點解沙特係咁推遲Aramco上市？

路透引述多個消息人士指，沙特阿拉伯政府已經取消將國有油企上市嘅計劃；雖然沙特能源部長 Khalid Al Falih發表聲明，指報道並唔正確，強調沙特政府仍堅持會將Aramco上市，但就講左句「幾時上市由我地話事，等緊市況最合適嘅時候。」

市場嘅睇法係呢句話意味著，沙特會無限期推遲上市計劃。點解上市都搞到咁煩，搞左幾年都搞唔成，依家仲要無限期推遲延呢？

其實唔少原因我之前都寫過，整理返俾大家睇：

1）做唔到2萬億美元估值

係當日公佈上市大計時，沙特皇諸（當時只係副皇諸）指Aramco上市估值高達2萬億美元，單係5%上市都可以為主權基金（PIF）帶黎1000億美元嘅資金。

但市傳Aramco嘅顧問一直苦惱2萬億嘅市值好難成真，一個原因係早年油價過低，但更重要係Aramco一直係沙特皇室嘅私人提款機，直接支持國家不少支出。呢筆數目係披露處理已經好難交代。而就算沙特政皇室點樣拍心口保證，市場都難以相信Aramco未來嘅收入唔會再成國家「包底基金」，呢個風險因素令Aramco估值大打折扣。

2）油價回升

幾年前油價急跌，布蘭特期油一度跌穿30美元，近兩年係沙特積極推動嘅OPEC+減產協議支持下，油價已經回穩至60至70美元。

減產協議除左可以舒緩該國嘅財政壓力之外，亦可以支持Aramco嘅估值；例如要達到沙特一直聲稱的2萬億美元，油價就要至少維持70美元。

有趣嘅係現時油價回穩，政府收入又連隨回升，令反而令要Aramco上市嘅迫切性下降。要知道係Aramco估值回升嘅同時，亦有傳中資有意直接入股Aramco亦令融資渠道多左，上市亦未必係最好嘅選擇。

3）中資入股

中國直接向沙特洽購Aramco股份，可以幫後者解決一啲困難；例如中國直接入股，估值上嘅工夫可能會以隨意一點，因為中國唔只想投資係Aramco未來嘅盈利分成，亦係投資係同沙特嘅戰略關係，因此溢價不妨給多一點，相信呢點令沙特對上市融資更為卻步。

4）借錢好過

另外，最新消息係沙特主權基金（PIF）打算向多間國際銀行貸款120億美元。

原先Aramco上市嘅用途，就係為PIF籌集資金作投資之用，希望用呢筆錢分散沙特嘅投資收入，唔好再依靠石油相關收入。依家眼見其他融資方法都容易，亦令Aramco嘅吸引力下降。