《技術文：日本漫畫嘅兄和弟》
注意：呢篇文章約八千字，閱讀時間幾分鐘至幾十分鐘不等（視乎你求其睇一次定認真睇完再睇）。內容圍繞日本主流漫畫作品，大路王道嗰十幾本（例如《龍珠》，唔包括同人誌、黑執事、H漫嗰類），有睇日漫十年以上嘅人士，應該識90%以上。
文中圖片僅作示範用途，如有侵權請告之。
────
【前言】
有晚瞓唔著，諗下無聊嘢嚟等自己安然入睡。回想嗰篇＜港產爛片終身成就奬頒奬典禮＞大結局提到日本漫畫，當中好幾套都有「兄」同「弟」嘅角色，於是思考一個超級無聊嘅問題：
如果一套漫畫同時有親生「兄」同「弟」嘅角色，究竟係「兄」定「弟」嘅實力會較勁？
一諗呢啲咁認真嘅問題，搞到更加瞓唔著。上網花咗好多時間搵咗資料，重溫返啲日漫，研究邊套有親生兄弟，工程重煩過港珠澳大橋。要留意：
(1) 「兄」同「弟」係有血源關係嗰隻親生兄弟。
(2)「勁」嘅定義非常非常複雜－「勁」係用整體實力計算，綜合各樣因素，例如戰鬥力、智慧、領導才能、性格，非常主觀。更大問題係，唔同時空時代嘅人點比較？隨漫畫發展，角色越嚟越勁，戰鬥力越嚟越高，點比？例如，你拎超級撒雅人3嘅悟空（弟）比起初嚟地球嘅拿迪斯（兄），悟空抖啖氣都夠殺死拿迪斯；但同一時空下，拿迪斯比起悟空，又應該勁啲。
所以比較嘅準則有兩個：
1. 若兩兄弟同時出現，則比較兩兄弟喺該時期最頂峰嘅能力；
同埋
2. 若其後有一個死咗，而死咗嗰個又較勁嘅，就用生還嗰個嘅成長路徑嚟再比較。
不過，屌，呢啲準則係呃鳩人，純粹整到篇文懶科學咁。總之我話邊個勁就邊個勁啦。
最後，一個人嘅閱歷時間同知識有限，無可能睇晒所有日漫同記得所有兄弟班，以下寫得出嘅我都睇過，希望無重要遺漏－有咪遲兩年寫個續篇囉……
好咧，頭盔戴晒，五場一至十四號馬已經準備好，以下係日本漫畫中各組親生兄弟嘅實力比較：
(1) 戶愚呂兄弟（《幽遊白書》）
非常抱歉，第一對登場嘅親生兄弟，實力差距有如高橋聖子對胸咁巨大：戶愚呂弟係《幽遊白書》嘅代表人物（sorry, 唔係飛影同藏馬），實力超凡（遇神殺神、殺幻海，一路幾乎無敵）、有智慧－透過殺死小鳥而取得雪菜嘅眼淚、有故事有義氣－徒弟被殺而加入妖道、有性格－純粹想變強成為妖怪，並非心地邪惡。戶愚呂弟之經典，在於佢一心尋死，又知道幽助可以殺死佢，為自殺整個暗黑武道會出嚟。最後求仁得仁，自殺成功。雖然輸畀幽助，但嚴格嚟講佢係特登輸（夾硬激嬲幽助）同輸自己（出自己都頂唔住嘅能力）。
戶愚呂弟嘅代表作，肯定係「100%中的100%」呢招，即係使用100%實力……嘅100%。數學同邏輯上呢招極為風趣(100%嘅100%，咪又係100%；100%中的100%中的100%，都係100%…….)，加上佢一出120%就頂唔住收咗皮，咁100%中嘅100%就係最強了。
「100%中的100%」，漸漸成為經典口號。而家你講得出「100%中的100%」，代表你對某事情嘅絕對肯定。可能我講得太多，而家連冇睇過《幽遊白書》嘅責任主編（即我女友）都識講100%中的100%，可以感染到普通市民，戶愚呂弟係堅勁。
