【開書文】就算係咁都要繼續畫！
致香港漫畫人嘅打氣書。
日本嘅「香港漫畫店」店主非常有心，每年都會自資出版香港漫畫相關同人誌，分批整理手頭上香港漫畫家推出嘅作品。可以話，只要你係香港漫畫人，佢就九成九有買你嘅作品，除咗喺佢嘅網店出售，亦都會出同人誌介紹心頭好。
做生意同個人喜好完美結合，所以我幾時都話店主係我偶像。講到勤力我更加自愧不如，係人都知伊死嘅音讀係「ishi」，訓讀係「LAZY」[*1]，並唔係浪得虛名。店主呢本同人誌《それでも描くんだ。（我流譯名：就算係咁都要繼續畫）》，佢喺年頭嚟香港嘅時候已經送咗畀我，應承寫介紹，拖到今日先至有動力寫（明明正值《迴響》截稿期），就知我有幾懶。（在此奉勸其他托我寫介紹嘅朋友唔好太期待）
今次呢本《それでも描くんだ。》係小薄本（佢以前出嘅同人本根本係資料集），喺2022年1月推出，復刻店主之前出過嘅同人本。內容主要係簡單介紹一啲喺2022年1月為止，香港人出版過嘅漫畫作品，有商業誌有同人誌，介紹嘅漫畫人有天花板嘅利志達達哥，亦有一啲連香港人都未必識嘅作者。呢位日本店主癡迷香港漫畫嘅程度，簡直係港漫博士級數。
《それでも描くんだ。》介紹漫畫人：
* 利志達
* 黎達達榮
* 阿塗
* 小克
* 楊學德
* 馮展鵬
* 智海
* 尊子
* 白水
* ANGRY ANGRY
* PEN SO
* 柳廣成
* 麥少峯
* 草日
* 文地貓
* 門小雷
* 謝曬皮
* 米路沙
* 暗黑指紋
* 閃亮大陸可能會有人質疑，香港漫畫點解唔推邱福龍鄭健和？人哋之前出咗Ｎ本書推介咗喇。
一個人睇咩漫畫、點睇漫畫，都係反映個人品味嘅，睇到店主嚴選推介名單，就會知道佢個人喜好。呢本《それでも描くんだ。》推介嘅書單背後，仲有另一個打氣嘅意念。
早幾年香港大環境係點，大家有眼見，受影響嘅當然唔單單係漫畫創作，甚至地球村所有村民都唔易過。店主認為，有漫畫人面對逆境仍然努力創作，拎起畫筆繼續畫，已經係一件令人佩服嘅事，就算世道幾咁差，有幾多阻礙，只要唔放棄，繼續畫落去，就一定會被人看見。
係嘅，我明白香港人總係鍾意踩香港人，出本書好似殺你全家咁被香港讀者批評到體無完膚，香港讀者Mean都唔係今日嘅事，只會讚外國人而踩自己人，踩人好容易，欣賞人好難。
而傳統意義上嘅港漫銷量大不如前亦都係事實，但係週刊作品仍然每星期風雨不改出版，淨係呢份堅持已經令人欽佩。而近兩年大型年漫畫資助計劃下，獲資助而出版漫畫作品嘅受惠者把握機會努力創作，亦都見到新嘅境象。
店主寫《それでも描くんだ。》嘅時候，仍然未有「港漫動力」計劃，佢已經提到香港漫畫人其實用緊好多唔同嘅方法盡力畫漫畫、盡力出版，呢點係佢佩服香港漫畫人嘅原因之一。到咗今日，仲有唔係週刊出版、冇收資助嘅漫畫人默默努力，我諗就係店主當年最想見到嘅創作群象。
我都同好多朋友傾過，假如香港從來都冇任何漫畫資助計劃，香港漫畫人會點樣呢？相信呢兩年好多作者都會轉行、好多作品都唔會問世。但係回想未有資助嘅那些年，捱得好辛苦都仍然要畫漫畫嘅嗰份熱誠，燃燒青春時間金錢，蝕到懷疑人生，令人反思前世做錯咩，先至要喺香港做漫畫（做出版同理）咁折墮。但係諗番轉頭，又唔會覺得自己好戇居，起碼做過吖。
講咗咁耐，再翻開《それでも描くんだ。》，見到入面提到有部份漫畫人，幾年前可能仲係寂寂無名，但係今日已經多咗人認識，有啲人就離開咗香港，有人就回流，感覺真係好感概。
呢本同人本嘅打氣Message好直接，十足十熱血王道少年漫畫口號：只要畫落去，一定會有人見到；就算環境有幾差，想畫就繼續畫落去。
共勉之。
呢本印量少，店主好似話賣晒，想睇書嘅話可以約我食飯，又或者幫襯第25期《迴響》，有店主嘅訪問，呢期係漫畫人特集，大量漫畫人開聲講創作，我碌爆咗張人情咭。
註：
［*1］音讀（音読み／おんよみ）、訓讀（訓読み／くんよみ）
學日文嘅人要識嘅兩個日語漢字概念，音讀係指讀法源自中文嘅漢字（漢語），訓讀係讀法依循日文原有字音（和音）。所以一個漢字Ｎ種讀法，喺日文入面係常態。而音讀或者訓讀亦都會影響字義，亦都有必要喺漢字旁邊／上方標明讀音。
近年日本人會喺有特別字義嘅漢字上標音，而個音又唔係音讀又唔係訓讀，似我哋廣東話講嘅玩食字。舉個中二病嘅例子，「宇宙」讀「うちゅう・Uchu」，有人用嚟做歌詞，會標明「宇宙」讀「そら・Sora」，「そら」原本嘅漢字其實係「空」，即係天空，用嚟配合歌曲意思。
吹遠咗，「伊死」音讀「ishi」訓讀「Lazy」，就係咁解。
My Medium Record：(Update中) https://readmedium.com/my-medium-record-e1f290f9c470
ishi is lazy。
順手睇埋～
個人BLOGss~ ☆伊死的漫畫特區 （講漫畫、讚漫畫） ★嚟Plurk吹水