4月｜讀｜台灣：苦悶的歷史
Book Review in April: “台湾: 苦悶するその歴史”
前言
希望大家都身體健康。3 月繼續 WFH 書繼續有睇，但反而冇咩心機去寫文。
台灣：苦悶的歷史
《台灣：苦悶的歷史》喺一本寫於 1964 年嘅書。好奇嘅讀書可能會問點解一本講述台灣歷史嘅書，原版會喺日文？咁就要講返台灣歷史（用台灣歷史去講一本講台灣歷史嘅書）。
雖然今次運動令到香港人成日喺邊掛住「今日香港、明日台灣」、「Connect 埋台灣人」、「只可以示範一次俾台灣人睇」；但事實上，台灣人嘅獨立運動已經經歷咗幾十年，絕對喺香港嘅老前輩。只不過大多數香港人嘅歷史知識同世界觀都莫名奇妙，又唔會花時間去暸解一下唔同地方嘅歷史，就連成日去嘅台灣，我諗大家都唔知道好多香港人都唔知到佢地一路以來走過咩路。當然，台灣本土嘅人都可能唔會清楚自己國家嘅歷史。
二戰之前 — 日治時期
扯太遠由荷治時期、清治時期講起，就會 Cover 埋本書嘅內容，而且呢篇文亦都唔喺好似呢本書咁 — 透過追溯福爾摩沙嘅歷史，去建構「台灣人」呢個主體民族。不過又咁講，如果你喺一個有志於香港獨立運動嘅人，就更加要睇多啲唔同國家嘅歷史論述，去睇下唔同國家嘅人點樣去建立自己嘅民族同國家。當然，我唔喺話日治時期之前嘅台灣歷史冇意思或者唔好睇，但就留返俾各位自己去睇。
講返呢本書本身嘅歷史，作者王育德喺日治時期台南出生嘅台灣人。日治台灣由 1895 年結束甲午戰爭簽定《下關條約》開始，到 1945 年大日本帝國戰敗為止，為期 50 年。王育德出生個陣，正正喺日本同台灣嘅蜜月期，當時日本本土嘅政黨政治氣氛日益濃厚，例如喺 1918 年個陣，第一位組成政黨內閣，有著「平民首相」呢個稱呼嘅原敬上台；而台灣總督府亦由最初嘅武官統治，變成文官統治（當然，文官上台亦唔代表冇任何壓迫，例如1923 年擔任總督嘅內田嘉吉就喺 1918 年做民政長官發生咗「西來庵事件」，鎮壓咗一場大規模抗爭）。
當然，總督府作為日本嘅殖民者代表，一定會壓制任何反對大日本帝國嘅派系或者思想；但起碼，由伊澤多喜男（任期由 1924 年到 1926 年）開始，總督府嘅大方針就有所改變，例如伊澤多喜男主張「台灣統治之對象非十五萬之（日本）內地人，而為三百數十萬之本島住民」、上山滿之進任職時講話會以「一視同仁」為治理原則，甚至提咗一首《任臺灣總督書感》。
遽拜恩綸荷顯榮，樓船破浪向南瀛。摩天阿里山容秀，扼海澎湖島影橫。已以微躬膺重寄，只當一念竭精誠。糟糠內子今無在，欲整衣冠暗淚生。
當然，陳虛谷提《為台灣詩壇一哭》批駁諂媚以詩和應上山滿之進嘅台灣詩人又喺另一段故事。
呢段時期，總督府亦大興土木，例如興建各地鐵路、設立台北帝國大學（現國立台灣大學）、興建桃園大圳、開始日月潭水力發電工程…要數就肯定多到數唔曬。呢個時期嘅主張由冇方針嘅殖民統治，轉變成同化政策，例如公佈日台共學制度，鼓勵台灣人講日文，設立評議會等。
另外，1923 年個陣，裕仁皇太子訪台，睇完阿美族表演之後，總督府奉詔，廢除「生蕃」稱呼，改以「高砂族」稱呼台灣原住民，亦多少印證住上山滿之進嘅「一視同仁」，不論喺日本人，台灣原住民定非原住民。