反觀阿哥戶愚呂兄，嘩，根本廢物嚟。廢嘅程度而宅心仁厚嘅細佬同對手藏馬都睇唔起佢……廢嘅奸人，一般叫嘍囉，不過佢勁在有不死身同有個超勁細佬。兩兄弟身形性格實力完全兩個層次，我懷疑佢哋究竟係咪親生兄弟。
順帶一提，戶愚呂弟靠假殺死桑原嚟刺激幽助；同《龍珠》中斯路殺死16號然後悟飯變強，條橋一模一樣。你話係英雄所見略同，定係天下文章一大抄，真係無人知。
判決：100%中的100%係戶愚呂弟
比數：兄 0弟1
───
(2) 河田兄弟（山王工業，《男兒當入樽》）
河田家嘅兄長河田雅史係日本學界班霸、山王工業正選中鋒，隊中第2號得分人物，能攻能守，進攻形式多元花－漫畫中佢能投中距離、入樽、走籃，並多次封阻湘北不同嘅球員。以現時NBA計算佢樣貌、身形同打法似足帝王嘅中鋒姪仔(DeMarcus Cousins)。
比起隊員澤北同深津偶爾鳩屎柒柒、白白痴痴，河田雅史喺場上無時無刻表現絕對威嚴，超高籃球智慧同領導能力。神奈川第一鋒赤木面對佢，被玩弄得不似人形，陵南嘅魚住、海南嘅高砂，對住佢應該死得更慘。
相反，細佬河田美紀男，只係一個七呎高嘅死肥仔，貌似毒撚（樣貌都係實力嘅一種），進攻模式單調，只懂低位迫籃轉身，一招了，防守豆泥，連櫻木都守唔住，打半場就被迫去返後備席做觀眾。我認定佢入選山王有80%係裙帶關係，20%係同胡鬚教練有路。估計佢畢業後成為相撲手嘅機會仲大。
判決：河田雅史（兄），大比數勝出嗰隻
比數：兄1 弟1
───
(3) 宇智波兄弟（《火滾忍者》）
呢組兄弟比起戶愚呂兄弟、河田兄弟嘅差距更大。
宇智波家兄長鼬係喺《火滾忍者》、甚至整個日漫系統，如神一般存在嘅人物。神、神啊！
呢個係岸鳩齊史設定同描寫嘅問題，任弟弟宇智波佐助再努力、靠灌功拎多幾多隻白眼輪迴寫輪眼屎眼，始終唔會勁過宇智波鼬。你唔信？岸鳩齊史將宇智波鼬神化嘅劇情如下：
－武功高強：13歲之齡，自己將整個族人滅族；初回木葉，宇智波鼬一對三木葉上忍，玩票形式、插住褲袋嘅手未拎出嚟就贏咗卡卡西、阿司馬、紅。卡卡西班用咗五六期先打贏一個鼬用三成查拉克整出嚟嘅分身。大蛇丸想侵佔佢個body，宇智波鼬將大蛇丸玩弄於股掌中。宇智波鼬係喺火影唯一一個到死都冇輸過嘅人。
－創新：幾乎所有同寫輪眼有關嘅超必，都由智波鼬首次使用，包括萬花筒寫輪眼（月讀、天照）、須佐能乎。
－高智慧、高EQ：，接受木葉高層任務，要滅自己族人；隨後加入曉，成為自己最深愛嘅家鄉木葉嘅叛忍。為大局殺晒自己族人，又去做卧底，表現出智商同心理質素嘅極致。
－親情：滅族嗰陣，宇智波鼬殺淨最愛嘅弟弟佐助。結果一日到黑畀呢條唔知頭唔知路嘅白痴仔尋仇，仲要唔殺得佢。
更重要係，鼬之所以死，完全為咗等佐助谷到盡，引佐助身體中嘅大蛇丸出嚟再殺咗佢。嗰陣鼬身體已經非常虛弱，仍然發動到佐助同讀者冇見過嘅須佐能乎。佢要殺佐助，舉手之勞，一定做到。為咗救佐助，宇智波鼬連命都唔要，重親情重到咁，仲想點？
