《記幾筆流水帳》

近排超級忙，完全冇時間寫嘢，遑論研究。只分享下幾件事：

＿＿＿＿＿＿

1. 改變一個重要嘅習慣

1.1 多得 Medium一班好事之徒喺度圍爐寫咖啡，機緣巧合下終於搣甩咗每朝飲一罐雀巢咖啡嘅習慣，改飲掛耳包手沖咖啡。（請參考：萃取／品嘗）

每朝一罐飲雀巢咖啡嘅習慣，至今八年多，睇住由$5.x一路漲到$8.x-$10.x。超甜無咖啡味都算，最離譜係個罐一直咁難開，多年嚟完全無改善過。日本人啲罐裝咖啡，輕輕一啪必定開到；雀巢嗰啲，我要攝個萬字夾落個蓋度，用盡槓桿原理，先有機會開到。唔用萬字夾開，輕則斷指甲都開唔到、重則反甲流撚晒血但一樣開唔到。每朝早被迫返工然後第一個任務就係要開呢罐垃圾咖啡，你明唔明生活有幾悲哀？

下年歡樂滿東華應舉辦雀巢冠名贊助「一分鐘內徒手開罐裝咖啡比賽」，要雀巢班高層試下開自己出品嘅罐裝咖啡。到時電視畫面必定異常血腥，要移師 thisav播出。

題外話，同為雀巢出品、已經停產嘅四方果啫喱，一樣難開，難開程度比罐裝咖啡有過之而無不及。食完飯，諗住開開心心開個四方果啫喱食，無數次出盡九牛二虎之力、搣到手痛、封面包裝膠爛晒，盒裏面嘅啫喱依然原封不動。難開到屎都滾，同四方閪一樣咁難搞，雅興盡失。

試過打去熱線半詢問半投訴，要求改善四方果啫喱個包裝，對方回應「好好好」，好你老母，直到停產，依然毫無吋進，抵你執笠。

雀巢好撚用心良苦，呢啲四方果啫喱、罐裝咖啡，皆非有益之物。越難打開，令你食用嘅時間成本上升，間接令你食少啲。

又講遠咗，要戒雀巢咖啡嘅主要原因，係太肥、超多糖，搞到我個肚腩越嚟越大。想戒，一直搵唔到代替品－朝早無咖啡因嘅話，生產力係零甚至為負數。有次喺 Aeon見到掛耳包咖啡（DOUTOR牌，日本連鎖咖啡店），試完發覺 (i)香味同味道唔錯 同 (ii)價錢低過罐裝好多。把心一橫放棄雀巢，每朝沖包掛耳嘅齋咖飲……

飲咗兩個月，唔知係事實定係主觀幻覺，我肚腩好似細咗。

1.2 除咗改飲掛耳咖啡，早餐亦由聖安娜預先包裝嘅麵包，變成屋企附近茶餐廳嘅新鮮出爐麵包。連早餐都轉會，我非常不滿聖安娜嘅麵包冷冰冰、硬掘掘，咬落去似化學物品；地鐵站聖記所賣嘅包，更加清一式有膠袋包住，好唔撚環保－我唔係乜撚講環保，絕對唔係環保撚（起碼我夏天係長開冷氣）。只係如果環保嘅代價好低，我係會毫不猶豫去做。

年中搬屋，去到新居後發覺每朝往地鐵站嘅路途上，有間茶餐廳每朝有賣新鮮出爐嘅麵包－菠蘿包、餐肉包、腿蛋包、墨西哥包（好多後生仔唔知係乜嚟），熱辣辣、香噴噴，我用摺疊式膠杯裝起，拎到返公司個包仲係暖嘅，食落去感覺好美好。

我同你講，每朝品嚐到熱辣辣嘅麵包同咖啡，絕大幸福嚟。

【以前】 喺聖記買麵包加雀巢 －價錢：$14-$16（視乎食乜包同有冇特價） －味道：啲包好難食，咖啡好多糖，純粹提供咖啡因 －環保：一不可重要鐵罐，一不可重用透明膠袋（有啲人仲要拎多個白色膠袋，痴撚線）

