《我的所謂不良嗜好－咖啡》
見文友 陳零 Grace Chan 同 Keith 提起咖啡，我先醒起，自己朝早飲咖啡嘅習慣，唔經唔覺已經十四五年，自投身火坑以嚟無停過。
＊＊＊警告＊＊＊
此文完全沒有任何教育及文學意義，甚至乎不存在任何意義。
呢個系列係講一個三十幾歲麻甩佬嘅一啲嗜好同中意嘅嘢，包括食煙、飲酒、講粗口、飲咖啡（呢篇）、儲唐老鴨、睇AV，同林嘉欣……嗜好應該得咁多。嗜好，唔使諗得咁複雜，三十幾歲人，想做咪去做、想寫乜咪寫乜。＊＊＊警告＊＊＊
1. Cappuccino
話說回頭，廿歲前我冇飲過咖啡。
細個唔食唔飲黑色嘅嘢（可口可樂除外），最憎苦同辣嘅食物，咖啡又苦又黑色，絕對唔會考慮。加上傳媒成日渲染咖啡令人上癮，而咖啡嘅重要成份「咖啡因」同毒品「可卡因」名字非常相似，我對咖啡一直抱有非常大嘅戒心。我認真嘅，到今日我依然覺得「咖啡因」同「可卡因」為遠房親戚，有啲疏堂關係。
因此，大學之前，冇飲過咖啡。即使為高考而朝九晚十二咁溫書，我只飲雞精，另一種幾難飲嘅黑色飲品。
1999年入大學，有兩個女同學，發明咗一樣簡直同自己條命及個胃有不共戴天之仇嘅飲品：熱檸啡－熱、檸檬、齌啡。佢哋話杯嘢超級提神，我覺得飲完會見到死神。試過飲一啖，熱檸啡嗰種苦、嗰種澀、嗰種索命嘅氣味，對於一個完全唔飲咖啡嘅人嚟講，等同叫個青頭仔同你玩 SM咁超前。無論幾眼瞓，我都冇跟隨呢對女同學嘅步伐，走去飲熱檸啡：
我選擇咗走晒朝早啲堂，瞓到自然醒先返學。
何況，即使飲完呢杯鶴頂紅，呢對女同學上堂依然瞓覺。
第一次有意欲主動接觸咖啡，反而因為一首歌。
首歌叫「Cappuccino」，蕭亞軒主唱
愛情像 Cappuccino 濃濃的眷戀泡沫 誘人的氣息 多愛不釋手 愛情是 Cappuccino 苦苦的美麗滋味 藏在我心頭久久
我同好友活地，唔知點解好中意蕭亞軒－一個唔大波、唔性感、唔sexy、唔靚（男人係咁膚淺），唱歌並唔凸出嘅台灣女歌星。佢當年好紅，同孫燕姿有得揮。佢另外嗰首《突然想起你》，我哋兩個喺卡拉OK睇過一千次。
呢首中板歌「Cappuccino」，亦係 Neway playlist瘋狂重播嘅精選之一。歌中不斷提起cappuccino，話佢苦、偏偏令人印象難忘，於是我某日的起心肝，喺港大 Starbucks嗰個位間咖啡店，買咗人生第一杯 cappuccino（因為首歌有幾句歌詞就去試，年青人就是這麼戇鳩了……好在蕭亞軒唔係唱「強姦女人好撚正」或者「核彈好好味」，哈哈哈哈哈）。順帶一提，我大學嗰陣食煙，一樣係某日個腦浮起「不如食枝煙」嘅念頭。
畀完錢，我好緊張拎杯 cappuccino上手，第一個感覺係……
「仆街個杯係咪空嘅？杯嘢咁輕嘅？」
……飲落去，原來咖啡唔係想像中咁苦，亦無乜嘢熱檸啡咁殺氣重。杯嘢得半杯，好唔抵飲；更重要睇返首「Cappuccino」嘅歌詞：
愛情像 Cappuccino 濃濃的眷戀泡沫 誘人的氣息 多愛不釋手 愛情是 Cappuccino 苦苦的美麗滋味 藏在我心頭久久
呢幾句歌詞毫無邏輯可言，點解「濃濃泡沫」同「眷戀」有關？「苦苦滋味」會「藏在我心頭久久」，將歌詞主題變做可口可樂（第二次出現可口可樂），一樣 work:
愛情像 Coca Cola濃濃的眷戀氣沫 誘人的氣息 多愛不釋手 愛情是 Coca Cola甜甜的美麗滋味 藏在我心頭久久