－口密：宇智波鼬做咗咁多嘢，為木葉、為和平、為佐助，但佢從嚟冇洩漏咗計劃嘅任何嘢。一 • 句 • 都 • 冇！為咗喺漫畫交代秘密，參與相關計劃嘅人總會喺某個位（多數死或計劃成功之前）講返晒出嚟，而作為一個知道咁多嘢嘅人，宇智波鼬多年一直隱藏所有秘密，一句怨言都冇，全部嘢由旁人路人交代出嚟。真係啞嘅都冇佢咁守到秘密。
－前瞻性：宇智波鼬一早已估計死後有人用穢土轉生召喚自己，於是喺鳴人眼中殖入烏鴉，等自己可以擺脫穢土轉生嘅控制。你老味！主動解除到穢土轉生呀！一至四代火影都做唔到！
去到咁盡，宇智波鼬先係火影第一號人物，智勇雙全，為咗做大事可以放低所有嘢。第一代火影、宇智波斑、輝夜都比唔上，更遑論佢個長年中二留班嘅細佬佐助。
如果你知宇智波鼬嘅能力去到邊，佢大概等於：
不敗地位設定：有馬貴將《東京喰種》+ 手塚《網球王子》
戰鬥力：孫悟空《龍珠》+琦玉《一拳超人》
智慧/EQ/前瞻性/洞觀能力：卡卡西+鹿丸+金田一+夜神月《死亡筆記》+L《死亡筆記》+涼介《頭文字D》
以上咁多人加埋，先等於一個宇智波鼬。
要數宇智波鼬嘅缺點，只數到佢份人表面好冷漠，無乜禮貌，雙手成日插袋，唔好好著住曉件褸。
反觀細佬宇智波佐助，一日到黑恨恨恨恨恨，恨完鳴門恨阿哥再恨檀助再恨木葉。佢比起鼬優勝嘅得兩樣：靠長老六道仙道灌功開咗輪迴眼；結咗婚生咗個女後以偵察為名拋妻棄女實質去流浪（男人嘅榜樣）。佐助離譜喺幾乎所有忍術都係靠人哋灌功：
- 第一部咒印：大蛇丸送嘅。
- 左眼萬花筒：鼬死前將自己瞳力注入佐助左眼，開完一次之後，佐助就識長開。
- 右眼萬花筒：打八尾臨滅團之際，居然靠自己開到。唯一一次靠自己實力開眼。
- 永恒萬花筒：鼬移植上去嘅。
- 左眼輪迴眼：六道仙人灌功開嘅。
佐助憑努力學嘅，只有火遁同千鳥/雷切同相關嘅變化，成功靠兄幹，正宗二世祖。
判決：宇智波鼬（兄），大比數勝出嗰隻
火影中仲有金銀兄弟、鬼兄弟、左近右近兄弟，唔識？係呀，所以無謂介紹……
比數：兄2 弟1
───
(4) 星馬烈、星馬豪（《四驅兄弟》）
與港人遊旅熱點「星馬泰」合稱「四驅三兄弟」。
無得寫，因為我冇睇過《四驅兄弟》。
至於點解無嘢寫都要加一段，係因為要畀讀者抖抖氣。
───
(5) 一二代火影（《火滾忍者》）
《火滾忍者》好多兄弟班，有襟兄弟鳴仁佐助，有真兄弟，當中政治地位最高嘅兄弟係一二代火影。
先幫岸鳩澄清一下，《火滾忍者》第一部，大蛇丸召喚嗰對一二代火影係次貨嚟，實力遠低於傳說，應該係大蛇丸畀錢搵人假扮。一二代嘅真正實力，依兜用穢土轉生嗰個版本為準（好慘，明明死咗都要翻生兩次）。
忍術嚟講，一代火影識血繼界限「木遁」，仙人模式；二代火影只係識水遁，唯一絕技係飛雷神之術（仲要由徒弟四代火影發揚光大）。一代武功高強，識召喚千手觀音，又打得贏宇智波斑。相反，喺檀作嘅回憶中，二代火影探測到有十個追兵，包括金銀兄弟，佢去斷後，估計因此死亡。好難想像一個頂級忍者（例如宇智波斑）會唔夠十個人打而瓜柴。
性格上，一代火影可謂戴耀廷嘅忠實支持者，主張愛與和平，凡事向好方面諗，雖然武功高強，但迫不得已先會出手；二代呢，性格著墨甚少，不過喺一代同宇智波斑嘅回憶中，二代火影似乎係一個疑心重、不相信宇智波家、喺人哋背後說三道四嘅小人。
