點解民陣遊行集會完都一定要散水?

其實每次都俾人鬧，亦都聽慣咗架啦，點解要散水就係因為不反對通知書囉。不反對通知書其實就係遊行策劃人同警方相討的細節，傾掂後警方發出的，有好多細節位申請人要負責，否則算違反公安條例。

點解一定要維園到政總？

其實唔一定維園的，好睇雙方估計的遊行人數。例如6.9遊行本來預計30萬或更少，咁咪諗住東角道出發都ok囉；如果大家評估再少尐，甚至會遮打花園或者盧押道出發，相反如果預計人多，就一定叫你去維園草地，球場就無批好多年啦。終點就無乜所謂，公民廣場同立法會門外都有，警方的要求係唔好塞人，一定要有出路，所以大家行完一定指你去龍和道走；去中聯辦就一定水街出。

點解要有糾察？

如果估唔到遊行人數呢？例如聽日我搞個「支持劉德華做特首大遊行」，大家都估唔到有幾多人出黎，咁警察就會問你有幾多糾察先；而家已經有條公式，就係每500人的遊行警方會要求1名糾察，所以100萬人的遊行警方係要求緊2000名糾察。（坦白講邊有咁多義工，所以申請遊行通常會寫細好多，6.9可能只係寫緊5萬人左右，實數我唔知)糾察無實權架，糾察只係某個位置遊行申請者的代理人，同警方傾遊行情況。即係叫警方開路，開多一條綫之類。不過對面個警察通常連一條柴都無，等佢搞成十幾分鐘問晒上頭然後話NO，咁大家咪燥囉。

另外警方好鐘意自己搞唔掂的野就叫民陣出黎講野，叫人繼續行唔好衝之類，可唔可以唔講呢？一定可以，唔怕拉就得啦。咁所以大家聽完就算，我的角度係就算要拉，都唔係呢個位俾差佬拉。

可唔可以唔籌款？

呢個問題大家其實問錯人，問民陣係無乜意思，因為民陣只係管到自己的錢箱，其他的街站其實各個不同團體自行向食環申請的娛樂牌同小販牌，無牌搞籌款有機會會拉（所以我一直唔明點解處理唔到大媽歌舞團，實無牌啦）。係大型遊行好似七一咁，民陣的職員會協調街站位置（個個都鐘意希慎，但位就得一個）。所以下次我建議大家直接問尐叫：入錢入錢入錢的團體可唔可以唔籌錢？

點解一定要散水？

遊行集會申請通常到2359，好少批過夜，係不反對通知書寫明的。申請人都常會講遊行集會完結，等於踢完場波吹長雞，跟住發生的事同場波無關，打晒交都唔會有紅黃牌。召集人變返普通人，唔再需要為你地的個人行為負責，否則以而家政治的打壓隨時係「策劃暴動」。

其實真係拉過

其實俾人拉都係唔係咩大不了，不過真係好煩，岑永根當年楂頭車被告無停車熄匙（夠痴綫未？），被警察收左部iPhone 4，最近過晒乜野上訴終審都無罪，終於收到返部iPhone 4（你而家俾返部iPhone 4我有叉用呀?擺明俾警察玩)。

民陣不代表我？！

到底民陣可唔可以做多尐或者激尐？唔係唔得，不過好難。民間人權陣線其實唔係一個團體，而係接近50個團體組成，當中有政黨有議辦有平權團體有工會，剩係缺少傘後組織（大家都唔鐘意加入），係搞遊行其間已經傾好底線。秘書處可以做的其實唔多。

關於6.12

雖然警察未搞到，不過民陣都有機會要負責，因為個場係民陣申請的，搞到咁大件事睇下政治打壓到邊個度。無論如何，政權強硬不低頭，我的建議係大家有遊行集會就參加，有佔領行動就支援。