撐香港同人！【音魂不息──粵語動漫文化同人音樂匯演】

寫文撐老友。由同人詞作詞家內木一郎（我老友）擔任創作總監，同人音樂組織「音魂不息」主辦，（可能係）香港第一個同人二創音樂 + 戲劇匯演。

［演出資料］ 演出節目：【音魂不息──粵語動漫文化同人音樂匯演】 演出日期：2018年7月21日 演出時間：晚上7:00 ~ 晚上10:00（設有中場休息，唔駛忍住唔去廁所） 演出地點：柴灣青年廣場Ｙ劇場 門票費用：HK$100（早鳥優惠平$10~去到7月20日都仲係早鳥） 演出歌手：DS、Echo、Marumaru、Neko、夕音みとり、五島漾、卓翹（ViuTV《手作Low Gear》其中一隊成員，佢話至憎人叫佢卓翹哥哥）、阿悠、雪鈴（FD子，人靚聲甜）、零魂、銀牙、藍悅（「音魂不息」成員）、靈（「音魂不息」成員） 演出演員：Eva、Errol、Katy、小艾、小嵐、神木堯、靈唯雪 主辦單位：音魂不息 創作總監：內木一郎 音樂總監：靈＠音魂不息 行政總監：藍悅＠音魂不息

活動專頁：>>呢度<< 可以睇埋演出者、台前幕後嘅介紹 （以上按官方最新公佈為準）

表演啲咩？

簡單講，係將動漫迷會開心嘅動漫歌曲，填上同人二創嘅粵語歌詞，加同歌曲意思相連嘅戲劇。 咁又同音樂劇有啲唔同，因為唱同演嘅係兩班人，我都想知佢哋點穿插個演出。

有咩歌？

主辦話未公佈得住，總之係動漫歌同Ｖ家歌。 （吓？Ｖ家係咩？除咗問Google大神，入場之後應該明。）

個劇講咩？

青春愛情劇（大鑊，至憎呢種…）。 我問主辦Ｒ嘅劇情簡介是咁的（我流轉述）： 個劇主題講一個香港青少年嘅成長抉擇，分上下半場。 上半場，可以話係青春愛情劇。念慈（少女mode）同好多女仔一樣，想要一個白馬王子，不過現實話佢知，邊有咁簡單，講就易，哪有咁多靚仔。愛情唔係許個願就有，個天唔會跌個男神落嚟。好喇，少女念慈轉眼成長，拖有拍過幾次，或者唔特別，或者你同我都經歷過同佢一樣嘅愛情，但係你仲記唔記得，第一次拍拖嗰陣，你係點？同而家係咪一樣？你有冇俾呢個世界扭曲自己嘅愛情？ 下半場，念慈長大成人（成人mode），冇咩青春冇咩愛情，仲畀而家個社會搞到灰埋。啲中學同學有人做咗黑警，有人走去衝。搭地鐵又畀水貨阿嬋恰，唱首歌啫就畀人趕。如果你係呢個主角，又可以點揀？

歌手陣正唔正？

如果你唔熟香港嘅同人歌手（其實我都唔係好熟），我會話你聽：好正！ 我係歌姬雪鈴嘅FANS，有一半係為佢入場。曾經見過佢Cos住唱MarcrossF，現場演繹係正到無倫。主辦「音魂不息」女歌手靈姐係實力級歌手。仲有同人老前輩卓翹哥哥（唔好打我），大家去佢FB PAGE，會見倒佢PO好多自彈自唱嘅片，又識畫嘢又識LOW GEAR又識唱歌，卓翹哥哥真係屈晒機。

啲歌正唔正？

雖然未公佈歌單，不過想聽動漫改篇歌已經可以買定飛入場。有份填詞嘅內木一郎填過唔知幾多百首歌，出咗Ｎ本歌詞集，我希望現場有佢啲詞集賣啦。

點解要撐？

我撐老友，但係同時撐香港同人、撐香港創作。 老實講，今次係主辦第一次搞呢種SHOW，我唔期望會做到同經驗劇團一樣，但係就咁睇演出者嘅名單，係有期待嘅。 香港同人係好小眾嘅興趣，一直以嚟主要出書、出精品，有同人畫到去日本發展，有同人畫到做職業級漫畫家，有同人開到GAME公司（例如我舊舊舊舊公司），但係未見過有同人玩到上舞台做SHOW。 近幾年香港同人場嘅舞台活動好精彩，流行喺台上面Cosplay Show，主要以跳舞為主，又型又開心。但係真係喺同人場表演多，玩到獨立做SHOW，仲要玩到有劇情，可能真係第一次。 同人由地起，我樂意見證地基慢慢建成。希望將來更多人會用唔同嘅方法玩同人。做STAGE係難嘅，所以我點都撐。冇咩可以做，都係寫吓文推一嘢咁啦。

點買飛？

可以即時walk in，遞一張紅色銀紙就可以入場。 亦都可以訂早鳥飛，日本叫做前賣券。

我會唔會入場？

梗係會，早鳥飛已訂。（雖然未過數） 叫人去自己又唔去，呢啲咁衰嘅我唔會做嘅。有緣嘅話，會場見。

最後，主辦話，今場OUT BUDGET賣一張蝕一張，未開場已經可以宣佈係赤字。

喺香港，赤字都肯做嘅生意，同人算係其中一樣。 （雖然一赤字就唔係生意） 嗱，當然有人賺嘅，但係賺嗰個唔係我，亦都有好多人次次都蝕住參場。（話時話，我十年冇出同人了…）

My Medium Record：(Update中) https://readmedium.com/my-medium-record-e1f290f9c470 每月月頭會將部份上月免費文章轉做會員限定文章。

順手睇埋吖～

個人BLOGss~ ☆伊死的漫畫特區 （講漫畫、讚漫畫）