Game of Thrones 究竟算不算爛尾？

［以下全篇都有劇透］

我唔係GOT嘅Fans，但係我四月中時，開始睇第一季，到左今日，我終於都睇完第八季最後一集。

「一個系列，能夠係全世界做成咁大嘅迴響，一定唔簡單。」我係抱住呢個心情打開自己一早就有Subscribe嘅HBO GO，然後有個覺悟係呢一套所謂神劇有機會令我不眠不休咁用70+小時追晒。

但當我睇完之後，我只係想上帝還返呢幾十個鐘比我，呢幾十個鐘，我拎去睇書會學多左野，我拎去搵錢至少可以食餐好。

特別係結局篇，網上有好多評論，有好多反對聲音，大家紛紛話套劇「爛尾」、「垃圾」，有人想買凶殺死編劇同導演（通稱D&D），有人出聯署要求HBO重拍。

至於我，我就覺得呢套劇其實唔算爛尾，佢第一季算中上，但由Red Wedding後開始，每況愈下，到左第七季係全套劇嘅最低點，甚至負分，反而到左第八季，係有少少回升，升返做零分。

呢套野根本就係70+個鐘嘅「一堆雜交到IQ變負嘅低能兒在玩鬥氣爭櫈仔」遊戲，由頭到尾都無變過。

因為由頭到尾都係爛，咁係爛，而唔係爛尾！即係一餐飯如果得個甜品唔好食，就係爛尾，如果成餐飯都唔好食，就係唔好食。

以下數一下令我討厭嘅兩大點：

劇情不合理

係！劇情唔合理，唔係Slow Motion然後Ayra只係騎馬騎到去Kings Landing門口咁簡單，而係根本八季入面，好多好多地方都唔合理，超級唔理，極度唔合理。

首先，係GOT嘅世界入面，係無偵察兵的。即係話如果你要奇襲，你只需要就咁行過去，就可以奇襲。

阿Robb Stark捉阿Jaime果次，Jamie自己無斥侯嘅？騎程七日內，離開自己附近八個方向有無大型部隊駐紥呢D野好基本啫係咪呀！（有讀者提我Robb係有捉過阿Jamie一個偵察兵的，很好，原來有一個，八季咁多終於見到一個，只要佢比假消息，就搞掂，我諗緊我係咪要更正返做「GOT嘅世界入面，D偵察兵係廢的」之類）

你話阿Robb做晒喬裝，暗渡陳倉都話丫，但事實唔係喎，佢派一隊人扮打另一邊，你就唔知佢大部隊去左邊啦喎，有無可能呀！

唔係一次喎，成套劇，八季，無一隊軍隊有偵察兵，Lannister打Tyrell又係咁，海戰又係咁，Battle of The Bastards 又係咁。

更離譜嘅係，Wildling之前明明有人識上烏鴉身，Bran都識，點解唔睇清楚先打仗？

第二樣野，就係成套劇入面，幾乎所有人都係鬥氣，而唔係解決問題，所有人都係做野之前，唔會考慮後果嘅小學生。

Cersei你扶植武裝教團嘅時候有無諗過咁樣根本一定會燒到你自己？Jon Snow你話去帶隻喪屍去見Cersei嘅時候有無諗過佢根本唔會理你？Ellaria Sand你毒死佢個女嘅時候有無諗過對面會報復？龍后將D貴族釘上個架嘅時候有無諗過人地會反抗？Stannis燒死自己個女嘅時候有無諗過咁樣其實返唔到轉頭？

咁你唔諗，但係我有諗丫嘛，我係一個合理嘅人黎嫁，我求你地，管理住咁大個城，咁大條軍隊，做決定之前，諗一諗、兩諗甚至三諗都唔係好過份丫？

你捉象棋都要諗五六步啦，你管理咁大個城乜撚都唔使諗？

定係諗完都仲係咁嘅死樣？

第三樣野，就係D故事橋段一旦完左，就會完全完晒，好似從來都無出現過係呢個世界上面咁。

好似武裝教團咁，High Sparrow炸死左，但個教團呢？之前咁多人，炸左個教堂就個個安份守紀聽朝準時返工？無人會繼續反抗？無人需要比人安撫？Cersei無野需要跟進？

又好似Sons of Harpy咁，之前鬼咁強，事件解決完之後就失晒蹤？無人會記得佢地，無人會諗起佢地，龍后千秋萬載，一統江湖？

甚至乎成塊東方大陸，龍后過左黎Westaro之後，成塊陸沉左？一句都唔使講？Cersei買黃金兵團你龍后係Merleen唔使搵人截下佢？Iron Bank借錢比Cersei，然後又唔會買返D龍后黎對沖？

