香港粵文精粹：賭仔術語 (II)

「六嬸～三太公～大眾開檯啦臉似蓮蓉…」

再續。前言

最近，網上都流行講番天九、牌九。一時啲咩「鴛鴦六七四」、「么雙擒四」既術語滿天飛。但係偶爾立下其他人既留言，都知道好多人講就天下無敵，其實根本都係一知半解（例如以為天九可以出「雙天至尊」當通殺既例牌）。於是，成件事都好似依家好 hit 既 Big Data一樣：

Big data is like teenage sex: everybody talks about it, but no one really knows how to do it.

唔好話天九牌九啦，依家係香港，連打麻雀既人都愈黎愈少！我地或者今次就入屋少少，講下舊時姨媽姑姐攻下四方城會用到既麻雀術語，睇下你又識得幾多個？今次所引既例子，更加簡單～相信好多大家都已經識～

1. 落焊

『落焊』係出老千既一種手法。將麻雀加上記號，方便老千認牌。的而且確有一排係興用隱形墨水加上麻雀再用特製眼鏡去睇。所以賭神都唔係老作架。但隨住科技進步，依家有埋電腦自動洗牌機用Program出千。科技真係日新月異呀。所以如果你去人屋企三唔識七打牌卻用洗牌機，就要小心提防喇！

2. 棺材

『棺材』就係八筒。呢個係相當淺喇。應該係覺得個外型八點藍色砌成一個長方形似掛。但係其實無人會因為驟忌呢個名而亂咁飛Ｄ八筒出黎既。

3. 偷章

『偷章』係一種迷信既麻雀技巧。因為賭徒大多都唔信牌疊埋係一個i.i.d process，所以經常講運，講氣，唔講乜野機會率同埋隨機既。假設本來摸牌順序如下：

（四家）東，南，西，北，東，南，西，北 （摸牌）Ａ，Ｂ，Ｃ，Ｄ，Ｅ，Ｆ，Ｇ，Ｈ

但如果呢個時南家上牌，打出自家一隻，不摸牌，就會變成： （四家）東，南，西，北，東，南，西，北 （摸牌）Ａ，上，Ｂ，Ｃ，Ｄ，Ｅ，Ｆ，Ｇ

咁如果一切紀律不變的話南家就變相係下一回偷左上家既章數。當然，咁樣偷有無意思呢？純粹係覺得手風唔順想轉下架唶。其實你無辦法知道咁樣偷有無用，或者本來Ｂ就係你想要既牌呢？係呢個情況下，就叫『漏（章）』喇。

4. 花章

『花章』係一種唔太想俾塘邊鶴見到自己副牌做緊乜，又或者係一種懶係自視甚高既打牌方法。就係拎起手牌，完全唔分門別類，就咁照摸照打然後食糊。有人係會串到清一色都亂嘈嘈咁十四隻放出黎，砌一輪先顯示到自己食糊咁。

5. 洗牌疊

『洗牌疊』係舊時麻雀老千必學既一個重要過程：洗牌同埋疊牌。有意出術既人一定會照樣好似平常人一樣咁洗牌同疊牌，但其實已經將自己想要既牌好好記住同埋拎埋去自己果邊到疊。然後到佢莊家打骰，就必開1，5，9，13 等等。所以遇到係咁食大牌既人，又經常開自己果門牌，要小心。

6. 天仙局

『天仙局』亦係以前既麻雀陷阱。係舊時唔會有人on99打個電話都俾人話呃左幾百萬既時候，呃錢辛苦好多，又要搵多三個老千，又要一齊扮晒開心打牌，仲要一開始有一個人扮晒魚腩咁輸下錢，等被千既人上釣，到話增加注碼果陣先一次過劏到一頸血。依家仲邊有呢類新聞。

7. 衛生麻雀

『衛生麻雀』，乾淨，錢不過手，即係打麻雀賭緊『白頭片』，或者賭注極小。『衛生麻雀』完全會令到打麻雀失去意義。變成一種港女式既Afternoon tea，毫不刀光劍影。

