2020睇叱咤告別老屎忽年代
講到跨年期間睇咩節目，相比起追日本紅白，我每年更加鍾意追1月1日追叱咤，冇理由淨係撐外國嘢，唔撐本地嘢嘅。
今年叱咤真係百感交雜，我見到時代嘅眼淚。 講真我真係冇咩點寫過香港歌/頒獎禮嘅PO，因為一向聽嘅歌都唔係主流，但係今年實在太多感受。
專業十大
今年我聽多咗廣東歌，專業十大嗰十首係計903播放較多嘅，我鬼知佢哋播咗邊首歌幾多次咩。
比較意外嘅係原來903班DJ真係咁鍾意造星仔仔，有時聽903節目會聽到《IGNITED》（原名叫《焫着》，好似係），但估唔到播到可以上第3位。仲有一個唔明，係ERROR《我們很帥》喺派歌嗰陣都喺903狂播，班DJ又話好鍾意，竟然唔上十大。
睇番十首歌，一首跳唱，兩首BAND，只有一首電視劇主題曲，另外六首個人派台作品，個分佈好似唔錯。但以曲風去聽，一首快板，九首中慢版，我就希望有多啲唔同曲風，希望香港主流可以容納多啲RAP、ROCK、METAL、JAZZ、COUNTRY之類。其實年年都淨係得中板歌慢歌情歌攞獎，真係好悶。
然後睇埋專業推介十大唱現場，又係尷尬到一個極點，好多歌手都係陷入走音尷尬嘅情況。per se嘅LIVE明明可以好啲，可能真係緊張啦，Serrini就一貫現場水準（唔記得歌詞之嘛）。
個人好鍾意JUDE，香港好少呢種聲線嘅歌手，最愛佢嘅歌絕對唔係《零分》（反而係幾唔鍾意），明明把聲咁特別，唔應該唱大路情歌，不過《零分》喺YouTube真係過一百萬Hit，都反映咗香港人聽歌嘅口味。佢最好嘅演出都唔係呢一晚，但係唔知做咩呢一晚係走音到爆，作為樂迷唔知講咩好。
出道17年嘅關智斌，表演差過跳住唱嘅MIRROR，明明大家都係偶像，點解差咁遠？Kenny喺英皇學咗啲咩？MIRROR出咗道兩年咋。連陳柏宇都失準喺高音走，不過佢都知道而立即講Sorry，我覺得好過唔知自己走音而又覺得攞獎係理所當然嘅人。係呀講緊AGA，佢嘅LIVE一向都係咁上下，唱歌個嘴掹咁細真係搞唔掂。
莫文蔚係個驚喜
《呼吸有害》真心正，我都成日LOOP，就算係係TVB狗劇主題曲，至少TVB喺呢套劇唔係再無限循環班契仔契女夾硬嚟，算係有進度㗎喇。套劇？冇睇過喎。上Youtube一Search就會見到好多人Cover《呼吸有害》，證明首歌真係多人欣賞。
我覺得莫文蔚係其中一個現場有POWER過錄音嘅歌手，一直以嚟莫文蔚都好少喺香港發展，係樂迷嘅損失（仲停留喺火雞姐度，唔係呀？）。叱咤台上唱MEDLEY，一副從容嘅態度，就算高音飄咗幾粒音，走音咪走音囉，都遊刃有餘咁唱到尾，呢種演出係由舞台經驗累積。失望嘅係首MEDLEY冇方皓玟嘅《人話》，咁莫文蔚唔講人話都明嘅。
唔講都唔知莫文蔚已經50歲，仲成個美魔女咁，唱LIVE仲咁好氣。 你望吓楊千嬅，嘩好醜樣，嘩眼袋好大（by郭富城）。
莫文蔚上叱咤台唱MEDLEY嘅意義，我覺得有一種傳承嘅含意。 喂呀，你點會估到上世紀出道嘅歌手會唱《女神》《長相廝守》《原來她不夠愛我》呀？李克勤都冇唱啦！
好勵志，《全民造星》，真係造到星㗎
今年叱咤賽果，見到選秀節目歌手嘅實力。
造星仔仔由選秀出嚟，跳住唱冇走音，由出道《一秒間》跳舞唔齊到想掩眼，到叱咤台唱《IGNITED》可以齊齊整整，進步真係好大。我幾鍾意LOKMAN嘅RAP，佢RAP嘅力量勁過團體唱跳，加上段RAP又係自己寫，RETROLL HIP-POP嘅人果然唔係渣流灘。 （網上鬧《IGNITED》難聽嘅人，其實係咪鬧緊王雙駿？）
OPENING由ANSON LO《一所懸命》打頭陣，又係跳住唱高水準，本身ANSON LO喺造星節目已經好穩定，夠氣又夠力，天生係唱跳歌手。阿JER都唱得好穩定，係高音震咗啲，已經比好多十大專業推介歌手嘅走音LIVE好好多。不過阿JER安慰人可唔可以細細聲，唔好喺台上大大聲安慰，做你兄弟都唔知笑好定喊好。
除咗造星仔仔，以前TVB都有選秀節目㗎，華星新秀真係成就好多明星。今屆女歌手獎陳蕾係《亞洲星光大道》出身，男歌手獎銅獎馮允謙、金獎許廷鏗都係巨聲幫。
不過馮允謙冇簽過TVB，咬唇鏗（讚緊佢）2018年離開咗星煥國際，去咗華納唔駛再聽TVB話，都唔知TVB搞《超級巨星》《聲夢傳奇》係成功定失敗。唔係留唔到仔，係留唔到好嘅仔囉（鄭俊弘嗰啲）。樂小姐見到造星咁大迴響，又搞番《聲夢傳奇》，係咪要幫定華納講聲多謝你幫手發掘潛力股？TVB啲仔好多都過咗華納喎。
