非專業 fact check：意大利外相到底有冇嚴詞斥責中國 fake news？

話說小妹前晚喺某台灣傳媒度，見到意大利外相 Di Maio 嚴斥中國散播 fake news 嘅新聞。需知意大利呢個國家，一直以嚟喺大家嘅形象都並不強硬，自然有啲懷疑呢單新聞真唔真。去到尋日見到香港蘋果日報出同一單新聞、Twitter 都有人呼籲 share 呢單新聞嘅時候，我就更加懷疑嘞。意大利平日都唔似咁惡啦，何況係而家「共同抗疫」緊？

於是我嘗試搵返佢哋引用嘅 source 睇下係咩一回事。台灣傳媒同香港蘋果所引用嘅，都係網媒《Linkiesta》呢篇《I cinesi diffondono fake news sulla pelle degli italiani》(Chinese spread fake news on Italian skin)。

又到咗小妹嘅意大利文同翻譯溫習時間。不負責任先行利申：部分內容經過先 Google translate 英文，再參照返意大利文原文對照嘅。

北京外交部發言人喺 Twitter 度，話意大利人喺屋企露台唱中國國歌感謝中國。如果我哋係個認真嘅國家，咁就算喺而家嘅緊急情況下，我哋嘅外交部同 Di Maio 都應該令北京聽到我哋嘅回應。

華春瑩係中國外交部發言人兼新聞司司長，即係中國政治宣傳嘅領導。明顯地佢嘅工作包括散播 fake news，例如佢官方 Twitter 嘅嗰一條片。

華春瑩貼咗條意大利人喺星期六中午行出露台、向忙於處理呢場同樣來自中國嘅疫情嘅醫護人員鼓掌嘅片段，並解釋意大利人係喺窗邊歌唱「多謝中國」，同埋喺羅馬街上播中國國歌，以感謝中國對擊退病毒所施嘅援手。條片入面有意大利人嘅鼓掌聲，以及中國國歌作為背景音樂。佢副手趙立堅都貼咗一樣嘅內容。

我哋有其他緊急狀況、其他問題，而且可能會有人大聲多謝中國。但如果我哋係個認真嘅國家，咁我哋嘅外交部、同埋好不幸地帶領外交部嘅嗰位部長 (Di Maio)，就應該令北京聽到我哋嘅回應，要求佢哋停止再向意大利人散播 fake news。

內容就得以上咁多。即係話根據報道，「意大利外長斥責假新聞」呢件事係唔存在嘅，報章只係表達咗佢哋認為意大利作為有尊嚴嘅國家，外長應該行出嚟批評中國假新聞嘅立場。

而觀乎 Di Maio 嘅其他言論，亦似乎難以預期佢會咁樣嚴厲批評中國。例如蘋果日報喺同一篇新聞裏面，引用咗《頁報 (Il Foglio)》批評佢用字不當，包括形容意大利從中國購入嘅醫療物資係「來自中國嘅救援」，及宣稱中國向意大利寒冬送暖。

而偏保守嘅《意大利世紀報 (Secolo d’Italia)》刊出嘅國會議員 Maurizio Gasparri 呢篇評論，更加係批評「只有好似 Di Maio 咁不負責任嘅人，先會因為口罩供應而讚得落中國」。不過 search 完佢係貝盧斯科尼個黨嘅成員，又有種「佢咁大力咬都唔奇」嘅感覺。內容都咬得幾惡，但唔關事就費事譯了，有興趣可以自己 click 入去 Google translate。

Questo Paese contribuisce alla quasi totalità dell’inquinamento del pianeta, ma nessuna Greta e nessuna organizzazione internazionale intima alla Cina di rispettare regole che altri Paesi si sono imposti. 中國呢個國家，排放接近全球所有嘅污染物，但阿 Greta 同啲國際組織就冇諗過要求佢哋去尊重其他國家 set 俾自己嘅規矩。呢段感覺好連登仔。

反擊中國武漢肺炎 fake news 時，必須避免自己都成為埋中國傳出嘅 fake news 嘅一部分。之前已經有華人、亞洲人喺歐美遇襲嘅假新聞，而家就有全球人民感謝中國嘅假新聞。我哋要搵出事實，反駁假消息，但喺過程中我哋都切忌製造咗 fake news 出嚟。