總體而言，呢段時間嘅台灣喺一種日本嘗試去實踐同展示帝國實力嘅經營階段，其中一個目標喺宣傳俾亞洲其他國家睇大日本帝國嘅管治實力。
順帶一提，前期乃木希典個陣，日本土本曾經因為自己嘅債務，同埋早期台灣人嘅抗爭運動，而考慮將台灣賣俾英國或者法國，但因為兒玉源太郎話：「台灣唔喺搞唔掂，搞唔掂嘅我地啲官，我去就搞得掂。」結果台灣就繼續由日本統治了，如果台灣變咗英國或者法國統治，今日個故事可能又會好唔同（例如法國應該會將成個台灣送俾中共，之後台灣一齊玩文化大革命）。
扯得太遠，所以結果都喺王育德就喺成長喺一個日本由「重商殖民主義」過渡到「資本殖民主義」嘅時期，亦都一如王育德所講（引用），如果唔喺日本人嚟到台灣呢個地方，去改革台灣嘅基礎建設同公共教育，台灣依然會喺一個落後又污糟嘅地方。
結果，個一輩嘅台灣人，有好多出國（？）讀書嘅目的地，都喺日本，不論喺王育德，抑或其他人，例如蔡培火、邱永漢、許世楷等人，亦因為咁，日本成為咗日後呢班台灣獨立運動人士嘅落腳地。
如是者，一直到日本開始打中國，總督府就由變返武官擔大旗，而日本因為資源問題，而需要台灣全力支援，意識到呢點嘅日本政府就需要令到台灣人忠誠於天皇 — 呢段時期就喺皇民化教育時期。
皇民化教育簡單嚟講就喺內化政策嘅極端，例如強迫台灣人講日文、著和服、放棄傳統信仰，去到後期設立台灣志願兵役、再之後喺台灣行徵兵制等。
一如王育德自己講，無可否認，日本所犯嘅戰爭罪責喺難辭其咎嘅事實，但日本對於台灣嘅發展同建設，亦都有著無可非疑嘅貢獻，不論喺創辦學校、興建鐵路、運河、推動經濟發展；亦都可以話，今日台灣同中國最大嘅分別之一，就喺台灣經歷咗日治時期。
然後，二戰之後，台灣由一個黑暗時期步入另一個更黑暗嘅黑暗時期。
二戰之後 — 國民黨獨裁時期
狗去豬來
前略…簡單嚟講就喺兩班獨裁者喺到互毆，輸咗嘅老蔣就同佢啲親朋好友一齊敗走台灣。扯遠少少幫自己推舊 Po，想知點解美國成日支援獨裁者，請參考我嘅舊文：
對於敗走到台灣嘅國民黨，由台灣流亡到香港、著有《香港》一書嘅邱永漢就咁樣講：
戰後接收台灣的國民黨軍隊是罕見的低水準部隊…
水準低呢樣嘢諗返都好合理（我唔喺話水準低呢件事合理），一嚟國民黨本身貪污到仆街、二嚟有能力嘅部隊一定一早死曬，留得低嘅一定都喺奶老蔣上位個啲人，可以想像得到佢地嘅質素有幾參差。貪污開就會 Keep 住貪污，我地唔洗討論冇咗美國金援之後，國民黨搵邊個俾錢佢貪啦，呢啲眾所鳩知。
講返國民黨班撚樣上到台灣做咗乜鳩先，一開波已經不停打壓台灣人，當然你唔會期待一班貪開污嘅人去到新地方就唔貪污啦，之但喺，點解台灣人會接受呢樣嘢呢？照王育德所言，當時嘅台灣人覺得自己不單止冇幫手打日本人，仲要幫手打中國人，所以對住班中國人多少有啲自卑，但個最大問題其實喺，當時嘅台灣人既唔喺中國人，亦都唔喺日本人，而咁樣嘅佢地冇任何能力去決定自己嘅國家嘅前途，就默默咁由一個殖民者掉到落另一個殖民者手中。
雖然當時已經有唔少台灣嘅知識份子將目光放咗喺台灣獨立上面，但喺一來喺日治時期台灣唔存在任何方法去傳播台灣民族呢個想像，二嚟台灣呢個地方本身喺一個移民之地，原住民只喺一班少數，呢啲移民並冇台灣人呢個民族共同體嘅信念。
