伊死总结
《东岛丹三郎想做面具超人》是一部痴迷漫画,讲述了一群热血人物追求成为面具超人的故事,展现了他们在面对现实与梦想之间的挣扎和成长。
摘要
漫画《东岛丹三郎想做面具超人》讲述了主角东岛丹三郎和其他热血人物如何在现实生活中追求成为面具超人的梦想。丹三郎在即将放弃成为面具超人的时候,意外获得了真正面具超人的帮助,从而实现了自己的梦想。漫画中还展现了一系列其他角色,包括巨乳女侍、巨乳女教师、面具超人V3、女版虎霸王等,每个角色都有自己的背景故事和动机。这些角色在追求梦想的过程中,经历了各种各样的挑战和战斗,包括与真正的恶劣组织的斗争。漫画还探讨了做人的态度,如何在现实与梦想之间找到平衡,以及如何在面对困难时坚持自己的信念。此外,作品还强调了肉体训练的重要性,通过角色们的肌肉和战斗场面展现了对人体美的追求。最后,漫画提到了平成拉打迷的必看性,以及作品的购买信息和其他相关作品的链接。
观点
- 梦想与现实的平衡:漫画强调,尽管追求梦想很重要,但也要面对现实生活,找到两者之间的平衡点。
- 热血精神:作品体现了热血漫画的精髓,通过角色们的坚持和努力,展现了不懈追求梦想的精神。
- 肉体与精神的双重强调:除了精神上的坚持和成长,漫画还强调了肉体训练的重要性,通过角色们的肌肉和战斗场面来展现对人体美的追求。
- 黑暗面的探讨:通过古惑仔中尾八郎等角色,探讨了“做坏人”的成分,以及黑白分明的世界观。
- 对传统与现代的反思:通过角色们的故事,反思了现代社会中传统价值观的变迁,以及个体在这种变迁中的适应和选择。
- 推崇正义与团结:漫画通过角色们团结一致对抗恶劣势力的故事,推崇正义和团队合作的重要性。
熱血推介:《東島丹三郎想做幪面超人》<下> 你都做得到!
其實睇完呢套漫畫,我係咪都可以做到幪面超人㗎?
上回講到:中佬拉打迷東島丹三郎諗住放棄做幪面超人嘅夢想之際,竟然俾佢遇到真正撒旦幫,終於都可以做幪面超人喇!變~身~!
呢套漫畫沒有最黐線,只有更黐線。


第4期個封面好有心。「玉面金剛」後來真係做咗幪面超人4號。(頭盔:以下我流翻譯只作介紹之用,敬請課金俾作者。)
巨乳女嘰嘰VS巨乳女教師
真正嘅撒旦幫怪人蜘蛛男,唔知點解放過咗東島丹三郎同百合子Miss(呢一PART好唔合理,唯一解釋可能係蜘蛛男唔將呢班人類放在眼內,費事煩),呢兩個中晒拉打毒嘅宅男宅女去咗間CAFÉ唞吓,整理吓發生咩事,仲同CAFÉ嘅店長講出之前嘅一切經歷。
店長叫做島村三葉,同一般人唔同,佢完全相信東島丹三郎遇到撒旦幫嘅經驗,鬼咁有共鳴,仲講咗個秘密俾東島丹三郎知,就係撒旦幫一早已經融入咗喺一般人當中。
第二日,百合子Miss如常咁返學教書,一個四眼女學生由加莉絲走嚟搵佢,盤問自己個Miss係咪鍾意三葉店長。原來由加莉絲係間CAFÉ嘅女侍應,亦都係三葉個女朋友,因為三葉由細到大都係幪面超人FANS,所以好擔心Miss會拎搶走自己個男朋友。於是,由加莉絲舉高右手,一秒變身成為女嘰嘰!
呢個巨乳嘅女侍應竟然係個女嘰嘰!
