《雨革裏，我戀上的多重人格女孩》（第十四集）
【Episode 14 : 奇幻少女的悲傷過去】
某年某月某日，北海道吉野家。
我望著前方的特盛鰻魚飯，雙眼發光。熱騰騰白米飯、再鋪上蕩氣迴腸，燒得剛好的鰻魚，這味菜簡直是人間極品！
我快手挾了大塊魚肉，混著白飯送入口中，軟綿口感加濃香醬汁，雙重刺激把我送進幸福天堂。
「靖瑤，妳都食啲呀，妳唔係最鍾意食鰻魚嘅咩？」
我笑嘻嘻的望著對面的紫裙女孩。
「係呀。不過我以後都食唔到啦……」
靖瑤笑容僵硬，頭顱突然180度扭動，關節發出詭異的咯咯聲，大量鮮血如黃河決堤般從頸部噴出！
「哇！唔好呀！」
恐怖畫面Fade Out，我從睡夢中驚醒，全身大汗淋漓。
「又發夢夢到靖瑤？唔係真㗎傻瓜。」
茉莉花香味從旁邊傳出，初晴柔情地輕撫我的臉頰，目光盡是憐惜。
「其實我冇事㗎啦。不過有時會夢到呢啲畫面，妳覺得佢會唔會仲怪緊我？」
這個問題九唔搭八，死人還會有甚麼情緖？
「唔會。只要係曾經真心相愛過嘅情侶，一定唔會怪對方嘅。」
初晴一本正經地安慰我，沒有埋怨我想起前度。
在這個女孩面前，我從來不需隱藏自己情緒，把自己包裝得完美無瑕。大概幸福就是這樣。
或許我們都在尋覓一個不只懂得欣賞自己，而是願意接納我們過去，撫平一切傷口的靈魂伴侶。
「爸爸同我提過你哋見面嘅事，從來無人夠膽當面鬧佢，不過佢話想同你講句對唔住，佢嗰日唔應該咁講嘢。」
初晴甜甜一笑，調皮地捏我鼻子。
「其實去美國醫病都好呀，反正呢件事都困擾咗妳咁耐。我會等妳，同埋……」
「我唔想去醫，我真係唔想。」初晴打斷我的發言。
「你瞓多陣啦，尋晚OT放咁夜，我煮好早餐叫醒你。」她轉移話題，神色有點淒楚。
我實在非常疲倦，不消片刻再度進入半昏迷狀態。朦朦朧朧間，我依稀聽到初晴的聲音。
「唔知我離開咗，你會唔會都發夢見到我？」「我唔想醫，因為我唔想忘記你。」
我醒過來的時候，初晴已經離開我屋企。飯桌上擺著一碗香噴噴的餐蛋麵，以及兩塊鬆脆多士。旁邊擺著女友的愛心Memo。
「美國機票訂咗啦，我10月20號走，唔知去幾耐㗎，呢段時間要好好珍惜我呀！😘」
嗯，還有三個月時間，要拼命去愛呀！我突然想起靖瑤最後的吩咐。
雖然知道初晴的病因對我來說已經無關重要，但我還是忍不住去聯絡一個人。
Kester，那個常常在尖沙咀演唱的地下樂隊歌手，和他通訊幾次後，我發現原來他是Kate 的前度男朋友。
(11:46) Sky，唔好意思。之前一直忙樂隊啲嘢，我都想見一見你。有啲關於Kate 嘅嘢，我想畀返你。我估你應該係佢男朋友？
咩姐，我英文名就係Sky，貪佢夠本土夠MK。小說家唔係事必改個文青風嘅名，呢啲只不過係你哋星斗市民一廂情願嘅諗法。
我約了Kester 在銅記花園餐廳見面。商討大事當然要吃雜扒餐，這是男人的浪漫。
Kester 這天佩戴隱形眼鏡，下巴圍著濃黑剛硬的鬍鬚，外形依舊俊朗，長得有點像蘭桂坊USB沈震軒。
我不花編幅形容場景和他的衣著了，畢竟他只是個揭露重要劇情的工具人。
「我知道你一定會覺得我傷害咗Kate，不過我希望你聽我解釋。當時，我同你面臨嘅困難其實係一樣。」
Kester 和我寒暄幾句後，立刻進入正題，我很欣賞他的坦率。
「我係US 讀High School 嗰時識Kate。我同佢拍咗兩年拖，因為一次意外令到我同佢被迫分開。」
Kester 沒有在對談加入發問環節，繼續解釋。
Kester 拿了一張即影即有相片出來，那是他和另一個男人的合照。那名男子面貌生得有點像Kester，他滿臉病容，身穿白袍，坐在輪椅上。
「呢個我細佬。八年前，我同佢加埋Kate 去咗間酒吧飲嘢，有幾個黑人過嚟搞事……」
Kester 搖搖頭，不想記起過往傷心事。