政治貢獻上，一代火影憑藉努力，建立木葉，成為火影；而二代火影可以做到火影，睇怕出於火影制度係禪讓，上一代話邊個做就邊個做，十足十現代某大國。《火滾忍者》嘅各個國家，根本係軍閥獨裁統治，人民無機會投票選領袖……
判決：千手柱間（兄）……sorry，我呢刻先記得一二代火影分別叫千手柱間同千手扉間。一「間」屋嘅「柱」同「門」（扉），各有功用，但論重要性，無柱層樓會榻，「柱」一定重要過「扉」。個名都已經話咗你知道個勁啲。
比數：兄3 弟1
為免你以為成篇文只係得阿哥會勝出，下一個就寫細佬壓倒咁勝出：
───
(6) 悟空與拿迪斯（《龍珠》）
唔知比乜嘢，因為無人會覺得拿迪斯勁過悟空。
拿迪斯係《龍珠》第一個講到明自己嚟自其他星球嘅人物（註）。當時悟空已經係世上最好打－晨早超越咗武天師傅，同輩已經無人比得上，連魔族嘅笛子魔童都畀佢負碌打贏埋。於是鳥山明開始加插外星人，同埋舖路等悟空交棒畀個仔悟飯，以延長龍珠嘅壽命（但完全係多鳩餘，悟空根本交唔到棒，而到悟空為骨幹嘅《龍珠》到今日都仲玩緊）。
印象中《龍珠》係第一本漫畫引入戰鬥力系統，將人物強弱高低用具體數字作出不客觀嘅量度。初相遇時，悟空嘅戰鬥力(416)比唔上阿哥拿迪斯(1500)，要靠同魔童(400)合作再自己犧牲埋先殺到拿迪斯。魔童招魔貫光殺炮又係搞笑之作，要儲氣仲要射得慢，兼職幫政府拆樓先用得著。
《龍珠》嘅戰鬥力系統有樣不解之迷，就係喺地球生存過嘅人，可以喺短時間內爆氣提升戰鬥力（例如悟飯喺太空船飛出嚟嗰下，由個位數升到百位數）。外星人對於呢樣嘢非常驚訝（初到地球嘅納巴、喺娜美星初段嘅殺波等），但鳥山明無講解過，更加無解釋點解連去過地球嘅人（例如比達）都識咁做。
又講得好遠，幾百字無認真比較過悟空同拿迪斯。諗真啲又唔使解釋，外星人都清楚悟空係全日本漫畫戰鬥力最高嘅人物，絕招係遇強越強，絕對係外星人中嘅外星人。拿迪斯只係短暫勁過悟空，一樣冇撚用，高戰鬥力都要死。幾撚離譜？明明個戰鬥力系統嘅作用係分高低，但佢轉頭又唔理戰鬥力分勝負，咁要個系統嚟做乜？
講到呢度又要吐糟，斯路之戰，悟空同斯路打咗一陣，自動認輸唔打交棒畀悟飯打，令我懷疑過編呢個劇情嘅人冇睇過龍珠。悟空之所以成為悟空，唔係因為滑頭，而係因為從來唔認輸，遇強越強，喺面對強大嘅對手中變強，由遇到桃白白開始，去到大魔王、比達，跟住菲利一樣如是，甚至乎打金正恩嗰陣心臟病發亦照打。而家地球生死存亡，悟空居然自．己．認．輸，認做契弟？我屌你老味咩。你諗下如果悟空對住菲利講對「我唔夠你打, sorry」會點？
對我嚟講，悟空十幾年嚟建立嘅形像同精神喺斯路之戰蕩然無存，徹底摧毀晒，《龍珠》亦係喺斯路之戰完結咗（我無睇過魔人布歐同近年重新製作嗰啲「龍珠」）。所以呢，喺我嘅世界《龍珠》係無二仔孫悟天，所以無得比較悟飯同悟天邊個勁啲。
（註：悟空係第一個喺《龍珠》出現嘅外星人。Btw，天津飯亦係外星人，不過佢自己都唔知。鳥山明講過，天津飯嚟自三眼星人，原本有計劃叫佢族人出嚟搞下事。但天津飯本尊跟唔上戰鬥力惡性通漲呢個潮流，佢族人恐怕惡唔到乜嘢出樣。）
