《萬一分錯手……》

現實生活中最有用嘅四大知識－理財、溝女、上床（你敢講上床技巧唔重要？）、人際關係，大中小學進修學院研究院從來唔講、唔教、唔提，彷彿唔存在。反而你畢業後毫無用處嘅嘢－花崗岩形成原因、貞觀之治等，教育系統不斷迫你硬食，你表示抗拒依然禁室培慾十幾年先被放行。

好多人寫愛情文章，三角戀苦戀偷情姦情無情師生戀人獸交乜都有，但有個問題，我觀察咗好多年，從來冇人提出解決辦法：

「萬一我同女友分錯手，點算好？」

───

為免你以為我空口講白話，先交代下同各前度嘅分手理由：

初戀（中學） ： 成日唔理我 第二初戀（中學） ： 太理我，成日管住晒（睇下人幾犯賤） 港女（大學） ： 偷食，無錯，原來我戴過綠帽 玲玲（大學） ： 到今日依然未知點解分手（但分咗手十幾年） 圓圓（大學） ： 黑社會嚟 史高治（畢業後）： 原因好複雜

上面呢幾次拖，肯定分錯手：應該一早分手，等我可以早啲遇上責任主編（即現任女友）……哈哈哈哈哈（上面呢幾句並非佢迫我打嘅）。

問：咩為之分錯手？

答：兩個人唔應該分手，理應繼續一齊。

當時同初戀分手，隔咗幾年，試過追返佢，不過失敗；同港女分手，年幾後佢放棄第三者，我哋一齊返（好戇鳩，明明佢有第三者在先，我又跪又唱晒歌佢先肯復合）；同玲玲離離合合，橫跨近十年；試過搵返史高治，佢拒絕咗（以上故事嘅詳情，麻煩參考本《史詩式愛情》）。只有第二初戀同圓圓，無諗過搵返佢哋，半‧秒‧都‧冇。

Action matters : 分錯手，自怨自艾無撚用，再悲傷一億年，只變成化石，分手事實不變。唯有實際行動，搵返人嘗試復合先有機會。啲人話「好馬不吃回頭草」，挑你老味！有草唔食，唔通食屎呀？

想返啅嗰陣，應當如何思考？萬一/如果/有日你分錯手，應該點做先可以追返前女友？

───

【研究分析篇】

喺有任何行動前，務必要搞清楚你同前度之間嘅事實。請回答以下問題（留意，以下方案只適合男生；女生嗰個喺最尾）：

1. 邊個飛邊個？

你飛佢，返啅機會較大；佢飛你，返啅機會較細。

如果大家經協議談判後，同意和平分手（其實唔會有不和平分手－唔通你拎枝核彈出嚟咩），復合機會接近零。

如果你唔肯定分咗手未，你對呢段感情都幾冇把握力……最好whatsapp問下對方，到時會確認到你真係分咗手。

2. 有冇第三者？

人哋有第三者（或四五六者），未分手已經去咗峇里島風流快活緊，做乜要同返你一齊？相反，你有第三者……好心唔好咁賤成日想姓齊先得……

一對情侶分手，有90%係因為有第三者/第三者醞釀中/佢想溝過第二個/有第二個溝緊佢。尤其30歲以下嘅，分手十居其九因為第三者(sorry其實十居其九都係90%)。

2002年港女派咗頂綠帽，我一早估到，無嬲過一秒鐘（佩服自己咁豁達），最後反而係佢頂唔順講分手。我仲中意港女，唔想分手，但既然佢覺得第三者畀到幸福佢，咁咪算囉。人哋有咗第二個咁開心，仲搵佢做乜？

你以為自己可以畀更好環境、更多幸福畀對方？收皮啦，對方有第三者，用腳投下一票，就算食草皮都唔想同你一齊，企開啲啦屌你老母！

於是我等，希望港女回心轉意……咁又唔係坐喺度齋等，中途有同其他女仔拍拖。即係，排隊等公屋咁囉，你交完表真係坐喺何文田房委會總部門口等足五年再上樓咩？中途咪又係做其他嘢，租樓搬屋諗下買唔買到樓咁，咁唔撚係「等」咩？

