Chris Wong 寫俾樂美心既一封信

用粵文寫信，一樣有辦法

正文前講多幾句：我諗真係香港上一代既學生，可能先知道邊個係樂美心同埋 Chris Wong。簡單講，就係中學考公開試係中文既實用文寫作以及英文既 Writing 經常出現既範例名字。答題果陣，用名一定要用樂美心或者係其他提供既名，至於英文就多數提示要用 Chris Wong 寫信俾 Newspaper Editor ，如果用左考生自己名或者亂作其他名，就會扣分，都幾霸道下。果陣杏壇中學呢個名亦都經常出現。成日覺得可以用番呢間學校做背景寫返一篇故出黎...

睇篇文果陣，或者播番呢個 Fantasia on Greensleeves 會效果更佳。LOL

樂美心同學：

囗囗有一日係街上遠處，無意中見到你既身影，我真係即刻覺得，果個就係你，毫無疑問。我地係杏壇中學已經畢左業咁多年，猶記得係學生時代，你做左學生會主席，不論係台上發表演講辭，定係係台下你以中文學會主席既身份，教學生寫實用文（雖然應該對於好多學生黎講，除左用黎考試之外係人生係從來無實用過），你都係一樣自信滿滿，英姿颯爽，呢一份咁既感覺，一直深印係我腦海，揮之不散。果日，再度跟你遇上，雖然係對面馬路，無打招呼，但我都幾相信係命運既安排。

囗囗係，或者你根本一直都唔識我。因為我係學校果陣，就算同你同班都好，我地都各有各玩，毫無招呼。咁以前既風氣係興男還男女還女大家都好似好守規矩咁架嘛。再加上你本身就熱愛文學，中文造詣異常到家，但我就岩岩相反，細個係外國讀書然後中學先返黎，雖然講得一口流利英文，亦都叫做了解果下英國文學既偉大莊嚴。中同英，好似天角一方，大纜扯唔埋，但係其實：

囗囗我一直都想結識你，只係失諸交臂。然後唔知幾時，大家已經離開左校園，你我消失於茫茫人海之中。

囗囗我唔知到今時今日，寫封咁既公開信，係咪好老土，或者你可能已經玩緊Instagram 同Snapchat呢。而你就算呢一刻見到，都希望唔好恥笑我，咁多年都唔識用書面語執筆寫野。反正我都係無文筆可言，不如索性豁出去，用口語，可能感情，仲黎得真摯。你有你既生活，我有我既忙碌，其實人生十多年流水匆匆，我都係果一刻先發現，我對你仍然有好奇妙既一份感情，只不過俾身邊既人與事，沖淡左。我地係同一時空下，有限既時間，係咪應該更珍惜眼前既一切？我咁樣問自己。

囗囗所以，我都唔怕自己會俾其他人笑到面黃，亦都唔會理呢封信無跟格式，會俾你扣分扣到傻左。做人最重要既，都係踏出第一步。希望你如果見到呢封信，可以抽空回覆咁就好喇。我唔奢望乜，但可以做番朋友傾下偈，都好呀。

囗祝 生活愉快！

Chris Wong

Originally published in 粵典 on 10 January 2018. Further edited on 10 January 2019.