銀行閑談 (165) - 過去十年香港硬幣量係升定跌呢？每個香港人又平均收埋幾多個銀仔呢？
最近留意到台灣出咗硬幣 ATM，方便台灣民眾將銀仔存入銀行，而這邊廂既香港就因為疫情關係暫停收銀車服務，而大家無咩事都唔會攞啲銀仔入銀行，博畀人收手續費咩！唔知大家會唔會因為咁多咗啲銀仔喺身呢？
或者大家會話其實都無咩分別，因為唔好話銀仔，事實係連 ATM 都撳少咗好多，受波叔既推動，邊個無八達通 / Alipay / WeChat Pay 呢？而家連搭的士都用信用卡 / 八達通啦！
不過大家有無諗過以香港 as a whole 咁嚟睇，喺 FPS + e-Wallet + 消費券推動之下，香港過去十年銀仔既數目到底係多咗定少咗呢？邊個面值既銀仔喺過去十年增長咗 60% 咁多呢？香港人又平均收埋幾個多銀仔喺屋企呢？呢堆神沙加埋又值幾錢呢？你又係咪屬於多銀一族呢？
今日同大家一齊銀行閑閑談一吓喇！
GDP 多咗、嘢貴咗，錢就自然都多咗啦
如果以總體貨幣供應量嚟講 (先唔好理咩 M1、M2 先啦)，Econ 101 話畀我哋知 QV = PT，假如 Velocity 變動唔大，喺過去 10 年 GDP 同 物價都明顯上漲下，Money Supply 增加都係意料中事啦！
當然「貨幣供應」增加又唔等於「銀仔量」增加既，話唔定因為電子支付，加上物價上漲下一毫子根本粒糖都買唔到 (真係跌落地都未必會執)，大家根本都唔需要用到銀仔，銀仔量會跌都未定。
咁即係多咗定少咗呢？
多咗定少咗？HKMA 年報有答案
所以我搵咗 2010–2020 年總共 20 年 HKMA 既年報 (2021 年未出呀老友！)，每年喺「貨幣穩定」既章節都係詳細講到嗰年既紙幣同硬幣供應量。
原來過去 10 年所有面值銀仔既供應量近乎「從來無下跌過」，而就算香港人口由 2010 年既 702.4 萬上升到 2020 年既 748.2 萬，所有面值銀仔既人均數量都無跌過，即係話原來「銀仔增長速度」比「人口增長速度」仲要快，畀幾張圖大家睇吓。
銀仔 11 年上升 30%、人口上升 10%
睇番年報，原來過去 10 年升咗 30% 咁多，由 2010 年 52.2 億個上升至 2020 年 73.6 億個，升幅超過 30%。而就算 PayMe 同 FPS 喺 2017、2018 年相繼出台，銀仔量仍然升得快過人口架！
所以話就算而家大家都慣晒電子支付，對金管局嚟講銀仔仍然屬於「淨流出」，銀仔未有咁快絕種喇！
邊種銀仔係「罪魁禍首」呢？
咁喺過去 10 年邊種面值既銀仔增長量最多呢？我 plot 咗張 graph 同大家睇吓。
原來 5 蚊同 2 蚊係增長既原動力，過去 10 年增長咗超過 60%！而跌落地都唔會執既 １ 毫子雖然較為遜色，但喺過去 10 年都增長咗超過 20%，我都覺得好神奇，証明商戶仍然有找逐 1 毫子既需要，但係呢啲 1 毫子就極少進入番銀行體系，所以一路都係淨流出喇！
香港人平均收埋幾多個銀仔呢？呢堆神沙加埋又值幾錢呢？
要回答「香港人平均收埋幾多個銀仔」呢個問題，首先要為商用、遺失、民用假設一個比例，因為總有部份銀仔喺惠康百佳手上，又有啲會唔覺意丟咗、食咗、燒咗之類，唔會所有「流通銀仔」都喺市民手上既。
我既不負責任估計比例就係商用、遺失、民用各佔 40:20:40，係無科學根據，所以大家唔信的話，可以自行調節比例，以下總之我就用 40% 計算喇。
以 2020 年香港流通硬幣合共 69.00 億個計算，40% 即係27.6 億個，以香港 2020 年人口 748.2 萬計算，人均原來攞住接近 370 個銀仔，其中 1 毫子佔咗接近 100個咁多！
咁 100 個 1 毫子都係 10 蚊啫，咁呢堆神沙加埋有幾錢呢？答案係 $440！哇，都夠兩口子平平地食一餐個喎！
大家都不妨盤點吓嗰堆從來都唔攞出街既神沙，話唔定有餐 free lunch 都未定喇！
你又係咪多銀一族？
今篇同大家睇吓過去 10 年香港銀仔既供應量，總體增加咗 30%，其中 5 蚊同 2 蚊更增加咗 60%，同我哋一直以為電子支付會淘汰銀仔既觀念背道而馳喇。
喺人均銀仔儲存量方面，如果以 40% 民用計算，平均每個香港人攞住接近 370 個銀仔，其中有接近 100 個 1 毫子，成堆神沙平均價值 $440，即係 1 家 4 口隨時有過千蚊神沙！
大家係時候攞番出嚟，一齊促進吓香港經濟喇！
關於華田：
兒時夢想做i-banker，結果做了bank worker，還要是retail那種。過去在各大小銀行不同部門流徙，叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發，到現在還未安定下來。不懂財經、不懂經濟，只想談一下「銀行」這回事。2021 年開始 Medium 只會發佈部份文章，想知最新銀行 insider insight，就要訂閱我 Patreon(patreon.com/watin) 喇！2021 年 8 月 Medium 再次改制，讀者可以選擇將一半既 Medium 會費撥繳至你喜歡既作者。如果你想喺 Medium 上面支持我，可以去以下呢條 link (watin.medium.com/membership)登記做會員哦！華田銀行 FB: facebook.com/WatinResearch
華田銀行 IG: https://www.instagram.com/bank_of_watin/
華田銀行 HKET 專欄： https://wealth.hket.com/sraw116/華田銀行
