《技術文：七個令 NBA更刺激（或無咁沉悶）嘅方法》
對於近幾年嘅 NBA，我只得一句評語：
「好撚悶！」
運動刺激同過癮之處，在於驚喜、意外、有娛樂性，過程、賽果係你想像唔到，而戰術、球員同技巧花招多花款，各有不同。
Sorry，從呢個角度睇，近年嘅 NBA簡直悶到仆街。宏觀嚟講：
－ 冠軍：近四年決賽戲碼係《勇士對騎士》，連續上演四年，當中勇士拎咗三屆冠軍，兩隊嘅差距一年比一年大。更重要係，大家未開球季、1230場常規賽未打，有90%人估東岸係大帝占士玩晒（中）、有75%人估西岸係勇士稱霸（又中），大半人已經預計總決賽係勇士對騎士（再中），勇士眾望所歸又拎埋冠軍（中中中）。我唔敢講話常規賽一啲都唔重要，只係當一場未打大家都估到冠軍係乜，嗰樣運動嘅娛樂性一定大打折扣。點解英超又要整乜嘢Big-4外號，但明明有一兩隊根本未夠班？望落去好似刺激緊張啲囉……
－ 戰術：與其話係五打五比賽，主流戰術淪為兩隊嘅三分賽。呢個並非個別球隊同球員嘅戰術，而係整個聯盟嘅潮流。
──2017–18球季，平均每場比賽射29球三分，佔總投射33%（兩隊夾埋；即係每射兩球兩分，就會射一球三分）。全數30支球隊平均每場投射超過20球三分。
──2007–08球季，平均每賽射18球三分，佔總投射29%。30支球隊，只有7隊平均每場投射超過20球三分。
──1997–98球季，平均每賽射13球三分，佔總投射19%。29支球隊，只有1隊平均每場投射超過20球三分。
所以某啲球隊（例如火箭），你見到四/五個球員圍住條三分線企，一啲都唔出奇，哈哈哈哈哈哈。
三分戰術主導，聯盟同球員亦有以下相關嘅發展：
－已經無乜人再射中距離。波只得一個，射多咗三分，射兩分嘅比例就低咗。以下係全聯盟以投射距離計算嘅射波分布，中距離嘅比例由20年前嘅42%，跌到去年嘅26%：
個別球員嘅比例更誇張。去年得分王 Harden只有11%嘅投射喺10呎至三分線以內，50%係三分投射；2002–03得分王 Iverson嘅數字分別係49%同16%，當年三分王 Ray Allen，佢嘅數字係32%同39%（即只有39%嘅投射係三分）。
－中鋒已經無乜用。應該咁講，已經冇傳統中鋒呢個位置，只係得返啲識射三分嘅高級高佬（90年代只係得 Sabonis一個識、後尾多埋Brad Miller）同只識 pick n roll嘅低級高佬，同埋識pick n roll同防守嘅嘅中級高佬－望下金塊 Nikola Jokic同爵士 Rudy Gobert。你睇波好少再聽到旁述講 Fade Away（向後跳投）呢個名詞。唔迫籃，邊使用 Fade Away？
－唔識射三分嘅（控球）後衛總低人一等，例如 Rondo、Ball、Michael Carter Williams（notable exception : Ben Simmons）。連高佬都要識遠射嘅年代，矮仔唔識射，好蝕。倒轉講，如果你努力改善到三分（K. Walker、D. DeRozan），就達明星級級數。
你講畀我知，呢五屆 NBA，有乜野驚喜？LBJ/Durant轉隊、Donovan Mitchell（B級驚喜）、勇士皇朝、Westbrook擦數據擦到全季三雙……有好幾季冇一球金球/入樽令我留底乜嘢深刻印象。
－全部人都要射三分、高佬唔識迫籃、控衛盛世、Point forward流行、Stretch 4更加流行、最流行將會係Stretch 5、fade away/mid-range jumper退潮。
話NBA悶係咪太過武斷？係，不過我覺得真係好悶。NBA已經無90年代咁刺激（老屎忽出沒注意）：球員嘅體能同技術比起幾十年前好，但進攻模式單調咗。
另一邊廂，科技進步，League Pass、又youtube highlight，欣賞到嘅賽事同精華比以前多咗。睇得多，新鮮感自然大減。Law of diminishing marginal value，對不對？
