《IT狗》進步空間大到好似虛空宇宙咁廣闊

到咗2022年嘅香港，要企出嚟鬧ViuTV做得唔好，真係需要好大勇氣，因為呢個世界上面好多人其實分唔到當一個人鬧你嘅時候，究竟鬧你嗰個人係真心想你變好，定係鬧你嗰個人只係想搵你嚟出氣；講真，如果我可以開發一個AI，每次有人鬧我嘅時候，我就會知道究竟條友係咪真心想我改，我估我會發達。

唔講無謂嘢住，講返套劇，我睇咗四集，發現《IT狗》進步空間大到好似虛空宇宙咁廣闊，如果要將呢套劇改做一套合格嘅劇，令人睇得開心舒服睇完仲要有嘢可以拎走嘅話呢，我要用皮皮喺劇入面一句對白嚟形容呢個情況，就係「不如唔好Debug啦，Delete啦！」

當然，唔係真係要你Delete咗套劇佢，只係想講下個嚴重嘅程度，要有根本開始講起，目前我見到嘅角色有七個，包括：失意創業低能主角、Designer轉Programmer花瓶乙個、天才Programmer極度右傾、女權左膠、星之子、BrainCha、負能量極黑子。

問題喺邊度？問題就係呢七個主要角色我全部都可以「十個字之內」講完佢嘅所有嘢呀！呢堆唔係人類嚟，只係一堆樣版角色，睇咗四集，三個鐘，呢班人無鐘意嘅嘢、無憎嘅嘢、無任何同角色設定嘅矛盾，佢地只係掛住我上面講嘅名牌嘅AI公仔，而唔係真真正正一個角色。

咁就死啦，個故事入面，究竟點解要有呢堆角色要存在？

通常一個好嘅故事，每個角色都會有佢嘅定位，例如一個偵探故事，就一定會有一個偵探，負責解謎，會有一個助手，負責問問題比偵探答，會有兇手同埋被害者，所有嘢要恰如其分。

再問返頭先個問題，《IT狗》入面，點解呢七個角色要存在？佢地負責做啲乜嘢？對個故仔嘅推進有咩作用？好嘅故事由角色推動故事，唔好嘅故事由故事設計角色，《IT狗》呢？連「唔好嘅故事」都唔係。

因為，佢根本無故事，故事嘅主線喺邊？主角為咗咩創業？為咗咩要參加比賽？係呀，諗深一層，個主角全部嘢都係煮到埋嚟就食，個角色其實任何一個人都得，咩性格都得，都一樣會比人抄，一樣比女飛，一樣賣樓創業，一樣參加比賽，因為呢條主線根本算唔上係一個故事，只係諗咗一堆Encounter去比個主角遇到。

咁樣非常糟糕，因為無嘢係由個主角嘅行為引發嘅，所有嘢都係喺個天到由編劇一下掉落去主角個頭度，然後個主角亦無得反抗，只可以企定定硬食咗件事，認真，咁樣真係無故事可言。

有部份人話，只要當佢係處境喜劇（SITCOM）咁，笑完就算數，都可以一睇；我話比你聽唔係囉，可唔可以唔好咁樣侮辱處境喜劇？要做一套處境喜劇，你要一集之內搞掂晒成個故事起承轉合，要一集之內講到你想講嘅Message，然後又要幾十分鐘之後一切嘢回復正常，根本係難度極高，如果好地地一條15–20集嘅大故事線都Handle唔到，仲要嘗試用做緊「處境喜劇」嚟掩飾編劇無做好個故仔實在係令人無法接受。

而且，所謂處境喜劇，係喜劇，即係要引人笑，但係《IT狗》真係唔好笑，做喜劇有好多公式可以跟，但我唔知佢唔識定自命清高，好似經常故意唔去跟啲喜劇公式，最簡單好似麥兜咁不斷重複嘅「無魚蛋」、「無河粉」、「無叉燒」呢種公式，其實好好笑，加上你一用，大家自然會意識到你搞緊笑，心情自然會去咗笑嗰邊，咁就會容易啲開心；不過佢無用，佢以為啲嘢唔協調咁放晒喺度觀眾自自然就會笑，老實講，咁樣係太睇少「搞笑」呢件事啦。