【而家】 街口茶餐廳麵包＋自沖咖啡 －價錢：$14 －味道：新鮮出爐面麵包，即沖零糖零奶咖啡 －環保：一個不織布材嘅掛耳袋。又咁講，掛耳式唔算絕對環保，起碼用濾紙更加環保。屌，得咧得咧，咁直接用個咀去水機飲水、甚至唔生存最環保啦。

【而家】呢個組合，不論喺價錢、質素同環保上，徹底完勝以前嘅早餐combo。我唔知自己點解食屎食咗咁多年先發覺原來食緊屎……諗真啲，我都叫後尾發現食緊屎。好多人將票投畀啲畀屎自己食嘅人，投咗幾十年依然蒙在鼓裏……嗱，我講緊票投民建聯嘅人，你啲泛民支持者咪撚對號入座。（呢段嘅語法與文字之臃腫，簡直無法無天）

1.3 上面提到環保杯。我年中買咗個摺疊式環保杯，朝日買麵包用、午後偶爾去星巴克／太平洋餿水會用、夜晚上堂飲水又會用。使用率奇高，起碼用得多過個腦。

個杯質地似飛機杯（矽膠），仲幾貴，要百幾蚊。要靠去星巴克每次減$4回本，未breakeven已經破咗產；不過，每次見到啲外賣杯呀、盒呀、飲管呀，用一次就掉，嚇撚死你。我試過將幾日嘅垃圾儲起嚟，多到嚇親自己，尤其是午晚皆食外賣，幾日啲發泡膠疊起嚟高過我。

講咗我唔係環保撚（越澄清越顯得我係，好似小學生周圍話人放屁其實係自己放咁），唔結婚唔生仔已經係對環境 / 人類文明 / 自己財政最好嘅貢獻，然而每晚用嘅紙巾唔算少……好多嘢，做完未必對事情有即時、實際幫助，我只求對得住自己，起碼自己身體力行；其他人環唔環保，我無興趣去理會同干涉。大家做好自己本份，已經係對世界、社會、娘親最好嘅回報咧。

上星期有幾陣雨，望一望商場垃圾筒啲雨遮膠袋，多到滿。啲膠袋全部用一次。低能：

人類係地球嘅寄生蟲嚟。

2. 你，懷念乜？

住咗尖沙咀幾十年，最近發生兩件事，理應觸動老街坊嘅情緒，奈何我居然冇任何感覺。

－ HMV全線結業 － 海防道街市/熟食市場重建

HMV死前，於尖沙咀嘅分店位於 I-Square。只要你年過三十，會記得當初HMV由英國攻港，1994/95年尖沙咀分店喺北京道和漢口道交界、現址為Adidas嗰四層樓。

當年CD唱片好好賣，阿茂阿壽出碟都白金(5萬張正版為白金，唔係5萬張7–11 Sanrio Coupon)、雙白金，張國榮、張學友可以賣到五六白金；而家啲歌手要賣碟嘅話，賣到死都未籌到帛金。HMV啲碟每隻賣貴$20－旺角賣$85佢賣$105－於是畀得起租。或者，佢哋以為自己畀得起。

後嚟 HMV搬咗去斜對面，兩層。

對於尖沙咀四層 HMV，大部份時間係作為地標用嚟約人，功用同尖沙咀地鐵恒生差唔多（又，唔知幾時開始，尖咀地鐵好仆街地有兩組恒生 ATM機，成日搞錯）。幾個女友同我暢遊過 HMV，作為拍拖節目；自己一個人無嘢做會去鳩行一陣。HMV只係一個打發時間嘅地方，印象模糊；而當我出嚟做嘢投身火海之後，根本無時間可以打發，一年最多行一次 HMV。