我唔知道呢個情況幾多係嚟自 NBA真係比以前單調、幾多嚟自睇得多而新鮮感減退，要令 NBA更刺激（或無咁沉悶），聯盟要認真考慮以下方法。
───
1. 調整季後賽排名方法
目的：平衡東西岸實力，令季後賽更激烈
東西岸實力太懸殊，西岸嘅第8名實力往往等於東岸排3－4名。有人建議廢除東西岸，30隊最好成績嗰16隊入季後賽，再根據成績排名次。
我建議暫時維持東西岸，每邊最好成績嗰4隊入季後賽，成為種籽隊，淨返嗰22隊排成績，最好嗰8入季後賽，再順序撥去東西岸（如果當年東岸首名成績好啲，第9隊就撥去對西岸第1、第10隊對東岸第1）。
好處：大致保持東西岸（雖然我唔明點解要保持東西岸）、增加下線球隊實力，令賽事更加激烈。
2017–18季後賽： Raptors (1) vs Wizards Celtics (2) vs Bucks 76ers (3) vs Heat Cavs (4) vs Pacers
Rockets (1) vs Wolves Warriors (2) vs Spurs Blazers (3) vs Pelicans Thunders (4) vs Jazz
變成
Raptors (1) vs Pacers Celtics (2) vs Jazz（有睇頭） 76ers (3) vs Spurs（更有睇頭） Cavs (4) vs Heat
Rockets (1) vs Pelicans Warriors (2) vs Wolves Blazers (3) vs Nuggets Thunders (4) vs Bucks
Wizards out => Nuggets in；其他隊伍只係對手唔同。
以2018年計，改賽制對東岸影響不大－新加入的馬刺及爵士都未有足夠實力挑戰大帝占士；西岸較有趣，火箭面對的對手比原先的強些少（由木狼同爵士變成塘鵝同雷霆/公鹿）。長遠嚟講，咁布局未必徹底改變東西強弱嘅差別，但起碼公平些少。一步步嚟，最後取消東西岸，不失為上策。
隨住大帝去咗湖人，嚟緊呢季西岸會變成放工時間金鐘站咁，更迫、更多人喺車廂、更多更多人連車廂都上唔到……有更多人連車廂都望唔到，你叫 Damian Lillard同 Anthony Davis幾咁無奈……
評分（五粒＊最高） 創新度：＊＊＊ 重要性：＊＊＊＊＊ 可行性：＊＊
2. 增加明星賽競爭性
目的：拯救垂死嘅明星賽（或給予安落死）
2003年 All Star Game佐敦射入致勝一球之後（但畀仆街謝美奧尼爾破壞咗），我冇睇過明星賽。明星賽已淪為浪射三分、花式入樽賽、零防守，同浪費時間係同義詞。舊年改咗隊長猜包剪揼揀人同贏波有奬金，情況無太大改善－喺明星賽嘅面子同金錢對呢班球員都唔係太強嘅誘引。
嗱，你唔好以為明星賽一路如此，以前（老屎忽又出沒注意）絕對有競爭性，兩隊會出力打下。1992年俗稱魔術手明星賽，正選共有九個 Dream Team成員；第一節可謂經典，娛樂性同功架兼備：
唔知幾時開始（估計係 T-Mac 2002年第二節8:03秒自己掉畀自己 Alley Oop嗰刻），明星賽開始墮落，近年仲無聊過旺角大媽唱歌跳舞。相比下，三分賽同入樽賽仲刺激，更有娛樂性。
要鼓勵班大帝出真功夫，明星賽嘅奬品可以改為：
－勝出一方球員所屬嘅球隊，嗰年 Lottery Pick嘅名次全部上升一格。球隊老闆一定同你死過，但球員又未必因為球隊著數而出力……
－勝出一方球員，有權休息幾場比賽而無需受罰……
－勝出一方球員，可以指名叫輸嗰邊嘅一個球員做一樣嘢（例如今年贏波嘅占士，叫輸波嘅杜蘭特同韋斯布兄影張合照……），當然條界線去到邊要再諗。