見到許廷鏗攞金獎真係好感動，我由佢早期《青春頌》聽到今年，覺得佢團火越燒越旺。《Negative》係《全民造星II》嘅Eagle作曲，Eagle亦都有Cover《無力感》。許廷鏗做完《造星III》評判又多咗人鍾意，睇吓選透節目幾咁大影響力？
同樣出道15年，林二汶都話獨立發展未試過做大過1000人嘅SHOW，何況好知名、何況攞獎？今年做完造星爸爸（A-Team好在有二汶），終於比人見到佢有幾好（之前《最後的信仰》真係聽到喊），等緊佢找數去紅館開LIVE。
姜濤不紅，天理不容
嗰啲鬧緊姜濤有咩資格攞最受歡迎男歌手、唔識佢、點解唔係暴龍哥、未聽過最受歡迎歌曲、話香港樂壇已死嘅人，有幾耐冇聽過廣東歌？又有冇投票？
第一年睇叱咤咩？專業推介計播放率，我最喜愛計投票率。 有票唔投，唔好喊。
我支持ERROR同KOLOR都用咗兩個電話號碼投佢哋一票，送唔到佢哋入五強都冇辦法（係，我用咗兩個電話投咗兩票）。新城連袁偉豪都有獎攞，相比之下，一人一票選我最喜愛的，有咩問題？
2018年投票投到古天樂上台攞最受歡迎男歌手，派得半首歌就話佢值得。2020年姜濤SOLO 派3 首、MIRROR組合派3首，就話冇資格？
最重要都係FANS力量。鏡粉真心癲，成日幫MIRROR賣巴士站廣告，姜糖仲連續成個月喺蘋果落足成個月廣告（ANSON LO教主嘅神徒都唔弱），上網投個票，簡直一星任務。就算鏡粉姜糖一人投N票，證明佢哋用行動支持鍾意嘅歌手。有票，唔係唔投吓？
攞最受歡迎獎，係計郁到幾個FANS。好明顯嘴裏說支持暴龍哥、《一人之境》嘅人，唔夠啲姜糖勤力，或者根本冇投票。BTW，當年你班友咪又係鬧鄭中基靠老豆？香港冇樂迷，只有花生友。
出道耐啲又唔代表FANS多，FANS冇錯係措番嚟，措措吓FANS會轉會、會退會，啲熱度會減退（所以古天樂真係奇蹟）。
喺2019、2020年，大家睇清楚一啲歌手藝人嘅立場，唔會再支持啲玻璃碎，會投票嘅人，分散晒啲票去其他歌手。 「我最喜愛」呢個獎真係反映時代。
話未聽過《蒙着嘴說愛你》、首歌冇資格嘅人，可能唔係好知，呢首係2020年為香港醫護人員打氣嘅歌。肥仔@ERROR幫手排舞，仲搵到好多人一齊拍片跳（好多都係姐姐姨姨，花姐呀、嘟姐嗰啲），喺抗疫早期真係有種正能量。
個人對姜濤無感（同隊MIRROR比較欣賞佢啲兄弟），不過姜濤現象證明今年叱咤開始出現真係追偶像嘅現象，就好似當年哥哥VS倫伯、劉華FANS VS 黎明FANS咁，FANS力量又出現。
點解之前十年冇咁多FANS力量？因為香港樂壇冇偶像。 香港最後偶像陳偉霆同宇宙GEM都（都俾香港人笑到要）北上啦。偶像文化唔係壞事，韓國日本都有偶像活躍。
當然一個樂壇只係得偶像係唔健康，冇偶像又唔健康，而點樣平衡，等啲公司高層頭痛。
電視台曝光都重要，今年見到ViuTV發力喇，打破過去TVB靠電視曝光谷歌手嘅現象。唯一會疑惑嘅，係ViuTV暫時主力推MIRROR（ERROR同阿THOR都冇咩谷佢哋唱歌），資源可以集中啲，如果以後再簽更加多造星仔仔，又會唔會做到同樣嘅成績？
如果講年資可以攞叱咤嘅大獎，今年EASON李克勤容祖兒鄭秀文張敬軒麥浚龍冇獎攞點算？謝安琪輸俾陳蕾，唔通又要喊爆咩？而家鬥喺台下坐得耐咩？坐耐啲個獎勁啲？今年冇獎，咪出年囉。唔通個歌手冇獎攞你就唔支持佢，唔聽佢啲歌？
今年叱咤獎樂於見到新人推前浪，努力嘅歌手有回報。
花姐喺《全民造星III》有句金句：「全民造星嘅參加者係好努力㗎。」，今屆《造星III》參加者子涓都有句金句：「努力嘅人唔會一事無成。」，我好相信努力有用，好歌有好報。
終於可以告別老屎忽樂壇，希望2021年有多啲唔同嘅廣東歌聽。
紀錄吓2020年我最常LOOP嘅廣東話新歌，出年今日又睇吓自己會聽咩新歌。 （排名不分先後） （重申我好少聽大路歌）
ToNick：鬼滅之日、衰喺個掣度 KOLOR：天地無用、進退 許廷鏗：無力感、Negative ERROR：我們很帥、緊箍咒 GIN Lee：敢 MIRROR：INIGTED 莫文蔚：呼吸有害 艾粒：奇妙事不斷有 Serrini：網絡安全隱患 盧巧音：旁觀他人之痛
My Medium Record：(Update中) https://readmedium.com/my-medium-record-e1f290f9c470 2021年第一篇文竟然係長文（我明明咁懶），有個好開始。（就奇！）
順手睇埋~
個人BLOGss~ ☆伊死的漫畫特區 （講漫畫、讚漫畫） ★嚟Plurk吹水 ☆開咗MeWe