2019年香港人關鍵字 — （集體智慧）Wisdom of the crowd

香港人係呢半年經歷左好多野，而且，Most Likely，黎緊仲要經歷一段應該相當長嘅時間，上一次淪陷我地香港人用左三年零八個月終於等到春暖花開，今次我真係唔知仲要等幾耐。

呢半年黎，其實香港人仲未死晒嘅唯一理由，得一樣野，就係我將要講嘅呢個關鍵字「Wisdom of the crowd」（集體智慧），點解要講Wisdom of the crowd？因為真心話，用外語講，會真心好多丫嘛。

Wisdom of the crowd係一個統計學嘅概念，原自英國一個叫做Plymouth嘅地方，搞左一個農村嘉年華，當中有一個遊戲，就係佢嘉年華中間有一隻牛，要大家估下佢幾重，估得最近果個有奬品。

咁當然有人估好重，有人估好輕，但係呢，除左冷氣軍師之外，無人可以Exactly咁估中隻牛究竟有幾重，最多都係稍為近D咁。

然後一個叫Francis Galton嘅統計學家，拎晒D數據去做研究，佢就發現，原來估得最準果個，係所有數據嘅中位數，亦即係Median；隻牛1198磅，而眾人猜測嘅中位數呢，就係1207磅，誤差細過0.1%。

之後有好多統計學家拎好多唔同嘅估計數據去測試，發現呢0.1%嘅誤差，無論係咩實驗之下，結果都一樣，即係話，呢個係一個定理黎，只要有足夠嘅人去估一件事，個答案，就會無限咁接近眾多猜測嘅中位數。

咁0.1%係一個咩概念？假設一個課金Game每抽20次蛋要$500咁，你要抽到一隻0.1%SSR，平均就要抽1,000次先抽到，即係要課金$25,000先會入手。

而呢個價值$25,000嘅誤差，唔係由超級聰明人估出黎，而係由所有猜測嘅中位數得出黎。

所以，原來藏係眾人入面嘅智慧，係比任何超級聰明人都仲要厲害，仲要準確。

無啦啦講呢個統計概念係為咩呢？大家唔知一路聽呢個故仔有無一路發現，其實香港人過左呢半年，同大魔王一直交戰，無論力、智、體、敏、錢都唔夠大魔王高嘅情況下，之所以仲未死晒嘅原因，就係Wisdom of the crowd。

所謂「兄弟爬山，各自努力」，其實就係咁多人一齊估隻牛幾多磅，你唔好理我估幾多，我又唔好理你估幾多，最後呢？

搵個中位數出黎，就會中，而且誤差少過0.1%。

亦即係好多人成日掛係口邊嘅「無大台」，但係呢個方法有一個好大嘅問題，就係你「無大台」嘅時候，做出黎嘅野唔會超級創新、超級有型或者超級英雄。

因為果個，係中位數；所謂中位數，就係最高唔要，最低唔要，剩係要正正係中間果個數。

所以香港人，唔可以又要馬兒好、又要馬兒不吃草，即係你用緊Wisdom of the crowd，你就要接受做出黎嘅野唔會一步到位，唔會有D咩奇兵險著，因為果個係一個中位數。

有D人會信日程表，有D人會覺得日程表送頭，最後就係呢成堆人中間有一個中位數，而呢個中位數，就係價值$25,000、誤差細過0.1%嘅最佳答案。

希望2020年，香港人繼續死唔去，再等落去，即使冰河時期，最後都會春暖花開。