香港人講歧視、講環保，就好似D人飢荒時講牛扒幾多成熟先好味一樣

琴日睇完一套叫做《綠簿旅友》嘅戲，非常咁值得入場，非常咁好睇。（當然佢個譯名就真係不知所謂，玩食字，玩到唔知講乜之餘，仲要唔啱音，食嘅字亦同劇情完全無關，呢幾年真係每次買飛對住D戲名我都直接講英文算。）

但對於佢入面講嘅議題，對於今時今日嘅香港人黎講，真係非常之咁離地。

當然，佢係拍比美國人睇嘅，你香港人只係順便有得睇啫，所以對香港人黎講離地，對美國人黎講，應該係相當有討論價值嘅。

套戲探討緊兩個人嘅轉變，同埋當時社會歧視黑人嘅風氣，講得非常到肉，非常好睇。

用返標題講嘅比喻，呢個話題，就等於有兩個人係度討論緊牛扒手究竟幾多成熟先為知好食咁，如果你係好食好住，三餐無優嘅人，呢個話題其實幾值得討論；但如果你係一個飢民，每日都為三餐頻頻撲撲，呢個話題無論你討論得幾深入，幾咁有營養都好，都係憨鳩嘅。

我認真，如果你連今晚有無飯食都唔知，可能就快要食樹皮充飢，咁牛扒幾多成熟先至好食完全係唔撚關你事嘅。

返返黎種族歧視，又或者環保呢D議題，如果我地香港人連自己嘅政府都無權選出黎，仲活係大航海時代式嘅殖民主義之下，我地係無資格談論呢D議題嘅。

真嫁，細個嘅時候讀過一科叫「中國文化」（暴露年齡系列），入面有一編範文係殷凱光先生寫嘅《人生的意義》，佢話人生先要滿足物理層，然後先至可以滿足文化層。

簡單黎講，就係話一個人有左三餐溫飽之後，就開始要思考道德問題，要去做一個「更好」嘅人。

我覺得即使係文化層，我地都應該可以將佢細分，最接近物理層嘅就係「選擇權」，人有權選擇自己嘅生活方式，有權選擇不要被勞役，有權選擇自己嘅工作，最重要嘅係，我地應該要有權選擇自己嘅政府。

未滿足到選擇權之前，咩平等、咩環境、咩都好，都係廢話。

我地連移民入黎嘅「新香港人」都無得揀呀！我地連尊唔尊重國家都無得揀呀！

你仲同我講咩普世價值，仲同我講咩奉公守法，仲同我講咩和平抗爭？

你無野下話？

係呀，我而家真係咁諗，香港人其實真係無資格問呢種「何不食肉靡」嘅問題。

我地有更急切、更接近物理層嘅問題需要解決，而且無辦法解決，有D人會同你講：「你有無D咩方法？」

老實講，我有好多方法，但問題係，時機呢？資源呢？同埋更重要嘅係，我將我嘅方法講比你聽如果無幫助解決問題，甚至會幫倒忙，我為咩要講比你聽呢？

而即使我無任何方法，都唔影響「我地而家講D咩環保，咩大愛，咩歧視議題其實係好荒謬」呢個事實的。

所以，未食飽之前，傾牛扒幾成熟先最好味呢D野，其實真係非常之咁扮野同虛偽。

唔係唔比你傾，係扮野同虛偽啫。

又，其實扮野同虛偽係無罪嘅。