鍾意就係鍾意 流行曲係兒時集體回憶無人拎得走
呢排見 Cool Music 公佈 2010s 年代百大金曲…嘩，十年嗱！！！不勝唏噓。Cool Music 係多少人的少時回憶，好多詞人都係個度出嚟。
然後表態問題令藝人表又唔係，唔表又唔係，表又唔知表乜，以前啲CD要拎去掉……好慘，其實好慘。娛樂不能大行其道，大家政治掛帥，然後兒時偶像都要親手催毀。
上埋謝安琪，然後concert都無得你睇（我明明有得睇 eason，宿命），真係要唱返首《肥媽有話兒》（heavy metal 版正）
Local school 長大好多人都識唱當代流行曲，連容祖兒啲 side track 都識唱，就知呢個真係大眾回憶。
細個無乜錢，不是常常可睇演唱會，所以會好珍惜，亦只會揀自己最熟最鍾意嘅歌手去睇。
人大個，show 看得多，但看完一個演唱會，可以激動數天的感受，仍然好值得珍惜。應該話，更值得珍惜。
去睇一個演唱會，最開心係咩？
隻隻歌都識（除咗隻新歌），個intro 一起，就估到係邊首，就算改咗 arrangement 憑個底 beat 個幾下，medley 中間一轉beat都估到，sidetrack 又識，個種激動，真係容祖兒先俾到我。
Ivan Li 李聲揚 - 華麗后台 話「其實可以一個香港歌手聽足廿年，鍾意足二十年，係一種福氣。唔只係你堅持，仲要佢都配合。」我去嗰場《Pretty Crazy》，佢話有 fans 同佢講 9歲開始聽佢唱歌。exactly，就係咁。
我第一張買嘅唱片係容祖兒，第一個睇嘅演唱會係容祖兒。我重記得第一次去紅館，雖然坐山頂，有種睇完真係「死而無憾」（個陣真係飄起呢四隻字）嘅感覺。而家睇番當年佢嘅表現未必有而家咁好，但「第一次」嘅難忘係千金難買嘅。其實都係受人影響。隔離位同學教我唱容祖兒，然後我就花錢買下佢嘅第一隻碟。
（導致到而家我有一箱容祖兒 CD /DVDs 唔知點處理，散咗佢又唔係，但實體碟真係好晒位，香港寸金呎土，買CD買書唔緊要最大問題係個租好位，唔想交租for 擺嘢。而家越嚟越少人出碟，轉出digital了）
所謂飲容祖兒嘅奶水大就係咁意思。我知，鍾意容祖兒，會被人覺得MK、低B、俗氣等（佢出道早期又成日亂講嘢）。有好多人會揀啲歌手懶係有品味 e.g. HOCC、盧巧音，咁個啲我都聽，大路啲未楊千嬅。敝校上堂唔係set死一個課室，好多科用流動設計，所以會去人哋啲班房，之前坐過個位係有師姐擺楊千嬅張相神主牌咁起檯上，我仲話不如上柱香，激到阿師姐死。當然亦有好多崇洋同學，以英文為母語自居嘅鬼妹仔同學梗係聽英文歌啦，可能佢哋都好不屑廣東歌（阿擇 （Chaaak）可唔可以叫粵曲？）
但真係，o靚妹的需求是甚麼？就係重口味直出直入多元多角度情歌放題嘛！失戀單戀苦戀第三者無得戀x戀乜戀乜都齊。俾一個無談過戀愛的靚妹從歌曲中感受一下戀愛就好了（所以我細個好鍾意睇韓國愛情片，夠慘）。
去到中期，出現咗《一拍兩散》呢啲歌，先至無咁慘但重戀緊。俾喜歡戀愛同完全唔戀愛嘅少女，呢啲先係最好嘅。
慘得過連佢唱 《世上只有》同《明日恩典》（a may sing grace 改篇，真係……）我都會lun好耐loop好耐。2011年以前佢所有 side track 我都識唱同背到，重要知係邊隻碟第幾首 track，讀書時一班同學喺班房度唱《銀蛋伴小貓》（一首永遠唔會唱嘅 sidetrack，side track concert都無唱），所以呢啲真係忠粉來。
到後來，大個咗，需求不同了，鍾意謝安琪，聽下啲社會歌，又慢慢乜歌都聽，又因為全球化及科技進步，容易聽咗外國歌，閩南話都聽下，但回憶就係回憶。（不過一全球化及中國化香港歌手就頹晒輸晒比 K-pop）