「Kate 突然發晒癲，幾下手勢打到班黑人重傷。我細佬驚搞出人命，過去阻止Kate，然後就比佢推咗落樓梯。」
Kester 雙眼通紅，神色難過。我看得出他是個重視家人的好男人。
「係阿烈做嘅？」我推斷。
「係。我只係見過呢個人格幾次，不過好深印象。我細佬因為嗰次意外盤骨嚴重撕裂，下半身癱瘓，呢世都行唔到。」
「我冇怪Kate，真係冇。一開始一齊，已經知佢有呢個病。我冇諗過會咁，屋企人迫我同佢分手，我冇得揀。」
Kester 低頭輕嘆。
如果換轉是芷瑜被傷害，我會作出怎樣的決定呢？我代入Kester 的心情，很替他難過。
「除咗阿烈，你有冇見過其他人格？」我急忙轉移話題。
「有。分手之前我見過Auntie Wendy 同小鈴，佢哋比較多出現。呃，仲有個女仔，佢叫Cherry，我只係見過佢一次。」
Kester 數數手指，陷入思考中。
「Cherry？邊個嚟？」我心頭一震，想起Chris 錢包裏的信紙。
Rule 1: 不能把真相告訴Cherry！這個規則從腦海瞬間閃過。
「Cherry 同Kate 好大分別。Cherry 係個好開朗，笑得好好睇嘅女仔。」
Kester 補充一句。
Cherry 就是宋初晴，她是昨天睡在我旁邊的女朋友！？越接近真相，我就越心寒。
「分手之後，我見過Kate 幾次。意外過咗四年到，我識到而家嘅女朋友。佢同我講有個女扮男裝嘅女仔成日係公司樓下等佢，個奇怪女仔就係Kate。」
「再過多排，我喺蘭桂坊再見到Kate。佢成個唔同晒，變到好姣，痴埋班鬼佬度跳辣身舞。我就知道佢又分裂出新嘅人格，個病越嚟越嚴重。」
分手打擊實在太大，所以Chris 和子遙便因此誕生。現在回想，我認為也挺合理。這一男一女都是極度渴求愛的人，只不過尋找伴侶的方式各有不同。
「Kate 從來冇同我講點解佢有依個病。不過呢啲資料應該會幫到手了解病情。」
Kester 從袋中拿出四張微微發黃，充滿皺痕的紙張。
「嗰日講分手，Kate 喊住喺度撕呢本日記，我執返少部分碎紙。我相信佢細個曾經被人綁架過。」
他把古舊信紙遞給我，紙上文字經過歲月洗禮，變得有點模糊不清。
內容如下：
七月一日. 星期二. 陰
我和媽媽被強行帶到一間灰色木屋。那個叔叔很可怕，他的笑聲很像小丑。
他說拿到錢就會放我們走。媽媽要我把事情記錄下來，將來有用。
七月四日. 星期五. 陰
今天我和媽媽嘗試逃走。屋外有隻很大很惡的狗，我們不敢冒險。
叔叔常常走過來親我的臉，我覺得很嘔心。媽媽阻止他，卻被他帶到另一間房間。媽媽事後哭得很厲害。
七月十日. 星期四. 雨
媽媽身上傷痕越來越多，我很擔心她。我們會死嗎？我很餓，每天只能喝一碗湯和吃兩塊麵包。
那個叔叔說不能讓我們吃得太飽，怕我們逃走。他又再捉媽媽入房，不斷重覆說操你媽。之後我抱著媽媽大哭。
爸爸一定會來救我們的。如果我沒有參加音樂比賽就好了。
七月十四日. 星期一. 雨
那個邪惡的叔叔笑得很討厭，他不停踢門，又打了我媽一頓，真是可惡。
我們不等了。媽媽偷了一把利刀，今晩我們就要離開木屋。
最後一篇日記佈滿黑色大交叉，年幼的Kate 當時應該陷入崩潰狀態。
我不知道她怎樣捱過那段恐佈日子，紙上標記的天氣或許同樣反映著她的心情？
我感到十分心酸，想起小鈴的畫、想起那間陰森的木屋、那個像野狼的瘋子、那個奄奄一息的婦人。
我彷彿聽到無助的Kate 躲在一角哭泣。為甚麼爸爸不來救我？媽媽會活過來嗎？我會死嗎？
Kester 打斷我的思考，將一張醫師卡片放在我面前。
「佢係Kate 之前睇開嘅心理醫師。我都見過佢一次。我唔擔保佢會同你透露啲咩，不過或者你會想見一見佢。」
Michelle Tam，這個女人曾經努力幫過Kate，她能解開我心中的所有疑團嗎？
（待續）
#下集聽日有
#請務必睇落去
下一集傳送門: