Facebook Page Admin 在大事件的生活日常

每次香港發生天災人禍，包括舊年十號風球「山竹」、包括地鐵 (aka 港鐵) 大規模冧檔，例如上次「大四喜」 (應該寫作「大四囍囍」?) ，以及今次中環站附近炒車，都係 Facebook Page Admin (下稱「管理員」) 開飯嘅日子。

視乎時間啦，一般嚟講，香港人朝早七、八點返工都好慣掃 Facebook ，夜晚九、十點又係。咁今次地鐵炒車呢，消息其實半夜三、四點已經傳出，只係要到晨早大家瞓醒 (或者嚇醒) 先至知道地鐵荃灣線去唔到中環。

咁作為一個盡責嘅管理員呢，第一件事當然就係上 網搵條新聞 link 貼出嚟，然後加兩三句一針見血嘅評論。不過由於近年 FB algo 壓外來 link 壓得好甘，有一啲行家改為貼圖，即係將新聞網站嘅內文截圖，然後視為己出。咁樣嘅迴響好似又會好少少。

之後呢，再望下有冇一啲好爆嘅新聞圖片，一係 save 低再 post ，一係 cap 圖直出，都係飲完頭啖湯之後再下一城嘅方法。記住，要有 caption ，唔好多過三句，你玩 Instagram 都唔會寫多過四十字嘅，係咪？

如果大家好似我咁，有管理多過一個 page ，咁呢個時候就係互 tag 或者互 share 嘅時候。當然都要視乎大家個 Page 嘅定位，例如本身講飲飲食食嘅，最好就搭返句「今朝早餐食乜好」去誘發大家討論，如果本身行開政治路線嘅，當然就要引伸到左中右立場大亂鬥，咁先有 noise 。

去到食晏時間，可以檢查下啲 posts 嘅反應係點，多唔多人留言。有嘅話當然要回覆一下，繼續帶動 engagement growth 。如果開到荼靡，咁就有兩樣嘢可以做：首先係自我檢討，衰乜？點解人哋得、自己 sucked ？當然，如果你玩 Page 玩到課金推 po 嘅，命中率理應高啲，自我問責嘅機會可以少啲。呢個係用錢解決問題嘅奧義。

另一樣要做嘅，係寫文。係，好似我而家咁，寫文。視乎你有幾熟悉呢個話題啦，如果你又 mechanical engineering 又鐵路迷仲知道法國鐵路系統二三事嘅，隨手一揮一篇技術文出嚟分析炒車嘅前世今生當然會收得。如果冇咩實在嘅材料喺手，寫一篇插科打諢抽水政治文都係一個大路又脆口嘅選擇，就好似爆穀咁，啱讀者放工之後吐口水送飯。

不過賴叔老鳥，唔識得寫「香港交通史上最黑暗嘅一日」之類嘅矚目文章。咁， step back 少少，踏後半步，遠離人群寫少少宏觀少少嘅另類現象，其實都係一種解悶方式。

但無論是為甚麼都好，記住，聽朝大家都要準時返工，城中熱話嘅半衰期通常係一日，所以有啲咩口水尾，記得即晚瞓覺前舐埋佢。然後，聽日又要搵過另一個話題去發大嚟搞，好似商場定時定候咁搞啲活動去吸引遊人。為搞而搞，因為唔搞就冇咩好搞。