融入咗台北嘅生活？

雖然我讀旅遊系、曾從事過旅遊業，知識同意識上會提醒自己當去到外國，都要尊重當地嘅社會文化、適應熟習當地人嘅生活習慣；但同時地出現一種我起名為「抗拒港燦」嘅思想，唔只提醒自己唔好做「港燦」嘅討厭行為，另一方面會抗拒去一啲「港燦」常出沒嘅地方。

就以台北為例，以往我好怕去101、台北車站、西門町..... 之類嘅地方，因為好怕見到周圍都係「港燦」仲隨時會見到佢哋啲「大鄉里出城」以至失禮行為然後會無名火起，因而極少去，就算要去都係「買完要買嘅嘢就閃人」嘅心態。但近呢大半年，諗法出現變化，把對香港略有認識的台灣朋友將西門町同旺角做類比，走出「台北人去西門町=香港人出MK」，再沒怎樣覺得「此地不宜久留」。

另外就是搵食醫肚，好堅定要食「本地嘢」；除咗唔想掂M記之類國際品牌之外，仲會認為食返台灣嘢先至係啱嘅。不過今個三月去兩次台北，認識了新朋友，拓闊了生活圈子，情況出現了變化。

約去食泰菜、日本菜、越南菜...... PUB式西餐廳飲酒食嘢，甚至港式酒樓飲茶，完全無抗拒。表面上純粹遷就朋友們喜好 (其實係我懶得諗 and 搵)，但靜落嚟諗 ── 响香港約朋友食飯係乜都食，响台北 Why not do the same！再衰啲講，自己開口埋口「都幾熟習台北嘅生活」、又成日話「台北嘅生活習慣同香港好相似」，點解唔可以將响香港嘅生活模式搬過嚟台北？一嘢 K.O. 自己！

唯一無變嘅係酒店 (台灣人叫「飯店」) 位置選擇還是遠離台北車站、西門町 (exactly 邊區梗係唔講)，唔係怕撞口撞面「港燦」，而係一如响香港都怕住响啲嘈雜嘅地方。

以上嘅心路歷程變化，繼而萌生移民台灣打算？仲未去到呢一步。但至少確定自己可以响台北生活而唔怕適應唔到，就算唔係移民，都叫做心態思想上多一個生活落腳點吧。