《大叔的愛》角色Hash Tag
講明先，我好腐。講明先，有劇透。講明先，鬧多過讚，但係都讚。 唔啱睇唔好拍手。
★警告★ 未睇《大叔的愛》又唔知睇唔睇好嘅朋友，快啲閂咗呢頁，唔好睇落去。因為睇完我呢篇之後，你好可能係會唔想睇套劇。
[LINK]追劇依正路，唔好睇邪道：黃Viu OTT《大叔的愛》 （以下圖片都係嚟自黃Viu，主題係「如果拍香港版《大叔的愛》，最理想嘅演員」）
春田創一 TAG：#渣攻 #後宮之王 #毒男
一開就就覺得超奇怪，呢個角色搞咩？毒咗卅幾年，突然咁有市場？兩男一女爭個毒男咁勵志？
睇番劇情發展，一開始春田田唔止激走老母咁不孝，喺公司業績又廢，一啲都冇表現出任何優點，實在唔明點會有人愛。而且佢後來嘅表現只係令人覺得「邊個愛我我愛邊個」，尤其幫佢煮飯洗衫打理家頭細務就Perfect，佢擺明只想搵個人代替阿媽照顧佢。點解千珠明明係女仔，入到屋都唔可以坐正？因為佢唔做家頭細務囉。睇吓阿牧同大叔，賢妻良母嘅級數簡直係超級執事錫巴斯陳欣級數，邊有得比。
阿牧問過「你想我留低，係咪因為貪我幫你執屋貪方便？」，雖然春田田話唔係，但係又講唔出係咩原因，根本就係貪方便求其就手，犧牲個額頭就氹番個執事番屋企，抵啦。後來同大叔都可以同居一年，因為大叔打理頭家打理得好。春田田真係渣到跌渣。WELL，我信愛情是盲目的。
好在，中段都有透過蝶子睇倒春田田嘅優點，佢又唔係一無是處。
BTW，少女漫畫女主角經典對白「你哋唔好為咗我嘈交啦」，由佢把口講出嚟，真係好好笑。
點解話佢係渣攻而唔係渣受？好明顯啦，如果阿牧同大叔都係攻，同一屋簷下，佢一早被攻陷。根本暗戀佢嗰兩個都係受。我好懷疑，到底毒男春田田到最後識唔識攻？嗱嗱嗱，唔好搞出人命呀。
牧凌太 TAG：#聖母 #誘受 #執事
我完全唔明精英嘅口味。 阿牧，你個EX咪幾好，一表人才事業有成，點解撲過去春田田度甘心做佢執事，唔係，簡直係佢阿媽一樣。自從春田田激走老母，阿牧就成為春田家女主人，執屋煮飯，仲幫春田田洗埋襪同底底。一個男人肯幫另一個男人洗襪同洗底底，本身已經係超越真愛嘅表現（除非個男人開洗衣舖）。
睇第一集，我以為阿牧係肉食男，腐神，原來我錯了。
第一集最後，阿牧衝咗入浴室昅仔，仲強行錫埋，同埋留低咗句沿用2016版經典對白：「我知前輩你鍾意巨乳，但係巨根你Ｏ唔ＯＫ呀？」，嘩，進取到呢！而且仲同上司爭仔爭出面，鬥數春田田的十大之最，嗰個Moment，可能係呢個角色最man嘅一刻。
但係！後面搞咩？離家出走之後求其俾春田田氹兩句就冧晒番去、自動讓愛俾千珠、知道春田田同大叔訂婚又扮冇嘢。為咗個男仔做完阿媽，仲讓愛讓到呢個地步，除咗聖母，真係唔知可以落咩TAG。加上一齊住咗咁耐都只係錫過一次，呢個誘受實在太草食，我幾乎以為佢咁後生就不舉。情敵同文雀一樣，俾晒位千珠同大叔入，佢哋冇理由唔入㗎。
我覺得個編劇組一係就精神分裂，一係就為咗講番2016年版嘅呢句名對白而夾硬編番嗰句名對白落去，搞到阿牧前後差咁遠，以為佢俾外星人換咗Ｊ。
黑澤武藏 TAG：#炮灰 #黑乙女 #飼主 #金主 #反差萌 #隱性基 #人妻 #陰險受 #武將名字系列
改咗個咁型棍嘅名，點知部長大叔係個乙女心，仲要係人妻屬性。佢老婆蝶子咁多年嚟都發現唔倒佢嘅內心係個黑乙女，搞到離婚都冇辦法。
