《冬末北歐遊：安特衛普／比利時》
請小心控制流量（手機上網嗰啲，唔係月事嗰啲呀）
2019年3月冬末，去咗歐洲四個地方：
Stockholm/斯德哥爾摩（瑞典） Tromso/侵素（正式叫 Tromsø，位於挪威。「侵素」係我改嘅，Tromso個正式譯名「特羅姆瑟」不知所謂） Antwerp/安特衛普（比利時） Amsterdam/阿姆斯特丹（荷蘭）。
今次介紹比利時。
【比利時總評】
去過比利時三次，第一次去布魯塞爾(Brussels)同三個小城［布魯日 (Bruges)根特 (Ghent)、聖尼古拉斯 (St. Nicolas)］、第二次去根特參加婚宴 (Ghent)、今次去安特衛普 (Antwerp)。
從遊客角度出發，比利時好撚悶，無乜獨特性，要睇嘅嘢歐洲其他城市更靚更多更出色。打個比喻，比利時好似喺酒店食自助餐，乜嘢都有啲－教堂、藝術博物館、風景、購物、餐廳、歷史建築，但冇一樣夠代表性。Everything is good but nothing really great.
更重要係我對比利時印象極差，頭兩次去都遇到啲不禮貌嘅事－第一次喺布魯塞爾地鐵畀張五十蚊歐羅個職員佢一嘢掉返畀我、第二次係喺根特個電車司機喝鳩我。去頭兩次中兩次，去咁多地方唯獨係比利時畀我呢種唔尋常嘅經歷。
今次仲去比利時，係為咗探親－主編同我都各有一個親戚朋友喺比利時定居。喺安特衛普大部份時間食飯傾計，無乜景點好介紹；二嚟翻查資料，安特衛普根本無乜景點－你睇下 TripAdvisor，第一係安特衛普車站、第二係教堂、第七係動物園……十大景點中只得第十嘅行人過海隧道 (St. Anna’s Tunnel)有啲吸引力而我冇去到。順帶一提，去完嗰度成個月先研究有乜好玩，你話我幾撚無聊先得嫁……
不過對喺當地住嘅人嚟講，無景點係好事定壞事？絕對係好事。一個地方好少景點，嗰幾個景點肯定多人爆；如果一個地方好多景點，咁就成個國家周圍都咁撚多人。唔好信「疏導人流」呢啲偽科學學說－嚟嘅人不變而景點增加，每個景點嘅人自然少咗；事實係，多咗景點只會吸引更多人嚟，而上升嘅幅度快過景點上升嘅速度，即係，嗰個地方多咗景點、而每個景點嘅人又多咗，結果全部地方都咁撚多人。唔使用乜嘢公式證明，只需要睇下香港就夠。結論：最好就係一個景點都冇。
你想安安定定生活，唔想出街人撞人、唔想樓價飛升，千祈唔好搵多遊客嘅城市定居。全球樓價數一數二高嘅城市，例如香港巴黎東京紐約倫敦悉尼羅馬（唔計北歐嗰堆），全部係遊客高度集中嘅地方。我搵過幾份講全球樓價最高嘅城市，比利時嘅布魯塞爾完全無影，有時候根特 (Ghent)嘅樓價更高－根特係比利時最遊客嘅城市。不論係各國城市之間比較 (Inter-city comparison)，定係一個國家裏面各城市嘅比較 (Intra-country comparison)，大概印證到呢點。留意，我無話因為遊客多所以樓價高，只係兩者有關係（我覺得連呢啲都要寫簡直侮辱緊睇我寫嘢嘅人）。
__________
咁啱我比利時個朋友想搬，大家講下比利時啲樓同樓價。佢畀咗幾個網站我參考（但明明要搬嗰個係佢），下面呢間求其搵嘅，喺安特衛普近郊，20分鐘私家車車程去安特衛普車站／50分鐘去布魯塞爾機場，
現樓，兩層、四房、大花園、兩個廁所（另外有個沖涼房）、特大衣櫃，計備配套齊全，向南，
地皮面積：596……平方米，折合6,412平方呎。目測屋裏面唔算大，只得約2,000呎。
價錢：五百萬，港紙。
五百萬，你喺香港連412呎都買唔到。
