Overpaid 定 underpaid？邊個知？
一個打工仔永恆嘅問題。除非你係做 Finance 或者 HR ，成公司盤數畀你睇通睇透，連 CEO 個秘書一個月開幾多次公數幫老闆買咖啡買花買朱古力都知道啦。否則，一般人都好難判斷，自己喺公司入面待遇算係高水定係低水，更加莫講話同行業相比。
嚴格嚟講，公司嘅員工守則同埋僱傭合約都會叫你將個人薪酬同待遇視為機密，不得與同事高談闊論或者竊竊私語嘅。原因？好簡單，只有當資訊不全面流通嘅時候 (imperfect information) ，掌握全部資訊嘅一方，即係僱主，就會佔到上風，尤其是要傾升職加人工、請新人同挽留舊人嘅時候。情況就好似打麻雀咁，你打開住副牌同坐你對面嘅老闆打，你估邊個容易啲食糊？邊個比較可能扣住晒啲牌？
唔使驚。市場上有大撚把資訊，係大家可以用嚟參考嘅。由廣到窄，由準確到唔準確，都有。係睇下你識唔識得攞嚟用嘅啫。
招聘中介：轉工梗係揀，咪信晒中介
嗱，首先呢，呢個世界有一種行業叫 headhunting 。獵頭族呀，你冇睇我以下呢篇舊文，返多兩年工，都總會收到啲電話 cold call 你、問你有冇興趣搵工跳槽嘅。
當佢哋撲埋嚟，你可以問價，唔係問佢哋每個月出幾多糧或者收你未來僱主幾多成佣金。係叫你問下，以你今時今日嘅資歷，喺出面搵工，合理叫價係幾多。不過問下好喇，佢哋八九成都係敷衍你，話根據市況呢，轉工加一兩成人工都好合理，之類。所以，聽完就算啦。
薪酬趨勢調查：可信但不可盡信
真正有參考價值嘅，係呢啲獵頭公司，佢哋本身會定期做一啲薪酬趨勢調查，然後每年好似發現新大陸咁發表調查結果。如果你本身做開金融行業嘅話，隨便 Google 下 “Salary Survey” ，閒閒地都有好幾份報告可以畀你參詳下。啲 RH 呀、 H 呀、 MM 呀、 RW 呀⋯⋯ (獵頭公司 initial ，畫公仔真係唔使畫出腸) 都幾仔細地將前線、後勤以至不同專業界別嘅崗位劃分，然後按照唔同嘅職級、資歷，提供一個參考嘅範圍。即係，例如話佢寫住 “Project Manager / 3–5 years experience / 40K — 60K” 咁，就即係你有三至五年相關工作經驗，拎住呢個銜頭，月入就大約係四萬至六萬蚊港紙咁啦。
有時呢啲調查結果會用年薪表示，呢啲位就要小心啲睇清楚，佢年薪係 all-in 咁包括埋花紅 / variable bonus / discretionary bonus 之類定係唔包。喂，爭好遠架，如果你滿心歡喜以為 “600K” 即係每個月有五萬蚊，但原來人哋假設當中包括兩個月 bonus ，咁每月底薪就可能只係得四萬三千左右，都打個八五折架。
有咗行業薪酬調查做參考，跟住你就可以衡量下自己今時今日咩新鮮蘿蔔皮，秤下自己公司喺行內算係出手闊綽定係出名孤鳩寒，從而判斷下自己係畀人待薄咗丫，抑或係身在福中不知福。
當然，除咗由上而下咁 top-down 去評估，另一個方法係由下而上咁比較。
同事情報：有得必有失
最直接嘅方法，當然係問你嘅同儕。如果你喺同 team 有一啲同你角色、崗位類近嘅同事，你又信得過佢哋唔會出賣你嘅話，大家混熟咗之後隱隱若若咁交換下啲數目字，無話唔得。當然冇人叫你蠢到用公司 email 或者 instant messenger 講呢啲，會留底架嘛懵炳！有咩當面講，流傳於空氣之中，好快就散。
不過咁樣係有少少牙煙嘅，一來同事之間保持一臂之距 (one arm’s length) 比較好，交換到月入呢啲咁私隱嘅嘢，你放唔放心先？二來萬一交換之後你發現自己原來搵得多過其他人一截，咁你估下你跟住落嚟有冇好日子過？三來，有啲嘢叫各有前因莫羨人，一個早你廿年入行但係同你一樣做緊 Officer 嘅同事，本身人工高過初出茅蘆兩三年嘅你，其實都唔出奇。你諗返人哋加咗幾多轉人工先啦，如果中間冇減過，人哋本身處於呢個職級嘅山頂位真係好正常。知得太多，有時又係盞自己唔開心。
同行情報：一家唔知一家事
出外靠朋友，有啲朋友，你最好識返兩三個，例如話醫生、牙醫、律師，有咩事叫起手都幫到你。如果你好關心人工水平點樣為之高或低，咁你就要識返個 CFO (Chief Financial Officer) 喇。因為佢睇住盤數架嘛！而 CFO 本身亦會有自己嘅圈子，間唔中少不免會同行家互相參詳下某啲崗位價值幾何，免得老闆做咗水魚，公司開支無辜辜地大咗，年尾分 bonus 一個唔該細份咗就唔抵。
我最近就同一個 CFO 朋友打聽過，八卦下自己搵工跳槽會唔會有難度⋯⋯
CFO：「吓？你呀？聽講你叫價都唔低架喎！」 (淡淡然飲啖茶)
我：「開天殺價、落地還錢啫⋯⋯」 (好明顯開始淆底)
佢繼續講：「如果你想搵頭好人家，可能要有心理準備減少少喎，畢竟人工入面有 risk premium ，如果人哋好人好姐冇事冇幹，出手自然就低啲。唔係咩叫重賞之下、必有勇夫呢？」(攤手)
無論係剛才由下而上嘅 bottom-up research 又好，開頭講嘅 top-down 又好，兩者都係以市場價格為依歸。但係大家不能免俗嘅係，會攞自己目前搵緊嘅銀碼，以及每月開銷嘅金額作為指標。明嘅，心理上，總係覺得自己轉工係要承擔風險，人工唔加返兩三成都對唔住自己。
問題係，如果你企喺僱主嘅立場去諗，你搵唔到理由去 justify 呢個加幅架。因為僱主只會睇返佢哋本身 budget 有幾多，其他 candidates 叫緊幾多，同你叫價差幾遠，而你又有冇咁獨一無二要佢額外花錢羅致你返嚟。
同樣地，你屋企要養一屋七姓十三人，都唔關你未來僱主事架。平日大花筒，並唔係搵工叫價高嘅藉口。 (NBA 前球星 Latrell Sprewell 2004 年拒絕一紙 2,100 萬美元嘅三年合約時曾經拋下名言 “I have a family to feed” ，但佢往後周轉不靈賣遊艇、被收樓，你係咪想學？)
所以呢，記住，莫道你在選擇人，人亦能選擇你。除非你已經透過人脈關係，搵到好碼頭，而個碼頭又認定你係上佳人選，你夠牙力嘅，咪試下要個世界跟住自己轉囉。幾時都話，識人好過識字嘅。
未諗掂嘅，睇埋下面轉工三部曲啦。再諗唔掂嘅，留個言同我傾下？