百合子Miss亦都變身(=換衫)做電波女甲蟲女,同由加莉絲打起上嚟,而且話咁快就用過頭摔打低由加莉絲。(又一次証明女嘰嘰唔係用嚟戰鬥嘅。原著入面啲女嘰嘰都係負責做吓Admin、沖吓茶、執頭執尾,幾咁反映70年代日本職場實況。)
店長三葉可以公主抱由加莉絲咁耐,都暗示咗佢唔係普通人。最強幪面超人V3出場
百合子Miss call埋東島丹三郎出嚟,將由加莉絲抬去CAFÉ俾三葉。
呢個時候,三葉嘅大哥島村一葉以一身黑皮褸嘅造型出場,一見到個女嘰嘰就喊打喊殺,仲鬧個細佬同女嘰嘰拍拖。又難怪嘅,呢兩兄弟嘅爺爺嫲嫲就係俾撒旦幫所殺。
兩兄弟喺細個嗰陣就已經親眼見過真正嘅撒旦幫,加上爺爺嫲嫲死喺撒旦幫手上,兩兄弟自幼就立志為兩老報仇,各自苦練。喺大哥一葉心入面,最強嘅幪面超人就V3,所以佢模仿嘅對像當然係V3。
一葉黐得幾勻洵,連平時造型都學足V3未變身之前咁樣,出個甫士都入魂過人。同東島丹三郎、岡田百合子一樣,一葉學V3學到入晒魂。似到一個地步,係一葉同東島丹三郎切磋嘅時候,令人有個錯覺,有兩個真正嘅幪面超人對打。
身邊總有一兩個嘰嘰喺左近?俾百合子Miss打暈咗嘅女嘰嘰由加莉絲醒番,就見到兩個幪面超人對打,觸動咗佢身為女嘰嘰嘅本能,召集身邊隱藏喺人群當中嘅嘰嘰。
睇住啲嘰嘰由街頭唔同嘅地方行出嚟變身,呢一幕同《少林足球》「呢個moment我要爆喇」係異曲同工。
俾大佬搵笨嘅玉面金剛
東島丹三郎(幪面超人1號)、百合子Miss(電波女甲蟲女)、一葉(V3)三個英雄夾手夾腳打低咗一窩蜂出現嘅嘰嘰,真係好似真正嘅幪面超人英雄咁。
蜘蛛男又再出現(呢條友作為奸角真係唔稱職,又唔殺晒啲正義朋友,又打打吓玩失蹤,仲要消滅啲被打暈嘅嘰嘰),見到遍地嘰嘰被打敗,唔明點解普通人有能力打敗被改造過嘅嘰嘰。不過蜘蛛男不愧係正牌撒旦幫怪人,三個(自稱)英雄好似唔係好夠打。
喺最危急嘅時候,一隻鐵鈎手用鋼索纏住蜘蛛男。蜘蛛男回頭一望,竟然係「變身」做玉面金剛(Riderman/ライダーマン)嘅三葉。
拉打迷應該留意到,原著嘅玉面金剛係右手被改造,而呢套漫畫入面,三葉係隻左手。因為佢大佬一葉當年打斷咗佢隻左手,又唔佢想用開嘅右手斷埋,就咁令山寨版嘅玉面金剛苦練左手。之前講過一葉同三葉兩兄弟細個嗰陣睇住爺爺嫲嫲被撒旦幫殺死,冇理由得大哥一葉咁黐線要做幪面超人V3,而細佬三葉就冇中拉打毒。其實三葉都想做V3,可惜打輸咗俾大佬,仲俾大佬打斷咗隻左手。於是一葉就話將玉面金剛呢個身份俾細佬,原因係「玉面金剛都冇咗隻右手,而你斷左手,咪啱晒囉」。嘩,擺到明搵個細佬笨。
有一個中年幪面超人超級FANS已經好黐線,跟住出咗個女FANS,然後又有兩兄弟咁啱都係幪面超人FANS。呢套漫畫就係咁癲,妄想症傻人一個接一個出場,但係睇落去又唔會覺得好兀突,讀者都會融入去呢個咁癲嘅世界。
★雖然漫畫入面由三葉把口講出「玉面金剛係最熱血」呢句對白,三葉本人其實唔係咁熱血嘅。[*1]女版虎霸王都出現埋
都話咗沒有最黐線,只有更黐線。
漫畫去到第6期,出現咗女版虎霸王(タイガーマスク)。
喂呀!明明係《幪面超人》嘅世界,做咩走個女版虎霸王出嚟呀?個作者都唔同![*2]
大家都係東映嘅作品,不要分那麼細。
二葉同個西裝友對打,一腳踢甩咗個人皮面具,先至知道世界上真係有撒旦幫。島村家有大哥一葉(幪面超人V3),三弟三葉(玉面金剛),中間其實仲有個二家姐叫做二葉。
二葉冇見過嫲嫲慘死嘅情形,覺得大佬同細佬睇電視睇到short咗(又的確係),仲因為大佬喺學校就已經話自己係V3,搞到做佢個妹都俾同學笑,由細到大都冇朋友,孤獨咁渡過童年。
所以二葉一直都好憎個大佬(但係幾錫個細佬),憎到想打死大佬,而去咗一個叫「小虎之穴」嘅摔角道場學藝。就係咁,二葉成長之後,繼承咗佢師父(女)嘅絕技同埋虎頭面具。
冇錯!島村家三兄弟姐妹全部都好抽得!