Anyway，因為一首「Cappuccino」，誤下誤撞幫我打開咗通往咖啡之門。不過，我身份只係一個每日會飲咖啡嘅人，唔會自稱為咖啡狂熱份子，我完全唔沉迷咖啡，亦分唔出好飲同唔好飲嘅咖啡。
因為無研究，又唔敢問人，我一直以為其他咖啡都有朱古力成份（我唔食朱古力），於是喺任何地方、所有國家、全部咖啡店，喺30歲前點咖啡我只會飲 cappuccino或者 regular coffee。
人類真係可以好撚無知啊……
直到近年，責任主編（即女友）話我知，原來 cappuccino等同 Latte，只係奶同咖啡嘅比例有所不同。同樣嘅價錢，杯 Latte拎上手重手啲，感覺抵飲啲，自此我轉會 Latte，好少飲 cappuccino了……
2. 亞士厘道，My coffee
2002年，讀碩士嗰陣嘅女友，有日問我飲唔飲咖啡。我答佢『我飲 cappuccino但好少飲』，佢居然二話不說帶咗我去亞士厘道一間叫「My coffee」嘅咖啡店－我人生中遇上第一間淨係賣咖啡嘅飲品店。
嗰陣已經住喺尖沙咀十幾年，完全唔知呢間咖啡店嘅存在。「My coffee」仲要係神級咖啡店，不論當時定今日，你同人講你去過亞士厘道間咖啡店，好多人會即刻講得出「My coffee」，然後覺得你識欣賞咖啡。
女友同我講，My coffee啲咖啡超級好飲。對於一個淨係飲 cappuccino嘅人嚟講，我唔識分。
My coffee地方細細，位唔多，燈光昏昏暗暗（王家衛最中意嗰隻色調）。My coffee可謂文青集中地（當年未有文青呢個專用名詞），好多藝術家之類嘅人類出沒，又好多外國人，更加見過有客同出名有性格嘅老闆吹唱片吹足兩個鐘－女友去之前千叮萬囑我唔好撩老闆講嘢，條友分分鐘唔應機，到時自己無癮。你入得去 My coffee，做乜都冇人理，當年大把人拎住雜誌坐足一日。當年我讀碩士，拎住大學圖書館借返嚟 Milton Friedman本 Price Theory，試過坐足四個鐘頭，睇咗好幾章，仲唔覺意整污糟咗幾頁。
對我同女友嚟講， My coffee最正係食得煙。好多人食，絕對無人歧視你，絕對無人阻止你。我哋試過起身去 My coffee食早餐、飲咖啡、一邊瘋狂煲煙，一邊做 term paper，跟住返屋企再瘋狂做愛。
我絕對唔係 My coffee嘅常客，不過，喺嗰度可以做自己中意做嘅嘢，無人嘈你，飲得悶悶地就望下亞士厘道人生百態，好自由好舒服。
後嚟我同嗰個女友分開，試過喺 My coffee撞到佢，大家只好當對方透明。為免佢對我難捨難離依依不捨無法自拔，我只好唔再幫襯 My coffee……
輾轉下，隔咗幾年又同返呢個女友一齊，某日佢睇睇下xanga同我講，原來My coffee尋晚最後一晚營業，已經無機會再去，連講再見嘅機會都冇。我記得，我失望咗大概三秒。
而家回想，My coffee真係神級咖啡店了。
好多好多好多年後，活地（即係同樣中蕭亞軒毒嗰個好友）介紹我去東京嘅〈琥珀咖啡〉。活地話入到去，時間好似停止咗一樣；我去咗三次先醒起，琥珀咖啡好似 My coffee，佢令我回想起當年喺 My coffee完成過幾份碩士嘅term paper，KO過幾本學術書嘅日子。飲咖啡、食煙、睇書，平靜寧靜咁度過一個下午。
我哋，連同香港，好似一粒射出去嘅子彈，回唔到頭咧。
自從他走了以後 在我的心中 留著不大不小傷口 在這個入秋街頭所有感受 我還沉溺在回憶漩渦
