《忘記唔到嘅一句話》
警告：我向天發誓，用賓周作擔保，呢件係真人真事。膽小如鼠者、有心臟病人士、孕婦、BB仔、任何住高樓大廈嘅人請勿睇落去……
呢件事發生喺我小學三年班至五年班嗰陣。確實嘅年月日已經唔記得，畢竟已經係廿幾年前嘅事。
我有一個阿媽一個阿爸（其實人人都係……sorry，一時唔記得自己寫緊鬼故）。小學仲未離婚嗰陣，佢哋每逢周末會約埋阿媽做工廠嗰陣識嘅金蘭姊妹同佢老公，四人圍埋打麻雀。
打牌嘅地點係金蘭姊妹老公位於太子嘅士多。而我同金蘭姊妹個仔──賢仔（信我，我喺呢篇文會打錯佢個名做腎仔起碼五十次），通常坐喺隔離睇打麻雀。由於一打起碼十六圈，由中午殺至天亮，我不時上賢仔喺附近嘅屋企玩，玩到咁上下就落士多一齊食飯，飯後佢哋喺四方城內再殺落去，我哋又繼續喺屋企玩。
賢仔細我兩年，聰明仔，屋企又多玩具──有超任、世嘉五代同《魔神英雄傳》全套玩具，相反我一樣都冇，所以我好中意去佢屋企玩。加上我哋兩對父母爛賭到閪，幾乎個個星期都打麻雀，我同賢仔玩得好埋，我幾乎合埋眼都識上去佢屋企。
某個周末，我哋老竇老母們如常開四方城，我同賢仔就返屋企打機。由士多行去賢仔屋企嘅途中，賢仔好興奮同我講：
「我發明咗一樣新遊戲，一陣可以表演畀你睇。」
嘩，新遊戲、表演喎！由於賢仔屋企有幾部遊戲機，我以為佢講緊買咗新game。我抱住雀躍嘅心情一路急步行，行到屋企對面馬路，賢仔同我講：
「一陣個表演喺電梯度玩。我上星期先發現，好過癮。」
咁奇怪？賢仔話過癮，應該無死錯人。
賢仔屋企位於太子楓樹街一帶，十幾層嘅舊樓嚟，有電梯。不過呢，電梯係舊式嗰隻、有兩道門嗰隻，即係你要由走廊入電梯：
- 首先要向自己拉一道門（外門），外門上有一個小窗；
- 然後有第二道門（內門）：最舊式嗰隻喺道閘嚟，你要用力向橫方推開道閘－工廠大廈嘅運貨嘅電梯仲有呢種閘；而賢仔屋企嗰隻就新一啲，你打開外門後，內門會自動、由左至右打開（並唔係左右合上）。
如果你唔明，就當係得一道門嗰種新型電梯，出面再加一道要自己拉嘅門。示意圖如下，呢個唔係實物，但大概如此：
去到屋企樓下，賢仔鬼鬼鼠鼠咁望一望管理處。
「管理員行開咗。無人，正！」賢仔沾沾自喜。
等電梯嘅時候，賢仔同我解釋新遊戲係乜：
「我前排一個人搭電梯，無嘢做，chok下chok下，學識咗chok停部電梯。幾好玩。」
你可能覺得賢仔低能，因為你而家chok嘅係陽具，不論係chok自己或男友嗰碌，感覺上都成熟好多。但我同你講，我哋呢啲老餅細過嗰陣無乜娛樂，乜撚都玩一餐。chok停一部suppose會自動郁嘅電子用品（例如電梯），已屬天大娛樂、絕大成就。
「chok停咗，咪即係困『車立』囉。」人哋話好玩，我居然咁樣潑鳩人冷水。
「唔係呀，chok完，過一陣，佢又會郁返。」嘩，好意淫。當年天真嘅我當然唔知呢啲對話咁撚淫賤。
「咁好似幾好玩喎。」我天真回答。
「chok嘢其實好簡單㗎咋，你趁部電梯郁郁下嗰陣，夾硬由左至右推開度門（即係內門）就得。」
「嘩，咁容易。咁道門開咗，會見到啲乜？」
說時遲，那時快，賢仔未答我，電梯已到。兩隻馬騮急不及待入去chok嘢。
賢仔住8樓，我哋按8字。棟大廈嘅地下係G、雙數電梯一上就4/F（無2/F）、6/F再到8/F。電梯到邊層，嗰層按鈕嘅燈就會著。
部電梯開始郁，入到去三四秒，未到4樓，賢仔就大叫：
「喂嚟咧，一齊幫手推。」
兩條友合力，推開咗道內門。推嘅時候，我望一望「車立」掣，無任何一層嘅燈著咗，即係我哋應該停咗喺G至4樓中間。
電梯停咗。
我再望望「車立」掣，無任何一層嘅燈著咗。
內門慢慢開咗，我一望……
．
．
．
．
．
．
．
．
．
．
．
．
我望到一大片石屎。整個門框外，就係一大片石屎。
因為部電梯由G去緊4樓，我哋喺中間整停咗佢，即係2樓至3樓，咪淨係見到一層石屎。
不過，嗰片包住道門嘅石屎，帶畀我前所無未有嘅震撼。
面對一層厚厚嘅石屎，我覺得好似身處於一大舊石屎當中。石屎全面將我包圍同覆蓋，只有呢部電梯嘅狹小地方先有保護同空氣。好大壓迫感、感覺好擠擁，石屎彷彿下一刻就湧入嚟咁。
我凝望住幅石屎牆，呼吸急速，面青口唇白。賢仔似乎見到我唔多正常，即刻話：「睇嚟你覺得唔好玩~~唔玩咧，我哋返去打機~有新game。」