你覺得啲奬品太過豐富，對一場明星賽嚟講多得滯？其實我都覺……無辦法，鬼叫班友喺明星賽打得咁求其。不如索性取消五對五比賽，改玩三打三，幾個隊長揀隊友，再加強圍爐取暖嘅熱力。
又者，索性取消明星賽，淨係入樽賽、三分賽、技術賽就夠。
評分 創新度：＊＊＊＊ 重要性：＊ 可行性：＊
3. 根據籃框嘅距離計算投籃所得分數
目的：鼓勵戰術多元化／停止於比賽中進行三分賽
而家單純計兩分、三分，禁區射波又係兩分、退後去到19呎射波（命中率低啲）又係兩分，咁梗係再踏後一步射三分（分數多50%、但命中率只係差些少）。呢樣嘢好奇怪－三分線喺70年代尾引入聯盟，啲人喺2010年先發現。
喺科技嘅配合下，大可改做禁區至10呎維持2分、10呎至三分線前2.5分、三分線就3分，咁戰術就多元化得多。咁一變，大致上每個距離嘅預計得分將會變得較接近。師兄，當 NBA觀眾席張張唔同價格、前後爭一排嘅座位價錢已經好大分別，有乜理由射波只係得1/2/3分三個間距？
去到盡啲，當然可以根據距離將得分定為2.1, 2.2….2.9。總之大意係：投籃得分同距離籃框距離成正比。
至於加超過距離4分波，屌！而家整，短期內咪淨係益Curry同火箭嘅 Gordon！而家嗰兩隊波仲唔夠屈咩？
為加強球賽刺激，亦可以改喺第四節最後五分鐘，2/3分波變為3/4分波，再加5分球，完全廢除垃圾時間，等你班球員無得抖。
評分 創新度：＊＊＊＊＊ 重要性：＊＊＊ 可行性：＊＊
4. 派發借用球員券
目的：令強隊之間嘅競爭更加激烈
好多人批評啲球星組超級球隊（aka 三名明星級球員圍爐取暖隊）。戇鳩！超級球隊一啲問題都冇，幾多人肯畀錢入場睇 Infinity War？問題係啲球星夾埋一齊根本發揮唔到1+1+1>3，想拍 Marvel “The Avengers”，點知變撚咗 DC “Justice League”……該唔該煨？望下雷霆，夾埋$120 million買咗 Melo一季服務，連試多一季都唔試，幾咁失敗？又例如木狼，究竟Wiggins/Butler/Towns邊個係大佬？你擔保未來幾年球星如云嘅76人、太陽唔會內鬨？
啲人以為超級球隊好容易整，一隊波要有齊以下幾個條件：
－ 選秀超叻（以前雷霆、勇士、馬刺）、或者超級好運（騎士、76人、太陽）、或超級有錢（而家雷霆）
－ 本土市場夠大（今年76人、下年小牛，即使有薪酬空間都吸引唔到人）
－ 老闆肯交富豪稅 (luxury tax)
－ 教練駕馭到星級球員s、說服到佢哋交出 Alpha Dog位置 (熱火嘅Wade)
－ 明星球員肯屈就，由球隊一哥變二佬甚至乎三哥 (Bosh, Durant, Love)：唔怕畀人話抱大腿，又唔怕畀舊東家啲球迷噓
粗略估計，每屆 NBA大概有20–30明星級球員，假設有6隊超隊（共佔18個明星球員），依然6隊可以有兩個明星／12隊有一個明星。
以2018年為例，
4個明星球員 ：勇士 2.5個 ：雷霆、火箭、76人 2個 ：騎士、塞爾特人、拓荒者、速龍、塘鵝、爵士、木狼 1個 ：馬刺、溜馬、金塊、公鹿
當中頭嗰6隊，已經稱得上超級球隊，同我所講大概吻合。勇士真係無計，有眼光、選秀權即使唔係排頭都揀到好嘢（Curry係7th pick, Thompson係11th pick, Green係35th!），返到嚟細心栽培。幾年間搵到三巨頭，仲有走咗嘅Harrison Barnes，證明勇士揀選同訓練新人堅勁。McGee /Iggy /Livingston，邊個估到佢哋喺咁嘅年齡仲喺一隊冠軍球隊有實質貢獻？當年雷霆亦厲害，一度擁有杜蘭特、哈登同韋斯布克，出咗名揀人叻嘅仲有馬刺、塞爾特人。勇士更加出眾，更叻豬亦係最仆街，係喺2016年輸咗畀騎士即刻簽咗 Durant（我開始覺得嗰年領先3–1再輸3–4係特撚登）。本身3個明星已經接近無敵，而家係肯定無敵。