仲有好多好多劇情唔合理嘅地方，最慘嘅就係佢唔合理得黎，又好鬼容易估，好悶；如果你唔合理得黎，係完全估你唔到果隻，我都可以當笑片睇，笑下輕鬆下，而家呢？

而我睇到第四季之後，每一季都係用個「捱」字黎形容睇嘅時間。

人物設定非常討厭

以下係我最討厭角色排名：

第一位，Daenerys Targaryen

呢條女，好乞我憎，最乞人憎嘅地方係佢從來都唔會靠自己去解決任何問題，有問題放係佢前面，佢乜都唔使做，編劇之力會幫佢做好晒。

比自己阿哥賣比大隻佬，唔反抗，然後大隻佬鐘意佢，殺左佢阿哥；大隻佬死左，佢比人呃，眼看就要收皮，求其點個火就生左三隻龍出黎；帶住三隻龍，無食物，無錢，無啦啦有個黑鬼比錢佢使；帶住一堆錢，去買兵，買完之後唔比錢，仲要殺埋個賣家，之後仲要人人都愛佢；去到另一個地方，將D人釘晒上架，搞到比人暗殺要走佬，一個人企係草原中間，諗住唔餓死都晒死，大隻佬以前嘅同伴又出黎救佢；大隻佬以前嘅同伴叫佢安安份份做Khaleesi，佢唔肯，燒死晒人地，然後唔知點解成個部放不但唔憎佢，仲好愛佢；知道自己蠢，唔識治國，編劇又係對面海運幾個文官過黎幫佢。

乜都唔使做，就要風得風，要雨得雨，呢種人，其實即係二世祖，只不過佢爸爸係編劇咁解，好難唔乞人憎。

佢另一點更乞人憎嘅係，沽名吊譽，由佢救左無垢者開始，每次出場，都要講晒自己水蛇春咁長嘅名號，一隻Starbuck杯都寫唔晒。

唔係沽名吊譽係乜？

即係換做現代人，如果有個人每次介紹自己都係咁講：

「你好，我係小學常識問答賽初級組冠軍、文言文朗誦比賽金獎、全港中學徵文比賽冠軍、十八區歌唱比賽冠軍、會考8A、高考4A1B、大學GPA 4.0 First Hon畢業、雷曼證卷見習經理方麗娜。」

你估你頂唔頂得順？

我就頂唔順，唔好話要呢個人做我上司，我連呢個人做我朋友都唔想。

第三樣野，就係到左第八季終於捨得爆發嘅，佢果種暴戾，好多人話佢第八季性格改變，變咩啫，佢根本一路以黎都係咁，活生生燒死一個人同埋一刀斬左個頭落黎，明顯前者係殘忍好多，聽尖叫聲就知，但呢個女人每次要殺人，有得揀都一定揀活生生燒死？

即係明明應該同奴隸主談判或者鎮壓，但係佢選擇嘅係活生生咁將佢地釘係個架上面晒死。

點解？原因得一個，就係佢生性暴戾。

一個乜都唔識，乜都唔理，然後自自然然擁有一切，沽名吊譽，生性暴戾嘅女主角，真係非常非常咁討厭。

第二位，Cersei Lannister

呢個女人我相信都唔止得我一個討厭佢，好多人可能唔鐘意佢心狠手辣，又或者唔鐘意佢奸。

我呢，我剩係唔鐘意佢一樣野嘅啫。

蠢

好撚蠢。

做所有野都極致地感情用事，做錯野唔會反醒，唔會諗下下次點樣做好D，死左一個仔之後唔好好諗下應該點樣保護第二個，甚至幾乎同親手將自己個仔推落樓一樣咁令第二個仔死埋。

有時一個人蠢其實都唔係好大問題，人梗係有聰明，有蠢，有靚，有醜；但佢嘅問題係，蠢之餘，仲要嚴重地高估自己嘅智商。

諗住自己個仔做左King可以挾天子以令諸候，點知完全控制唔到Joffrey，咁算啦，你話Joffrey痴痴地好難控制，咁到大仔死左細仔上，溫文耳仔軟嘅Tommen你搞得掂啦掛，都係搞唔掂，搞唔掂都唔緊要，仲要搞埋D自己一定控制唔到嘅狂熱武裝宗教組織。