判決：雖然咁嬲，但《龍珠》依然係經典。悟空勝。
比數：兄3 弟2
───
(7) 菲利、古拉（《龍珠》）
《龍珠》另一對兄弟。古拉係菲利阿哥，喺劇場版《最強對最強》、《一百億能量戰士》出場（留意悟空對拿迪斯時戰鬥力只得418點，打完菲利再對佢阿哥已經去到100億 i.e. 10,000,000,000，仲唔係惡性通漲？）。
計戰鬥力，古拉一定高過原版菲利；但以受歡迎程度，菲利一定高過古拉一千倍。菲利應該係《龍珠》最高人氣嘅惡角。點解？因為菲利嘅性格同悟空一模一樣：
－ 明明唔夠對方打，依然頂硬上，誓不低頭；
－ 鬥志超凡，死完翻生再死再翻生（已經數唔出佢一家復活咗幾多次），再接再厲，不斷輪迴都係為咗打低孫悟空。一般敵人打交輸咗死咗就算去輪迴，菲利係日漫少數死咗都要翻生嚟覆桌嘅敵人。
另外，菲利第三變身嘅造形設計非常超時代，過咗十幾年睇都唔out date。另一個接有超時代造形設計嘅壞人，係幪面超人嘅影月。
判決：菲力重生咗幾鑊，戰鬥力應該超越咗哥哥古拉。古拉出場係為咗幫菲利報仇，某程度上沒有菲利就沒有古拉，所以古拉戰鬥力再高，都唔夠菲利嚟……詳情請睇下一對兄弟。
比數：兄3 弟3
───
(8) 阿瞬、一輝（《聖鬥士星矢》）
根據《聖鬥士星矢》嘅設定，88個星座嘅主人清一式為淫棍神戶光政嘅親生仔女、同父異母嘅cum brothers。「如果」要認真比較，要寫晒88個聖鬥士。除咗太花時間（大佬真係要去大學申請個基金認真研究），漫畫中亦不斷重申一輝/阿瞬、撒卡/卡儂、艾奧里亞/艾奧羅斯、希度/巴度（北歐篇）呢啲真兄弟關係，令我對「神戶光政喺所有人老竇」呢個講法抱有極極極大嘅懷疑。真相，似乎係神戶光政喺朋友面前嘅鳩o翕畀吹大咗，傳傳下啲人以為係真，好似嘅乜嘢富豪塞哥爾夫球，咪又係咁。
阿瞬、一輝喺星矢出現嘅第一對兄弟。
比起一代火影，阿瞬係更加堅貞嘅戴耀廷支持者，睇嚟年中捐唔少錢畀雷動計劃/風雲計劃搞所謂港獨。阿瞬從嚟唔會主動挑起戰鬥，戰意長期處於負數，連絕招亦以守為攻，正宗等運到。不過，阿瞬喺電子遊戲Final Fantasy學咗一個獨有技能，就係處於瀕死狀態時可以免MP召喚阿哥一輝 aka最強不死召喚獸。
《聖鬥士星矢》作者車田正美無講過，不過我推論一輝應該係四代火影嘅徒弟，只要弟弟阿瞬瀕死，一輝會即刻使用飛雷神之術出現。再遠距離一輝都感應到，Big Brother is always watching you，諗真啲好恐怖。後嚟阿瞬由戴耀廷版本變成哈帝斯版本，以冷酷無情見稱嘅一輝居然唔肯以拳相向，足見一輝深愛著似女人嘅弟弟。
一輝正職係黑社會，無乜讀過書，淨係識恐嚇（鳳凰幻魔拳）同放火（鳳翼天翔），同弟弟作為愛與和平支持者相映成趣。不過，一輝招絕並唔係恐嚇同放火，而係打不死，只要死淨火鳳凰把口，仍然可以靠把口復活。
邊個強啲？拋一下無謂數學，A+N>=A for all non-zero positive real number N。即係，基於阿瞬可以召喚一輝（而一輝不能召喚阿瞬），而阿瞬有近乎零但非零嘅戰鬥力，所以阿瞬＋一輝係勁過一輝。