大概2004年，剛投身火坑無錢無拖拍，又知道港女無拖拍，慢慢接近返佢，最後一齊返（不過好快又散咗）。

總之，有第三者，唔使諗復合。因為你已經輸咗一次，無謂再主動去畀人侮辱多一鑊。即使想復合，亦只能夠鳩等，等到人分手。

3. 分手原因係乜？

呢個乃上條題嘅精髓所在。撇除第三者，如果你哋分手係為咗啲濕碎原因同誤會，例如嗌咗場無謂嘅交、你覺得佢偷食（而佢冇），甚至乎更無謂戇居嘅事，復合可能性較高，只要賴皮就得；相反，分手因為「大原則、大是大非」，例如政治取態、婚姻睇法、人生前途、佢好中意睇無綫電視，呢個復合嘅可能性較低－除非是但一方肯作出徹底改變。

上面提到，從來冇諗過復合嘅圓圓同第二初戀，分手基於非常結構性嘅考慮（套用黃子華說法）：圓圓生於販賣毒品嘅黑社會世家，負責睇數，同佢拍拖分分鐘拍到入赤柱，甚至伏屍街頭；第二初戀係一個控制狂，無時無刻想管住我。即使佢哋分手後想復合，我完全無考慮就拒絕咗。

反覆思量後，仍然唔知因乜原因分手，我強烈建議你算撚數。唔知乜嘢原因，不外乎以下幾個：

－關係好複雜，各種因素千絲萬縷 －你哋因了解而分開……而你唔想承認 －你根本無了解過呢段關係，你唔了解/亦唔願意理解對方

你唔明白點解分手，就唔能夠說服自己同對方，點解仲要喺返埋一齊。講到尾，從一開始，你無法知道判斷同了解點解分手係錯。

愛對方，並唔等同要同對方一齊。「愛就要一齊」，徹底漠視現實嘅美好幻想，同白雪公主醒返之後與皇子永遠快快樂樂咁生活落去，一樣咁不可思議同呃鳩人。

互相相愛，只係兩個人一齊嘅先決條件。同自宮一樣：欲練神功，必先自宮；即使自宮，未必成功。

分手未必係最差嘅終結，正如結婚生仔都未必為最佳嘅結局－2007–2016年，香港共有140,000對夫婦離婚（資料來源）。正如近呢幾年，我先明白同玲玲分開最好－我只係佢「生命中嘅可卡因」（呢個詞語幾撚文青）：

「一齊快樂但有害，唔一齊有陣痛但長遠有益。」

後嚟接受到一個殘酷嘅現實，分開係對兩個最好嘅結局。你問我乜叫成長。成長係接受到現實嘅不完美，將教訓好好記住、將痛苦收藏喺腦海深深處，然後彷彿無事咁生存。（詳情請細閱村上春樹《挪威的森林》、《沒有色彩的多崎作和他的巡禮之年》）