講真，佢真係好乞人憎，佢之所以排第二嘅原因，只係因為佢好多時都要為自己嘅行為承擔返後果，唔似第一位嘅某人，有編劇之力幫佢搞返掂。

第三位，Sansa Stark

由細果嘅時候好傻好天真，到大個之後居然想學Cersei，你就知呢條女嘅好傻好天真唔係扮出黎嘅，係真係好傻好天真。

我真係頂唔順呢種女仔，講真，生於亂世，要安身立命，點都要訓練下自己嘅思維，諗下每日發生緊嘅事係點解會發生，諗下身邊嘅人係為咩要咁做。

開頭唔識，唔緊要，大佬，死左個老豆之後你要識啦掛；都仲係唔識，唔緊要，被人逼你嫁比Tyrion，你要識啦掛； 都唔識，唔緊要，比Ramsay姦完之後都應該要學下啦。

但佢無，無諗過去讀下書，吸收下古人嘅智慧，學下基本邏輯。佢走去學Cersei，OMFG，學果個做野唔諗後果，除左鬥氣同睇住自己D仔女死之外乜都唔識嘅Cersei。

我真係祝你好運。

題外話，講完我討厭角色，都講下我喜歡嘅角色，我最喜歡嘅角色：

第一位，Night King

佢係第五季之後，唯一一個遇到問題會諗方法解決嘅角色，你諗下呢件事係幾咁可悲，一隻唔識講野，喪屍咁嘅奸角，係唯一一個遇到問題會諗方法解決嘅角色⋯⋯

The Wall有魔法另屍鬼行唔到過去，OK，我搵隻龍返黎燒爆The Wall佢。

屍鬼怕火行唔到向前，OK，我人疊人疊過去。

屍鬼唔識遊水，唔緊要，我等天氣凍D結晒冰再黎打你班仆街闔家剷。

Bran好難搵，OK，我趁佢扮烏鴉黎睇我嘅時候係佢手度落Mark。

遇神殺神，遇佛殺佛，講真，The Long Night嘅時候我真係好想佢贏，只可惜，佢係終極奸角，終極奸角好少好少會贏，難食出過十三么。

第二位，Tywin Lannister

全劇唯一一個智力正常嘅統治者，雖然如果打三國志，佢智力可能都係80左右，但係呢個世界，佢已經係IQ最高嘅人。

諗野正常、治國正常、打仗正常，完全係呢套劇嘅異數。

如果唔係佢真心歧視自己個仔，我可能會更鐘意佢。

期望管理嘅問題

其實我睇到第四季左右嘅時候，有問過D Friend究竟鐘意呢套劇D乜，大佬，D人又低能，劇情又唔合理，又長又悶。

好多人有好多唔同嘅答案，但我覺得，其實大家鐘意嘅唔係呢套劇，而係呢堆人，呢個世界帶比大家嘅幻想空間。

好多人幻想第八季Bran會騎龍，好多人幻想有人會變做Night King，好多人幻想Lannister家族會死晒。

因為佢地唔同我，佢地係一年一季咁睇，所以好多時間比佢地幻想，好多時間比佢地去忘記呢套劇前幾季唔合理嘅地方。

所以到左第八季，要完啦，大家嘅幻想破滅。

無錯，呢套劇唔係爛尾，呢套劇係令大家幻想破滅左，點解龍后無令Westaro人民得到幸福，點解Jon Snow無做到King，點解Ayra Stark唔可以親手殺死Cersei，類似嘅問題令到大家好不滿。

當你現實中幻想破滅嘅時候，你無野可以鬧，因為現實就係現實，你明明幻想自己可以年薪百萬，彈指間牆櫓灰飛煙滅，但現實係你朝九晚十一做生做死，人工都係雞碎咁多，你幻想破滅，你可以鬧個社會，可以鬧個天，可以鬧自己嘅命運； 問題係呢堆野唔會聽到你鬧佢。

但係如果一套劇令你幻想破滅呢？

你可以鬧個導演同編劇，而且，佢地會聽到，佢地會不爽。所以先至會有好多反對聲音，會話套劇「爛尾」、「垃圾」，會想買凶殺死編劇同導演，會有人出聯署要求HBO重拍。

講到低就係期望管理嘅問題，我用左幾個星期，睇晒八季，根本無時間比我幻想，無時間比我忘記前幾季做得差嘅位，咁我自然唔會幻想破滅，我嘅反應亦都自自然然唔會咁大。

所以呢套野其實由頭到尾都唔係真係好好，佢只係一般地爛，唔係爛尾。