判決：阿瞬。係咁夾硬嚟嫁咧，吹咩？
比數：兄3弟4
───
(9)-(11) 撒卡/卡儂、艾奧里亞/艾奧羅斯、希度/巴度（北歐篇）（《聖鬥士星矢》）
星矢裏面仲有好幾對有名嘅兄弟，寫晒唔得掂，惟有一次過簡單寫。
雙子座兄弟：撒卡/卡儂。兄長撒卡再勁，只係親手殺咗一個耆英教皇，佢點炸都炸唔撚死五小強；卡儂殺咗大量冥鬥士，包括三巨頭之一拉達曼達斯。卡儂仲要長命過撒卡。弟勝。
獅子座射手座兄弟：艾奧羅斯/艾奧里亞。兄長艾奧羅斯又係戴耀廷支持者，無殺過人（星矢係一套打打殺殺嘅漫畫，偏偏不斷出現愛與和平嘅支持者）；艾奧里亞仲勁，殺嘅係自己人（卡西歐）。
艾奧羅斯係主角星矢嘅召喚獸，得閒就出嚟畀套黃金聖衣佢著，明明出咗一兩集但喺套漫畫居然由頭出到尾，可謂日漫中菠蘿雞之皇者。艾奧里亞條命較長，但表現乏善足陳，去到冥王篇大結局先識畀套聖衣人哋著嚟搶鏡，跟住第二格就畀人打爆……兄勝。
北斗七星黑虎白虎兄弟：希度/巴度。留意，北歐篇乃電視動畫加插入去，漫畫冇北歐篇。呢篇文講日漫，所以黑白虎兄弟不計算在內（要計就白虎勁啲，因為細過嗰陣套白虎聖衣玩具係限定版嚟）。
星矢有好幾對兄弟，全部細佬勁啲長命啲。我估作者車田正美都有個阿哥，細過嗰陣畀佢虐待過。
比數：兄4弟5
───
(10)立花兄弟（《足球小將》）
……幾好笑。我100%中100%確定作者高橋陽一自己都分唔到立花和富同立花政富，亦肯定立花里子較易認……究竟一飛沖天彈跳射球，邊個頂頭鎚、邊估係喺下面畀人踩死嗰個？某日本手遊和富同正富係兩張唔同嘅咭……屌唔係咁點呃你課金抽蛋呀？
立花兄弟嘅絕招唔單止違反力學，仲反地心吸力。以港漫《海虎》系統計算，佢哋每人擁有起碼50萬匹力量。另外，如果你年過30但細過無同表兄弟喺自己張床、甚至乎石米街場試出過一飛沖天彈跳射球（仲要冼住嗰隻），請忍真檢視自己童年嘅存在意義。
至於世青篇，由於我跳咗外圍賽冇睇，泰國嗰三兄弟太弱雞，唔寫。
判決：平手。
───
(11) 艾斯、路飛（《One Piece》）
(6月22日後補)首先，其實二人並非親兄弟，哈哈哈哈。不過我當佢哋係……
兩個人打平手……如果只計智慧。路飛等於弱智版鳴人（鳴人居然有弱智版），而艾斯喺One Piece第一部表現有如弱化版宇智波鼬，有實力勇氣智慧膽色，文武雙全，直到佢喺頂上之戰畀赤犬串咗兩句，明明走緊佬都沉唔住氣返頭同人鬥拳，仲要鬥輸，智商一洩如注、江河日下。而艾斯本身知道：
1. 成場仗以自己生存逃出為勝利； 2. 白胡子軍團同路飛傾巢而出救佢； 3. 白胡子已準備好犧牲自己，並以船長身份命令所有人撤退； 4. 佢喺眾人維送下，只要乖乖咁跟隊，一定走得甩；
然後佢抵唔住赤犬3頁共5格畫七個說話泡嘅挑釁，強行留低同赤犬打，最後死埋。（for your information，成場頂上之戰由鋪排至艾斯之死畫咗大概連載咗一年約五十話，每話17頁每頁8格，即大概6800格。）整死一個人、摧毀艾斯嘅智慧，用成個頂上之戰6800格唔夠0.1%就夠。
