[千奇百趣] 日本嘅「便利店+書店」

如果喺堅尼地城開番間？

因為少人買實體書，日本呢個閱讀文化根底咁深嘅社會，都面臨書店結業潮。數字上，2008年5849間，跌至2018年剩番3249間。[*1]

書店求生術速成各種書店附加價值服務。例如大型嘅TSUTAYA（蔦屋）有CAFE任你打書釘、搞私營圖書館、延長營業時間同埋開２４小時書店；又有NET CAFE變書店漫畫店，仲有得沖涼同瞓覺；又或者好似誠品嗰種，分租俾其他食肆等等。

大型書店有資金可以咁樣玩，去搵一啲分店去試唔同嘅模式。 咁中小型書店呢？唔通只可以摺埋？

兵庫縣加西市嘅一間當地中小書店西村書店，聯同便利店FamilyMart喺2017年7月1日，搞咗一間「便利店+書店」，感覺相當實驗性。

呢間舖全名叫「FamilyMart + 西村書店」，係西村書店第4間分店。總面績710平方米（大約7600呎），4份3空間用嚟做書店，大約有10萬本書，包括繪本、小說、漫畫、經濟書、工具書等等。

有幾實驗性？主要因為間舖喺加西市北条町橫尾，係一個人口老化、只有4萬5千人嘅小城市。

2011年香港人口普查數字，老區堅尼地城人口係8萬2千人，概念上，相等於喺堅尼地城開兩間呢種「便利店+書店」。

營運咗差唔多一年，業績係大約有5%增長。有大約6成人去呢間便利店買嘢嘅時候係有買書，比‌之前淨係做書店嘅時候，每日生意倍增。而增長較多嘅書種，係女性讀物同埋兒童書。

「便利店+書店」，香港得唔得？

「書店+X」呢個玩法，歸根究底，係當「書」唔再係主要商品嘅時候，要搵其他「附加價值」去令書店變成多元消費嘅地方。書店入面賣精品、文具、電子產品等等已經係常態，做會員儲分換禮品等等營銷手法都玩到爛，甚至深圳書城嗰種唔理賣唔賣倒書，總之有人租我嘅地方用就算。

但係「便利店+書店」嘅概念啱啱相反，書店先至係便利店嘅附加價值。因為「去便利店，順便買書」，所以大部份便利店都會有一個書架放少少最新出版嘅雜誌或者書。將概念擴大，就係今次FamilyMart crossover 西村書店嘅玩法。

呢間「FamilyMart + 西村書店」嘅客人主要係區內年紀較大人口。當老人家都倚賴便利店嘅時候，便利店crossover任何業務都似乎有可能。咁當然，班老人家都要係一班有讀書習慣嘅讀者。

單睇呢兩個基本因素，就當真可以喺堅尼地城開一間同樣嘅「便利店+書店」，香港都似乎好難維持倒一間咁樣嘅舖頭。第一點，區內仲有士多、超級市場、辦館（唔多，但係有）、大型街市等等，對便利店嘅倚賴性唔高。第二，有閱讀習慣嘅人口有幾多？我真係唔敢想像。

如果堅尼地城真係有「便利店+書店」，我作為一個西環人梗係開心到飛起，但係一諗到，間舖可能會變成另一間24小時麥當奴，為HOMELESS或者老人家提供多一個冷氣位，又真係笑唔出。

西村書店聯同FamilyMart培育出當地人有更好嘅閱讀習慣，喺香港，可能只能夠成為「千奇百趣」之一，最多下次去日本嗰陣，順路嘅話（9成人應該都唔順路）去參觀吓咁囉。

希望呢間「FamilyMart + 西村書店」可以繼續健康發展，我下次去神戶嘅話真係想去呢間便利店書店朝聖㗎。

註： *1：呢個數字只係反映有加入「日本書店商業組合連合会」嘅書店數量，但係有啲小型書店、二手書店係冇入會嘅。而兵庫縣本身嘅書店，由2007年230間，減至2018年146間。

延伸閱讀：

My Medium Record：(Update中) https://readmedium.com/my-medium-record-e1f290f9c470 每月月頭會將部份上月免費文章轉做會員限定文章。

個人BLOGss~ ☆伊死的漫畫特區 （講漫畫、讚漫畫）