電子筆記「MobiScribe」開箱後一周年使用心得

用咗成年先嚟寫使用心得，睇吓我幾懶

最近喺一個電子書嘅谷講起呢部「MobiScribe」，發現自己用咗成年都冇好好為佢記低一啲用後感之類，於是寫吓文啦。可能因為呢部嘢太就手，用得好自然，又唔覺有咩特別，但正正因為佢自然融入生活，先至係佢好嘅地方。

點解我會買呢部MobiScribe？

未用電子筆記之前，我其中一個喜好係去文具店揀筆記簿。

我專係揀啲細細本（唔好大過A5，又唔好細過A6）、又唔太厚唔太薄（最好150頁至200頁左右）、啲行距要6mm或者係格仔或者白紙、如果係圈圈簿嘅話啲鐵圈（鐵圈is a must）要夠硬淨、封面要淨深色……。

見到以上條件都知呢條友對筆記簿嘅需求係煩過人，所以買一本啱心水嘅筆記簿對我嚟講係一件好難嘅事。後來屈服喺MUJI筆記薄之下，總算唔駛咁煩燥，不過依然繼續周圍去物色啱心水筆記簿。

＜左圖＞可以插入Micro SD咭，用USD叉電+駁電腦。要叉超過50%電先至會對電腦有反應。＜右圖＞官方個套由一個磁力Clip控制開合，同Kindle唔同，開開合合個套都對電子產品冇影響，唔會入Standby mode，主要都係自己撳電源。

基於一直從事燃燒地球資源嘅工作而於心有愧，我一早就想改用電子筆記薄（啲開會紀錄DROP NOTES之後我9成係唔會睇番，都係為DROP而DROP，實在太浪費地球資源了）。以前流行PAD，我成日嫌PAD太細部，到電子產品發展成熟嘅呢個年代，市面上又充斥住大陸製同類產品，想搵一部非大陸製嘅機都唔係咁易（智能產品都盡量唔買大陸牌子或大陸廠出品）。

好在MobiScribe唔係大陸嘢，係台灣同美國合作研發嘅產品。知道有呢部MobiScribe之後，再上網睇埋啲介紹，我就覺得呢部嘢應該係我一直想要嘅電子筆記。

＜左圖＞.NOTE一頁只係8KB左右，除咗Keep番做.NOTE File，都可以轉做PDF或者PNG，儲存位置都有得揀。＜右圖＞裝咗BlueMail就可以用E-mail將啲NOTE send俾自己。

講咗咁耐，好唔好用先？

首先，要記住重點：呢部係電子筆記簿，其他功能都係附帶嘅。

以電子筆記嚟講，賣$179鎂嘅價錢，MobiScribe實在冇咩好挑剔。（我心目中另一部Dream機係萬惡$ONY出嘅，價錢貴幾倍）

MobiScribe嘅筆記主要行.NOTE檔案，SAVE咗個.NOTE落主機，亦都可以轉去SD咭、SEND去DROPBOX，或者裝完BlueMail就可以用E-MAIL SEND個File俾自己。喺SEND NOTE之前就已經可以選擇檔案類型，最好轉做PDF先至SEND（其實我鍾意SAVE PNG），喺電腦睇又得，SHARE俾人都好方便。尤其做會議紀錄嘅話就啱晒，一DROP完NOTES，用MobiScribe直接一嘢SEND E-MAIL俾所有成員，大家同時收到。

＜左圖＞筆記可以揀打直定打橫。＜中圖＞筆刷都幾豐富，簡直係黑白版小畫家。＜右圖＞唔同粗幼嘅筆刷。

我鍾意佢個NOTE功能係筆刷嘅粗幼同Texture，有好多選擇，直頭好似黑白小畫家，所以有時用嚟做design起draft，實在太過就手了，而且支WACOM仲有筆壓，真係好似帶咗本Sketch book出街咁。

NOTE嘅Template都有十幾款，雖然我用嚟用去都係嗰兩三款，但係已經好夠用（行距真係有6mm！配埋粗幼1point嘅筆，係我最常用嘅配搭），仲可以無限加頁（雖然頁數多會load慢啲）。

想Edit邊個NOTE都隨時可以，方便過用紙本筆記簿揭嚟揭去都揭唔到自己想搵嗰頁（至憎黐到成本簿幾十萬張紙仔Bookmark，我通常摺角就算）。

用MobiScribe有咩好？

記得最後一次喺舊公司開會，我就係用MobiScribe記錄，我舊老闆睇到我用，佢對眼立即發光，立即試用咗一陣。吸引老闆嘅注視，當然係好處。（不過嗰一刻我已經遞咗信走）

然後我都開始習慣用MobiScribe記低一啲idea、設定、計劃，諗到就隨時記低，真係好過以前用幾本筆記簿分類（係，我高鋒期係帶住幾本筆記簿出街，係好癲，好撚重）。

MobiScribe其中一個catch phrase係「BIG IDEAS」，亦都即係方便整理思緒，呢方面可以話係完全做到。

強大嘅PDF功能

另一個我鍾意MobiScribe嘅地方（其他同類產品都做得到），係佢內建嘅PDF Viewer「nPaper」，可以將個PDF食入去NOTE，換言之，可以直接喺個PDF檔案做筆記！