尾田（One Piece作者）好勁，畫得好感動，但成件事本身極度戇鳩。超級戇鳩。戇鳩過鳥山明畫悟空向斯路認輸。字典上「無謂嘅犧牲」，最啱用艾斯之死嚟做例子。艾斯之死將佢嘅智慧一下降到去同路飛一樣。
戰鬥力計，艾斯嘅實力肯定喺路飛之上，即使路飛經過三年特訓，我唔相信佢絕對打得贏艾斯。以運氣計，路飛肯定較負碌－成日同對方打平手，大叫一聲就贏咗。
判決：平手。路飛有主角光環，超越艾斯係時間嘅問題，不過我實在寫唔出路飛勁過艾斯。
───
(12) 越前龍馬、越前龍雅(《網球王子》)
《網球王子》係以運動包裝嘅殺人同搞笑漫畫。兄長龍雅喺《新網球王子》橫空免洗出場，毫無伏線，龍馬老竇完全無交代過，唔排除龍雅係假扮親戚嚟騙財；弟弟龍馬，擁有三大神技之二（天衣無縫之極限，千錘百煉之極限），兼持更強絕技主角光環。
以現時進度而言，龍雅嘅實力應該同手塚同級，遠超龍馬，但手塚嘅無敵光環應該會隨佢加入德國隊而被DQ，而龍馬打贏龍雅亦係劇情所需－前題係《新網球王子》唔好畀人腰斬。
判決：龍馬。龍雅免洗出場太乞人憎，呢個亦係《新網球王子》唔受歡迎嘅原因。
比數：兄4 弟6
───
(13) 高橋涼介、高橋啟介(《頭文字D》)
一凹一凸嘅兩兄弟，實力同樣擠身高手行列。兄長高橋涼介綽號「白色彗星」，文武雙全，醫科系學生，喺《頭文字D》暴走族充斥下唯一具有智慧嘅生物，冷靜兼具強勁分析力，Project D計劃大腦，同時為飈車高手，實力足夠擠身頭十名；細佬高橋啟介沒有綽號，唔知讀乜嘢科（應該係野雞私立大學啲水泡科），金毛MK仔（連架車都係黃色你話MK唔MK?），冇腦衝動派，Project D兩個車手之一（另一個叫藤原拓海）。
以印象深刻度計算，高橋涼介同死神北條凜嘅故事，喺整套《頭文字D》中排名第三。呢部份將涼介喺漫畫表現嘅沉默、過去悲哀嘅遭遇，與死神嘅過節，透過兩架車比賽（其實係死神嘗試謀殺涼介）表達出嚟。過程中，作者不斷強調涼介技術有幾勁，心哋有幾善良，將涼介提升至接近宇智波鼬嘅境界。細佬啟介去到最後，比起漫畫開頭成長咗唔少，性格轉趨成熟，但涼介始終喺技高一籌。
上面提到死神為印象深刻排名第三，《頭文字D》最印象深刻，係綽號神之手嘅城島俊也，喺臨衝線贏托海之前兩三百米，停車嘔吐……印象第二深係唔知道個為咗避狗而輸咗賽事……屌你，不如行雷打咗閃電落架車度咪算……
判決：涼介完勝。
比數：兄5弟6
───
(14) 揍敵客五兄弟（《全職獵人》）
篇文個勢好老，開始悶，再寫落去自己都頂唔順。最後要講嘅兄弟，係奇犽一家五兄弟。二哥五弟能力不明，無法作比較，估計我死前富奸都唔會具體畫到二哥五弟嘅劇情。隻揪隻，大哥伊耳謎肯定拼贏三弟奇犽；偏偏奇犽擁有無敵金手指、最強外掛、暗黑召喚獸、日漫版本Scarlet Witch（註）、易服四弟阿路加。阿路加、奇犽單獨贏唔到大哥，但二人合作又會技高一籌。不過依揍敵客咁古板嘅武術家庭嚟講，家中話事人應該係長子嫡孫做，以奇猗牙咁老土嘅性格，佢又會死死氣受大哥點同老點。
判決：弟弟奇犽憑外掛勝出武力，但大哥應可憑政治倫理控制奇犽。
比數：兄6弟6
