《「明日戇鳩」》
「明日大嶼」公布咗一周，對此呢件事沉澱咗幾日。不過事忙，僅能簡單寫一下我對「明日大嶼」嘅睇法（簡稱「明日戇鳩」）：
睇法
香港唔夠樓是真、唔夠地也是真（有班人成日話香港有幾十萬個空置單位，真有趣）。
但我唔同意填海用嚟解決唔夠樓、唔夠土地嘅問題。
(1) 要喺源頭減廢，即減少單程證人數，減少需求，否則無論再多新嘅土地（嚟自高爾夫球場好、棕地好、填海好、乜叉都好），只係用嚟填氹。今次填完1700頃，廿年後要再計劃填多1700、甚至3400。古文《六國論》都有教：『薪不盡 火不滅』。還嚟還去都係利息，本金冇郁過，戇鳩嫁咩。
(2) 繼續開發新土地之前，先搞好棕地同加盡地積比率。
追數
一般土地開發要10年，2018年唔夠地，邊個責任？2007年邊個係發展局局長？林鄭月娥。好多故事、資料，例如搵下當年啲地嘅地積比，同最高可發展嘅相距，肯花功夫，可以出本三千頁嘅書。
借錢
有個中小企會計師叫陳茂波，話舉債發展「明日戇鳩」。
你戇撚鳩咩，借咗錢唔撚使還？廣告都有講：「借錢梗要還」。問銀行借一萬億，資產/現金同負債同時多咗一萬億，財政狀況好咗去邊？你以為銀行係觀音借庫，借咗唔使還？
如果淨係拎個島去做抵押而政府唔做任何保證，即係個島畀唔起錢破產嗰陣政府要塾屍底、籌旗唔夠錢要保底，我覺得OK。如果有投資者咁戇鳩願意投資，咪由得佢戇鳩。唔好慷他人之慨、唔好亂用幾代納稅人儲落嚟嘅錢。
77萬
好多人話每日150單程證，14年等於77萬人，相當於「明日戇鳩」落成時可容納嘅人口，即10000億嘅建設只用嚟照顧新移民。呢個完全唔係反對「明日戇鳩」嘅有力原因－因為其他任何開發土地嘅方法，你可以用同樣方法去反對（這是為何源頭減廢咁重要）。不過，呢兩組數字嘅巧合，作為寫作／報導嘅tag-line，非常搶眼、非常好使好用。
劉德華
我諗咗好耐，如果為條片配旁白嘅係林嘉欣，而唔係劉華，我會點諗。
一聽到董建華，陣老人徐出晒嚟，正常人睬你有味；劉德華咁世界仔，依然肯下海，原因得三個：蠢；佢身邊嘅人無盡力做好due diligence，話清楚畀佢知風險同後果；佢知道風險，不過由於娛樂圈人情同/或更強嘅政治壓力，依然被迫去做。
我相信劉華，劉華已經被神化，正如好多人只會記住米高佐敦喺球場上神一般嘅表現，而故意忽略佢個人有幾乞人憎。
推倒方法
要推倒「明日戇鳩」，只能從技術可行層面配合法律上進行，大家啲乜嘢理據呀、道理呀、上面寫啲打飛機、遊行呀，唔係唔啱，但無用，收埋先（嗱，我叫你收埋，唔係叫你收皮）。仲有一個方法（下述）。
「明日戇鳩」（其中一個）目的
「明日戇鳩」有很多目的。其中一個比較隱含嘅（政府即使有呢個意圖，亦絕對唔敢宣之於口），就係要除去地產商喺經濟及政治上權力：
政府透過發展全新土地，將當中70%以上發展成公營房屋（更多是是銷售房屋如居屋），最終目的希望將房屋定價主導權由市場轉到政府手上。
冇咗地產市場嘅話事權，地產商喺政治經濟層面嘅影響力肯定大減。呢樣嘢好複雜，涉及好多層面，亦唔係三五年做到。就樓市而言，林鄭想做嘅，大致是「新加坡」模式－絕大部份市民有資格、亦有足夠嘅供應畀市民住喺價廉物美嘅國營銷售房屋（所謂「組屋」，相當於居屋；佔80%人口），私營市場只是陪襯，你要超級有錢才能負擔（政府也懶理呢班人嘅死活）。
1. 林鄭在6月底嗰六招，變相宣布徹底放棄私樓市場。六招當中，將土地由私樓變公樓，是真的，可起更多居屋（不過唔夠）；修定居屋定價，讓更多人有資格，也是真的；而空置稅，則是廢的。