講真,二葉都冇咩資格話佢大佬COSPLAY上腦,佢自己咪又係拎住師父嘅虎頭面具HIGH爆(SheShe嚟嘅),見到個蜘蛛男,咪又係戴住虎頭面具挑機。好喇好喇,二葉終於知道個大佬平時唔係吹水,出場之後憎個大佬憎到去第6期,第7期正式加入咗呢班(自稱)英雄嘅正義朋友行列。
古惑仔大佬中尾八郎立志做個好似撒旦幫咁嘅壞人,倒頭來被真正嘅撒旦幫怪人蜘蛛男一招了斷。有正就有邪?黑道有情?
《東島丹三郎想做幪面超人》講緊一班深受幪面超人影響嘅人,咁樣調番轉,會唔會有人立心想做撒旦幫,而唔係受到撒旦幫洗腦?
有!而且(理所當然)係個撈偏嘅古惑仔大佬。
古惑仔大佬叫做中尾八郎,就係佢策劃「COSPLAY撒旦幫行劫」,叫三條𡃁扮嘰嘰做世界。
中尾八郎喺好細個就已經知道做好人冇好報,佢老豆人太好,結果老婆走路,想搞架薄餅餐車嘅心願都達成唔到。好多細路爭住扮幪面超人,中尾細個就爭住扮撒旦幫,大個咗順理成章出嚟行古惑,內心一直都冇放棄想做撒旦幫嘅夢想,於是策劃「COSPLAY撒旦幫行劫」。
但係呢個撒旦幫FANS點會諗到,世界上真係有撒旦幫、真係有隻蜘蛛男怪人㗎啫?班𡃁連(自稱)幪面超人嘅阿叔都打唔過,面對蜘蛛男,仲唔俾佢溶咗?中尾唯有俾晒成副身家啲𡃁叫佢哋走,而自己頂住。
就係咁,中尾亦都死喺蜘蛛男手下…咪住!臨死之前中尾向蜘蛛男提出一個要求,就係「將我變做撒旦幫!」。結果當中尾清醒番之後,真係變咗撒旦幫,仲可以一秒變身做嘰嘰。夢想原來真係可以達成!
獨力挑戰一班幪面超人,結果係被正義朋友打到變豬頭。喺咁多個角色當中,中尾八郎呢個古惑仔反而係最似現實嘅人。佢一早就知世界上冇撒旦幫,於是好現實咁去做壞人,覺得咁樣先至保護到自己。就算做咗古惑仔,對班𡃁都有情有義。後來情況失控,見到嘰嘰襲擊一般市民,更加調轉槍頭打番嘰嘰,黑道都有講人情味嘅。
中尾八郎呢個角色,將成套作品由帶去另一個思考層次。
「做壞人」係咪等如邪惡?
世界係咪真係只得二元分立,非黑即白?
唔想太過好人俾人蝦,寧願自己去蝦人,呢種心態有冇錯?