以上現象有data support，越後生越鍾意聽 mainstream，老咗會 divert 出去，去到42歲到中年危機又會有少少 divert 番去 mainstream。
所以，未有所謂集體回憶，因為大家在同一個年紀時都鍾意聽 music chart top hits 嘛。就算啲同學點樣唔鍾意容祖兒，啲歌，一樣識唱。
我個陣都好批判 Twins，我一次 Twins 演唱會都無去過，但大個咗，求奇 play 隻 Twins 我就會識唱，所以為咗「青春」同埋「回憶」，可能Twins再開演唱會考慮下去睇。返唔到轉頭嘅嘢突然有機會俾你返轉頭喎，仆倒去呀。
我又諗番起，我睇林憶蓮啲演唱會錄像，有班中老年嬸嬸伯伯頭髮都白埋嘅歌迷好努力 為佢打氣，Sandy去多謝佢哋，話跟咗佢好多年，一直都咁支持。我終於明了。
原來對上一次睇佢已經係 Joey 1314（原來已咁耐）。中間我以為其實我已經無咁鍾意佢，尤其佢對上幾年減產無乜出到咩好歌，上咗神檯就過過哋氣，個陣原來出咗隻碟叫《Me, re-do》，我係完全唔知囉，個啲咩《樂觀》、《天然呆》、《飄紅》真係（原來有首五輪真弓作曲）……但，睇佢演唱會就 rediscover 番個激動。有邊個去到咁上下年紀，仍然極認真對待自己歌唱事業，仍然在最 fit 狀態，跳舞、唱歌都係頂級（當然會好後生就紅咗，另一個咁嘅人係謝霆鋒同埋GEM）。
當年佢第一次攞商台女歌手金獎時啲人好唔鍾意佢，佢只係出道4年，好多人唔認同，話咩「蜀中無大將」等等，又話英皇惡勢力等（咁無話唔係），當然佢公司幫佢好多( 同埋做好多衰嘢未定），但我諗佢以佢嘅專業同努力證明到，佢真係樂壇天后。
以前佢演唱會周不時爛聲，又話要打開聲針，但今次，我睇到後面啲場次，仍然好靚聲。一個歌手通常幾年先開一次大型演唱會，好似睇世界盃咁，睇完一次又要等幾年先有一個 production，每次都係倒數來，下一次又唔知有無上一次咁好，真係要好好珍惜。
佢嘅專業態度，去到紅咗重會學唱歌，去進修，努力 keep fit，作出種種犧牲，唔係好多hea 咗嘅藝人可以媲美（咁當然佢都未去到王菲關淑儀個age，咁唔知到時會否已hea）。
所以另一個我近年開始好鍾意嘅歌手係林憶蓮，無妥協過，無鬆懈過，與時並進，近年首首造出來嘅歌都係精品。最緊要係，去睇演唱會，有好多廣東歌，祖兒甚至成場都係CantoPop；去睇GEM，就發現，真係唔係必然。
之前成日話容祖兒打唔入台灣市場，大陸好啲，但同GEM同的士陳無得比，但成個演唱會都係廣東歌喎。另一方面佢又夠紅搵得夠多所以 production cost 可以高，R到 sponsor，唔容易。
Spotify data 亦話，每個人嘅金曲，多數青春期出現嘅，男仔 13–16歲，女仔11–14歲。所以我明點解呂珊譚詠麟大AL開 concert 都會有人去睇，個代的人永遠想回到嗰代。社會如是，樂壇亦如是。
所以未有許冠傑出來唱《半斤八兩》、《鐵塔凌雲》；50路車房佬勁播陳慧琳disco勁歌兩句鐘；以及手機仔收銀loop住關心妍劉浩龍嘅事。唔知00後知唔知係乜了。
香港已經返唔到轉頭，你點樣「再出發」，質變就係變咗，往事只能（聽歌）回味。
睇到呢度，我相信唔同人有唔同追隨偶像嘅經歷，你將上面個容祖兒換走變做第個就係唔同嘅故事喇。不過又真係識人細個唔聽歌唔睇戲唔好呢味嘢。
我鍾意容祖兒實在太無品味，佢做文匯之星亦好__，甚至上次遮住隻眼單嘢佢可能唔為意都未定，但兒時記憶嘅嘢無人可以拎得走。