（註：美版X-men Scarlet Witch可以將口講出嚟嘅嘢變成現實；電影版Avengers嗰個唔知邊個嚟。）
【結論】
平手！係平手呀！寫咗幾千字就係為咗話你知，其實日漫中嘅兄弟，各有千秋，不相伯仲，好難一概而論話兄勁啲定弟勁啲。
如果要將上面咁多對兄弟歸納出一條法則，我會話：
大多數日漫都有真兄弟角色，日漫史上銷量頭10本漫畫，有4本有親生兄弟(one piece, 龍珠, 火影, 男兒當入樽）。
日漫中嘅兄弟二人嘅實力通常好大差距，根本唔存在比較（係呀！成篇文係垃圾）。
一般嚟講，兄長通常實力較強，分析能力較高，性格冷靜，文武雙全，好多時係細佬心目中嘅模仿對象；細佬（如果係主角）能力一般較弱，不過潛力同增幅強勁，性格較衝動，好多時要靠哥哥照顧。
隨住漫畫發展，哥哥通常會瓜柴，並成為弟弟成長中嘅暗陰面。之後弟弟會不斷努力向上，最後超越哥哥，創造到哥哥都做唔到嘅成就。
日漫好睇，其中一個原因係大方向有得捉，偏偏人物發展可以好多元化（例如你睇《我的英雄學院》，以為豪爆會好似《火影》嘅佐助咁加入對家，點知又冇），兄同弟嘅關係同分工都有不同。
最後，兄有兄好，弟有弟正，打和！好嘢！！！
───
至於以下幾套日漫都有兄弟班，但因為各種原因無寫到……唯有簡單解釋一下：
上杉達也、上杉和也（《Touch》）：年代太遠，唔記得具體劇情－大佬套嘢1981年呀，我得1歲。漫畫開始嗰陣細佬和也喺棒球場上嘅表現遠勝兄長達也，但最後達也越越咗弟弟，仲溝埋佢條女，嚟個未亡人夫目前……
愛德華、阿爾（《鋼煉》）：……其實我冇睇晒鋼煉……（逃）。順帶一提，鋼煉係第一套以兄弟為重心，並以二人合作嘅日漫。上面介紹嘅兄弟，唔係配角就係敵對，只有鋼煉呢套兄弟係主角。
虹村形兆、虹村億泰（《JoJo》）：我亦冇睇過JoJo……
森羅日下部、象日下部（《炎炎消防隊》）：《炎炎消防隊》劇情仍喺起步階段，好多謎底仍未解開。兄長森羅係主角，實力一般但潛力強勁，弟弟象日能力屈絕……有屈絕能力嘅人物，喺作者要維持實力平衡下通常無好下場，好快會畀人出賣同快速收皮。To be rest in peace，弟弟。
龍卷、吹雪（《一拳超人》）：呢對係姊妹嚟喎師兄……
小吉兄弟（《IQ博士》）：小吉二號其實係小吉本尊嘅分身嚟，唔係兄弟，而係根本係同一舊嘢。
瓶兄弟（《東京喰種》）：我都係搵咗好耐先記得喰種有呢對兄弟存在過。
龍濤、涉谷之王（《達爾文遊戲》）：接有切斷能力嘅弟弟王實在太廢，能力不怎樣，有距離限制，而且智商不高；兄弟龍濤剛出場，似乎要報弟弟被殺之仇……希望不會落得與菲利阿哥同樣下場吧……
眾人（《北斗之拳》）：其實健次郎、雷奧幾個唔係親生兄弟嚟……至於書裏面幾對親兄弟，太嘍囉了……
歡迎大家加入 Medium，follow史兄： https://medium.com/@relgitsjg
Facebook page：https://www.facebook.com/Relgitsjg IG (主要用嚟睇女仔) : https://www.instagram.com/iamuncleshit/