如果我仲做緊原創漫畫編輯，有呢個功能就可以好方便咁用嚟執漫畫家嘅分鏡稿。如果我仲做緊漫畫編劇，仲可以直接用呢部機起分鏡。做校對嘅時候都可以成個PDF掉入部MobeScribe，用筆執完成個OUT番出嚟俾designer對住改。做出版嘅人用呢部機，年中真係慳番好多紙！點解呢部嘢唔早幾年出呀！

淨係nPaper食到大容量嘅PDF，已經完勝好多平價電子閱讀器。

將成本Google PDF電子書放落部機，可以Highlight同drop notes。我就用嚟寫吓睇書感想咁。影相手震，Sorry。

如果遇着啲翻譯JOB有PDF原檔嘅話就正喇，放落部機睇住譯，可以喺個PDF做筆記同bookmark，方便翻查，慳好多時間。

另外，睇得MEDIUM啲文多，習慣咗Highlight，而用MobeScribe去睇PDF書檔，就可以手動咁加底線Highlight、加筆記。睇紙本書會愛護圖書而唔會畫花佢，但係用MobeScribe睇PDF嘅電子書就可以實現呢樣嘢。我成日睇書都喺內心OS窒吓啲角色或者觀點，而家可以直接寫低。

我試過部機READ 10MB以下嘅PDF都冇問題，遲啲再試大容量啲嘅PDF電子書。除咗讀到喺Google Book買嘅PDF電子書，亦都讀到自己SCAN嘅PDF。

其實我好憎PDF版本嘅電子書，一直係Epub嘅FANS，因為MobeScribe，令我有少少鍾意咗PDF電子書。

買咗Google book點樣拎出嚟？網上有好多教學，連我都做到，So can you。

PDF可以調校Contrast，係另一個正嘅地方。呢本書SCAN嘅，原本啲紙係啡色，放落呢部機強行變成黑白，再用Contrast就可以tune做適合自己嘅頁面。左邊張圖又係手震，Sorry。

講到咁好，有咩缺點？

我一開始就講咗，呢部係「電子筆記」，其他功能都係附帶嘅，所以，其他功能都係麻麻。

咩係「其他功能」？

1. 講緊佢內建嘅e-Reader。即係睇電子書功能。 雖然Support Mobi、Epub、txt（你知㗎，Kindle唔support外來Epub file），但係功能就少到近乎冇。冇得轉Fonts type，只可以調校字型大細，而且default字型係mono，標點符號全部向下對齊，而唔係置中，以我呢種睇電子書都要符合印刷規格嘅要求嚟睇，當然唔合格。

我係「堅持書本直排委員會」嘅唯一成員（冇公開收會員），而MobiScribe嘅內建閱讀器只可以睇橫排。仲要衰到連轉晒做直排嘅file，喺呢個內建閱讀器都強行變晒橫排…直橫兩種排法最影響嘅當然又係標點符號啦。

＜左圖＞原本係直排嘅Epub File，被強行橫排，連帶全形引號、書名號等都變晒形。＜右圖＞TXT File讀得好順，冇任何問題，只要自己Edit好個TXT就OK。只係個內建Reader實在係好蠢，只可以調校字型大細。

2. 裝其他e-Reader諗住解決問題？

MobiScribe雖然行Android，不過係4.4版本，部機得4GB，你都想像到佢Support嘅Apps係點。

我試過裝陳年版本嘅Kindle lite（v1.10）同埋Bookwalker（v4.2），兩個都係我常用嘅電子書閱讀程式。結果Bookwalker彈App，Kindle lite雖然開得到，不過就猛咁話要update新版本，但係又update唔到（無限loop）…

再試吓裝其他e-Reader？求其裝過啲支援Android 4.0左右嘅e-Reader，都係彈App。

暫時都係未搵到啱用啱心水嘅e-Reader，慢慢再發掘。（鬼叫我對版面係有好煩嘅要求？）

係咪唔用得嚟睇書？

咪話咗「筆記」以外功能都係附帶，唔好咁多要求，平價機係咁㗎喇。唔介意橫排、標點向下拍齊之類小問題，用呢部機睇書，係完全冇問題嘅。但係我俾Kindle嘅高質閱讀功能養慣咗，而家呢部機都主要用嚟做筆記，睇書只會睇PDF版。

如果睇到呢度，你唔介意以上我認為嘅缺點，都想入手一部MobiSribe，除咗可以去官網訂，亦都可以去Amazon或者去台灣嘅「udn買東西」網站訂。我喺美國Amazon訂嘅，連埋個套、運費，換成港幣，大約HK$1800，比我預算貴咗少少。

啱啱MobiScribe出咗第二代「MobiScribe Origin」，昇級至32GB，筆刷多咗，仲有白色（我愛灰黑版），睇介紹係年曆功能多咗、NOTE嘅Template多咗、Load得快咗，淨機價錢係$249鎂，都仲係平過萬惡$ONY機。而我現時對手上呢部初代MobiScribe都好滿意，未打算換機住。