至於幫襯買嘢……遺憾地廿幾年嚟，一直信服唔到自己點解去 HMV買隻碟要畀多$20溢價。音樂要時間、耐性同品味去欣賞（三樣我都冇），試聽對我嚟講，毫無價值。我入去唱片舖，好多時已經知道要買乜嘢碟，拿拿臨平平哋畀錢就走。

所以，我喺尖咀 HMV分店，只係買過幾隻碟。其中一隻，係國貨城嘅EP《你是我的一切》。EP即係CD細碟，只得3吋、手心大細，一般得一至三首歌，EP呢樣嘢喺日本好流行，喺香港從來未試過受歡迎。當年去 HMV買《你是我的一切》，一來由於我好中意郭富城（同埋佢個杜拉格斯頭）、二來 HMV有簽名版、三來我計過數 EP只係$65，溢價溢極有個譜。

點知，佢老母臭閪，HMV賣$80，溢價一樣咁離譜。

然後，有好幾次 HMV有獨家／限定物品售賣（印象模糊到唔記得係乜）。當我知道啲員工自己 hold起晒圖利，而分店一件貨都冇得賣，更加無興趣幫襯。

無錯，上述對 HMV嘅回憶，好dry、好模糊、好普通－呢個正正係 HMV喺我心目中嘅感覺。

再者，近日執嗰個 HMV（由蕭定一擁有），同199x年嘅 HMV（英國嘢）已經係唔同嘢嚟。同樣叫 HMV，未執前嘅 HMV賣嘅嘢更多元化，不過唔同咗就係唔同咗。正如19970630後，呢度咪又仲叫做香港。HMV 執笠，毫不意外，亦唔感到可惜。

───

相比起HMV，我對海防道街市/熟食市場嘅感情，深厚1000000倍。

我阿媽從來唔喺海防道街市買餸，因為好貴，佢寧願走去佐敦官涌買；不過，佢做女嗰陣識咗個女性朋友，呢個女仔後尾嫁咗個賣雞嘅，婚後一齊喺海防道街市賣雞。

阿媽同我好偶爾會同賣雞嘅呢對夫婦飲茶。重點：呢對夫婦有個獨女，同我同年，幾靚，叫阿宜。

撇除飲茶見到面，九歲十歲嗰陣（1989–1990年）仲會一個人戇鳩鳩咁行去海防道街市，睇下阿宜喺唔喺檔口。問題係，從來冇人話過阿宜會出現喺雞檔。事實上我亦未曾喺嗰度見過阿宜，偏偏又依然繼續去雞檔，搏有神蹟出現。男人就係咁撚奇怪，一講到女人就用碌鳩諗嘢（而碌鳩是冇腦的）。

某晚，阿媽食飯嗰陣同老竇講：

「今日下午，阿廖（雞檔老闆姓廖）老婆喺機場打畀我，話佢哋移民加拿大，要離開香港。」

然後……撚有然後咩。我冇再聽到阿宜嘅消息。

當年，朋友喺你嘅世界消失，就係咁突然同簡單。一個電話，我要移民咧，bye～～返學隔離位退咗學，呀佢上星期去咗英國咧～～

未曾酒醉已清醒，未曾深愛已無情。雞檔之女阿宜喺我世界突然消失（事實係人哋根本無插入過我世界, vice versa），之後大概十年時間，海防道街市喺我腦海中 black out咗，無再出現。

直到廿歲，開始幫襯德發牛丸同隔離嘅發興茶檔，食飯食牛丸食油占多食煙。有時候喺呢度食完飯會再去亞士厘道 My Coffee。

德發同發興，兩檔嘢唔同老闆，不過你喺發興坐，點德發牛丸嘅嘢。

喺發興食一餐，見到嘅人比起喺火坑工作三百年仲要多：一開口就粗口嘅西裝友、附近廣東道租界名店嘅售貨員姐姐（清一式煙鏟）、地盤工人、的士司機、長期進駐兼瘋狂鋤大弟／鬥地主嘅阿叔三人組、見到你包煙又大把位仲要坐埋嚟然後嫌棄你食煙臭親佢嘅八婆。發興最出名，當然係「媚姨」一家，包括同周星馳《行運一條龍》個「媚姨」一樣樣嘅「媚姨」、邊煮面邊食煙嘅黑面神老竇、肥仔兩兄弟，仲有十足十 One Piece Big Mum嘅姑媽，每個家庭成員各具特色。