另外，港幣一千萬買到啲咁嘅小屋：
花園3,500平方米、四層樓大屋面積505平方米（即5,000呎）、五間睡房三間廁所、酒窖25平方米（大過我屋企）、廚房24平方米、大大個泳池。
個人唔中意樓底太矮，同埋買咗一定要退休先可以專心打理屋企。香港一千萬都買到泳池，不過係 club house同人time sharing，仲可以畀 $5/呎管理費等人哋幫你打理，唔恨得咁多。
要搵比利時樓？去呢度搵下。無得買，羡慕下都好。
一個地方悶有悶嘅好處：你想安居樂業，安安穩穩咁生活，越少遊客越好。
OK，上面講咁多無謂嘢，因為比利時景點，完全不值一晒……
【景點介紹】
尿尿小童 (Manneken Pis/le Petit Julien)，布魯塞爾
比利時排名第一嘅景點，尿尿小童，亦係布魯塞爾以至比利時嘅標誌。
未去布魯塞爾之前，主編已經講咗好幾次，千祈唔好對呢個尿尿小童抱有太多期望。之不過，去到布魯塞爾，每個地方都以尿尿小童做賣點，又鎖匙扣、餅乾、書簽、各式紀念品呀，仲有隻人等高嘅尿尿小童畀人影相，搞到我鬼死咁興奮。
穿過布魯塞爾廣場，行去到某個陰暗街角，有大班人圍住個角落影相，主編細細聲同我講：
「嗰個尿尿小童就喺角落頭。」
我望埋去，只見到一堆人頭－情況同喺羅浮宮睇蒙羅麗莎有得揮（註）。我幾經辛苦向前慢慢行，終於見到尿尿小童個真身……
「嘩！仆你個街，咁細嘅？」
由於已經入黑，嗰度又冇乜燈，陰暗中我只見到一舊好細小嘅黑色鐵、排出一條好幼嘅水柱……
「吓？咁嫁渣？」
「係呀，咪同你講咗唔好咁大期望。」
「呢個人類史上特大旅遊騙案嚟。」
點講好呢？唔係話旅遊景點一定要好偉大宏偉壯觀，尿尿小童堅弱雞。作為旅遊景點，佢嘅體積已經輸蝕－只得53 cm－附近又冇展示版講佢嘅歷史，吹到咁大係過咗火，無可能係一個國家最著名嘅景點……衰啲講句，尖沙咀個銅製李小龍像，體積、神情比起尿尿小童偉大一百倍。
我睇完尿尿小童，途中難掩失望同震撼嘅心情－失望係尿尿小童好弱雞，震撼係一個咁弱雞嘅景點居然畀人吹到咁大，結果比利時餘下嘅旅程，我都受「尿尿小童創傷後遺症」（Post-Mannken Pis Stress Disorder）影響……
如果我嗰陣知道，陰暗街角嗰個尿尿小童係複製品，真正500年歷史嘅原始雕像放咗喺城市博物館，我諗已經喺街殺人……仆你個街，放個複製品出嚟做乜？
推薦度︰★（最高5 ★） 擠迫度︰★（最少人係5 ★）迫撚到仆街 接近其他景點度：★（附近多景點係5 ★）。行多兩步係布魯塞爾大廣場 開放時間：24小時 費用：免費
往後幾年，同所有去過/住喺比利時嘅朋友傾開計，大家不約而同認為(1)尿尿小童名過於實，(2)布魯塞爾大廣場 (The Grand Place)更靚更具獨特性。
布魯塞爾大廣場幾舒服，去嗰陣晚上有音樂會。行落去好舒服，呢種廣場喺歐洲都唔少，布魯塞爾呢個較空曠，附近建築較一致。布魯塞爾大廣場英文叫 The Grand Place，唔使地址唔使國家名，總之 “The” “Grand Place”全世界只有一個。好串，其他名勝一般有個人名／地點名，呢個 “The Grand Place”用普通名詞就夠。
主編細細聲講，仲有一個尿尿小妹，喺布魯塞爾另一邊……我同佢都覺得 “Fool me once, shame on you; Fool me twice, shame on me” 決定無去睇。為咗寫文 google咗尿尿小妹， 100000%肯定冇去睇乃人生中最正確決定……
