2020 年初季結

年初寫到今年決定唔寫新年目標，但都為今年嘅自己訂立咗啲方向：了解自己、表達自己，了解多啲唔同嘅語言同文化，行事盡量順其自然、避免追求捷徑。雖然有啲計劃被武漢肺炎打亂咗，但大方向上都冇乜影響。

轉眼間過咗三個月、四分一個 2020 年，不如就做個季度檢討啦。小標題之間未必有關係。

Social Media 與文宣

喺 Social Media 使用習慣上，自從二月開始咗返份 part time (另一份因為武漢肺炎冇咗) 後，忙裡偷閒嘅時候逐漸慣咗開 Twitter 而唔係 Facebook。

而家嘅 Facebook 俾我嘅感覺，係除咗睇新聞同部分朋友嘅 FB-only posts 之外，就再冇其他用途。每日喺 newsfeed 見到嘅，來來去去都係同一群朋友同 pages 嘅 posts，以及啲殺死地精、美少女手機 game 嘅廣告，久而久之就失去好奇心打開個 app。同樣 frustrating 嘅，係平時收到 notifications 以為有人俾反應自己啲 posts、share 嘅嘢，結果撳入去全部都係新聞 live 通知，呢點俾我個感覺好差。

或者有人問，講到普通人似玩單機，Twitter 唔係仲嚴峻咩？Twitter 嘅優點係除咗政治 tweets 之外喺 newsfeed 仲可以睇到唔少人嘅日常生活同廢文，相比 Facebook 除咗政治同新聞外就得返啲地獄 memes 要繽紛好多。而當你回覆人哋啲唔期待有人覆嘅廢文嗰陣，人哋亦真係會回應你，呢種感覺同 Facebook 好唔同。

成日聽到人話 Twitter 係文宣武器、唔應該講咁多日常生活，批評咁做係圍爐、妨礙打國際戰綫、要吃喝玩樂就返去玩 FB、IG 咁。然而 Twitter 本身就係個 social media 嚟，並非為文宣而設。喺打文宣戰之前，大家要先將自己塑造成一個個真實存在嘅人而唔係網軍。唔好限制自己只能講抗爭嘢，放心去玩自己 account，唔好只喺有新聞、有議員出 tweet 嗰陣，先四張四格漫畫咁轟落去留言「China xxx」，咁樣只係逆向小粉紅所為。

我亦懷疑而家嘅 FB、IG，係咪真係容許正常人 (非港豬、非不問世事) 去放鬆分享日常生活。我自問好扭曲，既唔鍾意見到啲人大書特書自己點吃喝玩樂玩，但亦對啲人誓要用盡每寸 social media 空間貼文宣好反感。對前者反感，主要係因為佢哋曬嘅嘢通常都太奢侈、好似生活喺平行時空；對後者反感，則係因為自己已經對呢啲傳播唔開去、只能停留喺同溫層嘅「文宣」感到厭倦。你唔係 KOL，你喺 story 度貼嘅嘢，只有你啲朋友先睇到、會睇。至於啲如雨後春筍湧現，甚至互相競爭、抄 post 嘅專頁，佢哋嘅問題就更顯而易見。

所以我好唔希望連 Twitter 呢片仲有啲空間、去俾大家匿名分享現實生活嘅淨土，都被「文宣」(有引號) 踐踏埋。諷刺嘅係香港嘅 Twitter 圈喺三月頭發生咗件小風波，結果係一班「文宣」(有引號) 至上嘅人趕走、嚇走咗唔少本身喺 Twitter 畫緊文宣 (冇引號) 嘅用戶。

關於 Twitter bot

而大家都知小妹喺之前啲文章度，間唔中都會嚟個直入式廣告，鼓勵大家多啲做 Telegram 嘅 Twitter bot 所提供嘅每日任務。所謂每日任務，係指個 bot 嘅 admin 每日會精選啲同香港同中國嘅 tweets (可能係新聞，亦可能係學者、政治人物嘅評論)，然後放上個 bot 度俾大家集中地去 like、retweet 同 comment。

雖然個 bot 同相關 Telegram group 嘅成員偶有炒車，但一直以嚟我都覺得個 bot 幾好用。直到月頭單小風波爆發嘅時候，我先開始反思一個問題：到底由人哋幫你揀曬要推嘅 tweets 有冇害？

話說舊年十月我已經因為個相關 Telegram group 嘅人強烈反對加泰集會，而冇再理會裡面嘅討論。而隨住今個月自己見過幾次個 bot 推錯新聞，導致有啲未經證實、甚至其實係幫中國講好說話嘅新聞、評論被其他香港用戶大推特推後，小妹決定停低唔再參與呢個洗心洗 RT 嘅遊戲。

