銀行閑談 (170) — 虛銀 eDDA 戰更新 — 一年過去虛銀入錢係易咗定難咗呢？

喺上年 3 月初寫完虛銀 eDDA 戰情況，喺 3 月下旬市場就傳出消息，話 eDDA收費風波暫告一段落，各銀行就eDDA「轉錢」所徵收的費用，由以往「一刀切」改為「分層收費模式」，即係單次過得少、手續費就畀得少，銀行間費用結算亦由各有各收 (好聽啲叫 OTC 啦)，變成由 HKICL 中央結算，每月向各銀行發出賬單，大家就唔使再嘈，亦唔好拖數啦唔該。

所以喺上年 3 月開始，如果銀行唔甘願被對手欺壓，又因為無得再賴數 / 拖數，都紛紛斬纜，或者喺「分層收費」之下，大幅減低每次入錢嘅限額，寧願叫個客分 10 分入錢，用盡個低層收費，都唔畀個客一次過入一大嚿錢，財技啦吓。

咁一年過去，用虛銀服務嗰陣，入錢到底係易咗定難咗呢？一齊同大家更新一吓喇。

ZA 清單基本不變，係多咗兩間 VB 朋友，仲有上限下調晒咯

截至2022 年 2 月 24 號，ZA 總共支援 13 間銀行嘅 eDDA 服務，包括上年已支援嘅 12 間 (滙豐、渣打、中銀、恒生、招商、交通、中信、集友、南商、創興、星展、Mox)，新增嘅 VB 朋友 Livi，亦預告會喺 5 月 1 號多一位 VB 朋友天星。

暫時就未留意到 ZA 以外其他銀行預告可以從天星轉入資金，而天星呢刻係無 eDDA 服務的，唔知天星會唔會遲啲加入 eDDA 服務喇。

而喺限額方面，根據我自己嘅記錄，喺上年 2 月尾係除咗滙豐、中銀、恒生係上限 $10,000 之外，其餘上限都係 $1,000,000。

一年過去，得番 VB 朋友圈 Mox、Livi、天星、同埋招商、交通、創興合共 6 間銀行有 $1,000,000 額，星展、集友同恒生就有 $10,000 (不過將喺 5 月下調恒生至 $2,000)，其他銀行就劃一得 $2,000。

即係話如果大家要入 $10,000 的話，就要分 5 次做喇。

Mox 情況同 ZA 大致相似，母行渣打成唯一逃生門喇

一年過去，Mox 支援 eDDA 嘅銀行由 8 間變成 9 間，包括 ZA、渣打、中銀、中信、南商、東亞、星展，再加 VB 朋友 Livi。

呢度最值得留意，係 Mox 最少由上年 3 月開始，已經無再支援滙豐同恒生兩間大行，方便程度一定比 ZA 差少少喇。

喺存款上限方面，就只有 VB 朋友圈 ZA 同 Livi 再加母行渣打有「無上限」限額，其他就一律 $2,000，即係話要由傳統銀行放錢入 Mox，渣打就係唯一逃生門喇。

WeLab 劃一 $2,000，VB 朋友圈都無面畀

WeLab 支援 eDDA 嘅銀行維持喺 9 家，包括 Mox、ZA、滙豐、渣打、招商、交通、創興、星展、大眾，根據我嘅記錄，同上年比較少咗中銀，但係多咗星展。

WeLab 比較特別嘅係所有 eDDA 單次上限都係 $2,000，連 VB 朋友圈都無情講！

WeLab 喺官網仲好可愛地話「如果你想重覆轉賬，可以設定多條自動入錢規則以減輕不便」，即係佢都知道「不便」(哈！)，大家見諒吓啦。

做得銀公虛銀小組召集人，Livi 當然係用 eDDA 最方便嗰間啦！

Livi 喺過去一年支援 eDDA 嘅銀行列表並無變動，維持喺 14 間，包括 VB 朋友圈 Mox、ZA、4 大行滙豐、渣打、中銀、恒生、中資代表建行、招商、中信、集友、創興、仲有東亞、大新、星展。

呢個表都有啲意思，因為當 Livi 連大新都包嘅時候，但係就無前中銀集團成員嘅「南商」同埋中資代表「交通」，而呢兩間竟然 ZA 係有包的，幾特別架。

上限方面就係所有銀行一視同仁，單次上限同每日上限都係 $100,000。

我就覺得 $100,000 好夠用啦，事實上喺 e-banking 嘅環境下，好多銀行因為保安原因，每日網上轉賬上限都係 $100,000 或以下，我諗無咩需要用到 $1,000,000 額咁多掛…

畀個表大家，或者入錢有秘道？

喺各家 VB eDDA 覆蓋嘅銀行同限額都唔一致之下，有時就會駁吓腳先轉到錢喇。

例如想喺渣打轉 $200,000 落 ZA，除咗可以直接打開渣打 e-banking 推錢去 ZA 之外，亦可以選擇先喺 Mox 從渣打拉一次錢，再喺 ZA 從 Mox 拉一次錢，即係透過 Mox 嘅渣打無上限 eDDA 做一次駁腳，咁就完成喇。

咁樣做仲有一個好大嘅優勢，就係好多時各銀行嘅「推錢」上限都會比較低，而因為「拉錢」必需要同名戶口先做到，保守比較好，所以如果撇除 eDDA 成本問題，eDDA 嘅轉賬上限理論上會比較高，所以大家會喺上表會見到 $1,000,000 甚至「無上限」嘅轉賬額咯。

畀個表大家參考一吓，下次轉錢或者會有秘道都未定喎。

關於華田：
兒時夢想做i-banker，結果做了bank worker，還要是retail那種。過去在各大小銀行不同部門流徙，叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發，到現在還未安定下來。不懂財經、不懂經濟，只想談一下「銀行」這回事。

2021 年開始 Medium 只會發佈部份文章，想知最新銀行 insider insight，就要訂閱我 Patreon(patreon.com/watin) 喇！

2021 年 8 月 Medium 再次改制，讀者可以選擇將一半既 Medium 會費撥繳至你喜歡既作者。如果你想喺 Medium 上面支持我，可以去以下呢條 link (watin.medium.com/membership)登記做會員哦！