由台灣人同韓國人點睇日本呢點已經可以多少印證到，日治時期嘅台灣比起韓國受到更大壓迫，例如日治朝鮮有所有議員都喺朝鮮人嘅中樞院向朝鮮總督府提案，相對地，台灣嘅評議會就只有部份人喺台灣人；另一方面，朝鮮一開始就已經採用大量當地人作高級文官，而台灣就要去到同化政策開始先至慢慢有台灣嘅高等文官；仲有新聞方面，台灣只有《台灣民報》一份台灣話報紙，而朝鮮就有中央同地方嘅幾份朝鮮文報紙。
即使喺咁，似乎台灣人比起韓國人更加接受日本呢個統治者，原因無他，就喺台灣人一直都喺被殖民者，只不過個腦細由大清帝國換咗做大日本帝國，而韓國就雖然 Under 大清，但身份並唔喺被殖民者，而韓國人亦都有著韓國人呢個身份，自然會更加覺得日本喺一個侵略者。
講返國民黨，一直去到蔣光頭輸到甩褲走佬去台灣之後，呢個打壓更加變本加厲，一直壓到 1991 年，其實都仲未完，雖然 1995 年個陣李登輝以國家元首身份代表政府向被害者道歉（之後馬英九再一次向受害者道歉），但今日為止國民黨都仲未真真正正向「二二八事件」嘅受害者及其家屬道歉。
當然啦，除非我喺一個台灣人，又或者一個研究嘅台灣史嘅專家，如果唔喺我唔太應該拎出嚟吹太多，但如果你睇多啲台灣嘅討論，就會見到國民黨嘅死忠打手最鐘意拎出嚟講嘅一句喺「外省人死得仲多啦」，但國民黨就喺一邊吹呢陣風，一邊唔會調查事件嘅真相，所以保持歷史真確雖然好重要，但將真嘅歷史傳開同樣重要，但又但其實呢個世界好多人都唔會在意咩喺真咩喺假，更加在意嘅喺個啲描述符唔符合自己腦入面嘅「事實」。
即使喺咁，記錄真正嘅歷史，去到他朝有一日重光，等後世知道真相，依然喺一件好重要嘅事。
二二八事件
二二八事件（1947 年 2 月）喺國民黨政府正式遷台（1949 年 8 月）之前發生，直接證明咗台灣人應該要獨立於中國人，成立自己嘅政府，而唔喺任由呢班外地而嚟嘅殖民者吸乾台灣人嘅血。
上面都講咗國民黨嘅人一去到台灣，第一時間做嘅嘢緊喺貪污，例如將應該發俾市民嘅物資拎去黑市到賣呢啲基本嘢一定做齊。如是者，本來戰後經濟已經差，台灣作為半個戰敗國就一定更加差，加上國民黨班人唔知喺無能定貪污太過有能，令到台灣經濟雪上加霜再加霜，大規模失業加埋呢班唐山嚟嘅流氓歧視打壓，成個台灣嘅情況就喺差到仆街。
如是者，去到 1947 年 2 月 27 日，負責捉私煙私酒嘅專賣局查緝員一槍打死咗一個寡婦林江邁，引爆咗台灣人嘅憤怒，班查緝員走佬個陣仲亂槍掃射打傷咗陳文溪，當晚憲兵隊唔肯交人，仲舉槍指向群眾。第二日二二八，台灣人宣佈罷市、罷工，之後有人衝入專賣局臺北分局當場打死兩個人、打傷四個人；去到下就，群眾遊行向行政長官公署，行到中山路路口，未到行政院廣場之前，就已經俾衛兵開槍掃射。局勢惡化，亦激發更多台灣人反抗，整個台北陷入混亂。去到下就 3 點，警備總司令部宣佈台北戒嚴，見到台灣人就射殺，大量市民被殺害。
去到 3 月，示威擴散全國，其中以高雄同嘉義情況最為激烈，高雄甚至演變成武裝抗爭，將虎尾機場部隊打到去林內鄉。如是者，時任台灣省行政長官陳儀就採取兩面手法，3 月 6 日個陣廣播話準備改革台灣省、縣嘅行政機關，另一面又 Call 馬叫人嚟救命，仲有搵黑社會同內鬼學生去打外省人（叫忠義服務隊。咦，點解同香港某個都喺叫忠義咩咩嘅咁似），一直拖到 3 月 8 日嘅假談判終於被由基隆同高雄登陸嘅軍隊打破。
