《Pam & Tommy》彭美拉與湯米李
Disney＋ 改編 90 年代真人真事電視劇
原來睇 Netflix《潘密拉．安德森）（Pamela, a love story）已經係上年 5 月嘅事。睇呢套紀錄片前，對彭美拉嘅僅有印象就係佢一對好假但好大嘅「警鐘胸」，睇完之後，對佢多咗一份欣賞，雖然佢年輕時事業上基本上只係賣身材，但佢並唔係只賣身材但「波大無腦」嘅女人，反之喺佢高低起跌嘅人生歷程中，睇到佢做人處事嘅果敢決斷、直率真誠、愛同智慧。
Netlfix 呢套紀錄片令我認識彭美拉多咗，兼知道多兩件事：
- 佢同第一件老公嘅私人性愛錄影帶被人偷咗兼公諸於世。
- 有套叫《Pam & Tommy》嘅電視劇將性愛錄影帶事件始末還原。
就係咁，咁啱得咁橋俾我喺 Disney＋見到《Pam & Tommy》，於是開咗嚟睇，短短 8 集，無諗到睇完個心久久未能釋懷。
以真亂假
如果唔係睇咗彭美拉喺 Netflix 套紀錄片，我都唔知有《Pam & Tommy》呢套劇，亦唔會有興趣去睇，對我嚟講，呢套劇真係因為彭美拉而睇，而呢樣嘢應該係佢本人最唔想見到，呢套劇係無得到彭美拉嘅祝福嘅。
講返 Disney+ 電視劇《Pam & Tommy》，首先要讚呢套劇嘅係男女主角嘅選角、造型簡直無敵，而且兼備演技，形神俱似！
Lily James 飾演 Pamela Anderson，明明之前做純情童話女主角「灰姑娘」，喺呢套劇竟然搖身一變身材玲瓏浮凸嘅性感尤物！老實講，我睇返佢本來真人個樣，我完全認唔出係同一個人。Lily James 話佢每日 0330 就要坐喺化妝室到進行歷時 4 個鐘嘅大變身，唔單只戴假髮、裝假牙，嗰個 34DD 巨胸都係假嘅，但其實佢唔講我都唔知係裝上去嘅假胸，仲以為佢都隆咗「警鐘胸」！
至於 Sebastian Stan 就飾演彭美拉第一任 Rock 友鼓手老公 Tommy Lee，身上畫滿妨照 Tommy Lee 嘅紋身圖案，劇中經常赤裸上身上陣。又睇返 Sebastian 平時個樣，我都一樣認唔出係同一個人！只能話劇組嘅造型設計真係好認真同好高質！
不過，得個造型只係成功嘅一半，兩位演員細膩嘅演出先係真正嘅靈魂，佢哋演得唔單只神似角色原型，而係好真實咁呈現返呢兩個一代明星嘅愛情故事同喺人生艱難中嘅心路歷程，令觀眾好容易投入其中，甚至已當咗佢哋係真正嘅 Pam & Tommy！
悲劇原由
故事講述彭美拉當年同老公喺大屋裝修期間，屋企成個夾萬俾人偷走咗，當中包括一餅佢哋兩公婆嘅性愛錄影帶，喺船上、公路、屋企翻雲覆雨嘅火辣甜蜜床事。由於間屋又大、裝修又搞咗好耐，佢哋連幾時俾人偷走咗個夾萬都唔知，而隨後就發現自己兩公婆嘅私人房事，變成網上可以買到嘅鹹帶，兼有大把 link 傳遍全球。
對於兩個名人嚟講，當然係災難級事件，對於一個女人嚟講，更係終身難以磨滅嘅污點。佢哋唔係喺知情同意下將私人性愛公開，但偷咗餅帶同係咁複製販賣嘅無恥之徒就從中獲利，可恨係法律完全保障唔到當事人。而作為《花花公子》成人寫真雜誌台柱嘅彭美拉，更因為「艷星」形象而無得到同情，反而傳媒當佢蕩婦一樣，不斷拎呢件事嚟當眾「提問」，乘機公開羞辱博收視。
