【IT9@B4】三個月學好會計（一）

所有入Big 4既人，如果唔係主修會計，都要上一個「三個月學好會計」既超密集會計課程。讀完三個月，就等同拎佐一個會計既postgraduate certificate，亦即係拎到考會計師牌(CPA)既資格。留意，只係拎到去考既資格，而唔係會計師牌。

作為IT9，工作上根本唔需要CPA，雖然考埋對自己將來搵工有so (jetso個so)——首先，公司提供有薪study leave 40日；而且，如果你合格，考試費都會俾返你。所以，其實係用公司錢考多個牌傍身。不過因為種種原因，我最後都無考，之後有機會再分享。

至於點解我唔駛CPA公司都俾錢我讀呢個「三個月學好會計」課程呢？我估有四個可能性：

１）公司覺得無論邊個部門，識少少會計總有佢既用處；

２）公司係by default要所有唔係主修會計既新人去上呢個course；

３）公司開頭其實無plan放我去嗰個唔駛CPA都得既部門；

４）令你三年之內唔可以離開公司（因為三年內走要pro rata咁嘔返個course嗰廿幾萬）。

咁到底係邊個原因呢，我就真係唔知嘞。不過因為工作上其實真係無乜用過呢個course學既，所以十幾年前三個月讀佐同讀到啲乜嘢，我又點會記得吖。唯有搵張Transcript出嚟參考吓……

嘩，乜原來我讀佐九科架！？咦，D佐一科？仲要係auditing framework…

然後，啲恐佈回憶開始湧出嚟。

開學前，收到書單同課程時間表，見到要讀九科！咁咪即係一個月讀三科！？睇下個時間表，一科連續上六日，最尾一日考試，重覆九次。

第一科係Fundamental Accounting。

開學第一日，入到課室，我淨係識一個之前副修人文學時認識既同學，其他人全部都唔識。

教授介紹完自己，就話：「下畫測驗。」

全班雖然大部份人都素未謀面，但係大家都好有默契 — — 面面相歔後即刻起鬨。

教授話喺網上課室有course outline，寫明下畫測驗。

首先，我哋根本就無收到任何通知講有「網上課室」。第二，就算知，我哋堂都未上，書都好似淨係買佐幾日，可以點準備？

敎授唔理我哋既起鬨，即刻開turbo考書。我從未接觸過會計，credit我都叫做聽過下個字，debit真係聽都未聽過，淨係喺月結單見過。Balance sheet？我好似喺excel見過，但係乜嚟架？仲有一堆阿媽係女人既方程式，好似 Assets = Liabilities + Equity，明明睇落好簡單，但係到要分乜嘢係Equity乜嘢係Assets，又係好煩。Profit and Loss statement ？老老實實，我當年對會計既認識真係零。

結果，教授講既英文隻隻字都識，但係我完全唔明佢講乜。明明只係加減乘除，但係煩到一個點，仲要一唔小心就會錯。本書仲教埋口訣幫你記credit同debit點放，類似credit is window debit is door ，九唔搭八到根本唔知係乜，右左不分既我就係黑人問號咁上完第一朝既堂。

放飯時，讀過會計既同學話：「癲架！一朝飛完成個會考課程！雖然會考account A啫，但係鬼記得咩。無讀過會計點會知佢講乜……」

呢個人其實係喺度晒命，佢係記得嘅。不過無讀過會計既我真係完全唔知個lecturer講乜。呢科對我既overload程度係我連呢個lecturer係男定女都無印象。

放飯時，會考讀過會計既晒命同學們就去食安樂茶飯，我同一位新識既Law友對住本書一頭霧水，都不知從何做起。

我仲記得啲Balance sheet永遠都Balance唔到。即係你明明知credit+debit要等於零，但係搞完一大輪，就硬係唔知邊度漏佐入帳，硬係爭啲。我印象中，我係呢科既測驗考試無試過成功砌好一張 balance sheet，每日放學返到屋企都已經八點幾，亦根本無時間俾你追。

所以，到最後竟然有B，我都好驚訝。

第二科就係 Business Law，呢科係其中一科比較有趣既一科。加上已經同幾位同學共患難佐一個星期，而law友本身就梗係讀 Law，所以起碼有問題都有人答到。雖然印象中呢科算係比較有趣，但我連一個有趣既案例都記唔到。好似有讀 Enron 之類公司倒閉？仲好似有啲案關於巴士既交通意外咁？

雖然我好似對呢科無乜印象，但係呢科對我哋全班既影響都好大。

因為Lecturer不久後就死了。

（下回再續……）