香港人都有病 — 和平妄想症

試想像一個情境，八國聯軍而家圍攻緊中聯辦，外面堆晒沙包，特種部隊行黎行去，中聯辦入面嘅人堅守不出，但估計入面糧食最多只可以捱三日。

然後，同一時間，你係觀塘Office落樓下茶餐廳食晏，見到一個後生仔戴晒頭盔，著晒迷彩衫，手上面拎住一把唔知真定假嘅AK47。

「嘩？好地地，使唔使好似打緊仗咁呀？」

如果你咁諗，你好有可能同大多數香港人一樣，患上左「和平忘想症」。

所謂「和平妄想症」就係無論情況變成點，有幾壞，有幾大鑊，但病人都係會覺得「好地地，做乜要咁」。

換言之，就算已經比人打到趴係地下，踩住個頭，「和平妄想症」嘅病人仍然會妄想呢個世界好和平，所有野都「好地地」，你地「做乜要咁」。

我舉以下幾個例子，你就會明白呢個病係香港有幾嚴重。

例子一：上水

我諗所有住北區嘅人都知道，上水已經淪陷左。

整個區域，所有店鋪都唔係為香港人服務嘅，一條新康街入面嘅藥房可能多過北角區入面藥房嘅總和。

而且，你係上水見到嘅人，可能有超過90%唔係香港人，一出火車站就會見到一個人海，人海散發住一陣由汗臭、廉價香水同普通話混合出黎嘅味道。

佢地可能係黎買野，可能黎食飯，但總之，佢地唔係呢度嘅人。

如果你問一個上水人，佢地會同你講「係咁嫁啦，有咩辦法？」，即使未能揭桿起義，至少都係無奈，都有一份敗而不餒嘅氣勢。

但你如果你問一個「和平妄想症」嘅病人（通常呢D人覺得上水一地係牛），佢會覺得，「好地地，唔想見到大陸人咪唔好住咁近琛圳囉！」

例子二：立法會

原本立法會都已經比功能組別呢個制度搞到根本就係舉手機器，所有議案所謂辯論、所謂修訂都只係做一場戲。

但係到左呢幾年，只要你立場唔同，連做場戲都唔比你做，有人出黎反DQ，有人司法覆核，但都無用，DQ呢件事根本係剝奪人民權力，對所有人民全面宣戰，

如果你問一個稍為有關心政治嘅人，佢地會同你講「無嫁啦，諗計移民啦！」，即使消極，但至少都係諗緊係呢個咁壞嘅環境入面，自己有咩出路。

但如果你問一個「和平妄想症」嘅病人，佢會覺得，「好地地，如果你唔支持港獨咪無人DQ你囉！」

睇完兩個例子，我相信大家都明白究竟呢個病有幾咁普遍。

但睇到呢度，可能你又會諗：「明明大家都好地地，做乜係都要話人有病？」

如果一個症狀，無色、無味、無害，咁自然係「好地地」，但明顯地，「和平妄想症」唔係一個咁嘅病。

「和平妄想症」嘅流行會令到好多原本有得救嘅情況，最後變到無得救，Pass the point of no return 。

你諗返，如果大家都敏感D，對自己權力被剝削時早D有行動，情況就未必會咁差。

即係當上水開始出現「水貨客」（屌你！走私避稅就走私避稅啦，水乜撚野貨）時，有人出黎反對，如果大家都唔覺得「好地地」，議員就要做野； 如果議員唔做野，佢下次會選唔到，會唔見幾萬人工，佢自然好肉緊。

咁情況一定無咁衰。

又或者當陳浩天比人DQ時，大家唔好因為佢提倡港獨而覺得佢抵死，而全力發動所有機器反對，咁政府亦無法張牙舞爪得咁輕鬆自在。

但現實呢？

「好地地，你唔好XXX咪唔會比人YYY囉！」呢種病，幾乎90%香港人都有，咁剩返嘅香港人，叫咩？

叫少數，叫偏激份子。

不過講返轉頭，其實革命抗爭呢D野從來都係少數人嘅事，我肯定全世界都有「和平妄想症」嘅患者，「好地地繼續效忠路易十六」VS「網球場宣言」，我知道一定係「好地地」多人D，「好地地繼續留辮做大清子民」VS「共和革命獨立新中國」亦一定係「好地地」多人D。

所以肯去改變嘅人，從來都係少數，係囉，咁我為乜要係度講埋咁多廢話呢？

「好地地，你唔好咁多野講，咪好似無事發生咁囉！」

又，黃子華講過，用得「好地地」呢三個字，就證明件事本身已經唔係「好地地」。