＿＿＿＿＿＿＿＿＿＿＿＿
根特祭壇畫/神秘羔羊之愛 (Ghent Altarpiece/ The Adoration of the Mystic Lamb)，根特
根特同布魯日兩個小城，作為一日遊的確唔錯。當中喺 Ghent St. Bavo’s Cathedral嘅呢幅巨型畫令我印象深刻，每一格、每個對稱都有意思同解讀，同埋呢種祭壇組畫非常少見，去根特一定要去睇。幅畫有700年歷史，嗰陣中國個皇帝叫明成祖。
推薦度︰★★★★（最高5 ★） 擠迫度︰★（最少人係5 ★）超級多人。睇畫嗰間房超細。 接近其他景點度：唔記得。 開放時間：呢度。記住睇下有冇得睇幅畫先好去。
＿＿＿＿＿＿＿＿＿＿＿＿
安特衛普中央車站 (Antwerpen-Centraal Railway Station)，安特衛普
人類史上數一數二靚嘅車站。古色古香，充滿中歐色彩。實物比得上任何調較過顏色嘅相片。不過，我同主編喺呢度花咗啲時間打 Pokemon Go!，所以冇時間影相。
唔係吹牛吹水，呢個車站嗰種古典味道，要睇實物先聞得到。
推薦度︰★★★★★（最高5 ★）但個人認為去一個城市淨係為咗睇車站係件非常奇怪嘅事 擠迫度︰★★★（最少人係5 ★）唔算多人。
＿＿＿＿＿＿＿＿＿＿＿＿
St Anna’s Tunnel / Underpass in Antwerp
返到嚟寫文先見到呢個景點，好想去。一條連接安特衛普東西兩岸嘅行人隧道，1933年開放。賣點(1)原裝木製扶手電梯、賣點(2)無限打咭點。無錯，打咭呢組關鍵字眼又出現了：
《史兄小知識》
我發覺，你只要話嗰個地方「打咭」一流，即刻可以令該地方嘅品味同級數拉低一百級，同公廁無異。中環大館明明做得唔錯，但一講係「打咭」熱點，即刻同垃圾過G點－「私處中心」。
來源： https://medium.com/%E6%96%87%E9%9D%92%E9%9B%9C%E8%AB%87/stockholm2019-ffabf3c0d45推薦度︰★★★★★（最高5 ★）純粹反映我好想去 擠迫度︰唔知 點去：google map 開放時間：隧道廿四小時開放，電梯開 閒日朝6晚8、假日朝9晚9（來源）
相比起侵素同斯德哥爾摩，係咪覺得比利時嘅景點有啲削？我都覺。一嚟比利時真係無乜景點、二嚟我對呢個地方印象麻麻、三嚟今年4月開始 Game of Thrones大結局又 Avengers 4 Endgame又盛，邊度嚟咁多時間寫嘢？
仲有最後一集阿姆斯特丹？咪又係去瘋狂隊草……唔通介紹我去邊度買草咩……都好喎。
＿＿＿＿＿＿＿＿＿
註：有關蒙羅麗莎
睇畫嚟講，最失望應該係達爾文嘅名著、人類史上第一號名畫蒙羅麗莎 (Mona Lisa)。去到羅浮宮，迫撚到年宵咁。入到去嗰間房，仆街邊係睇畫？首先蒙羅麗莎張畫好撚細，然後兩三呎前有圍欄，再加維園年宵x1000人群，只得五呎鬆啲嘅我註定只能睇到後尾枕。睇完又睇、諗完又諗，唔知幅畫點解咁出名。
「其實幅蒙羅麗莎，撇除係達文西畫，我唔知特別之處係乜。」我問。
「都係嫁。用今日嘅術語講，嗰陣達文西都唔知 engage咗幾多 KOL幫佢做勢，吹到幅畫咁大。」主編回答。
「哈哈哈哈哈，咁又似喎。」
Follow me on Medium，我嘅文字唔會令你失望（不過寫文嘅速度會）。
https://medium.com/@relgitsjgFacebook page：https://www.facebook.com/Relgitsjg