中尾八郎將日本黑道嘅任俠精神發揮到淋漓盡致。
任俠精神,盜亦有道,有力量嘅人要保護弱者。
喺1989年阪神大地震嘅時候,日本黑幫山口組自組救援團去救災,每年萬聖節都會派糖俾小朋友。雖然山口組係黑道,亦都會關心民生。有時候黑與白嘅對立,可能只係形式嘅分別。近年隨住現代化、高科技發展,靠傳統方法搵食嘅山口組謝晒皮,啲大佬幾十歲人為咗餵飽自己組啲𡃁,淪落到要去超級市場偷西瓜同偷米,撈偏都慘過人。
有啲嘢係雙向嘅。中尾對班𡃁好,班𡃁都好為個大佬,一見到舞台班青春偶像一秒變成女嘰嘰,立即衝上去頂住啲波濤洶湧嘅攻勢。太有義氣了!係咁,做人面對現實好,定係繼續追夢好?
相信睇到呢度,都明白作者並冇一刀切。
佢既鼓勵人要追夢,又要面對現實生活,至於點樣取得平衡,就要自己摸索同調節。夢想唔一定可以實現,但係做人唔可以冇夢想。
《東島丹三郎想做幪面超人》入面充滿呢種苦練嘅場面。作者強調鍛練肉體變強先至係真功夫。突破精神&肉體極限
如果有睇過柴田ヨクサル嘅作品,都會知道呢個作者追求人體美。佢嘅人體美學有好強嘅肉感,男角色要肌肉結實,女角色就波濤洶湧,真正係拳拳到肉,所以睇得特別爽。尤其係昭和拉打以格鬥技為主流,有別於平成拉打個個變晒魔法師神鎗手,由柴田ヨクサル畫昭和拉打,真係每一期都由第一頁爽到最後一頁。
或者有人睇到呢度,條氣都好唔順:
大家都係拉打迷,點解呢班主角就可以做幪面超人,點解我唔得?
嗱,首先你要be a better man。
淨係做拉打迷係唔夠嘅,你有冇貫徹幪面超人嘅精神?你有冇喺日常生活行駛正義?你有冇對抗惡勢力嘅決心?有冇信心即使俾人笑鳩你黐線,都要堅持落去唔放棄?
突破自己嘅精神界限,磨練自己成為更加配得上幪面超人稱號嘅人,就係主角(& Friends)可以做幪面超人嘅最大原因。
精神強大了,肉體都要配合。
《東島丹三郎想做幪面超人》回歸肉體訓練嘅基本,作品入面出現大量訓練同健身場面,除咗東島丹三郎大戰巨熊,後來中尾八郎都挑隻軍雞嘅機(癲㗎!)。成班人喺深山土法修練,放喺現代嚟睇,簡直係黐筋。就係要黐線到盡頭,先至係最有型最熱血,睇到好有共鳴。
古惑仔講粗口,係好合理嘅事。我用咗「蛋散」兩個字,聯想「雞」「蛋散」嘅關係。石之森章太郎心目中嘅《幪面超人》真係咁另類?
