2021年度之歌 — 每次我聽《跌嘢唔好搵 Rock Version》，我就自自然然可以企返直個人
2021年，香港最紅嘅歌係MC $oHo & Kidney嘅《係咁先啦》，當大家身邊都有人離鄉別井，帶住唔同嘅理由同埋感受離開呢個地方嘅時候，《係咁先啦》會紅係一件必然嘅事嚟，但如果要我揀一首歌，去代表今年嘅話，我一定會揀《跌嘢唔好搵 Rock Version》。
《跌嘢唔好搵 Rock Version》入面，ToNick嘅MC SH嗰段Rap，真真正正對呢首歌畫龍點睛，呢段Rap，227個字，係講我地應該點樣面對2021年嘅香港，同埋對呢個地方仲可以有咩嘢期盼。
以下開始係我對呢段Rap嘅超譯，比起咩「明就明」，我個人更覺得呢個世界係只要你唔講，就永遠都無人會明。
「點解香港條街每日都咁鬼多人，搞到我日日都撠到跌親。」
即係話香港咁多人，每個人都有自己心入面嘅立場，有啲偏左、有啲偏右、有啲偏黃、有啲偏紅、有啲偏黑、有啲偏白、有啲偏藍、有啲偏綠；而咁多人逼埋喺條街度，自然就會有磨擦，會撠親。
「你話你唔小心我覺得你根本係特登，搞到我無晒尊嚴仲跌埋個自尊心。」
無人會喺害你嘅時候先同你講「我係壞人，今次我係嚟害你嘅」咁樣的（除咗老人台劇集），所以搞到你嘅人無論係特登定唔小心，佢都只會話自己係唔小心，但作為被害人，我地一早就已經無晒尊嚴同埋自尊心。
「跌嘅嘢太多已經數唔清楚，公義同良知仲有心中嗰團火。」
除咗尊嚴同自尊心之外，呢幾年我地跌嘅嘢真係已經太多，跌到我地自己都唔想去回想自己之前究竟擁有啲乜嘢，公義？良知？心中嗰團火？火？吹就熄啦！
「去到足球場但係唔記得帶波，不如諗清楚你究竟需要什麼。」
所以其實香港人究竟你想做乜？我地走落個球場度，究竟係想睇波？定係踢波？踢波係想強身健體，定係想揚名立萬？究竟你有無心同你嘅對手你死我活？定係和稀泥點樣都可以？
「個世界行左咁多年其實從來無變，疾病同戰爭嘅新聞已經唔再新鮮。」
係呀，其實個世界無變過，自有人類文明以嚟，世界就係咁樣運作，2021年嘅香港，同1911年嘅武漢、1941年嘅波蘭、1971年嘅越南，喺本質上嘅分別其實未必有你想像中咁大，我地並無自己想像得咁特別。
「每日番工放工掛住搵錢人都癲，原來我已經忘記幸福就係身邊。」
不如抖一抖，諗下自己仲擁有緊啲乜嘢，然後捉緊佢；有時未必要強求去改變，你將半杯油倒落半杯水度，然後瘋狂攪拌佢，佢會變得混濁不堪。唯一令佢地分番開嘅方法，就係等，當然，你都要相信是非黑白真係水同油嘅關係，佢先會分開，至少，至少我係咁樣相信住嘅。
「邊度跌低唔一定要企番起身，所以跌咗嘢都唔一定要搵。」
跌低咗已經係事實，但幾時先企返起身，就係我地自己可以決定嘅嘢，要喺風大雨大嘅當下企定苦撐，我會尊重你，或者稍等片刻，等到趨勢轉變先乘風破浪，我估一啲都唔難揀。
「做好自己好事就自然會發生，行自己條路啦香港人。」
所以我嘅建議其實都係老生常談，增值自己、儲錢、平常心、捉住自己嘅中指，即使唔可以將理念大聲叫出嚟，都要將佢放喺心中，信念唔係鬥樹立得多銅像，係鬥有幾多人真心相信個信念嘅。
以上成段都係我自己超譯，老實講，可能同原作者完全無關，但我自己就真係咁諗。你可以再聽一次呢首歌，希望呢首歌可以比到力量你，等你可以「天跌落嚟就當被冚」、「魚骨，唔好夾硬啃」。