覺醒與革命 救港保前程

毋懼困阻，退無死所

有傳未壽終正寢嘅林鄭「終於」正式撤回，咁又點？

義士嘅名譽與清白未曾恢復，有啲甚至遭受無法挽回嘅身心傷害，但係就連道歉同賠償都冇。

更甚者，政府一日未撤控，抗爭者一日都要面對黑警嘅百般刁難、律政司喺司法程序上嘅纏擾。

而官方言論定性依然先於法庭裁決，呢場抗爭仍然被污衊為暴動。

最大共識係設立各界獨立調查委員會，柒婆至今都一再推搪，大家覺得佢真係有誠意？

單憑畀舔共走狗柒指嘅冇牙老虎監警會，談何處分？更加唔好話解散警隊啦。

唔將監警會同狗隊投訴及內部調查科，改組成獨立調查、監察及處分機構，長遠何以服眾？

仲有《公安條例》惡法呢？

1997年2月，全國人民代表大會常務委員會議決：《社團條例》和《公安條例》分別於1992年及1995年通過的主要修訂條文不能採納為香港特別行政區法律。如果不採取行動，則會欠缺規管結社和公眾示威遊行的法例，回歸後便會出現法律真空。為了避免這情況，香港特區行政長官在1997年4月就修訂這兩條條例的建議發出一份諮詢文件。經考慮所收到的公眾意見後，行政長官辦公室擬備了兩條條例草案。這些條例草案獲臨時立法會通過，並於1997年7月1日實施。

監控系統，乃至「國教」重推，乃至土共恐怖份子皇軍鷹犬仲有機會加人工……太多太多！

「五大訴求，缺一不可」，都仲未觸及全面而深層嘅革新。送中都惡唔過而家莫須有濫捕白色恐怖。單單一樣就收貨，點對得住自己、對得住手足、對得住下一代、對得住香港啊？

立國我心所求，宏圖理應籌謀

相反，要「光復香港，時代革命」，要留清白在人間，就要把握呢次可一可不再嘅機會！

觸碰主權，無可避免。單憑上面有關《公安條例》修訂嘅引文，經已睇到主權不在我等民眾，「一國」冇「兩制」冇「良制」只有「唔制」，棄主權無以保治權，覆巢之下焉有完卵。

「光復香港，時代革命」限於「光復香港，法統重光；撥亂反正，時代革命」，都係仲差少少。回顧六月拙文文末，亦實在溫和至極：

全面撤回修訂議案； 取消定性「暴動」； 立即釋放被捕抗爭者，唔再檢控； 成立各界獨立調查委員會，調查警方瀆職行為，處分相關警務人員； 凡遇到不公對待，招致性命傷害及財產損失者，予以賠償； 將冇牙老虎監警會同投訴及內部調查科，改組成獨立調查、監察及處分機構； 恢復《1995年公安（修訂）條例草案》版本，宣告非法「臨時立法會」重新制訂無效； 罪首問責。

爭取民主，首先要界定民眾社會做主體，任你將「民族自決」偷換成「民主自決」都係徒然，都迴避唔到「香港民族／國族」。建立民選政府及議會，就算結合嘅係被宰割嘅釋法權，實行嘅係畸畸哋形嘅憲政，依然有助完善香港嘅國體。練乙錚嘅「法理港獨」、「文化港獨」都不容於中共，唔通雙普選會咩？《人民日報》微博妖魔化「香港之路」（The Hong Kong Way）本意，唔通建設香港民主制度就唔會同樣畀中共批評「露出港獨本相」咩？而家講五大訴求，唔只雙普選，更加畀人話顏色革命啦。只要有「反心」，「造反」造唔造得成，都係「港獨」。

喺「留地唔留人」嘅吞併壓逼底下，喺動輒得「咎」嘅苦況困境底下，香港人別無他法、別無他途。縱使未準備，不得不準備。就算當下唔一定獨立到，都要有所籌謀，有所準備，令唔可行變成更可行。我哋未有臨時政府同議會、成熟專業嘅軍隊、穩重可靠嘅外交人才，但係老本、條件唔係太差，未至於需要白手興家建國。我哋唔可以一蹴而就，但唔代表時間會等人，亦唔代表我哋唔可以一路精進壯大。容我學吳叡人博士引用愛爾蘭劇作家Samuel Beckett嘅名句：

I can’t go on; I’ll go on.

認清現實，掃除心障。建設新香港，迎接新國家！祝願同胞福慧雙修、仁義兩全，香港武運昌隆、國運亨通！