超級球隊不是問題；問題係超級球隊不夠多。問題係，點鼓勵強隊之間嘅競爭？
抄職業足球有租借球員制度，每季每支 NBA球隊派一張球員借用券：
－ 借用券用嚟借用另一個岸球隊嘅其中一個球員。需得到該隊班主及該球員同意；
－ 球員薪金由借用球隊支付，再加一個百分比畀球隊作租借費用；
－ 借用券使用期間為二月中（球季一半）至季後賽開賽前；
－ 球員借至球季完結，其間不能歸隊。
呢個制度癲囉！季後賽常客同大牌巨星就肯定唔會借出嚟，不過喺弱隊嘅巨星、二三線球星、經驗老將、特定人材（三分射手／防守專家），頓時變成搶手貨。佢哋效力球隊去到季中都知爭標無望，班主又要付出巨額薪金，呢張券一石二鳥，既解決班主白畀人工，球星又可加入另一球隊試下衝冠，最緊要係有球衣賣呀！乜都係假，賣球衣緊要呀！（屌你唔係超級巨星點賣球衣？）
喺博奕之下，應該無乜球隊肯借人畀一線強隊；啲實力二線嘅，反而有機會透過呢張咭嚟填補球隊空缺，或加入邊線球星嚟打第六人增加攻擊力。撇除球隊要時間磨合，借人券能大大加強超級球隊對決嘅可能同可觀性呀！
呢個方案，聯盟方面真係要諗。
評分 創新度：＊＊＊＊＊ 重要性：＊＊＊＊ 可行性：＊
5. 提早返公布重要球員奬項
目的：加強奬項重要性
2017年之前，聯盟喺季後賽嗰陣陸續公布各個重要球員奬項，包括 MVP、最佳新人、最佳教練；2017年開始，聯盟改將所有奬項喺休季嗰陣，以頒奬禮形式頒出嚟。
屌你老母，格林美大奬一嘢變撚咗新城勁爆音樂奬。
有球隊喺總決賽贏咗總冠軍，係全季嘅高潮，亦代表該球季落幕。冠軍已定，過去一季已經喺過去，邊個再拎 MVP已經零意義、無意思。
MVP奬項一般喺季後賽第二圈左右頒發。喺2000–16年，17年當中只有3年嘅 MVP（02年鄧肯，10年大帝，仲有下面另一個）贏唔到嗰圈賽事、入唔到東西岸決賽，比例係17%；餘下嘅14個 MVP/83%，都能夠喺得到 MVP後勝出該系列（如果再推遠啲，加埋佐敦、馬龍、巴克利、奧拉祖雲，MVP入東西岸決賽嘅比例更高）。我相信，喺第二圈頒個奬，對 MVP嗰隊的確有振奮軍心嘅作用。而改用頒奬制兩年，已經有去年嘅 Westbrook一個入唔到東西岸決賽，比例係50%（time would tell if this changes when the sample number increases）……
凡事無絕對，我知你中意睇人仆街，拎 MVP而輸咗第二圈嘅經典，就有兩個……
──1995年西岸決賽第一場開賽前，聯盟頒 MVP畀馬刺嘅羅賓遜（David Robinson）……對手火箭嘅中鋒奧拉祖雲（Hakeen Olajuwon）唔係太高興，結果摧毀咗海軍上將……
奧拉祖雲上年先拎完 MVP，今屆輪到羅賓遜啫……唔好咁孤寒啦屌你，你拎撚晒咩。話時話，佐敦退休年半，你條友先拎到兩屆冠軍渣……
──2007年 MVP係小牛嘅魯域斯基（Dirk Nowitzki）。但首號種籽小牛當年畀老八勇士喺首圈踢咗出局，即係連 MVP個奬都頒唔到……真係未曾酒醉已清醒，未曾深愛已無情呀。
贏好、輸好，總之打緊比賽頒常規賽嘅奬，好過癮，亦非常合理。而家啲乜鳩頒奬禮，係啲擦存在感、維威喂、錢錢錢嘅 celebrity show。將啲奬推咗喺總冠軍後宣布，無晒 market impact，只有 marketing impact。
推返去季後賽頒，係撥亂反正！
評分 創新度：＊ 重要性：＊＊ 可行性：＊＊＊＊＊
6. 停止過份保護進攻球員 aka 球例復古
目的：加強攻防對抗性，攻守平衡
而家 NBA球證踏入「乜鳩都吹、又乜鳩都唔吹」嘅紀元：
－「乜鳩都吹」：防守球員只要掂一掂進攻球員，就會畀人吹犯規。進攻球員前後兩呎，真係好似國家國土咁，你入侵佢領空，冇掂到都要吹罰；
－「乜鳩都唔吹」：進攻球員走步、進攻犯規、非法單擋呀，要非常離譜先會吹。有時候以為 NBA已取消非法單擋。
