瞓身推！劇本設定畫功分鏡都一流嘅科幻漫畫《墜落》

繼續推介「港漫動力」系列。繼續私心硬推。長文慎入。

＞＞FRIENDS LINK＜＜

因為同作者熊人老師相識實在太耐，好清楚佢嘅創作風格係點樣，當初一聽到《墜落》嘅大橋、一睇設定同分鏡，就想像到完成品一定會係一本好好嘅作品。喺熊人老師孤軍作戰嘅過程當中，我冇咩幫到佢，唯有同「港漫動力」嘅主辦大會班導師講N次「呢條橋好正」「香港好少有咁樣嘅作品」「我相信佢一定做得到」，人肉擔保。好在大會啲導師又包容我哋呢個「任勝漫畫家+任勝編輯」組合。

《墜落》講咩？

軍方「機人」［*1］R310（傳統日系美女主角機）喺一次空戰入面，同敵方隊長「機人」8210（都係美女，你當係EVA嘅明日香嗰種，我杯茶）一齊墜落至一個人煙罕至嘅峽谷，距離地面1000米嘅地方。R310喺墜落撞擊，意外解開咗一個睡眠裝置，令裝置入一個小朋友由長眠中甦醒。基於機械人三大原則［*2］，R310判斷要帶呢個小朋友返番去地面，就咁就開始咗一個機械人同人類嘅冒險之旅。

不過地底原來險阻重重，有不知名嘅怪物、有宗教狂熱嘅地底住民，無論怪物定係宗教撚都追住R310同小朋友唔放。

鏡頭一轉，敵軍一隊一人兩機人嘅小隊，為咗追尋失蹤嘅隊長機，而深入地底展開搜索行動。小隊喺地底發現到神秘嘅「眼晴」，令其中一個機人3310陷入近乎發狂嘅邊緣。似乎地底仲有好多深不可測嘅嘢，好可能係人類唔應該觸碰嘅禁忌。

時空交錯，命運將唔同嘅事件串連喺一齊。 一次墜落嘅意外，改變咗一個小朋友同一個機人嘅命運。

近乎完美編排嘅故事線

個人覺得《墜落》喺故事安排上，係近乎完美，值得有志創作嘅人去參考。下面就分析吓劇情點樣行。

＜初段＞

上面提到故事線有兩條，分開兩個小組進行： 1. 女主角R310+冬眠醒咗嘅人類細路 — — 目的：由地底返回地面，安全送人類細路返回人類世界 2. 敵軍一名長官兩名機人（3310・9527） — — 目的：由地面落地底，回收隊長機8210

就咁睇兩條故事線安排，已經覺得好有趣，令人期待兩個小組會唔會有交匯點，而一路追睇落去。

＜中段 >

中段出現嘅地底住民，有少少搞笑，令情節輕鬆之餘，亦都對人設有補完作用。原本設定上，女主角係大和撫子類型唔出聲，咩都自己搞得掂，而小朋友…係唔識講嘢嘅；所以主角小組其實略嫌有啲太過靜，而地底住民啲離奇行為，就咁啱為女主角小組帶嚟轉變，小朋友由女主角對待地底住民嘅方法，從中慢慢學習更成長。呢啲古怪嘅地底住民，補完咗沉默嘅女主角小組。

另一條線，長官小組見到神秘「眼睛」，令小組成員3310差啲陷入瘋狂狀態，呢一段係呢個小組嘅轉折劇情。原本長官一直被兩個部下串、又成鬼日鬧佢賤格，總之好似男人冇地位，女機人萬萬歲。但係長官唔受神秘「眼睛」影響，喺呢一段入面由下把位置升格至上把，亦都令串串貢嘅3310有性格上嘅轉變，小組變得更加團結。

＜後段＞

尾段故事，高潮部份係女主角小組遇到發狂嘅敵方隊長機8210，而展開激戰。相對另一條線，長官小組亦都發現回收目標8210有移動反應，而追蹤過去。去到呢個時候，劇情上兩條主線終於喺某個維度有交匯點。

睇住故事情節上中後段發展，《墜落》嘅鋪排極盡心思。兩條主線，利用兩個角度，巧妙安排喺同一個空間發生，喺幾個關鍵情節令兩個小組錯開。只要細心啲睇，就可以留意到結尾扭橋嘅鋪排，其實喺前面嘅劇情一早就隱藏咗好多提示。