2. 施政報告中依然講明將政府新發展嘅土地，撥70%+做公營房屋。
3. 施政報告中嘅「土地共享先導計劃」（名字同早年嘅「大腸癌篩查先導計劃」有得揮），發展商起樓嘅面積與政府分成。他日樓起好，你某某地產商嘅樓，當中有一半用嚟做居屋、或附近有幾楝，同一地點、同一地產商，同樣商品嘅價格唔會相差太遠，對不對？（當然會因為市場準入、樓層高低而有差別）。地產商定價，還有二手樓價，還可以脫離居屋定價嗎？
4. 長遠來看，當政府擁有整個香港70%-80%銷售房屋的新供應，誰擁有定價權？現時政府為居屋定價，並不看市場，只看申請人收入；未來這個收入會越提越高，政府起嘅樓越嚟越多樣化，一層一層，最終影響私樓定價。
要達到此目標，首先加大政府籌碼。而填海－包括「明日戇鳩」－是政治阻力最少嘅方法。不要傻豬了，整天在 Facebook叫春、像我這般在 Medium寫幾篇文，叫政治阻力？我也不好意思寫出嚟。地主們到北京打個報告，令你林鄭無得連任，才是政治。
（點解要咁做，呢度引伸去政治問題，一樣我唔熟嘅嘢）：共產黨好撚憎地主階級；當香港嘅地主－各大發展商－喺政府經濟民生全方位擁有不可動搖嘅權力，我更加肯定佢哋係共產黨嘅最終眼中釘－短期嚟講當然施以甜頭，加以利用，以打擊短期共同敵人。
長遠嚟講，消滅地產商，最少佢哋嘅權力同影響力減低，乃共產黨計劃之一。搞撚掂啲香港人，走到嘅迫你走、走唔到嘅溝淡晒，成班窮撚落晒嚟，跟住唔搵你班有錢佬開刀咩？
【含意】
從以上推演，得出以下結論：
1. 要拉倒填海，一定要拉攏地產商，尤其是喺新界好多農地嘅發展商。佢哋先有絕對誘引令「明日戇鳩」拉到，一為神功二為弟子。我相信，有不少地產商知道「明日戇鳩」對自己不利，基於好多原因唔敢／唔方便出聲。認真敢怒不敢言。
你睇下，有錢到咁呀，都唔可以講自己想講嘅嘢，香港真係垃圾無比。（btw，誠哥2012年開始就唔同你班撚樣玩地產……你知道誠哥有幾勁未？）
2. 未填到海之前，政府繼續狂起居屋，並擴大政府銷售房屋嘅網絡，起更多更豪嘅樓，畀更高收入嘅人。一來起公樓較受社會接受，二來令供應增加，三嚟就係政府喺樓市嘅角色會更加重要。真正嘅廉租屋就收皮，係咁姨起下，唔會加好多，公屋輪候時間一直加長。
3. 好益地主嘅嘢，例如畀誠哥發展碼頭－唔使諗；明顯傷害到地主同有錢佬嘅嘢，例如收返高爾夫球場，亦唔會做，林鄭唔會畀機會啲地主發惡。
4. 如果經濟大逆轉（例如支爆，呵呵呵呵，啲人成日叫支爆爆撚咗十年）+樓市瘋狂下滑+庫房莫財嗰陣，幾個大發展商出錢出力出土，畀錢起自己啲地嘅基建，分三成畀政府，起好啲樓用居屋定價，用公眾壓力迫使林鄭放棄呢個計劃，不是沒有可能。
不過，呢樣嘢應該唔會發生－香港地產商，出名賤、人渣同仆街，所以香港先有今日咁嘅局面（二乘二叔一家人喺南生圍放咗幾多次火？你講呀！）。再者，嗰個「土地共享先導計劃」，有可能令部份地產商－尤其細嗰啲－有機會分到甜頭。
短期小恩小惠、暗中分化，拉攏，令你哋鬼打鬼，咪正正喺香港過去21年喺民間同普遍政治層面嘅縮影？
要拉到填海，倒頭嚟要靠令人深恨痛絕嘅地主們。
真諷刺。
（因為趕稿，未及謄文。）
Follow me on Medium，我嘅文字唔會令你失望（不過寫文嘅速度會）。 https://medium.com/@relgitsjg
【今年史兄喺Medium所得稿費，將全數用作支援魚蛋革命嘅義士。】
Facebook page：https://www.facebook.com/Relgitsjg