“Brews Brothers” ：飲醉喜劇

Netflix 嘅喜劇 (comedy) 選擇唔多，當然佢有好多 stand-up comedy (即係香港嘅棟篤笑) ，但係如果想睇有少少劇情嘅笑片，除咗 “IT Crowd” 、 “Big Bang Theory” 同 “How I met your mother” 之外，可能已經要數上更舊嘅 “Friends” 。

唔係話冇其他選擇，但係有個單憑一張 thumbnail 去推測套劇好唔好笑 (或者笑唔笑得出) ，都係一個令人相當氣餒嘅過程。

好在， 2020 年， Netflix 推出 “Brews Brothers” 。對於賴叔呢個酒精嚟講，呢套以一對撈亂骨頭嘅兄弟釀啤酒為題材嘅肥皂劇，喺瘟疫同社會氣候帶來嘅低氣壓之下，算係提供咗一個「笑吓啦」嘅機會。

“Brews Brothers” 一套八集，以劇評反應嚟睇，未必會有下一季。咁又咁講，肥皂劇好少可唔爛嘅。差就差在，爛得嚟，有冇夠 witty 嘅笑位，或者掉返轉，會唔會太多低級趣味「唧」你笑嘅內容，先至係核心。

先容許我寬容少少，我絕對唔會攞 “Brews Brothers” 同英國經典喜劇 “Yes, Minister” 相比──後者嘅政治背景，將政府官僚同政客嘅角力盡付笑談中，根本就係學習英國官場文化嘅偏方，層次高好多。

降低期望之下，我會期望 “Brews Brothers” 去唔到 “Big Bang Theory” 嘅層次，但都唔好差太遠。其實從釀酒兩兄弟 Wilheim 同 Adam 嘅角色設定，我已經諗起 Leonard 同 Sheldon 。係囉，一個戇直老好人，一個奄尖腥悶不食人間煙火嘅小白臉， for whatever reason 要一齊生活，就係咁囉。

女主角 Sarah 其實都幾搶鏡 (當然都因為我覺得 Carmen Flood 省鏡) ，不至於 BIg Bang Theory 入面嘅 Penny 咁無腦。甚至相對地有啲小聰明。而且好打得，喺其中一集嘅末段發揮小宇宙，令我幾乎有返兩三嚿腹肌。

但一個女主角又真係唔夠救全家。

經營不善嘅家庭式釀酒廠，要尋找生存之道，以 Wilheim 同 Adam 兩兄弟各走極端嘅作風去鬧笑話，絕對可以，但係比例上，屎尿屁同比較露骨嘅鹹濕笑話似乎佔咗大多數。趣味嘅嘢，照計可以喺嘔吐物以外製造？

喺三個主角以外，仲有幾個配角充撐下場面，但係除咗臨尾三幾集搶鏡嘅修士 Truffle 之外，蠱惑店員 Chuy 角色設定非常平面，一切淫賤下流嘅嘢都係交晒畀佢；酒吧外嘅快餐車鴛鴦 Becky及 Elvis 每次出場都係關乎交配，笑點就變得預期之內。

另外， “Brews Brothers” 冇辦法好似 “Big Bang Theory” 咁將一啲專門又 nerdy 嘅知識融入笑位。某程度上浪費咗個題材。或者編劇怕啤酒花同發酵嘅冷知識悶親大家？但會唔會正正因為有啲冷知識出現，透過唔同角色嘅一知半解衍生出一啲笑位，觀眾會有更多 takeaway ？

以劇論劇， “Brews Brothers” 只可以一笑置之，得啖笑囉。但係喺呢個時勢，大家或者真係唔可以挑剔太多？

退一萬步講， comedies 本身，好多時都係將快樂建築喺別人嘅痛苦或者愚蠢之上。

“Friends” 入面嘅角色 Mean 人嘅對白都唔少 (當然冇 “Little Britain” 玩到咁大同政治不政確) ；而 “IT Crowd” 兩個宅男加一個唔識電腦嘅女上司喺劇中都有好多令人尷尬失笑嘅場口。 “Everybody loves Raymond” 玩足九季，喺閒話家常中互相挖苦兼放送罐頭笑聲，其實都不落俗套。

“Brews Brothers” 無法媲美前人，講到底，都係劇本單薄無力，而且尺度大得有點兒 gross ，觀眾喺心裡納罕之際，自然就笑得冇咁開懷。