老老實實，因為反送中而加入 Twitter 嘅香港用戶，唔少人應該都已經玩咗呢個平台至少半年。用咗咁耐、做咗咁多個月「任務」、互相 follow 咗咁多人、follow 過 like 過咁多學者同政治人物，大家打開首頁時理應已經有唔少空間係俾啲咬中國嘅 tweets 佔據，因此冇咩必要再靠人去搵嘢嚟推。

因此我覺得大家係時候戒奶喇，而唔應該為任務 bot 出咗網頁版、令更多人可以貪方便唔睇內文就 retweet、慣咗喺新聞下低貼四格漫畫洗板而高興。作為曾經喺有份幫以上 bot 賣廣告、又冇諗過呢類 bot 點用先適宜嘅人，小妹有必要喺度寫低自己嘅反思。

武漢肺炎與德文

年初揀咗嘅幾隻目標語言而家都一路學緊。屈指一算，意大利文同印尼文都叫好悠閒咁學咗三四個月，詳細嘅感想足夠我寫另一篇文章。繼續溫習緊嘅有德文同日文。至於法文呢，足夠我 keep 住睇最新消息嚟笑我個本身喺 Sciences Po exchange 快活緊、而家被困巴黎 (亦唔想飛返嚟) 嘅朋友就夠了。

德文叫做喺之前讀完 B2 嘅課程，但由舊年年初 pick up 返德文開始，到而家讀咗成年，自己都仲係有嗰種唔記得咗好多嘢、未去返喺大學 minor 德文時咁流利、咁得心應手嘅感覺。我諗如果我而家去考 B2 嘅話，一定會唔合格啦。所以嚟緊一定要加倍用功搵返呢啲「失去嘅記憶」。

不過用功呢家嘢講還講，而家連去課室上堂都冇辦法，生活節奏唔固定嘅我又唔想買 italki 之類嘅 native tutor 服務練習，想加倍努力練 oral 都冇對象。其他方面就還好：聽同睇有大量關於武漢肺炎疫情嘅德文新聞做免費溫習材料，比起平日嘅地區新聞係比較容易入口。而練習寫嘢嘅機會就係喺 Twitter、IG 啲武漢肺炎新聞嘅留言欄，大把鬧交/教育對象任君選擇。

同啲開口埋口 just a flu、don’t create panic、masks are useless 嘅洋人對罵，雖然又攰又勞氣，但都不失為一個良好嘅練習鬧交機會。當然我希望佢哋可以堅持到底、有事唔好入院唔好用呼吸機啦，最好全部堅信 Homöopathie、堅持口罩冇用，繼續食洋蔥醫感冒，而唔好因為專家而家轉軚建議人遮住口鼻，就改口風指責亞洲人搶曬啲口罩。

然而呢一切因武漢肺炎而意外出現嘅學習機會，都未必抵消到疫情對我嘅最大影響：本來計劃咗六七月去德國上 Sprachkurs 嘅計劃焗住要取消。但見到佢哋而家有幾科學、幾平等咁去應對今次疫情，自己個心都有啲十五十六，唔肯定好冇疫情一「結束」就飛過去⋯⋯

其他語言同文化

跟住講下日文。二月尾三月頭先後收到舊年十二月考 N3 嘅成績同 cert，為自己意外地考得唔錯感到高興。確認自己會留喺香港後，上個星期我就報埋七月嘅 N2 考試了，希望今次可以準備得更好。事關上次考 N3，我係去到考前一晚，先發現自己大把雞精書嘅「文法」未見過，文法嗰 part 滿分實屬意料之外。但係聽解得大約 2/3 嘅命中率，雖然已經叫準過中國啲武漢肺炎測試盒，但都真係好唔理想，亟待改善。

意大利文同印尼文想另外寫篇文講，但都喺度講少少啦。可能因為學習動機強烈，同埋本身有少少法文做 Romance languages 嘅底，學意大利文對小妹嚟講好舒服。(但如果嗰「少少」係西班牙文嘅，應該好多嘢會撈亂曬。) 自問平時唔會亦唔鍾意話「邊隻語言特別好聽」，都真心覺得意大利文好好聽，連我自己睇住段 text 照讀都覺得好有韻律感 (讚下自己)。

唔知點解，自己喺睇得明一段意大利文 text 嘅時候會好開心，仲有種嗰段文字係未經翻譯咁同自己內心直接互動嘅特別感覺。呢種扣人心弦嘅情感，好似係我喺學其他嘢嘅時候都未曾體驗過嘅。但亦因為咁，之前睇住意大利嘅武漢肺炎疫情新聞時，個人都會好唔開心。

而學印尼文本來純粹係個小實驗嚟，不過學下學下就覺得幾好玩。由於我唔係幾滿意 Duolingo 嘅印尼文 course 將啲動詞根據 prefix 分類嚟教，所以就平平地直接買咗本 textbook 嚟睇。$100 內唔算認真學習啦，仲係屬於小實驗嚟。而家嘅程度大約係睇得明屋企附近間外傭服務中心，佢哋塊大 banner 嘅三分一內容到啦，唔知去到幾時先會聽得明星期日維園啲姐姐傾偈呢？而意大利同印尼，兩者都係語言環境特別嘅國家呢。