3. 返工隊咖啡
2004年畢業投身火坑。每日返工最難頂，唔係要做嘢、畀老闆屌、人工雞碎咁多，而係每日要朝早八點幾起身準時返工。尤其是你做大學生嗰幾年，無上過朝早嘅堂。
記得返工頭嗰一年，朝朝遊魂咁，一到下午兩三點似道友未上電咁款。我試過無數次走入廁所瞓覺，十分鐘好、廿分鐘好，一邊聞住隔離左右廁格嘅屎味尿味，一邊進入夢鄉。同朋友傾開，原來好多人後生嗰陣返工都會去廁所瞓覺……
後尾發現朝早啪罐雀巢咖啡，個人醒神好多（呢篇文又出現實名飲品名字，請自行考慮呢篇係膳稿嘅可能性）。自此，我每一日，係每一日，朝早都飲咖啡，唔•飲•唔•得。雀巢 OK、Starbucks OK、茶記咖啡 OK，總之係咖啡就OK（奶茶唔OK）。如果唔飲，嗰朝似食咗懵仔丸咁呆呆滯滯，個腦運行唔到。
飲足十四五年，冇停過，無得停。咖啡對我而言，由始至終只係提神工具。某而家連星期六日都要飲咗咖啡個人先會醒。所以乜嘢走decaf(去咖啡因)嘅咖啡，笑話嚟。無女優嘅AV仲係咪AV？
飲咗十幾年咖啡，我得出以下觀察：
－某程度上，飲咖啡同食白粉毫無分別，「咖啡因」同「可卡因」的確為遠房親戚。我可以幾日唔食煙，但絕對無可能幾日唔飲咖啡。
－連鎖店嚟講，Starbucks好貴，Pacific Coffee仲貴。一杯咖啡$3X，仲要外賣，坐都冇得坐，型唔型我唔知，戇鳩無比就肯定係。通常股票贏咗錢先會奬自己飲一次半次。Pacific Coffee啲咖啡更難飲，難飲到連我唔識分咖啡好壞都知佢好難飲。如果 Starbucks咖啡評分係1分（10分滿分），Pacific Coffee係－20分。
－陳零篇文提到一杯咖啡究竟值幾錢嘅問題。我覺得如果咖啡好飲、坐得舒服，而你又覺得呢樣嘢好重要，值。例如去琥珀飲一杯 hand-dip係港幣$60–70，我覺得值；你叫我喺香港 Starbucks同樣價錢飲一杯 hand-dip，我會回應 “thanks but no”。
－你喺香港幫襯咖啡店，要面對極為嚴重嘅「存活－享受困境」(Survival-enjoyment dilemma……唔係 google咧，呢個 term我老作嘅)。意思即係，喺香港生存到嘅咖啡店，完全唔預你坐喺度享受咖啡，從座位密度同舒適度、咖啡美味度，到人頭湧湧及店員閪面程度，一切指向「嗱我上咗杯熱咖啡畀你你用三分鐘拿拿臨飲完好走唔好阻住我翻枱做第十輪客」；另一邊廂，少人嘅咖啡店，任你坐，不過，呢類咖啡店一般生存唔到，你去多兩三次某日發覺佢突然結業。我從來唔會怪咖啡店，因為租金太高。咖啡店同普遍香港人一樣，有生存冇生活，有生活冇生存。
－開獨立咖啡店喺香港有獨特光環。咖啡店兼職（一定要兼職）、無人幫襯書店嘅職員、月薪三千嘅記者，喺香港統稱三大神聖職系，比起真正嘅神職人員更具光環。
－我最欣賞嘅咖啡，係大家樂下午茶時段嘅$8熱咖啡。大快活下午茶時段熱咖啡「特價」$12，我唔知佢特價咗喺邊。
到最後，你問我篇文有乜主旨，我答你，一啲都冇。
Follow me on Medium，我嘅文字唔會令你失望（不過寫文嘅速度會）。 https://medium.com/@relgitsjg
【今年史兄喺Medium所得稿費，將全數用作支援魚蛋革命嘅義士。】
Facebook page：https://www.facebook.com/Relgitsjg