亳無疑問，偷咗餅帶嘅木匠（原型角色 Rand Gauthier 係個電工）固然係罪魁禍首，如果佢只係爆格偷嘢，而唔係佢睇到餅帶後攞去賣通街，彭美拉同湯米李嘅損失就僅限於金錢同無咗餅值得紀念嘅私人珍藏。但電視劇嘅鋪排亦令人會有些少同情 Rand Gauthier，因為劇中嘅 Tommy Lee 係賤格狂人一個，不斷改裝修計劃，態度惡劣，仲要最後唔俾錢，總之嗰種乞人憎嘅程度係「地獄級」，所以當被剝削、羞辱、恐嚇嘅木匠想嚟一個大報復時，所有嘢變得順理成章，只係「報應」。但冤有頭、債有主，正如劇中 Tommy Lee 質問 Rand Gauthier 一樣，佢本人賤格啫，但佢老婆 Pamela 有咩得罪人？點解要咁樣搞到佢咁慘？
彭美拉無疑係呢件事上最大嘅受害人，但其實 Tommy Lee 一樣係受害人之一，即使佢係始作俑者自食其果。
導演不壞
一邊睇一邊都有少少罪惡感，電視劇出晒真名將彭美拉同老公 Tommy Lee 嘅私人性愛錄影帶一事翻拍成劇集播出，係咪又係對受害者二次傷害而從中得利？但我越睇越覺得唔係咁，所以好想為呢套劇平反下。
雖然全劇不乏裸露或性愛場面，但重點佢真係唔係販賣「性」，唔係灑鹽花吸眼球，反而係揭露呢藝藝人夫妻被偷竊兼出賣私隱、受盡恥辱、冷眼、欺凌嘅嘅不幸往事，作為觀眾，邊睇邊對彭美拉同 Tommy Lee 難堪兼難過，同時覺得彭美拉極之勇敢、堅強，佢內心嘅強大絕對比佢逼爆嘅身材更偉大！
我係由睇 Netflix 套紀錄片已真心欣賞佢，而呢套劇亦俾到我同樣觀感，不同在於係更易令人投入角色，好真切咁感受赤裸裸地被公開窺視私隱同凌辱嘅羞恥，而法律竟然完全保護唔到受害人，一路睇又悲又嬲。
年代眼淚
彭美拉同 Tommy Lee 流出性愛錄影帶嘅時期，仲係錄影帶流行嘅時期（唔知係乜嘅新生代請自行 Google），但同時亦係互聯網冒起嘅時候。嗰陣嘅網上世界，神秘、無身分、無法無天！最初錄影帶流出，都只係少數嘅人買嚟睇，即使廣傳，但情況再壞亦只不過似係一場「感冒」咁，但當影片被放上 internet，病情立即急轉直下變成「瘟疫」一樣，無人可以阻止。彭美拉最後決定將版權俾一間公司喺網上出售佢哋嘅私人性愛影片，目的係盡量減少睇到嘅人次，但佢並無開價，而係無價送出版權，因為佢唔想自己兩公婆嘅房事變成一宗生意交易，呢一點亦今我好欣賞佢，傷害已成定局，但佢無為咗想撈返少少賠償而放棄自己嘅原則。
喺 30 年前，網絡世界可謂無法無天，即使彭美拉同 Tommy Lee 係呢餅錄影帶嘅主人，即使係佢哋嘅私隱，即使餅帶係被賊偷咗嘅賊贓，但無任何法律可以保障到佢哋，或幫佢哋停止呢段性愛影片繼續傳播。加上當時社會風氣唔似而家咁開放，彭美拉同 Tommy Lee 嘅事業同形象就因為呢件事直插谷底，亦令佢哋嘅婚姻提早走上絕路。
但換咗而家又點，到而家亦一樣不時有人喺不自願嘅情況下被公開裸照或性受片段，有人落網，亦有人逍遙法外。當然，同 30 年前比，法律完善咗啲，社會風氣開明咗啲，但對受害人嘅傷害其實都一樣好大。
火花熄滅
呢套劇集令我最為傷感嘅係佢拍到彭美拉同 Tommy Lee 之間嘅愛情開始得好轟烈，相識短短 4 日就結婚，熱情之火燒得好猛，但都未去到見到愛情漸漸冷卻落嚟前，就已發生性愛錄影帶流出事件，呢件事無疑對兩人嘅婚姻嚟咗一記重擊，睇到最後兩人因家暴而離婚收場，再對比返佢哋當初燒得咁熾熱嗰團愛火，心裏面好黯然好心酸。
如果⋯⋯如果嗰位裝修工人爆格完只係私人欣賞別人嘅房事，而無用嚟賣錢， Pam & Tommy 嘅婚姻會唔會有另一個結局呢？
埋嚟睇，埋嚟揀！CLAP多 49下！
多謝大家睇到最後，Medium 改制後，以「拍手」同「留言」去計算俾作者嘅稿費，如果篇文唔差，請幫忙多多拍手，可以拍足 50 下！
以下目錄係介紹呢期最新文章同推介其他舊文，歡迎嚟慢慢坐、慢慢睇。