛咖……

今次個台設計好好，而家好多用 LED 台版，但今次無，反而個組合波用咗 LED。個設計睇落簡單，其實好複雜，搞到未成功full dress 過就開第一場，成個跳舞medley無咗，後尾將一日休息場免費補番俾人。

個台同裝置好多用途。個波可以做波，又可以劈開半邊做蛋，又可以放低做蛋糕，或者只係用下半忽做半圓 disco ball。原來重可以做沙漏型，然後 LED 又可以 display 唔同圖，好玩。然後個底都係蛋糕型，同樣可以咁用。同類我覺得咁實用多變嘅舞台大概就只有安室奈美惠嘅《Finally》，但祖兒四面台喎，安室三面，四面難玩過三面。

睇返報道，原來今次邀請了世界知名的舞台設計師去做：

Joey及其團隊已邀請了世界知名的舞台設計師艾思. 德芙林 (Es Devlin)主理。不熟悉舞台設計的朋友，就這樣聽到名字未必有太大反應，但Es Devlin曾為Beyoncé、Kanye West、Lady Gaga、Adele、Rihanna、Katy Perry、Miley Cyrus等國際巨星設計舞台，就連Netflix紀錄片《Abstract : The Art of Design》其中一集也邀請了她分享自己的設計工作，除了大大小小的演唱會外，更連奧運會的舞台也曾包辦過。相信說到這裡，大家也能大抵想像到這位舞台設計師來頭有多大，而容祖兒亦是她首次為亞洲女歌手作舞台概念創作的人。雖然未能透露實際金額，不過演唱會總監馮貽柏暗示，單是舞台設計這部份，已是一個天文數字的金額，很可能位列紅館史上最高的一次。

近年演唱會興 chorus 同 band 做埋表演一部分，例如張惠妹就係咁。今次數落佢music band 都20人有多，又 string 又 brass，咁做咗好多套衫俾佢哋之餘，次次跟著 quick change，認真揼本，你諗下幾十人衝去換衫件事幾咁混亂。祖兒嘉賓嗰 part 仲要晚晚唔同裙咁滯，晚晚有靚衫睇。一共有30幾個造型，黃偉文主理，呢度可以睇晒~

Run down 來講，未係 fans 最鍾意啦。佢每場會 vary 少少無重覆，好多時有就下嘉賓，如果同嘉賓要唱前面run down又會轉咁。但最主要係，有啲金曲就同fans 玩合唱，結果無得好好咁去聽，然後有啲慢歌選曲實在唔係 fans 所想囉，例如「蟹后」不如就算啦，你俾返啲《習慣失戀》、《借過》、《抱抱》我就好開心咖喇…呢方面《Number Six》 個 Concert 做得好啲。當然都要睇好無彩個日揀邊個 run down.

總括而言頭1/3極好，中間同 fans 玩玩到崩壞晒，後面有啲 visual 係幾有心思，但不及頭1/3，最尾無高潮有啲頹。但 overall 我覺得係正嘅。

尾場佢慣咗 encore，足足唱咗4個鐘！唱番晒《美麗在望》、《花千樹》、《麻煩你》、《借過》、《舊日回憶的山丘》、《我的驕傲》！有3隻我好好好好鐘意！但黃牛開咗場1個鐘都仲喺紅館外賣緊4倍價錢……

順帶一提，因為蛋公司財雄勢大，最後一場超時罰錢就梗，睇開容祖兒就知尾場有點歌環節。但原來晚晚都超時，因為23:30 係 official end time，而佢晚晚都超時……（所以話保守估計會罰100萬喎，不過啲錢預咗）除咗頭兩晚啲機關嘢外，佢每日都準時20:30–20:35到就開show，有時重會早兩分鐘。啲歌手通常要啲嘢 ready 好啲觀眾入晒場先開場都會遲，但佢去到後期好 discipline , 因為遲開啲嘢根本做唔晒呀!今次最出奇係無介紹 sponsor 環節，完全無，無介紹 dancer，連一字排開謝幕都無，估計實在無時間……中間無停過，咁已經講緊3個幾鐘，所以真係抵睇到爛。

最最最好彩佢成日會病呀開唔到聲呀要打類固醇呀……今次開之前2日重病緊失聲，但開咗就無事，佢重專登包機票要飛南京個中醫來，keep住每日插兩次插幾支針針炙……

佢嗰句「我應該嘅」令人心碎，敬業精神教人感動。雖然可以話咁呢個係佢事業，搏盡好應該啦，但你諗下又真係唔係個個歌手係咁。

佢嘅努力大家係睇到嘅（雖然調轉頭大把人好努力都紅唔到，做得呢行就知道運水真係好緊要，所以未有咁多人搵白龍王，同xx轉運囉）

其實想睇多場咖，能夠做完一場演唱會令人覺得意猶未盡，好難得。但因為老人家攰喇，concentrate 3個幾鐘有啲難喇，然後個 run down 唔係話我最理想的rundown。錢我又唔介意俾黃牛賺，但一來搵黃牛又煩啦，二來細個睇2場開心過睇一場，但老咗睇1場可能開心過睇2場，咁所以算喇。不過有啲 die hard fans 真癲講緊19場睇10幾場，所以我呢啲匿埋算喇~

下一篇會好仔細地講 run down。唔係 fans 未必睇得明~