我回過神求其答：「啊……好呀，打機啦、打機啦。快啲返去。」
賢仔對住內門踢咗兩下，內門又自動關上，電梯繼續向上運行。
我望住電梯排燈同掣，過咗好耐好耐，「4/F」個掣都仲未著燈。
我有懷疑過我哋困『車立』，但我仲感覺到部電梯係向上升緊……
我同賢仔一路無出聲，無望大家，只係默默咁企喺電梯裏面等。
等咗好耐。
「4/F」終於著燈。
又過咗好耐，先去到「6/F」，再去「8/F」。
成程電梯，我同賢仔無講過一句嘢，無望過大家。到要出電梯，大家先互相望咗一眼，有個默契要一齊出電梯。
賢仔屋企嗰層嘅平面圖，大致如下：
- 出電梯，電梯對住係A座；
- 出電梯轉左有條走廊，走廊左手邊係後樓梯，右手邊係公家窗；
- 走廊盡頭係另一排公家窗，右手邊係B座；轉左又係一條短走廊，走廊盡頭係賢仔屋企，C座。
一出電梯。我行先，賢仔行後。
感覺怪怪，走廊好暗，成個環境同往日好似唔同。
向前行兩三步，見到A座道閘……好似唔同咗。再望真啲，道閘真係唔同咗。
我斜身望一望賢仔，佢無出聲。
目的地係C座，我哋繼續向前行。
轉左入走廊，十幾步到尾，見到右邊B座道閘。
道閘又唔同咗！
我深呼吸一口氣，決定轉左望一望賢仔屋企。
道閘又唔撚同咗！！！無理由三個家庭道閘，一口氣喺一個星期內換晒啩！！
我即刻望望C座道閘隔離嘅門牌，係18樓。
18樓！？
我以為自己有幻覺，捽捽眼望清楚嗰門牌。
18樓。
瞳孔再放大，睇多一次：
18樓！！！！！唔係8樓！！！！！！！！！！！！！！！！！！
我轉頭向賢仔指一指嗰門牌，再同時望向B座閘旁邊嘅門牌。
18
又係18樓！！！
屌！！！呢層根本唔係佢屋企嗰層！！！
想去8樓但去咗18樓，極度靈異。對一個小學生嚟講，我無時間研究咁多、諗咁多，只有神經反射、本能反應，二話不說，轉身奔向後樓梯，拔足向下狂跑。
I swear to God I never run that fast, never that fast again.
後樓梯無窗，環境陰暗，幾乎伸手不見五指，我飛快咁向下跑，不斷跑。幸好賢仔好快跟上我，同我一齊跑跑跑。
我哋不斷向下跑、向下跑，有幾層直頭用樓梯嘅扶手借力，一嘢跳落去。我哋跑咗好多層，跑咗好耐好耐……喺幽暗嘅環境下，我哋無時間留意自己跑到幾樓。
跑咗幾分鐘……
「喂～唔得咧～～我頂唔順咧。」賢仔喺後面叫。佢年紀仲細，無乜氣，跑咗咁耐已經冇力。
嗰陣我先識停落嚟。我哋兩個抖順條氣，先敢行去出睇下啲門牌係幾樓。
10樓。
我好肯定頭先唔只跑咗8層。不過，唔理得咁多，我哋慢慢行落多兩層，到8樓，見到熟悉嘅環境，見返啱道閘，就入屋。
我哋入到屋，一拎起超任個手掣，阿媽姓乜都唔知，頭先發生嘅事好似無發生過。
夠鐘食飯，我哋由賢仔屋企行落士多食飯。途中，賢仔深呼吸一口氣，跟同我講咗句：
.
.
.
.
「其實，我屋企最高得16樓。」
.
.
.
講完之後，賢仔向左望，唔敢同我有眼神接觸。隔咗廿幾年，當時賢仔同我講嘢嘅聲線、表情，到今日依然歷歷在目，一直忘記唔到。
嗰陣未識驚，一星期後仲同賢仔去驗證（！），單數電梯最高15/F，雙數最高16/F。我哋上到去16/F，有條鐵梯可以向上爬，一爬埋上去見到天台……
屌你老母…………邊撚度嚟18樓……
對於不存在嘅18樓，當年完全無視，依然個個星期去賢仔屋企玩，依然搭嗰部電梯。
──
後嚟中學去露營、大學為溝女，有時會講下鬼故。每次講起呢個經歷，背脊都會涼一涼。聽到嘅人會好驚，其實講嘅人仲驚（我係當時人嚟呀！）。亦有人話我哋誤闖結界，好在走得快，唔係就一世會困喺18樓出唔返嚟。有報導指香港每年有百幾人失踪，會唔會都係唔覺意去咗結界？
多年嚟再見到賢仔，我無再提起呢件事。不過，有一點我好肯定，自此之後我唔敢再玩「車立」，一陣又去咗不存在嘅樓層，你話幾無謂先得嫁……
今年史兄所得稿費，將全數用作支援魚蛋革命嘅義士。 https://medium.com/@relgitsjg
Facebook page：https://www.facebook.com/Relgitsjg IG (主要用嚟睇女仔) : https://www.instagram.com/iamuncleshit/