4. 分咗手幾耐？

分手越耐，人哋唔再愛你/同咗第二個一齊/唔記得你係邊個嘅機會會越嚟越高，復合嘅機會就越細。

概括嚟講，分手兩年內，仍有機會；過咗兩年，人哋分分鐘連仔都生埋仲離埋婚，即使一齊，與其話係復合，倒不如當重新一段感情。

總結以上，你考慮請求復合時，請回答以下四條問題：

1. 邊個飛邊個？ 2. 有冇第三者？ 3. 分手原因係乜？ 4. 分咗手幾耐？

───

【策略篇】

當你確定自己要復合，必須制定策略。留意，你嘅對手唔係一般陌生路人，佢知晒你籠嘢，學星矢話齋「看過一次嘅招數，第二次就冇效」。

有用嘅策略得兩個：「賴皮」同「放低面子，道歉、認錯，作出改變」，請因應情況而挑選最適合嘅策略。

1. 賴皮

精髓：唔承認有講過分手、唔承認分手係既定事實，將黑講成白、白講成灰

學習對象：香港政府嘅高官

相近策略：「當我無講過」、扮死狗、死ler、耍寶（唔識譯，大概等同賴皮同玩世不恭，請細閱太宰治嘅《人間失格》以明白耍寶嘅真諦）

適用於：你飛佢而佢依然好愛你、因為誤會 / 非結構性問題而分手、你本身係條無賴 / 幽默大師

評價：簡單、易用，成本低，唔使作出任何改變，純粹畀個下台階大家，去忘記有人講過分手呢件事－直到有人再提出。

2. 放低面子，道歉、認錯，作出改變

精髓：一個字「改變」，change

學習對象：Walter White (美劇“Breaking Bad”主角)，一個會進步、進化嘅電視劇集角色。相比起拍咗六季仍然戇鳩鳩嘅小學雞 Piper Chapman (“Orange is the new black”)、做每件事都失敗收場嘅 Marty Byrde (“Ozark”)、去到第八季仍沉醉於近親相交嘅 Game of Thrones 仝人（第一季女王同細佬扑嘢、第七季龍女同 you-know-nothing仍玩緊同一套），Walter White係智慧同進步嘅象徵。

適用於：因為誤會而你願意認錯、結構性問題而分手

評價：如果你真心做到呢樣嘢，你同伴侶嘅關係會有明顯改善。唔見棺材唔流眼淚，好多人去到分手嗰刻先知自己有幾仆街（唔知嘅更多）。

前提有三個：你知道錯乜、肯改、知道點改。最難係認「低威」，願意改變。

───

大部份人要求復合並唔係因為愛，亦非覺得可以同對方一齊長久走落去，而係單純出於唔甘心，自己喺段關係付出咗（好似）好多，唔甘心結局係失敗收場。

好多人喺賭枱、股市一樣有咁嘅心態……而呢啲人最終輸到仆街。偶爾有人復合不果，憤而傷害對方，邊忽叫愛呀大佬？

「過去讓它過去」，大家有好美好嘅時光，開心過，時間到咗，洒脫啲，分手就分手。

你更加千祈唔好以求婚作為復合手段。你以為咁做係付出好大誠意，實際只是戇鳩兒。從以下角度想像下：辭咗工，舊老闆打畀你話畀個 CEO你做，希望你回巢。

正常人會講句：唔撚係呀嘛？

我前日先講分手，今日講結婚，會唔會起伏大咗同快咗些少？分得手，即使係誤會都代表大家有些少嘢唔夾，一嘢就去結婚？有人同我講「復合之後我哋就去結婚」，講嗰條友一係痴咗線、一係玩嘢，咁我仲信你？

───

睇完以上幾千字，係咪覺得索性溝過第二條新嘅女更好、簡單10000億倍？無所謂以前嘅包伏，無過去，大家真真正正由頭嚟過，重新探索，似乎更實際。你知道點解無乜人食回頭草未？所以，答返我文章開頭嗰個問題：

「追返佢，好煩、太複雜，算撚數，你疊埋心水溝過第二個啦。」

不過，如果咁就放棄，你嘅愛有幾真有幾深呢，又？

＊＊＊

以上嘅方法係畀男人用。如果你係女人，發覺分錯手咁點算？一個字：

「嗲。」

點解？男人都係鳩硬心軟嘅動物。

細個嗰陣希望投胎繼續做男人，慢慢覺得做女人，其實都唔錯。

Follow me on Medium，我嘅文字唔會令你失望（不過寫文嘅速度會）。 https://medium.com/@relgitsjg

【今年史兄喺Medium所得稿費，將全數用作支援魚蛋革命嘅義士。】

Facebook page：https://www.facebook.com/Relgitsjg