短短180頁漫畫，熊人帶住每個讀者遊走喺佢設計嘅時空當中，好成功咁引導咗讀者去睇佢想表達嘅。淨係呢個表達手法，已經展現咗呢位漫畫家對劇情編排有幾咁熟練。

有讀者話睇完之後唔明結尾，咁我估應該係諗唔通兩條故事線嘅Time Line，其實已經好明顯，好作品不妨睇多幾次。

論設定嘅重要性

熊人係設定魔，《墜落》嘅設定齊到驚人。《墜落》背後的確仲有八成設定冇SHOW出嚟，要出晒所有設定同劇情，可能要畫多幾期單行本（嗱嗱嗱熊人老師話銷量好嘅話可能會畫）。

《墜落》除咗劇情主線係示範作，連設定都係。唔單止係背景、服裝、角色武器、軍方編制等等大圍嘅嘢，而係幾乎每一個角色背後都有一大抽攞你命三千式嘅設定同故事，甚至可能係一啲讀者冇為意嘅畫面，背後都有一堆設去BACK UP。

做足設定真係好緊要，講緊唔單單係畫面上、造型上嘅設定，而係驅動角色行動嘅更多設定，可以令角色每一句說話、每一個動作都有原因。

好多時有啲作者會傾向太多設定。意思係做咗一大堆設定，放晒落作品，其實冇咩功用，只係想質晒落去（例如近期有《冥冥之中》），好似好豐富咁。有啲作品衰在設定唔夠，不足以支持成個故事推進，令到內容好空泛，甚至會悶場（例如近期有《I SWIM》）。所以設定點樣先至叫夠、點樣係唔夠，係視你點樣利用啲設定。好嘅做法係用設定表達故事，借用設定推動角色同情節，而唔好嘅做法就咁噏一堆設定出嚟（例如最近嘅《明日戰記》，希望佢會有Directer’s Cut或者古天樂’s Cut）。

可能睇《墜落》嘅時候，有啲嘢未必明，但係又真係唔需要解釋，因為唔影響個故事嘅完整性（例如點解地底有個細路冬眠、啲地底住民係咩嚟，呢啲都唔影響故事推進）。所以點樣取捨、放幾多設定落去作品入面，好睇作者本人嘅經驗。設定多與少同夠唔夠，視乎點樣用。不過你問我嘅話，做足啲設定，當然比設定不足更加好。

集合熊人個人喜好與大成於一身

熊人係一個自律、穩陣、重視細節、追求完美嘅漫畫家，我對佢嘅故事同分鏡都有絕對嘅信心，責任編輯可以無責任放手由得佢自由發揮，好嘢，至鍾意呢種實力型作者。

一直以嚟熊人呢位漫畫家嘅仕途比較離奇，明明係香港漫畫家，又好似冇香港人認識。明明喺銷量高嘅《LUCKY!》連載過，但係啲小朋友讀者成長之後好似失晒憶咁。後來佢參與咗歐美一個名著漫畫化企劃，改篇名著做漫畫，用英文出版日系漫畫。出咗幾本單行本，喺香港係冇人知都情有可原，個市場都唔喺香港。

所以熊人今次可以參與「港漫動力」企劃，第一次推出自己嘅原創作品，作為朋友真係戥佢好開心。而《墜落》亦都充滿熊人個人喜好同擅長嘅各種元素，我相信認識熊人嘅朋友亦都會同意。

熊人風格係咩？美少女、機械、爽快、設定魔…《墜落》全部中晒。熊人筆下嘅美少女特別迷人，而且女角全部唔同風格，任君選擇（情形好似真嗣身邊啲女仔都唔同Type一樣）。畫美女，功力少啲都唔得。

戰鬥畫面唔誇張，唔會見到一路打一路嗌招式名嗰種非現實風格，而係實實在在咁打，角色係用身上嘅武器、拳腳去打。美少女齊打交特別好睇。熊人式戰鬥畫面就係夠爽快，而且極度合理，拳腳往來嘅招式有編排過，而唔係求其打。

故事滲咗少少神秘學同埋陰謀論嘅內容入去，呢一點係我之前未見過熊人有嘅嘢（鬼咩，之前啲劇本唔係佢自己創作嘅，都係改篇作品），估唔到加咗又幾好，如果有機會可以出《墜落》續篇，將呢啲隱藏嘅內容講番出嚟，相信一定好吸引。

講到咁完美，有咩要執？

呢個故事線嘅安排，我個人真係滿足了。有咩要改進？都有嘅。

作者熊人老師作畫時爭分奪秒，長期維持住一個精神都幾緊張嘅狀態，務求令作品每一頁都唔好出錯。呢份嚴謹亦都反映喺作品入面，拎住本書睇，會覺得有一種過份工整嘅感覺。我覺得佢可以放鬆啲，學習擁抱、甚至享受壓力嘅話，會發揮得更加好。