咁或者其實佢係想做戲彷？即係每個人扮一種Stereotype，然後叫佢地做啲荒謬嘅嘢嚟諷刺佢地扮嘅人；問題嚟啦，咁觀眾識唔識你扮緊嗰個人，演員扮得似唔似呢？呢一類笑料係受眾越窄越好笑嘅，一個你識嘅中學同學跌落渠，你會笑到收唔到聲，但係一個你唔識嘅師奶跌落渠，你唔係無感覺就係會想Call消防員嚟救佢，至少，你唔係心地唔好嘅話你唔會想笑。同樣情況，好多人可能聽過「星之子」，但又有幾多人真係聽過佢講嘢？又有幾多人真係認識呢個人？如果個數量只能佔觀眾嘅10–20%，老實講，我覺得不如唔好做呢個戲彷好過，其他角色都同樣道理。

又又，或者佢其實係想做一個熱血嘅創業故事？由零開始，最後獲得成功，等觀眾同主角一齊成長，呢種故事Line係非常好睇嘅，你睇Rocky又好，睇狂舞派都好，都係呢種賣夢想嘅故事。問題又嚟啦，《IT狗》你個主角其實唔係真係咁想創業，對自己個Idea又唔係真係咁熱愛，成件事由頭到尾一啲都唔熱血㗎喎，定係佢已經超熱血但係我感受唔到？如果係咁，係咪應該改過另一個動機比主角等大家都感受到？

阿編劇，究竟你寫作嘅動機係乜，搞笑嘅時候唔好笑，諷刺嘅時候諷刺唔到，熱血嘅時候亦一啲都唔熱血。還是，你只係計字數出糧寫咗出嚟就算？

作者無動機，角色自自然然都唔會有動機，成個劇本堆咗一堆字出嚟，但入面無一樣嘢係有生命力；比我係凌文龍或者彭秀慧，收到一個咁嘅劇本，唯有演嘅時候更加用力，希望可以救返，但事實就係咁樣反而令個演出更加唔真實，好似將自己封咗喺個標本箱入面做戲咁。

咁我當我原諒晒你上面一切做嘅嘢，齋睇你想描寫嘅香港IT界；即使係咁，你嘅資料搜集都係無做好，我2003年開始喺香港做IT，由Support、Programmer、SI、Internal、銀行乜人都見過，係未見過IT Support Manager走去Sell自制System比HR阿姐，係未見過有人比人炒咗之後扮返工（香港長期缺人，工接工就有），亦無見過用茶樓改裝嘅Co-working space，都無見過初創唔請Creative、Marketing而請Programmer先，甚至無見過創業比賽嘅評判會單人匹馬咁去見Candidate。

編劇你唔可以拎住啲片面印象或者隻言片語，然後大作特作，真心覺得好睇嘅人，可能得你自己一個。當編劇用少少標題同印象去大作特作嘅時候，導致偏差嚴重，好似寫消防員故仔寫寫下變咗排球員故仔咁，係，佢地會打排球，但佢地唔係職業排球員呀，你咁寫只會越嚟越離譜。

再講少少細節嘢，就係一個故事，無關緊要嘅支節應該越少越好，但當你個主線故事都唔存在嘅時候，當然你所有嘢都變晒無關緊要嘅支節，因為都唔知有咩先係有關緊要；但即使係咁，有啲嘢真係明顯無關得好緊要嘅，例如第四集嘅馮德倫，點解係馮德倫，如果四十五分鐘內馮德倫唔會出現對個劇情產生影響，咁點解係馮德倫，唔係Snoopy？唔係Stephy？

全套劇入面咁樣嘅嘢多不勝數，你搵邵子風嚟做個速遞員，點解係速遞員？如果佢四十五分鐘之內唔會出現對個劇情產生影響，點解佢要出現？同樣問題你可以問隻蝸牛，問架發電單車，問Stanley嘅所有同事。

我用左三個鐘頭時間去睇《IT狗》，我希望佢係做得好嘅，但最後，至少，喺我心目中係完全唔合格嘅；對於一個考試唔合格嘅筍仔，好多人可能會選擇繼續買玩具比佢同帶佢去食麥當勞，但我呢，就決定用多三個鐘時間嚟寫一篇長文，希望佢明白，我肯鬧佢，係因為我真心想佢變好。唔通我會嘥時間嘥心機走去鬧喺地鐵睇龍虎豹嘅阿叔咩，我梗係轉身等另一班車就算啦。

真心，到咗2022年嘅香港，要企出嚟鬧ViuTV做得唔好，真係需要好大勇氣，而我為咗《IT狗》，我鼓起咗呢個勇氣。