凍檸茶（後尾改飲咖啡或奶茶）、油占多、德發淨牛丸（簡稱「彈出」，尤如雲吞面叫「細蓉」），簡單，直接，好味。呢個配搭，一食食足十幾年，春夏秋冬，風吹雨打，日晒雨淋，任憑身邊女友點變、特首係邊個含家剷，唯一無變係呢三寶仲有喺呢度瘋狂食煙。

若然一枝煙扣三分鐘壽命，我大概留低咗三年命喺發興茶檔。

______

幾年前某日，我一如以往凍檸茶、油占多、德發淨牛丸。

嗰日啲牛丸好難食，唔彈口，無牛味。

嗰陣我已經發現澳牛啲炒蛋變咗質。我無同媚姨投訴，只係碗牛丸食淨幾粒。媚姨過嚟收嘢嗰陣，細細聲同我講：

「唔好再叫德發咧。檔嘢啲質素過晒氣，下滑得好緊要。」

我幾乎喊咗出嚟。

半個檔主叫你唔好再嚟食－因為間嘢啲質素唔掂。好心痛，非常心酸。

自此我開始減少幫襯發興同德發。

早幾個月睇到報紙話海防道熟食檔要拆，遺憾地我連些少光顧嘅衝動都冇。德發最美好嘅歲月已經過去，德發早已死亡。我只希望記住佢美好嘅一面－10歲時第一次食德發牛丸，驚為天人；我唔想後期質素慘不忍睹嘅食物，仲有一大班一千年都唔幫襯然後人哋執就嚟打咭嘅人組成嘅賓墟，成為德發喺我心目中最後嘅回憶。

澳牛、發興、星座、新記、新發，我天真地以為，呢幾間茶記能夠屹立不倒。金馬倫道新發早已歸西，星座新記澳牛發興亦大不如前。

───

「很多人是三十歲就死了，到八十歲才埋葬」

－日本小說家本間久雄

2018年年頭，去咗兩次靈堂。其中一個係尖沙咀好友嘅契媽（另一個係我媽工廠時代已認識嘅金蘭姊妹）。

兒時家貧，家中一直冇電子遊戲機。與契媽同住嘅友人非常慷慨，經常叫我去佢屋企打機。有時打個天昏地暗，午飯晚飯亦由契媽照顧，唔少日子更加喺契媽屋企打機至天亮。

投身火坑後嚟與友人疏遠，少見友人，亦少見了契媽。近十年，偶爾我媽會告訴我在街上撞見友人契媽－呢個就係我唯一得到契媽消息嘅渠道。

多次想探訪契媽，但總沒有成事。她仍舊住在那兒，只要我花三分鐘、五分鐘，總能去到。

相隔十多年，2017年年底，尖咀好友結婚，終於與契媽再相見。

豈料相隔幾天，再見的地點已是醫院。

然後，再見已是在靈堂。

我無法用文字告訴你，我究竟有多難過－那真的並非筆墨能夠形容，就算能夠，也絕非一兩千字嘅事。

我反覆問過自己，契媽究竟是何時死亡。

契媽，或許是在2017年年底才宣告死亡，但我對她的丁點關心、我與她的連繫，其實在許多年前已經死了。

又或者，許多年前，香港已死、德發已死、契媽已死，還有許多人和事物，一早氣絕，死得徹徹底底，而 HMV根本無生存過。

大家彷彿只等待一個下葬。

Follow me on Medium，我嘅文字唔會令你失望（不過寫文嘅速度會）。 https://medium.com/@relgitsjg

【今年史兄喺Medium所得稿費，將全數用作支援魚蛋革命嘅義士。】

Facebook page：https://www.facebook.com/Relgitsjg