我流閱讀：王爾德《慾海有情天》
百年前英國ＢＬ同人誌老祖宗
之前介紹過明代ＢＬ《弁而釵》，始終係文言文書寫（其實好淺白），有朋友話好難閱讀。好啦，今次介紹西方好ＢＬ，由大文豪王爾德寫嘅ＢＬ同人誌《慾海有情天（Teleny）》。
各位同人+腐女，有神快拜！王爾德絕對唔係第一個自資出版嘅人，但係好可能係第一個自資出版ＢＬ小說嘅知名作家，而且內容絕對18禁，要劇情有劇情，要苦情有苦情，要藝術有藝術，要肉有肉，簡直有求必應。用「老祖宗」三個字形容太Old School，王生（人哋姓王爾德）可能會嬲嬲豬，不過又諗唔到去咩詞去形容。
多謝當年譯者景翔先生，將內容譯成火辣辣嘅中文。
買書LINK：Bookwalker電子書、博客來（因為係18禁，要先登入） 出版社《慾海有情天》介紹頁面
同《弁而釵》一樣，《慾海有情天》呢本古典好物，都係由基本書坊出版，我買由Bookwalker製作嘅電子書，如果見到實體書都值得買番。
根據書入面嘅導讀同譯序所指，《慾海有情天》喺1893年出版，而且發行數量極少，連間出版社都係假嘅，根本就係我哋而家所講嘅自資出版，亦可以話係同人誌。
由於標價較貴，又係限量，令《慾海有情天》只喺某啲志同道合嘅階層流傳，呢一點亦係都好有同人誌嘅意義。
日本嘅「同人誌」一詞，源自純文學創作，寫吓詩作吓文咁樣，後來以合本方式喺學校嘅文學學會之類流傳，係志同道合間小眾嘅分享。動漫人將同人誌加以發揮，成為現時日本ＡＣＧ界另一股創作動力，帶嚟好強勁嘅經濟效益，當然仍然離唔開「志同道合」同「分享」嘅原意。（成日話日本經濟差，去到Bigsite Comike行一轉，覺得自己喺平行宇宙。差？邊度差呀？）
《慾海有情天》當年標價較高，自然係想篩走一啲唔係佢嘅讀者。或者有人估，可能係窮人買唔起，可能係唔捨得俾咁貴買書嘅人；但最大嘅可能，我認為係佢希望讀者真係同佢一樣，不為其他，純粹欣賞情慾創作。你知啦，當年冇動作片，只靠文字誘發無限旖旎。文章有價，少量出版成本都更加高，唔好鬧人賣得貴，覺得值得就會俾錢。
王爾德當時應該已經成名，感覺就好似而家嘅商業漫畫家，走去同人場自資出版18禁同人誌一樣。
點解要咁做？漫畫家以繪畫商業漫畫為職業，受到出版社、大眾市場嘅限制，喺同人場就可以隨心所欲畫自己想畫嘅題材（咁啱大部份都係18禁啫）。用呢個角度去諗，我估王爾德都係一樣，由出版社發行嘅作品離唔開大眾、道德、文學價值，成為作家，就會被強行加諸一個道德規限。但係以王爾德一個咁曳曳嘅作家，又點會認同文學界班老古板？佢寫嘅作品都有種叛逆感，就算而家被視為童話嘅《快樂王子》、《夜鶯與玫瑰》等等，睇番內容都有批判社會，唔同大眾社會妥協。
創作一定要言之有物？文學一定要符合道德？
打開《慾海有情天》就會明白，王爾德話你知，想寫咩就寫咩。純以同性愛慾為主題，冇出版社敢出咩，自己出囉，我鍾意呀。你唔想睇咪唔好買，我寫比同路人睇嘅。道德？關我嘅創作咩事？
《格雷的畫像（The Picture of Dorian Gray）》作者序入面，開宗明義寫住 :「藝術家從沒真的打算證明甚麼，如果連真相都需要證明，證明是為了甚麼？」、「藝術家也沒甚麼道德同情。藝術家心中若摻透了同情，等於荒藝術風格之大謬，不可原諒」、「所有的藝術都沒甚麼用」。王爾德認為，藝術表達真相，無需過多道德同情慘入，但係藝術又真係冇咩實際功用。想做就做囉。呢段序可以話係王爾德寫咁多文字中，最有力嘅自辯。
幾咁叛逆，幾咁前衛。
睇吓現代文學，又停滯咗喺咩年代？
有人質疑《慾海有情天》係咪真係王爾德寫。呢樣嘢留番俾做研究嘅人去考究，姑且跟主流意見，當係佢本人嘅小黃本著作。
另一本王爾德較少人提嘅作品，係佢坐監嗰陣嘅獄中書《來自深淵的吶喊（De Profundis）》。
買書LINK：Amazon電子書、博客來、Google Book 群星文化版本譯得好好
王爾德同阿弗列．道格拉斯勳爵係當年社會著名嘅同性戀人，但係因為呢個原因，令王爾德喺1895年被判有罪而入獄。道格拉斯反面不認人，王爾德因為呢單官司破產同身敗名裂。一代才子喺獄中寫低一封一封情書俾道格拉斯，死後集結成為《來自深淵的吶喊》。喺《慾海有情天》入面嘅苦情男主角，竟然同佢本人有近似命運，同樣受到情人背叛。
相比起情慾文學，《來自深淵的吶喊》更重要嘅地位，係見證同志抗爭。王爾德案係其中一個對後世好有爭議嘅案件。
不過咁講，想了解王爾德多啲嘅話，唔好淨係睇佢嘅小黃本（講緊我自己），而係認認真真睇佢嘅作品，感受吓喺王爾德嘅年代，一個英國作家抗衡傳統嘅筆蹟。就連福爾摩斯系列嘅作者亞瑟‧柯南‧道爾，都讚賞過王爾德嘅作品，果然曳曳嘅作者都係志同道合。
如果王爾德生於現代，見到出同人誌原來可以咁自由咁好玩，可能會將同人誌當成正職都唔定？
王生，百幾年後嘅今日，純情慾創作遍地開花，除咗有文字，仲有畫面，有聲有畫，要咩有咩架喇。
My Medium Record：(Update中) https://readmedium.com/my-medium-record-e1f290f9c470 最近超懶寫文。
順手睇埋吖～
個人BLOGss~ ☆伊死的漫畫特區 （講漫畫、讚漫畫） ★嚟Plurk吹水