Gin 麻開門：李幸倪

一個周末，置記 (幾乎) 只做一件事。呢個星期日，我去咗睇李幸倪 “First of All” 演唱會。

我幾鍾意呢個演唱會嘅名字， double meaning ，意味深長，帶點 after-taste 。關於 Gin Lee 嘅印象，我係始於《雙雙》同《月球下的人》嘅。柔和溫婉大路嘅 K 歌，唔算十分特別，但係可以入耳入腦，以當下廣東歌樂壇嚟講已經算係咁。

當然，Gin 早在 2011 年已經來港發展，《今天終於一人回家》及《玫瑰的故事》可能更早為其他樂迷賞識。但我認識 Gin Lee (雖然佢唔識我) 都真係始於佢加盟環球唱片，或者都同我多數睇 ViuTV 同聽 903 有關，畢竟環球同 TVB 鬧翻之後，必須更倚重其他電子媒介去 plug 歌。

講返 Gin 。如果要數一首歌令我肯畀錢去睇 (或者聽) 佢嘅演唱會，我一定會揀 2017 年嘅《和每天講再見》。撇開唱片公司宣傳佢入錄音室 1 take 過同樂隊完成作品，《和》呢隻歌係突顯到 Gin Lee 紮實嘅唱功同廣闊嘅音域。呢兩個長處，喺容祖兒減產嘅情況下，更加令 Gin 鶴立雞群 (Disclaimer: no double meaning here) 。

“First of All” 演唱會原本只有一場，置記最初猶猶豫豫就錯過買飛嘅時間。後來加開第二場，買到平飛仲要喺正中間，抵啦。不過見到一啲宣傳夥伴 (例如電盈旗下 The Club) 到六月仍然可以換領門券，都知道加場來得相當勉強，頭場消耗晒忠實擁躉嘅購買力。結果，尾場兩邊各有三段中半山座位冚黑布，即使係山腰位嘅中價飛亦都有多少吉位，而席間有唔少家長攜同十歲左右嘅小朋友觀賞，更加惹人聯想係咪贊助機構派飛充撐場面。

演唱會有別於游泳池，唔係話少人啲同你 share ，你就會 better-off 。始終現場觀眾嘅氣氛同投入程度都好影響表演者同其他觀眾。不過 Gin Lee 似乎未受場面影響，甫出場即進入狀態，表現四平八穩自信淡定，不時展現燦爛笑容。

礙於置記認識 Gin 嘅歌實在唔多，我都要去同佢翻唱陳百強《偏偏喜歡你》先至可以投入少少。但撇除唔熟啲歌嚟講，佢唱得係真係好聽、冇乜瑕疵嘅。翻唱《李香蘭》國語版嘅輕鬆自如更加令人唔知佢功力有幾深厚。

與 Gin Lee 同公司、近年表現同步上揚嘅 Aga 及後出場，兩人合唱《一加一》，同樣令人期待 Aga 呢位才女日後喺紅館開個唱。以歌論歌， Aga 作品嘅旋律比較出色，聲線感情豐富； Gin Lee 就唱功勝一籌，但曲風比較多變，唔係每首都啱人口味。同埋 Gin 嘅歌啲歌詞有啲會比較奇怪⋯⋯唔知係咪馬拉中文同香港有少少出入？

不過點都好，當 Gin Lee 請出佢嘅父母、家姐同姐夫同場夾 band jam 歌，全場氣氛就變得更熾熱。 Gin 爸爸唔單止鼓藝精湛，羊咩鬚加上一身古雅衣著相當有型，翻唱 Frank Sinatra 嘅 “My Way” 更令人擊節讚賞。

呢一段亦 somehow 帶出李幸倪一路走來嘅起起跌跌：一個馬來西亞女仔，唔識廣東話，隻身來到香港闖蕩樂壇，中間曾經有兩三年冇唱片公司肯簽，朝不保夕甚至因欠租而被業主迫遷，對住家人又唔方便多講以免家人擔心，呢種孤苦無依，其實絕對可以令人氣餒退縮、萌生去意、打退堂鼓，重回老家嘅 comfort zone 。

不過 Gin Lee 最終捱過咗段低潮，簽咗環球之後逐漸獲得更多樂迷認同，終於踏上紅館嘅台板。以 32 歲嚟講， Gin Lee 可算大器晚成，尤其是當同期嘅 JW 王灝兒喺 2018 年年初、以 27 歲之齡開紅館個唱，李幸倪行去紅館條路似乎更長更遠更崎嶇。

Gin Lee 亦好在意自己千里迢迢、飄洋過海嘅奮鬥經歷，不忘喺台上勉勵樂迷：

如果佢尚且可以克服重重障礙實現夢想，咁又有乜嘢係冇可能呢？

亦難怪 Gin Lee 另一外號為「堅 Lee 」，因為佢正如佢嘅作品一樣，《很堅強》。

演唱會中後段有一段快歌跳舞歌， Gin Lee 更同 dancers 一齊跳 Chair Dance ，相當破格。 Encore 時段有側田現身做嘉賓合唱《Kong》及一段《愛是永恆》，最後以《空姐》及《今天終於一人回家》作結。睇得出 Gin 去到最後終於有少少攰，但係全晚表現確實係游刃有餘。如果佢日後可以同班底製造更優質嘅作品 (你睇下楊千嬅？) ，成就肯定更高。

對於樂迷嚟講， Gin Lee 固然為香港帶來襟聽嘅好歌，佢本人嘅經歷、對於夢想嘅堅持同努力不懈，嗰種豁咗出去就唔好望返轉頭嘅志氣，又可會為大家帶來多少啟發？