進攻一方擁有絕對優勢，主要因為係保護進攻球員，令比賽得分多啲、好睇啲；次要原因係預防球員有過份粗暴犯規，搞個《奧本山宮殿大暴動2.0》出嚟。為咗防犯球員有過多肢體碰撞，防範於未然，總之掂就吹。
見識過當年淨係防守嘅年代，而家狂飇分當然好睇。多年嚟 NBA為鼓勵進攻，成效顯著：
──每場每隊平均得分，由1999–2003嘅94.9，升到09–13年99.9分，14–18年103.1分，十幾年間升咗10分。
──兩分、三分同罰球命中率都有些微上升。
──每隊平均失誤，近年大概4.7–5.1嘅水平，低於90年代嘅5.0–5.5
可惜，無防守嘅籃球，一啲都唔好睇；連 playoff嘅防守籃球都冇埋。再咁落去不如將投球啲規則用喺 NBA度。而家嘅情況仍過去十幾年一堆因素所造成嘅結果，要改變，只能循球例慢慢入手：
－局部恢復 hand checking（例如喺三分線可以hand-checking） －嚴打非法單擋 －球員帶波衝埋去對方度射波，吹少啲 －減少球員因球證判決作出反應而吹技術犯規 －擴大 restricted area（鼓勵爆籃、上籃同去籃底進攻） －球員插水要即刻判技術犯規（Harden, Chris Paul簡直係插水天王） －最尾兩分鐘開始，球隊過犯減一，唔使一去就射罰球 －唔准大帝再走步
評分 創新度：＊＊＊ 重要性：＊＊＊＊＊ 可行性：＊＊＊
7. 改善賽制
目的：確保賽事流暢進行
NBA賽事停鐘停得太多太耐，嚴重影響賽事節奏，亦令睇現場比賽嘅時間成本大大提高。尤其是賽事最尾嗰三五分鐘，隨時四個 time out 、六個 replay、八次罰球，賽事好似移師去黑洞中心打咁，球員場上一秒等於觀眾世界一分鐘……
借鑑世界盃，使用精密嘅西德科技，增加背後重播中心嘅功能，協助球證更快作出判決。大佬，鑊鑊走去場邊、抬個電視上枱，睇嚟睇去，再傾一輪，明明射得出都變軟皮蛇，好煩好厭好悶。重播係必要，長遠會加強球證執法嘅公信力，唔廢除得（至於世界盃用 VAR搞得咁廢，我覺得係世界足協特登，等你啲人唔建議再用，個判決大權仍然留喺球證度）。
評分 創新度：＊＊ 重要性：＊＊＊ 可行性：＊＊
───
仲有好多人建議其他嘢，例如全部薪酬(salary cap)定個硬上限／絕對上限 (hard cap)、每年每隊82常規賽減少、設定4 分線（上面講咗）、改變合約年期，超級複雜，諗同寫都唔過癮，喺度唔多講咧。
───
籃球比賽，攻守平衡，先有意思。而家太過著重進攻－仲要只係射三分，或者拎住個波直行就有 foul……真係好悶（無錯我係講緊你呀 James Harden）。
聯盟制度、賽制、球例並非一成不變，要吸引普通球迷睇波，又要滿足要求較高嘅深度球迷，必須不斷改進。
結論，係冇嘅，因為近年 NBA非常好境，人人開心，完全無動力去改。大家等下咧！個經濟一轉勢，個市一唔好，聯盟就會諗方法改賽制改規則。到時用咗以上一條半條建議，我會之後三十年每年出一千篇文吹噓自己有幾厲害，講到自己九十歲。
數據來源：
－http://www.nbaminer.com/shot-distances/ －https://www.basketball-reference.com/
basketball reference係我常用嘅參考數據。詳細、易用。
Follow me on Medium，我嘅文字唔會令你失望（不過寫文嘅速度會）。 https://medium.com/@relgitsjg
【今年史兄喺Medium所得稿費，將全數用作支援魚蛋革命嘅義士。】
Facebook page：https://www.facebook.com/Relgitsjg IG (主要用嚟睇女仔) : https://www.instagram.com/iamuncleshit/