用一句說話講晒《東島丹三郎想做幪面超人》呢套漫畫嘅話,係「一班幪面超人宅全力對抗真正嘅撒旦幫」(明明一句講得晒,我寫咗咁多字),點睇都好黐線好另類。如果你受唔住呢種另類,睇完以下嘅介紹,可能會接受都唔定。
有傳聞話石之森章太郎本身就係想開一個由拉打宅做主角嘅另類系列,就係1992年嘅《真・幪面超人 序章(真・仮面ライダー序章)》。
但係,《真・幪面超人 序章》原案同製成品非常唔同,簡直係兩套作品。
原案係咁嘅:一班俾幪面超人毒到大嘅拉打迷聚會,大家COSPLAY住至愛嘅幪面超人角色,夜晚圍埋一齊開開心心玩扮英雄遊戲,點知真係捲入咗一啲可怕嘅事件。
可惜當時因為社會唔流行呢種利用宅文化衍生嘅作品,而且幪面超人嘅英雄之路註定孤獨冇朋友,所以《真・幪面超人 序章》嘅監製白倉伸一郎BAND咗呢條橋(連原作者都被BAND!白倉你好大嘅官威![超錯])。
而《真・幪面超人 序章》嘅製成品,最後就變成熱血男主角風間真被魔改造,挑戰邪惡嘅財團,可以話係回歸初代幪面超人嘅世界觀。
包括我在內,好多人都覺得,沉澱廿年之後,《東島丹三郎想做幪面超人》繼承咗石之森章太郎老師嘅遺志,真係將一班拉打宅變成真英雄。
(補充番,石之森章太郎本人都有出鏡客串《真・幪面超人 序章》,就算自己條橋被BAND,佢都好尊重製作組。《序章》因為太暴力血腥,上畫嗰陣禁止18歲以下人士入場,石之森章太郎爭取可以喺作品講出最重要嘅一個訊息,可能就係「幪面超人都係怪人」呢一點。可惜嘅係,呢套《序章》冇再拍落去,成為「未完成的幪面超人」作品。)
我錯了。女嘰嘰當中都有好打得嘅。佢原本係一個女摔角手。<多謝你睇到最後>
柴田ヨクサル嘅作品一向好長篇(《Air Master》有28期!動畫都有兩季㗎),目前《東島丹三郎想做幪面超人》出到第7期,除咗中間有兩期無離啦更變咗拉打宅之間格鬥爭第一,整體故事發展都好爽快,而且所有出場嘅角色都各有定位,做嘅每件事都有原因。
打打打咁好爽皮咁又一期,好值得期期俾錢追落去。
平成拉打迷更加必睇!
好很熱血!好很黐線!好很多肉!
再貼多次:
書名:東島丹三郎想做幪面超人/東島丹三郎は仮面ライダーになりたい
作者:柴田ヨクサル
出版社:HERO’s
售價:¥693(未連稅)
種類:熱血・英雄再造
[LINK] 睇書依正路,漢化睇壞腦
AMAZON電子版漫畫(日語,收費)
官方連載(日語,免費試閱,部份收費)
連撒旦幫嘅蝙蝠男都要恥笑呢班人。原來撒旦幫嘅心態都幾正常。[*1] 玉面金剛/ライダーマン Riderman
幪面超人V3x玉面金剛老餅FANS可能都會同意「玉面金剛」好熱血(而且好靚仔)。
「玉面金剛」結城丈二自幼被毒蠍幫養大,一直以為毒蠍幫係個濟世為懷嘅組織,直到鎧甲元帥搵佢做替死鬼,溶咗佢隻手之後,佢先至醒覺到毒蠍幫係奸嘅。喺第51集,結城丈二為咗阻止飛彈爆炸傷及無辜,而自己帶住個飛彈爆炸。
嗚呀~好熱血呀!V3傷心過後,將玉面金剛封咗做「幪面超人4號」紀念戰友。
當年唔流行HeHe,而家睇番真係基情滿載。
點解譯名叫做「玉面金剛」,可以參考番<上>嘅註解。
當年結城丈二被魔改造呢一幕,而家睇番…好似好變態咁。小朋友睇真係OK?[*2] 虎霸王/タイガーマスク
香港中文版嘅《虎霸王》,天行社出版。張圖上網搵嘅,我都想要番套。原作係梶原一騎,作畫係辻直樹,1969年動畫化,由東映發行,2013年先至第一次拍真人版。
邪惡摔角手拳館「虎之穴」太經典,主角伊達直人都係由呢間虎之穴出身,後來對付番虎之穴。條戲軌…又幾《幪面超人》喎。
不過故事結局係悲劇收場,伊達直人身為摔角手,喺擂台打得太激而失去自我,最後為咗救個小朋友而喺車禍中身亡。
My Medium Record:(Update中)
https://readmedium.com/my-medium-record-e1f290f9c470
超懶寫文。
順手睇埋~
個人BLOGss~
☆伊死的漫畫特區 (講漫畫、讚漫畫)
★嚟Plurk吹水
☆開咗MeWe