學習法與精神

呢點比較簡短，因為我唯一想做嘅就係「唔好做」。呢三個月堅持得幾好，唯一破例係之前睇咗朋友 share 嘅博恩唐鳳專訪。佢講述嘅以清明夢測試唔同解決問題嘅方法，以及「25 分專注、5 分鐘休息」嘅做事方式，因為聽落去好獨特，所以特此記低。自問心散學唔到呢啲方法、所以亦唔會去嘗試，因此我亦唔怕聽曬成個訪問。就當係一個又叻又努力嘅人分享自己嘅經驗、好似講故仔咁俾大家聽咁。

同用睡眠時間解決現實問題嘅清明夢相反，最近自己臨瞓著嘅時候，成日因為思考現實世界嘅問題而失眠。一瞓上床腦海裡面就有大量想法飆出，諗到個人瞓唔著，但第二朝瞓醒又只記得返啲零碎。以前試過放本簿喺床邊，瞓著前盡量諗到咩都寫低。但由於一坐起身啲想法就會消失曬，所以成效不大放棄咗。真係唔知點解決好。

另一樣困擾嘅係，最近小妹經常感到不安、覺得有啲嘢唔完美、自己錯過咗一啲嘢咁，但又講唔出係邊啲事情有問題。如是者喺日常生活上，個人成日感到有少少悶悶不樂同囉囉攣、會數住好多無謂嘅事、覺得自己有啲嘢唔記得、好緊張啲門窗閂好鎖好未、買餸有冇買漏嘢、隻手好似洗唔乾淨⋯⋯

我諗起中學有段時間，都係因為壓力太大而出現呢啲徵狀。當時我睇過一次醫生 (我估係 pschi 啩，唔記得喇)，本來諗住有藥食，但佢最後淨係叫我戴條橡筋喺手腕，然後個人一情緒不穩又攞條橡筋彈 9 自己⋯⋯由於嗰陣時係同屋企人一齊坐喺度同個醫生傾偈嘅，所以我都好肯定自己有好多嘢冇講出口 (但我又唔記得咗係冇講到啲咩)。而且嗰陣時啲徵狀係自己緩和返嘅，所以我到而家都係唔清楚自己發生過咩事嚟⋯⋯

嚟緊想寫咩？

目前有幾篇文喺個腦度浮嚟浮去，但一落筆就唔太寫到出嚟。例如上面講到嘅意大利文同印尼文啦、自己點睇啲有心人借題癹揮南韓嘅 N 號房事件啦、點解我咁憎人講「父權」同「女權」啦，仲有早幾日睇到個人而家都仲迷迷糊糊嘅《海貓悲鳴時》結局等。

最後當然係想寫多啲能夠擴闊香港人對香港粵語嘅想像 (唔係幻想) 空間嘅文章。成日見到好多人，口裡說要令粵語脫中脫支，同時又搏曬老命咁要為粵語爭「中原正統」，感覺好諷刺。呢種另類大中華膠心態好唔要得，我哋唔需要亦唔應該因為粵語係正朔先愛粵語。

我亦希望多啲人能夠明白，粵語係可以喺書寫嘅正式語域上使用，而唔係僅限於非正式文章嘅「書面語」附庸。儘管目前我哋未發展出分辨「正式」同「非正式」粵文嘅標準，好多嘢都要靠個人去摸索——我自己都只係參考其他語言，例如少用歎詞同啲冇意思嘅連接詞，以及選用較正式嘅詞𢑥——但我相信假以時日我哋一定能夠發展出一套約定俗成嘅標準，就好似「書面語」嘅形成過程咁。無論粵語同普通話是否因制度而對立，寫文時切換至「書面語」都係多餘嘅。

有人認為咁做等於摒棄過往用「書面語」寫作嘅香港文學經典同音樂作品，係放棄香港原有文化嘅表現。然而我認為粵文嘅立新並非為咗破舊、與以往嘅文化完全割裂，相反新舊兩者都係香港文化成長、獨立過程嘅見證。當然我期待世人喺將來會對提倡、奠基未來香港粵文文學嘅人，有比起過往所有文人更高嘅評價，就好似德國舊 1000 馬克上嘅格林兄弟同《德文字典》，以及南韓一萬圜上嘅世宗大王同諺文。

不過利申返先，我係個冇文化嘅人。

展望

嚟緊三個月應該都冇乜大問題。要認真思考、解決嘅都係其他生活上嘅問題，例如五月尾份 part time 返完後，原本六七月嘅歐遊大計冇咗，咁應該搵啲嘢做好定繼續賦閒在家抗炎好。而淨低要處理嘅，不外乎都係自己嘅情緒同精神狀況。

呢幾個月寫過嘅粵文同普通話嘢：

英文文章，舊年嘅一月一篇計劃依然持續唔到：