可能亦都係因為太緊張（無論製作時間同頁數都係），細節上有啲嘢一期漫畫係交待唔晒，只可以任由讀者自己想像。呢啲都係所謂作者盲點，同讀者嘅視角有差距。有時係唔為意發生，有時係故意隱藏細節。今次好似兩樣都有啲。呢個問題都可能都係放鬆啲，就可以清晰視野。

最後我份人係鍾意型格系女生，所以嫌聖母型女主角R310太靜兼缺少人性（重申，明日香派），係去到最後爆SEED第二次救番個小朋友嗰段，我終於見到呢個女主角變得更加有人情味嘅表情。R310同小朋友之間嘅互動都可以多啲，令件事更加溫馨，不過我本身都唔鍾意細路，所以呢個對我嚟講又唔係咩大問題。反而長官小組嘅配搭夠互補，滿足咗我，亦都令故事推進更加順利，長官小組加晒分。

香港搞科幻？得唔得㗎？

明明香港有全球華人最愛嘅科幻小說大師倪匡（由細到大俾佢荼毒）、王易，香港人都好似對科幻冇咩興趣。古天樂燃燒生命拍《明日戰記》，就係想證明香港都可以做到科幻作品。相比起小說，漫畫更加容易直接表達科幻設定；相比起電影，同樣有畫面，漫畫可以更加低成本做到有視覺效果嘅科幻作品。

所以，熊人嘅《墜落》正正同香港人講，漫畫真係好適合用嚟做科幻作品。淨係睇頭幾頁，一堆量產人型「機人」、空戰、指揮室等等場面，用文字表達會隔一重想像，但係有晒畫面，一睇就感受到個震撼嘅場景。鍾意科幻嘅人，應該都會滿意《墜落》表現嘅世界。唔使講好多設定或者背景，睇一眼就會明白，自己已經進入作者設定嘅科幻空間。

喺香港創作科幻，大前提係你真係要好科幻，唔好再搞啲《未來警察》咁嘅偽科幻兼偽香港。當美國拍緊《STAR WARS》《STAR TREK》，日本當時就係機械人動畫潮，小說有星新一為首嘅Short Short小說做代表，就連英國都有大長篇《Dr. WHO》。望吓香港，喺同一時間，正值由黑白片漸漸轉型做武俠題材嘅電影世界。香港嘅科幻創作可能起步比人遲（明明有衛斯理！有咁多外星人！），參與創作嘅人亦都唔多（倪老爺一個頂咗百幾個），不過絕對係一個有得發展嘅領域。就不妨繼續用小說同漫畫，逐一創作更多原創科幻作品。

我相信香港好多人都係俾高達星戰Matrix呢啲作品餵大，同其他地區嘅創作者一樣，香港創作者一定有創作科幻嘅能力同熱情。我哋需要更加多《明日戰記》式嘅熱血參與，《墜落》有幸成為與香港科幻原創漫畫，話咗俾好多人知，香港人都可以創作科幻作品。近期仲有一本原創科幻小說《電都列傳》，CyberPunk正到喊，我有時間再分享吓。明明過咗書展動漫節，仲係忙忙忙。

本身只想寫簡介，唔覺唔覺又變長文。

熊人老師，我對你算係唔話得啦。

＞官方網站介紹＜

＞買書傳送門＜

註： ［*1］「機人」 《墜落》內設定。機人雖然可以算係機械人，不過體內含5%生物成份。 機人有人類外型、可以量產。即係話可以將你女神量產100個都冇問題。 簡直高級女僕一樣，可惜軍方拎咗佢哋去打仗，用嚟湊小朋友咪好囉。 另外，機人只有女性，好似係。

［*2］機械人三定律（Three Laws of Robotics） 科幻迷必讀，唔知就應該唔睇科幻小說。 簡單講，艾西莫夫嘅機械人三定律有三法則，植入喺機械人嘅程式入面，規範咗機械人對人類嘅行動。呢個定律實際上成為所有科幻作者例必跟隨嘅設定，甚至科學家都跟住呢個定律去探討科學發展帶嚟嘅道德問題。 補充一點，後來艾西莫夫喺幾十年後，又自己手痕將三定律變做四項，將原有「人類」概念，加咗一個「整體人類」嘅定義。 唔…係時候睇多次艾西莫夫嘅《機械人》系列，四本好快睇晒。

My Medium Record：(Update中) https://readmedium.com/my-medium-record-e1f290f9c470

順手睇埋~

個人BLOGss~ ☆伊死的漫畫特區 （講漫畫、讚漫畫） ★嚟Plurk吹水 ☆開咗MeWe（好嘢唔記得咗PASSWORD入唔番去）