成套劇最值得俾掌聲嘅角色就係中途轉基嘅大叔，勇敢到咁嘅女主角實在係好難得（係呀，佢係女主角，日本啲宣傳都係寫佢係女主角）。但係唔知做咩要等十年先至Come Out同老婆離婚，同埋終於向春田田表白＆求婚，都暗戀咗十年啦，竟然突然之間咁進取同咁決絕，我以為佢有絕症呀陰功。
可惜，同居成年又係手都冇拖過（至少阿牧都嘴過同欣賞過全相），我堅係相信大叔更年期已過，根本硬唔起。相對阿牧係個超級執事，佢喺屋企會煮早餐打理家務、喺公司會俾機會春田上位，完全係個飼主心態，養番隻小動物咁款。佢享受嘅，可能就係暗戀、追求嘅過程都唔定。
老實講，大叔貴為部長，有錢、肯做人妻、事業上可以幫到自己，條件上呢位金主真係無敵，唔怪得春田田可以俾佢潛足成年。
荒井千珠 TAG：#炮灰 #腐女
開頭千珠成個腐女咁，係咁支持春田田接受阿牧/大叔，中間唔知做咩覺醒真愛玩表白，呢段戲睇到想反枱。佢嘅定位係炮灰，但係又因為佢，令王道CP嘅阿牧自動退出。編劇又玩精神分裂，到最後撐大叔搞婚禮，但係煽動阿牧去搵春田田。原本係劇內最索女角嚟㗎嘛！立場咁遙擺，搞到個角色好冇說服力。根本千珠自己都想要個錫巴斯陳欣，就算俾佢入屋坐正，都好快就會同春田田炒大鑊分手。最後又真係俾佢搵倒個鬼佬執事，編劇對佢真係好。
武川政宗 TAG：#炮灰 #眼鏡受 #熟男 #武將名字系列
相比起武藏大叔，政宗就堅定好多，亦都係我覺得成套劇至陰功嘅炮灰。其實佢同阿牧幾襯呀，話說「兩受必有一攻，CP先成功」，但係睇嚟兩個都攻唔起，所以只好分手（<<超妄想！）。佢為咗阿牧而去同春田田晒馬，呢段都好鬼MAN。要忍受自己個EX喺同一個Office，但係冇復合機會，而且個Ex仲要同另一個男人同居。男人最痛算這種。
講起嚟，一間Office有４個GAY，有冇咁高機率呀？
黑澤蝶子 TAG：#炮灰 #天真嬌
蝶子簡直係模範人妻，如果套套BL嘅女角都係蝶子咁就天下太平。佢好正常咁掙扎完，竟然好唔正常咁幫前夫去追仔，呢個前妻都算唔話得。同武藏大叔一齊咗30年都唔知道老公係黑乙女，佢都幾係天真嬌。而且演員大塚寧寧差唔多50歲人仲係咁索，失婚都可以有個嫩口型男追佢。我支持佢哋！
落完TAG，自己睇番都覺得成套劇唔合理嘅部份多到喊。不過都係一路鬧一路睇晒，又一路戥班炮灰唔抵。鬧還鬧，因為成套劇嘅氣氛真係好好，而且節奏都夠快唔拖戲，又真係會追住睇。
呢種劇莫講話CCTVB，其他香港嘅電視台都未必有能力拍得出。先唔講係因為HeHe劇情，淨係睇人哋認真程度都比下去。日本電視台會認認真真咁處理一套即使係喺深夜播嘅劇集，就算得7集都要拍好佢，而且好多細節都好用心。說時遲那時快，原來播咗春田田前傳㖭喇，一個IP煲得起，就可以有持續發展。
香港真係想有香港版《大叔的愛》？搞掂班明光大愛撚同怪獸家長先講啦。ＦＦ吓好喇。
貼埋其他角色圖先～
My Medium Record：(Update中) https://readmedium.com/my-medium-record-e1f290f9c470 每月月頭會將部份上月免費文章轉做會員限定文章。
順手睇埋吖～
個人BLOGss~ ☆伊死的漫畫特區 （講漫畫、讚漫畫）