未埋岸，班中國軍隊就開始掃射，上到岸就捉人入麻包袋或者用鐵絲網綑起扔落海，殺嘅人多到數唔曬，其中最出名嘅一宗就喺「圓山事件」，3 月 8 日，由基隆上岸嘅憲兵團隨街射殺中學生，仲有啲喺啱啱（被）解散嘅忠義服務隊成員，近百學生被憲兵林頂立嘅「特別行動隊」喺圓山倉庫前廣場，用機槍同坦克擊斃。
鎮壓完成之後，清鄉行動展開，一直去到 4 月，國民黨要求各地篤灰，鼓勵檢舉密報，否則就連坐，簡單嚟講就喺唔篤灰嘅就鳩殺咗先。去到最後，國為國民黨俾美國爸爸屌佢 on9，例如駐華大使司徒雷登寫咗份備忘錄要求彈劾陳儀，終於驚死，但又只喺將陳儀調返去南京，然後沒有然後。
二二八事年標誌住台灣正式進入國民黨嘅白色恐怖時期，一直去到 1980 年代，台灣嘅下一波民主化運動時期，先慢慢開始平反，其中一位重要推手就喺大家都可能認識、自焚明志嘅時事評論員鄭南榕。去到 1989 年，各會各派，包括和平日促進會、台灣人權促進會、民進黨，終於迫到文獻研究委員會紀錄二二八事件嘅口述歷史，官方同民間嘅研究小組亦都慢慢成立。
二二八之後
二二八事件之後，一方面台灣島內嘅壓制愈來愈強，另一方面部分台灣人嘅反抗同獨立意識日益加強。當然，蔣光頭唔會俾呢啲事發生啦（仆街啱啱先輸撚咗成個中國俾共產黨，連台灣都冇埋咁我食草呀），台灣正式進入足足維持咗 42 年（1949 — 1991）嘅戒嚴令，著住「反共」去拉鳩晒所有反對國民黨嘅人。
所以我一直都覺得去到今日會撐國民黨嘅窮人（有錢人就因為有著數唔計）一定喺有斯德哥爾摩症候群。
如是者，例如主張台灣獨立、成立台灣共和國嘅廖文毅、阿哥喺二二八被殺死、成立台灣青年社嘅王育德等人就被迫走難去其他國家，首選喺：
日本。
不過香港其實都幾緊要，作為一個跳板。例如廖文毅同台灣共產黨成員謝雪紅就喺香港成立再解放聯盟，之後廖文毅先去到日本成立「台灣民主獨立黨」同「台灣共和國臨時政府」；邱永漢亦都喺先到香港，到去日本。不過大部份台灣獨立嘅組織都喺日本成立，除咗上述，仲有史明創立嘅獨立台灣會等。
老老實實，冷戰時期嘅香港，雖然唔喺正面衝突嘅主戰場，但因為地緣嘅關係，有好多情報工作喺度發生。當然啦，班廢老獅子山精神病就緊喺繼續做佢地份牛工。
再扯遠啲咁啱見到：
老老豆豆，其實香港人憑咩反對台灣人獨立，你殖民政府？不過總算見到香港人開始走出大中華情花毒，希望有朝一日，香港同台灣都可以以香港同台灣呢個身份去建立邦交。
書就講到呢到為止，可惜嘅喺王育德先生於 1985 年去世，無緣親眼見證到之後嘅台灣。關於 80 年代台灣民主化運動嘅文，就留待我睇一本講呢段時期嘅台灣史書再講。
寫於最後
流亡於日本嘅王育德，終於喺 2018 年個陣，喺佢嘅故鄉到得到一座紀念館，呢個紀念館嘅成立多多少少都印證住台灣真喺一步步走出緊國民黨嘅獨裁統治。
順帶一提，呢個提案一直都存在喺台南文學界同台語研究界，但一直去到 2016 年蔡英文上台，先得以成立；而紀念館嘅其中一個重要推手就喺現任副總統，時任台南市長賴清德。
其實家父的生活態度非常的簡單，堅持「臺灣是臺灣人的。想要締造一個臺灣人可以幸福過日子的國家」這樣的一個信念而已。因爲家父切身瞭解「有自己的國家，說自己的母語，榮耀自豪地活著」對一個人來説是何等地重要。
利申未去過，打算過咗武漢肺炎之後去。