《831半週年網上集會 – —發言》（2020.02.29）

記得嗰晚港島遊行完結後，喺天橋到睇到新聞，嗰下既震驚我到今日都記得非常清楚。我喺天橋到忍唔住開始喊，好無力，好心痛。好多謝喺依刻上前安慰我既一位手足。

之後，我盡量每日都去祭壇望一下，上香同祈禱。其實我都算係基督徒，我係無上香既習慣。但在祭壇面前，我咩都做唔到，我無力到只要有任何事都願意去做。

儘管我知道咁係徒勞無功，就算我喊幾多次都無用。每次想像嗰一晚佢地喺地鐵入面既嗰種恐怖同絕望，就提醒自己一次，絕對唔可以原諒依個殘暴既獨裁政權。

信念係刀槍不入既。但要將信念延續落去，唯一既方法就係行動。要摧毀依個屹立多年既腐敗政權並不容易，可能五年、十年、廿年、甚至喺我有生之年都未必可以見到真正民主自治既香港。喺依個漫長既過程中，我地可能會自我質疑，努力咗咁耐好似無成果、同行者可能同我地既期望有所不同。但正正因我哋係有血有肉的人，我地唔係殺人工具，所以我地先會驚、會傷心、會絕望。

但只要我地願意去做一啲野，將信念一代一代咁延續落去，終有一日榮光會歸於依一片土地。

希望大家，唔好將世界既不公義當作必然既惡，因為無人係理所當然要受到咁既對待。政府總係叫我地包容、體諒，但真正既善良並非如此。忍耐唔一定係美德，將忍耐當成美德只係依個偽善既世界維持它扭曲的秩序的方式，有時候，生氣、憤怒先至係美德。

願我地可以善良地憤怒落去，記住手足們既血汗淚，光復香港唔只係一個口號，時代革命唔只係一場遊行。