8. 對碰對摸

『對碰對摸』同『偷章』有Ｄ關係，用番岩岩既配置： （四家）東，南，西，北，東，南，西，北 （摸牌）Ａ，Ｂ，Ｃ，Ｄ，Ｅ，Ｆ，Ｇ，Ｈ

如果東家打出，西家為東家對家，碰牌，打牌不摸牌，牌序變成： （四家）東，南，西，北，東，南，西，北 （摸牌）Ａ，罰，碰，Ｂ，Ｃ，Ｄ，Ｅ，Ｆ

南家被『罰章』，無法摸牌，Ｂ牌變成北家拎，有無留意： 北家原本摸Ｄ→變成Ｂ 東家原本摸Ｅ→變成Ｃ 南家原本摸Ｆ→變成Ｄ 西家原本摸Ｇ→變成Ｅ

再簡單講，就即係兩組對家之後摸既牌，會岩岩調換左。呢種做法，就係『對碰對摸』。信邪既就會覺得，咁樣做擾亂牌頭，隨時好大件事！

9. 矮仔上樓梯

『矮仔上樓梯』係老千技巧，摸牌果陣偷偷換牌，手型快，就無人能夠察覺。摸牌技術如果去到爐火純青，例如鬼馬雙星入面講，同時摸三隻打三隻都仲得。心諗：有無咁誇呀？！

10. 包衰詐旺

『包衰詐旺』係迷信既術語。即係被包牌既人，會唔好手氣，反而食左詐糊，可以沖番喜。信不信由你。但我唔相信會有人走去食詐糊試一試囉！

11. 美人照鏡

『美人照鏡』亦係另一個出千手段。就係係將牌疊向上既時候，手型略為一轉，已經將手上疊既牌一次過睇晒。依家反而變成，有啲人疊牌唔能夠一氣呵成，一拎起成疊牌反轉左，俾其他人睇黎，都充其量可以咁叫（不過又要洗過咁解）。

12. 三房一廳

『三房一廳』亦即係爛牌，三色雪糕。筒索萬乜都有，仲有Ｄ番子添。渣到呢Ｄ牌，唔知可以點算。唯有就沉著應戰喇。

13. 有大博大

有堆人平時經常見有咩風吹草動，即刻棄糊。但如果突然竟然博牌，可以顯示佢自己手牌都非比尋常，應該亦係想博食大牌。呢個就係所謂既『有大博大』，無大棄權也。

14. 打仔搵仔

『打仔搵仔』係識途老雀既蠱惑招數，又叫『回馬槍』，明明打過隻牌，若干回之後竟然番頭叫，甚至只叫絕章。但小心留意，日本牌有振聽，所以如果唔解除振聽，打仔搵仔係當詐糊論架！

15. 著埋同一條臭褲

『著埋同一條臭褲』係所三四家人都做埋同一色既清一色或者混一色。一門得三十六隻，四家每人得九隻，注定無肉食，但都死都唔打。咪齊齊著埋一條臭褲囉。

16. 寧叫卡窿，莫叫對碰

『寧叫卡窿，莫叫對碰』，因為大家認為後者容易對死，反而卡窿比較易食。都係少少迷信，無實驗結果作出任何支持。LOL

17. 西圈開糊，惡過老虎

『西圈開糊，惡過老虎』，同包衰詐旺一樣，我覺得都係用黎安慰人用。西圈先開糊，計我話，真係會相當辛苦。

18. 食頭糊，輸甩褲

『食頭糊，輸甩褲』，都係用黎 Fake人多。點解唔俾人食糊呢。如果無人食頭糊，鋪鋪都流局，牌幾時先打完呢？？舊時既俗語，真係幾令人難以理解！

19. 移燈換凳洗手食煙熨櫃桶

『移燈換凳洗手食煙熨櫃桶』，出自打雀英雄傳。又係迷信既人為左打牌期間轉運而走去做既無聊野。

20. 打穿戶篤

『打穿戶篤』係有人食糊，你唔甘心做下一兩家摸埋下一隻原本要摸既牌，點知發現會自摸，呢種就叫『俾人打穿戶篤』。通常都會覺得自己行緊衰運，之後打牌都唔方會好手氣。至於你問我戶篤係咪咁寫，我都唔太Sure。

其實講多無謂，睇完篇文，即刻約下班三五知己一齊打番十六圈仲開心啦！

（待續？）