隨口廢噏2019預算案 香港人繼續科水！
2019年財政預算案出爐, 宣布前夕財政司司長大吹淡風， 話經濟放緩， 派糖要縮水， 大家唔好咁多期望。 上年嘅退稅上限係三萬蚊， 綜援生果金等出三糧， 係因為突如其來多咗好多盈餘， 財爺拗爆頭先諗到辦法洗曬佢，仲要度橋花式派4000蚊，但派完錢似乎市民都唔受落，搞到財爺要網上開live道歉。 今年盈餘回復正常，經常性派糖亦回到恆常金額，佢終於可以唔使煩點樣派錢， 鬆番一口氣。
今年其中一個焦點係醫療。近日醫院逼爆，激起唔少怨氣，政府最多就係錢，所以大幅增加醫療開支，希望醫護市民嘈少句。究竟增加開支係咪可以處理現時醫院逼爆的問題？首先係人手，政府希望增加醫護人員開支挽留人才，激勵士氣。但好多醫護話工作如同賣血，加錢只係增加賣血錢，好多人係因為生活模式等轉做私家。加人工固然可以令工作吸引多一啲，但最終香港仍然需要更多醫護人才，先可以處理隨著人口老化同人口增長帶來的龐大醫療需求。
第二係硬件。而家香港床位唔夠，長遠係要投資更多落硬件上。《十年醫院發展計劃》預計完成後2026年每1000人約有4.3張病床，但大灣區融合會唔會增加常住人口及非常住人口對香港的醫療需求，令到2026年啲醫院起好都重係供不應求呢？政府撥款擴大藥物名冊，同買先進醫療器材增加醫護人員生產力同治病質素係好事，但長遠規劃真係要重新計下人力資源同硬件條數先得。
預算案另一焦點係創科，涉及400幾億的開支（不過當中360係大學同研資會，所以扣番又唔係話特別多）。理論上，創科係成熟經濟體提供突破增長的契機，係應該投資嘅項目。實際上，香港嘅比較優勢係金融、貿易、物流、專業服務，創科都係深圳叻啲，香港可以做企業融資嘅角色。不過，因為中美貿易戰升溫，香港維持到一國兩制，有佢嘅信譽同良好制度，將會係科技轉移同幫助大灣區科技產業鏈走向國際嘅門戶，所以發展創科，做好大灣區的門面，似乎係香港被分配嘅責任。
人口老化、貧富懸殊都係香港嘅長遠挑戰，但今年社福開支並無顯著增加。原因可以係因為上一年，公共社福開支增加咗差唔多百分之30，所以今年著墨較少。未來咁多千億嘅基建錢要俾，啲基建質素差，自不然維修補養都好襟計。大灣區融合帶來經濟機遇，但人口遷移同時亦可能令香港負擔百上加斤。貿易戰及世界經濟前景不明，所以政府好唔願意長遠再增加更多社福開支。
陳茂波成日強調理財新哲學，但今年照舊派糖，照舊無新嘅長遠策略，理財新哲學從何而來呢？大灣區呢個字成份《預算案》講咗20次到，錢就要出喇（其實一路都出緊啦，2009/2010過高鐵已經係），但有咩實質著數呢？there could be some trickle-down, 某啲人某啲行業，但真係好好好著數嘅嘢，有都唔到正常人分喇。
